ଦୁବାଇ: ଚଳିତ ICC ପୁରୁଷ ଟି-୨୦ ବିଶ୍ବକପର ଫାଇନାଲ ମୁକାବିଲା ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ମଧ୍ୟରେ ରବିବାର ଖେଳାଯିବ । ଏହି ହାଇଭୋଲଟେଜ ନିର୍ଣ୍ଣାୟକ ମୁକାବିଲା ପାଇଁ ମ୍ୟାଚ୍ ଅଫିସିଆଲ ଘୋଷଣା କରିଛି ଅନ୍ତର୍ଜାତୀୟ କ୍ରିକେଟ ପରିଷଦ(ICC) ।
ମରଇସ ଏରସମସ ଓ ରିଚାର୍ଡ କେଟଲବୋର୍ଗ ଅନ୍ଫିଲ୍ଡ ଅମ୍ପାୟର ଦାୟିତ୍ବ ତୁଲାଇବେ । ସେହିପରି ଭାରତୀୟ ଅମ୍ପାୟର ନିତିନ ମେନନଙ୍କୁ ତୃତୀୟ ଅମ୍ପାୟର ଦାୟିତ୍ବ ଓ ଶ୍ରୀଲଙ୍କାର କୁମାର ଧର୍ମସେନାଙ୍କୁ ଚତୁର୍ଥ ଅମ୍ପାୟର ନିଯୁକ୍ତି ମିଳିଛି । ରଞ୍ଜଲ ମଦୁଗଲେ ମ୍ୟାଚ୍ ରେଫ୍ରୀ ଭାର ତୁଲାଇବେ ।
ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ଫାଇନାଲ ମୁକାବିଲା ନ୍ୟୁଜିଲାଣ୍ଡ ଓ ଅଷ୍ଟ୍ରେଲିଆ ମଧ୍ୟରେ ଖେଳାଯିବ । ନ୍ୟୁଜିଲାଣ୍ଡ ୫ ୱିକେଟରେ ସଂଘର୍ଷପୂର୍ଣ୍ଣ ପ୍ରଥମ ସେମିଫାଇନାଲରେ ଇଂଲଣ୍ଡକୁ ହରାଇ ଫାଇନାଲରେ ପ୍ରବେଶ କରିଛି ।
ଅନ୍ୟପଟେ ଅଷ୍ଟ୍ରେଲିଆ ମଧ୍ୟ ଆଉ ଏକ କଡା ସଂଘର୍ଷପୂର୍ଣ୍ଣ ଦ୍ବିତୀୟ ସେମିଫାଇନାଲ ମୁକାବିଲାରେ ପାକିସ୍ତାନକୁ ୫ ୱିକେଟରେ ହରାଇ ଫାଇନାଲରେ ପହଞ୍ଚିଛି ।
ସୁପର ୧୨ ପର୍ଯ୍ୟାୟରେ ଗ୍ରୁପ ୨ରେ ୫ଟି ମ୍ୟାଚ୍ରୁ ୪ଟି ବିଜୟ ସହ ଦ୍ବିତୀୟ ସ୍ଥାନରେ ରହିଥିଲା ନ୍ୟୁଜିଲାଣ୍ଡ । ସେହିପରି ଅଷ୍ଟ୍ରେଲିଆ ଗ୍ରୁପ ୧ରେ ମଧ୍ୟ ସମାନ ସଂଖ୍ୟକ ମ୍ୟାଚ୍ ଜିତି ଦ୍ବିତୀୟ ସ୍ଥାନରେ ରହିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
