ବାଲେଶ୍ବର: ଜିଲ୍ଲା ସଦର ଥାନା ଖାନନଗର ଅଞ୍ଚଳରୁ ଗତ ଶନିବାର ଦିନ ପୋଲିସ ଏକ ମୁଣ୍ଡ ବିହୀନ ମୃତଦେହ ଉଦ୍ଧାର କରିଥିଲା । ଏହି ଘଟଣାର ତଦନ୍ତ ଚାଲିଥିବାବେଳେ, ଆଜି ଉକ୍ତ ଶରୀରର ମୁଣ୍ଡ ଭଦ୍ରକ ଭଣ୍ଡାରିପୋଖରୀ ଅଞ୍ଚଳରୁ ଜବତ ହୋଇଛି । ଏଥିରେ ଦୁଇ ଜଣଙ୍କୁ ଗିରଫ କରିଛି ପୋଲିସ । ସୂଚନା ଅନୁସାରେ, ନୟାଗଡ଼ ଜିଲ୍ଲାର ଯୁବକ ଶ୍ରୀଧର ଦଳବେହେରା, ଫକୀର ନାୟକ ଓ ତାଙ୍କ ପତ୍ନୀ ସୁମିତ୍ରା ନାୟକ ଗତ କିଛିମାସ ହେଲା ବାଲେଶ୍ବର ସଦର ଥାନା ଖାନନଗର ଅଞ୍ଚଳରେ ରହି ‘ବସୁଧା ଯୋଜନା' ପ୍ରକଳ୍ପରେ କାମ କରୁଥିଲେ । ଏହି ସମୟରେ ଶ୍ରୀଧର ଓ ସୁମିତ୍ରାଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା ।
ସମ୍ପର୍କ ଏତେ ବାଟ ଚାଲି ଯାଇଥିଲା ଯେ, ଉଭୟେ ପରସ୍ପର ସହ ରହିବାକୁ ନିଷ୍ପତ୍ତି ନେଇଥିଲେ । ସେପଟେ ଦୁହିଁଙ୍କର ପ୍ରେମସମ୍ପର୍କ ବିଷୟରେ ସ୍ବାମୀ ଫକୀର ଜାଣିବା ପରେ ସେ ନିଜ ଗାଁକୁ ପଳାଇଥିଲେ । ଗତ ୫ ତାରିଖ ସୁମିତ୍ରାଙ୍କୁ କୌଣସି କାରଣରୁ ଶ୍ରୀଧର ପ୍ରବଳ ମାଡ଼ ମାରିଥିଲେ । ୬ ତାରିଖରେ ଶ୍ରୀଧର ଶୋଇଥିବାବେଳେ, ସୁମିତ୍ରା ଏକ ଟାଙ୍ଗିଆରେ ମୁଣ୍ଡରୁ ଗଣ୍ଡି ଅଲଗା କରିଦେଇଥିଲେ ଏବଂ ସ୍ବାମୀ ଫକୀରଙ୍କୁ ଫୋନ୍ ଯୋଗେଁ ଜଣାଇଥିଲେ ।
ଏହା ମଧ୍ୟ ପଢ଼ନ୍ତୁ: ଆଉ ଜଣେ ଓମକାର ହୋତା, ଅପହଞ୍ଚ ଇଲାକାରେ ନିଶୁଳ୍କ ସେବା ଯୋଗାଉଛନ୍ତି ଡାକ୍ତର ସୁକାନ୍ତ
ଖବର ପାଇ ଫକୀର ଏକ ବାଇକ ଯୋଗେ ନୟାଗଡରୁ ସିଧା ବାଲେଶ୍ଵର ପଳାଇ ଆସିଥିଲେ । ଉଭୟେ ସ୍ବାମୀ-ସ୍ତ୍ରୀ ମିଶି ଶ୍ରୀଧରଙ୍କ ମୁଣ୍ଡ ବିହୀନ ଶରୀରକୁ ଏକ ସ୍ଥାନରେ ଫିଙ୍ଗିଥିବାବେଳେ କଟାମୁଣ୍ଡକୁ ନେଇ ଛତାବରରେ ନିର୍ମାଣ ଧୀନ ଏକ ପୋଲ ନିକଟରେ ଫିଙ୍ଗିଥିଲେ । ୧୨ ତାରିଖରେ ଶ୍ରୀଧରଙ୍କ ମୁଣ୍ଡ ବିହୀନ ଗଳିତ ମୃତଦେହ ଠାବ ହେବାପରେ ସଦର ଥାନା ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଥିଲା । ଏହାର ତଦନ୍ତ ପରେ ପୋଲିସ ଅଭିଯୁକ୍ତ ସ୍ବାମୀ ଓ ସ୍ତ୍ରୀଙ୍କୁ ଗିରଫ କରିଛି । ସୁମିତ୍ରାଙ୍କୁ କଟକରୁ ଓ ତାଙ୍କ ସ୍ବାମୀ ଫକୀରଙ୍କୁ ନୟାଗଡରୁ ଗିରଫ କରିଛି ପୋଲିସ ।
ଇଟିଭି ଭାରତ, ବାଲେଶ୍ବର
