ସମ୍ବଲପୁର: ପାରାଲମ୍ପିକ ସ୍ବର୍ଣ୍ଣ ପଦକ ବିଜେତା ପ୍ରମୋଦ ଭଗତଙ୍କୁ ସମ୍ବଲପୁରରେ ଭବ୍ୟ ସ୍ବାଗତ ସମ୍ବର୍ଦ୍ଧନା । ସମ୍ବଲପୁର ଗସ୍ତରେ ଆସିଥିବା ବେଳେ ସୁନାପୁଅ ପ୍ରମୋଦଙ୍କୁ ଜିଲ୍ଲାର ବିଭିନ୍ନ ଅନୁଷ୍ଠାନ ପକ୍ଷରୁ ବିପୁଳ ସ୍ବାଗତ ସମ୍ବର୍ଦ୍ଧନା କରାଯାଇଛି । ପ୍ରମୋଦ ସମ୍ବଲପୁରରେ ପହଞ୍ଚିବାପରେ ପ୍ରଥମେ ଜିଲ୍ଲାର ଅଧିଷ୍ଠାତ୍ରୀ ଦେବୀ ସମଲେଶ୍ବରୀଙ୍କ ମନ୍ଦିରକୁ ଯାଇ ପୂଜାର୍ଚ୍ଚନା ସହିତ ମା'ଙ୍କ ଆଶୀର୍ବାଦ ନେଇଥିଲେ ।
ପରେ ସମ୍ବଲପୁର ବ୍ୟାଡ୍ମିଣ୍ଟନ ଆସୋସିଏସନ ପକ୍ଷରୁ ପ୍ରମୋଦଙ୍କୁ ସ୍ବାଗତ କରିବା ପାଇଁ ସମଲେଶ୍ବରୀ ମନ୍ଦିରରୁ ଫାର୍ମ ରୋଡ଼, ମୁଦୀପଡା ଛକ, ଚର୍ଚ୍ଚ ଛକ, ଅଇଁଠାପାଲି ଛକ, ଲକ୍ଷ୍ମୀ ଟକିଜ ଛକ ଦେଇ ଏକ ବାଇକ ଶୋଭାଯାତ୍ରା ହୋଇଥିଲା । ପ୍ରମୋଦଙ୍କୁ ଖୋଲା ଜିପ୍ରେ ସହର ସାରା ବୁଲା ଯାଇଥିଲା। ଏହି ଅବସରରେ ଲକ୍ଷ୍ମୀ ଟକିଜ ଛକ ନିକଟରେ ସମ୍ବଲପୁର ଜିଲ୍ଲା ପୋଲିସ ପକ୍ଷରୁ ପ୍ରମୋଦଙ୍କୁ ସ୍ବତନ୍ତ୍ର ଭାବେ ସ୍ବାଗତ ସମ୍ବର୍ଦ୍ଧନା ଦିଆଯାଇଥିଲା ।
ସମ୍ବଲପୁର ଏସପି ବତୁଲା ଗଙ୍ଗାଧର ନିଜେ ପ୍ରମୋଦଙ୍କୁ ସ୍ବାଗତ କରି ଷ୍ଟେଜ ଉପରକୁ ପାଛୋଟି ନେବା ସହ ଫୁଲ ତୋଡା ଓ ଉତ୍ତରୀୟ ଦେଇ ସମ୍ବର୍ଦ୍ଧିତ କରିଥିଲେ । ପରେ ଜିଲ୍ଲାର ଭି ଏସ ଏସ ଇଣ୍ଡୋର ଷ୍ଟାଡିୟମରେ ଜିଲ୍ଲା ବ୍ୟାଡମିଣ୍ଟନ ଆସୋସିଏସନ ପକ୍ଷରୁ ସ୍ବାଗତ ଓ ସମ୍ବର୍ଦ୍ଧନା ଦିଆଯାଇଥିଲା । ପ୍ରମୋଦଙ୍କ ଏହି ସମ୍ବଲପୁର ଗସ୍ତ ସମୟରେ ପୂର୍ବତନ ବିଧାୟିକା ଡାକ୍ତର ରାସେଶ୍ବରୀ ପାଣିଗ୍ରାହୀ ମଧ୍ୟ ତାଙ୍କୁ ସମ୍ବର୍ଦ୍ଧିତ କରିଛନ୍ତି ।
ସମ୍ବଲପୁରରୁ ବାଦଶାହ ଜୁସ୍ମନ ରାଣା, ଇଟିଭି ଭାରତ
