ବରଗଡ଼: ଜିଲ୍ଲାରେ ଲଘୁଚାପ ଜନିତ ଲଗାଣ ବର୍ଷା ଲାଗି ରହିଥିବା ବେଳେ ଅମ୍ବାଭୋନା ବ୍ଲକ ମହାନଦୀ କୂଳିଆ ଗାଁ ଚିଖିଲି, ଅନ୍ତରାଡି, ବେନିଆପାଲୀ, ଘୁଘୁରାପାଲୀ ଓ ବଡମାଲ ଗ୍ରାମରେ ବନ୍ୟାପାଣି ପଶିବା ଆଶଙ୍କା ଦେଖାଦେଇଛି । ବିଶେଷ କରି ବର୍ତ୍ତମାନର ସ୍ଥିତି ଅନୁସାରେ ଚିଖିଲି ଗ୍ରାମରେ ପ୍ରଥମେ ବନ୍ୟା ପାଣି ପଶିଛି ଏବଂ ଶହଶହ ଏକର ଧାନ ଫସଲ ବୁଡି ରହିଛି । ଓଡ଼ିଶା ଓ ଛତିଶଗଡ ଅଞ୍ଚଳରେ ପ୍ରବଳ ବର୍ଷା ଯୋଗୁଁ ମହାନଦୀର ଜଳସ୍ତର ବଢିବା ସଙ୍ଗେ ସଙ୍ଗେ ହୀରାକୁଦ ନଦୀବନ୍ଧର ପଛୁଆ ପାଣିରେ ଏହି ଗ୍ରାମ ଗୁଡିକ ସଂପୂର୍ଣ୍ଣ ପ୍ରଭାବିତ ହୋଇଛି ।
ଏବେ ମଧ୍ଯ ବନ୍ୟାପାଣି ବଢୁଥିବାରୁ ଗ୍ରାମବାସୀଙ୍କୁ ସୁରକ୍ଷିତ ସ୍ଥାନକୁ ଯିବା ପାଇଁ ପ୍ରଶାସନ ତରଫରୁ ବ୍ୟବସ୍ଥା କରାଯାଉଥିବାବେଳେ ଲୋକେ ଆଜି ରାତିର ପରିସ୍ଥିତି କ’ଣ ରହିବ ସେନେଇ ଭୟଭୀତ ରହିଛନ୍ତି । ତେବେ ପକ୍କା ଘରଥିବା ଚିକିଲି ଗ୍ରାମବାସୀ ନିଜ ଘର ସାମଗ୍ରୀ ଉପର ମହଲାକୁ ନେଇ ସୁରକ୍ଷିତ ରଖିବାରେ ବ୍ୟସ୍ତ ରହିଥିବାବେଳେ ମାଟିଘର ଥିବା ଲୋକେ ନିଜେ ସୁରକ୍ଷିତ ରହିବା ପାଇଁ ଗ୍ରାମ ଛାଡି ନିକଟସ୍ଥ ଗ୍ରାମକୁ ଚାଲିଯାଉଥିବା ଦୃଶ୍ୟ ଦେଖିବାକୁ ମିଳିଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
