ବାଲେଶ୍ବର: କଳା କାରିଗରୀର ଜିଲ୍ଲା ବାଲେଶ୍ୱରର ଅନ୍ୟ ଏକ ଆକର୍ଷଣ ଜଳେଶ୍ବର ବ୍ଲକ ମାଙ୍କିଡ଼ିଆ ଗାଁର ଟସର ପାଟ । ଆଜିର ଆଧୁନିକ ଧାରାରେ ମଧ୍ୟ ତନ୍ତବୁଣା ଟସର ପାଟ ନିଜର ସ୍ବତନ୍ତ୍ରତା ଓ ଚାହିଦା ବଜାର ରଖିଛି । ଏହି ପାଟ କେବଳ ରାଜ୍ୟ କି ଦେଶରେ ନୁହେଁ, ବରଂ ସାରା ବିଶ୍ବରେ ବାଲେଶ୍ବରକୁ ଦେଇଛି ଭିନ୍ନ ଏକ ପରିଚୟ । କିନ୍ତୁ ଝଲମଲ ପାଟ ପ୍ରସ୍ତୁତି ପାଇଁ ଦିନଦିନ ଧରି କାମ କରୁଥିବା କାରୀଗର ଏବେ କିନ୍ତୁ ଦୁଃଖରେ । ଉପଯୁକ୍ତ ବଜାର ସୁବିଧା ନ ଥିବାରୁ ଖର୍ଚ୍ଚ ଓ ପରିଶ୍ରମ ତୁଳନାରେ ମିଳିପାରୁନି ପ୍ରାପ୍ୟ । ଯାହାକୁ ନେଇ କିଛି କାରିଗର ନିଜ କୌଳିକ ବୃତ୍ତି ପ୍ରତି ମୁହଁ ଫେରାଇବାକୁ ବାଧ୍ୟ ହେଲେଣି ।
ମାଙ୍କିଡ଼ିଆ ଗାଁର ପ୍ରାୟ ୫ ଶହ ପରିବାର ଦୀର୍ଘଦିନ ହେବା ଏହି କାର୍ଯ୍ୟ କରିଆସୁଛନ୍ତି । ମହାଜନ ପାଖରୁ ଆବଶ୍ୟକୀୟ ସାମଗ୍ରୀ ଆଣି ତାକୁ ତନ୍ତରେ ବୁଣି ଏକ ଆକର୍ଷଣୀୟ ପାଟ ତିଆରି ପାଇଁ 7ରୁ 8 ଦିନ ଲାଗିଥାଏ । କିନ୍ତୁ ଏକ ସପ୍ତାହରୁ ଉର୍ଦ୍ଧ୍ବ ସମୟ ଲାଗୁଥିବାବେଳେ ଖଣ୍ଡେ ପାଟ ପାଇଁ ଏବେ କାରିଗର ପାଉଛି ମାତ୍ର ୭ ଶହ ଟଙ୍କା । ଏବେ ପୁଣି ବୋଝ ଉପରେ ନଳିତା ବିଡା ସାଝିଛି କୋରୋନା ମହାମାରୀ । ଉପଯୁକ୍ତ ବଜାର ଅଭାବରୁ ନିଜର ମଜୁରି ଗଣ୍ଡାକ ମଧ୍ୟ ପାଇବାକୁ ସଂଘର୍ଷ କରୁଛି କାରୀଗର ।
କୁଟୀର ଶିଳ୍ପକୁ ପ୍ରୋତ୍ସାହନ ଦେବା ପାଇଁ କେନ୍ଦ୍ର ଠାରୁ ରାଜ୍ୟ ସରକାରଙ୍କ ଅନେକ ଯୋଜନା । ତଥାପି ଏହି ପାରମ୍ପାରିକ କାରୀଗରଙ୍କ ଦୁର୍ଦ୍ଦଶା କେବେ ସରକାରଙ୍କ ଦୃଷ୍ଟିକୁ ଆସିଛି ଓ ଟସର ଶିଳ୍ପର ଦୁରାବସ୍ଥା ସୁଧୁରୁଛି ତାକୁ ହିଁ ଅପେକ୍ଷା ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
