ଭୁବନେଶ୍ବର: ବିଶ୍ବ ବାଳିକା ଦିବସରେ ପଦକ ଭେଟି ଦେଲେ ଓଡ଼ିଶା ସବ୍ ଜୁନିଅର ଖୋଖୋ ବାଳିକା ଦଳ । ୪୦ତମ ଜାତୀୟ ଜୁନିଅର ଖୋଖୋ ଚମ୍ପିଆନସିପ୍ରେ କାଂସ୍ୟ ପଦକ ହାସଲ କରିଛନ୍ତି ଓଡ଼ିଶା ବାଳିକା ଦଳ । ଏହା ସହିତ ଭୁବନେଶ୍ବରରେ ୫ ଦିନ ଧରି ଜାରି ରହିଥିବା ୪୦ତମ ଜାତୀୟ ଜୁନିଅର ଖୋଖୋ ଚମ୍ପିଆନସିପ୍ ଉଦଯାପିତ ହୋଇଛି ।
୪୦ତମ ଜାତୀୟ ଜୁନିଅର ଖୋଖୋ ଚମ୍ପିଆନସିପ୍ରେ ଅନେକ କଡ଼ା ଟକ୍କର ମ୍ୟାଚ ଦେଖିବାକୁ ମିଳିଥିଲା ।ଏହି ପ୍ରତିଯୋଗିତାରେ ମହିଳା ବିଭାଗରେ ମହାରାଷ୍ଟ୍ର ଦଳ ଚମ୍ପିଆନ୍ ହୋଇଛି । ସେହିଭଳି ପୁରୁଷ ବିଭାଗରେ କୋହ୍ଲାପୁର ଦଳ ବିଜୟ ହାସଲ କରିଛି ।
ପୁରୁଷ ବିଭାଗରେ ଡିଫେଣ୍ଡିଂ ଚମ୍ପିଆନ୍ ମହାରାଷ୍ଟ୍ର ଏବଂ ଦିଲ୍ଲୀ ମଧ୍ୟରେ କଡ଼ା ମୁକାବିଲା ଦେଖିବାକୁ ମିଳିଥିଲା । କିନ୍ତୁ ମ୍ୟାଚର ଶାଷାର୍ଦ୍ଧରେ ମହାରାଷ୍ଟ୍ର ଦୁଇଟି ପଏଣ୍ଟ ବ୍ୟବଧାନରେ ଟାଇଟଲ ଜିତିବାରେ ସଫଳ ହୋଇଥିଲା ।
ଉଭୟ ପୁରୁଷ ଓ ମହିଳା ଇଭେଣ୍ଟରେ ପଶ୍ଚିମବଙ୍ଗ ଏବଂ କର୍ଣ୍ଣାଟକ ସହିତ ଆୟୋଜକ ଓଡ଼ିଶା ତୃତୀୟ ସ୍ଥାନରେ ରହିଛି । 2019ରେ ଅନୁଷ୍ଠିତ ପୂର୍ବ ଖୋଖୋ ସଂସ୍କରଣର ଉଭୟ ମହିଳା ଏବଂ ପୁରୁଷ ଇଭେଣ୍ଟରେ ଯଥାକ୍ରମେ ଓଡ଼ିଶା ପଞ୍ଚମ ଓ ୧୩ତମ ସ୍ଥାନରେ ରହିଥିଲା । ୪୦ତମ ଜାତୀୟ ଜୁନିଅର ଖୋଖୋ ଚମ୍ପିଆନସିପ୍ରେ ଓଡ଼ିଶା ଏକ ବଡ଼ ସଫଳତା ହାସଲ କରିଛି ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ
