ବରଗଡ: ପୋଲିସ ପଞ୍ଝାରେ ଏଟିଏମ(ATM) ଲୁଟେରା ଗ୍ୟାଙ୍ଗ । ରାଜ୍ୟର ବିଭିନ୍ନ ଜିଲ୍ଲାରେ ଏଟିଏମରୁ ଲୁଟ କରୁଥିବା ଏହି ଗ୍ୟାଙ୍ଗକୁ ଧରିବାରେ ସଫଳ ହୋଇଛି ବରଗଡ ପୋଲିସ । ବରଗଡ଼ ଏସପିଙ୍କ ନିର୍ଦ୍ଦେଶ କ୍ରମେ ଦୁଇଟି ଟିମ ଗଠନ କରାଯାଇ ଏହି ଲୁଟେରା ଗ୍ୟାଙ୍ଗର ୨ଜଣଙ୍କୁ କାବୁ କରିଛି ପୋଲିସ ।
ବରଗଡ ପୋଲିସ ପଞ୍ଝାରେ ଏଟିଏମ ଲୁଟେରା ଗ୍ୟାଙ୍ଗ, ମାଷ୍ଟର ମାଇଣ୍ଡ ଗିରଫ
ଏକ ବିଶ୍ୱସ୍ତ ସୂତ୍ରରୁ ଖବର ପାଇ ବରଗଡ଼ ସଦର ବ୍ଲକ ଅନ୍ତର୍ଗତ ଛତାପଥର ଛକ ନିକଟରେ ଏମାନଙ୍କୁ ପୋଲିସ କାବୁ କରିଥିଲା । ଏମାନଙ୍କ ଠାରୁ ୟୁପି ନମ୍ବର ଥିବା ଏକ କାର, ନଗଦ ଏକ ଲକ୍ଷ କୋଡ଼ିଏ ହଜାର ଟଙ୍କା ,3ଟି ମୋବାଇଲ ,ଗୋଟିଏ ଛୁରୀ ସହ ଏଟିଏମରୁ ଚୋରି କରିବାର ବିଭିନ୍ନ ସାମଗ୍ରୀ ପୋଲିସ ଦ୍ଵାରା ଜବତ କରାଯାଇଛି । ତେବେ ବରଗଡ଼ ଜିଲ୍ଲା ବରପାଲି ଥାନାରେ ଏମାନଙ୍କ ନାଁରେ ଏକ ମାମଲା ଥିବା ବେଳେ ଏହି ଲୁଟେରା ଗ୍ୟାଙ୍ଗର ମାଷ୍ଟର ମାଇଣ୍ଡ ଧରାପଡ଼ିଥିବା ସହ ଆହୁରି ଏହାର ଚେର କେତେ ଦୂର ଲମ୍ବିଛି ସେନେଇ ପୋଲିସ ପକ୍ଷରୁ ଅଧିକ ତଦନ୍ତ ଜାରି ରହିଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
