ବଲାଙ୍ଗୀର: ବ୍ୟାଙ୍କ ଘରୋଇକରଣକୁ ବିରୋଧ କରି ବ୍ୟାଙ୍କ କର୍ମଚାରୀଙ୍କ କାର୍ଯ୍ୟ ବନ୍ଦ ଆନ୍ଦୋଳନ । ବଲାଙ୍ଗୀର ଜିଲ୍ଲା ଉତ୍କଳ ଗ୍ରାମ୍ୟ ବ୍ୟାଙ୍କ୍ କର୍ମଚାରୀ ଶୁକ୍ରବାର କାର୍ଯ୍ୟ ବନ୍ଦ ଆନ୍ଦୋଳନ ସହ ଧାରଣା ଦେଇଥିଲେ । ଦାବି ପୂରଣ ନହେଲେ ଆଗାମୀ ଦିନରେ ଆନ୍ଦୋଳନକୁ ତୀବ୍ର କରାଯିବା ନେଇ ଚେତାବନୀ ଦେଇଛନ୍ତି କର୍ମଚାରୀ ।
ଏହା ମଧ୍ୟ ପଢନ୍ତୁ: ୧୦୦ କୋଟିର ସାଇବର ଠକେଇ, ବ୍ୟାଙ୍କ କର୍ମଚାରୀ ସାମିଲ
ବଲାଙ୍ଗୀର ଜିଲ୍ଲା ଉତ୍କଳ ଗ୍ରାମ୍ୟ ବ୍ୟାଙ୍କ କର୍ମଚାରୀ ଶୁକ୍ରବାର କାର୍ଯ୍ୟବନ୍ଦ ଆନ୍ଦୋଳନ କରିବା ସହ ମୁଖ୍ୟ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି । ତେବେ ବଲାଙ୍ଗୀର ଜିଲ୍ଲାର ୮ଟି ଉପଶାଖା ଓ ବଲାଙ୍ଗୀର ମୁଖ୍ୟ ଶାଖାର ସବୁ ବ୍ୟାଙ୍କ୍ କର୍ମଚାରୀ ଏହି ଧାରଣାରେ ସାମିଲ ହୋଇଛନ୍ତି । ସରକାରଙ୍କ ବ୍ୟାଙ୍କ ଘରୋଇକରଣକୁ ତୀବ୍ର ବିରୋଧ କରିଛନ୍ତି । ସେହିପରି କର୍ମଚାରୀଙ୍କ ଦରମା ବୃଦ୍ଧି, ଏନସିବି ନିୟମ ଅନୁସାରେ କର୍ମଚାରୀ ନିଯୁକ୍ତି ଓ ତାଙ୍କୁ ଦରମା ପ୍ରଦାନ ଭଳି ମୁଖ୍ୟ ୧୩ଟି ଦାବି ଏମାନେ ଉପସ୍ଥାପିତ କରିଛନ୍ତି । ଦାବି ଆଗକୁ ପୂରଣ ନ ହେଲେ ଏ ତୀବ୍ର ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି ବ୍ୟାଙ୍କ କର୍ମଚାରୀ ।
ଏନେଇ ଉତ୍କଳ ଗ୍ରାମ୍ୟ ବ୍ୟାଙ୍କ କର୍ମଚାରୀ ସଂଘର ସଭାପତି ପୁଳିନ ମିଶ୍ର କହିଛନ୍ତି ଯେ, "ଆମେ ଆଜି ଜିଲ୍ଲାର ୮ଟି ଉପଶାଖା ଓ ବଲାଙ୍ଗୀର ମୁଖ୍ୟ ଶାଖାର ସବୁ ବ୍ୟାଙ୍କ୍ କର୍ମଚାରୀ ଧାରଣାରେ ବସିଛୁ । ସରକାରଙ୍କ ନିକଟରେ ଆମର ୧୩ଟି ଦାବି ରହିଛି । ଆମେ ସରକାରଙ୍କୁ ଏନଆରବିଆଇ (National World Bank of India) ପାଇଁ ଦାବି କରିଥିଲୁ । ସରକାର ଆମକୁ ପ୍ରଫିଟ ସହ ସର୍ଭିସ ଦେବା ପାଇଁ କହୁଛନ୍ତି । କିନ୍ତୁ ସେ ଅନୁସାରେ କର୍ମଚାରୀ ନାହାନ୍ତି । ଫଳରେ କାର୍ଯ୍ୟ ଠିକ ଭାବେ ହୋଇପାରୁନାହିଁ । ସରକାରଙ୍କୁ ଅନୁରୋଧ କରୁଛି ଆମ ୧୩ ଦଫା ଦାବି ପୂରଣ କରନ୍ତୁ । ଯଦି ଆଗାମୀ ଦିନରେ ଏହିସବୁ ଦାବି ପୂରଣ ନହୁଏ ତାହାହେଲେ ଆଗାମୀ ଦିନରେ ଆନ୍ଦୋଳନ ତୀବ୍ର କରାଯିବ ।"
ଇଟିଭି ଭାରତ, ବଲାଙ୍ଗୀର
