କେପ୍ ଟାଉନ: ଦକ୍ଷିଣ ଆଫ୍ରିକା ମାଟିରେ ପ୍ରଥମ ଥର ଟେଷ୍ଟ ସିରିଜ ବିଜୟର ସୁବର୍ଣ୍ଣ ସୁଯୋଗ ହାତଛଡା କରିସାରିଛି ଟିମ ଇଣ୍ଡିଆ । ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ପ୍ରଥମ ଟେଷ୍ଟରେ ବିଜୟ ସହ ୧-୦ରେ ଆଗୁଆ ଥିଲା ଭାରତ । ମାତ୍ର ପରବର୍ତ୍ତୀ ଦୁଇଟି ଟେଷ୍ଟରେ ଜବରଦସ୍ତ ବିଜୟ ସହ ସିରିଜ ଛଡାଇନେଇଛି ଦକ୍ଷିଣ ଆଫ୍ରିକା । ମ୍ୟାଚ୍ ପରବର୍ତ୍ତୀ ସାମ୍ବାଦିକ ସମ୍ମିଳନୀରେ ଭାରତୀୟ ଟେଷ୍ଟ କ୍ୟାପଟେନ ବିରାଟ କୋହଲି, ବ୍ୟାଟିଂ ବିଫଳତାକୁ ପରାଜୟର କାରଣ ଦର୍ଶାଇଛନ୍ତି ।
ଏହାମଧ୍ୟ ପଢନ୍ତୁ: IND vs SA: ସିରିଜ ଜିତିଲା ଦକ୍ଷିଣ ଆଫ୍ରିକା, ଭାରତର ସ୍ବପ୍ନ ଧୁଳିସାତ୍
କୋହଲି କହିଛନ୍ତି, "ବିଫଳ ହେବା ସତ୍ତ୍ବେ ସିନିୟର ବ୍ୟାଟ୍ର ଚେତେଶ୍ବର ପୂଜାରା ଓ ଅଜିଙ୍କ୍ୟ ରାହାଣେଙ୍କୁ ଲଗାତାର ସୁଯୋଗ ଦେଉଛି ଟିମ । ବ୍ୟାଟିଂ ଆମକୁ ପଛରେ ପକାଇଦେଇଥିଲା । ଏହାକୁ ସ୍ବୀକାର କରିବାରେ ଅସୁବିଧା ନାହିଁ । ମୁଁ ଏଠାରେ ବସି ଭବିଷ୍ୟତରେ କ'ଣ ଘଟିବ କହିପାରିବି ନାହିଁ । ଏହା ମୋର କାମ ନୁହେଁ । ଏହା ଚୟନକର୍ତ୍ତାଙ୍କ କାମ । ଚେତେଶ୍ବର ଓ ରାହାଣେଙ୍କୁ ଆମେ ସୁଯୋଗ ଦେବା ଜାରି ରଖିବୁ ବିଶ୍ବର ସବୁ ସ୍ଥାନରେ ଭଲ ପ୍ରଦର୍ଶନ କରିଥିବା ଟିମର ଏହି ପରାଜୟକୁ ଗ୍ରହଣ କରିବା କଷ୍ଟକର । "
ପରେ ଡିନ ଏଲଗାରଙ୍କ LBW ବିବାଦ ନେଇ କୋହଲିଙ୍କୁ ପ୍ରଶ୍ନ କରାଯାଇଥିଲା । ମାତ୍ର ଏହାକୁ ସେ ଏଡାଇ ଯାଇଥିଲେ । କୌଣସି ବିବାଦ ତିଆରି କରିବାକୁ ଇଚ୍ଛା ନାହିଁ । ଏହା ଘଟିଥାଏ, ଏହାକୁ ଭୁଲି ଆଗକୁ ବଢିବାକୁ ହୁଏ ବୋଲି ସେ କହିଥିଲେ ।
IANS