ହାଇଦ୍ରାବାଦ: ଭାରତରେ ଆୟୋଜିତ ବିଶ୍ବକପ୍‌ ୨୦୨୩ ମହାକୁମ୍ଭ ରବିବାର ଶେଷ ହୋଇଛି । ଏହାପରେ ଆଧିକାରୀକ ଭାବେ ଟୁର୍ଣ୍ଣାମେଣ୍ଟର ସର୍ବଶ୍ରେଷ୍ଠ ଦଳ ଚୟନ କରିଛି ଆଇସିସି । ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରେ ଦମଦାର ପ୍ରଦର୍ଶନ ପାଇଁ ଆଇସିସି ନିଜ ଟିମ୍‌ରେ ୬ ଭାରତୀୟ ଖେଳାଳିଙ୍କୁ ସ୍ଥାନ ଦେଇଛି । ଏପରିକି ଭାରତୀୟ ଅଧିନାୟକ ରୋହିତ ଶର୍ମାଙ୍କୁ ଦଳର ଅଧିନାୟକ କରିଛି ଆଇସିସି । ଅନ୍ୟପଟେ ଫାଇନାଲ୍‌ରେ ଭାରତକୁ ହରାଇ ଚମ୍ପିଆନ୍‌ ହୋଇଥିବା ଅଷ୍ଟ୍ରେଲିଆ ଦଳର କେବଳ ଦୁଇ ଖେଳାଳିଙ୍କୁ ଆଇସିସି ଟିମ୍‌ ଅଫ୍‌ ଦି ଟୁର୍ଣ୍ଣାମେଣ୍ଟରେ ସ୍ଥାନ ମିଳିଛି । ଦକ୍ଷିଣ ଆଫ୍ରିକା, ନ୍ୟୁଜିଲାଣ୍ଡ ଓ ଶ୍ରୀଲଙ୍କାର ଜଣେ ଲେଖାଏଁ ଖେଳାଳି ଏହି ଟିମରେ ସ୍ଥାନ ପାଇଛନ୍ତି ।

ଆଇସିସି ଚୟନ କରିଥିବା ଟିମ୍‌ ଅଫ୍‌ ଦି ଟୁର୍ଣ୍ଣାମେଣ୍ଟରେ ଭାରତୀୟ ଅଧିନାୟକ ରୋହିତ ଶର୍ମାଙ୍କୁ ନେତୃତ୍ବ ମିଳିଥିବାବେଳେ ଭାରତୀୟ ଷ୍ଟାର ବ୍ୟାଟର ବିରାଟ କୋହଲି, ମହମ୍ମଦ ଶାମି, ଯଶପ୍ରୀତ ବୁମ୍‌ରା, ରବୀନ୍ଦ୍ର ଜାଡେଜା ଓ କେଏଲ୍ ରାହୁଲଙ୍କୁ ଟିମ୍‌ରେ ସ୍ଥାନ ମିଳିଛି । ଅଷ୍ଟ୍ରେଲିଆରୁ କେବଳ ଅଲରାଉଣ୍ଡର ଗ୍ଲେନ୍ ମାକ୍ସୱେଲ ଓ ଆଡାମ ଜାମ୍ପାଙ୍କୁ ଆଇସିସି ଟିମ୍‌ରେ ସାମିଲ ହୋଇଛନ୍ତି । ଏମାନଙ୍କ ବ୍ୟତୀତ ଦକ୍ଷିଣ ଆଫ୍ରିକାର ଷ୍ଟାର ୱିକେଟ୍‌କିପର-ବ୍ୟାଟର କ୍ବିଣ୍ଟନ ଡି'କକ୍‌, ନ୍ୟୁଜିଲାଣ୍ଡର ଅଲରାଉଣ୍ଡର ଡେରାଇଲ୍‌ ମିଚେଲ୍‌ ଓ ଶ୍ରୀଲଙ୍କାର ଷ୍ଟାର ବୋଲର ଦିଲଶାନ ମଧୁଶଙ୍କା ଆଇସିସି ଦଳରେ ସ୍ଥାନ ପାଇଛନ୍ତି । ସେହିଭଳି ଦକ୍ଷିଣ ଆଫ୍ରିକୀୟ ବୋଲର ଗେରାଲ୍ଡ କଏଜି ଏହି ଦଳରେ ୧୨ତମ ପ୍ଲେୟର ଭାବେ ସ୍ଥାନ ପାଇଛନ୍ତି । ପ୍ରକାଶଯୋଗ୍ୟ, ଆଇସିସି ଆଧିକାରୀକ ଭାବେ ଏହି 'ଟିମ୍‌ ଅଫ୍‌ ଦି ଟୁର୍ଣ୍ଣାମେଣ୍ଟ' ନିଜ ଅଫିସିଆଲ୍‌ ୱେବ୍‌ସାଇଟ୍‌ ଓ ଏକ୍ସ ହ୍ୟାଣ୍ଡେଲ୍‌ରେ ପୋଷ୍ଟ କରିଛି ।

ଏହା ମଧ୍ୟ ପଢ଼ନ୍ତୁ...ସମସ୍ତଙ୍କ ଆଖିରେ ଲୁହ, ମନରେ କୋହ: ଏମିତି ଥିଲା ଭାରତୀୟ ଡ୍ରେସିଂ ରୁମ୍‌ରେ ଶେଷ ମେଡାଲ ସେରିମନି

ଆଇସିସି ଟିମ୍‌ ଅଫ୍‌ ଦି ଟୁର୍ଣ୍ଣାମେଣ୍ଟ: କ୍ବିଣ୍ଟନ୍‌ ଡି'କକ୍‌ (ୱିକେଟକିପର), ରୋହିତ ଶର୍ମା (ଅଧିନାୟକ), ବିରାଟ କୋହଲି, ଡେରାଇଲ ମିଚେଲ୍‌, କେଏଲ୍‌ ରାହୁଲ, ଗ୍ଲେନ୍‌ ମାକ୍ସୱେଲ୍‌, ରବୀନ୍ଦ୍ର ଜାଡେଜା, ଯଶପ୍ରୀତ ବୁମ୍‌ରା, ଦିଲଶାନ ମଧୁଶଙ୍କା, ଆଡାମ ଜାମ୍ପା, ମହମ୍ମଦ ଶାମି

୧୨ତମ ପ୍ଲେୟର: ଗେରାଲ୍ଡ କଏଜି

ଏହା ମଧ୍ଯ ପଢ଼ନ୍ତୁ...ଭାରତକୁ ଆସିଥିଲେ ପୂଜା ପାଇଥାନ୍ତା, ଏବେ ଅଷ୍ଟ୍ରେଲୀୟ ଖେଳାଳିଙ୍କ ଗୋଡ଼ ତଳେ ଟ୍ରଫି

ଉଲ୍ଲେଖଯୋଗ୍ୟ, ଆଇସିସି ବିଶ୍ବକପ୍‌ ୨୦୨୩ରେ ଏକମାତ୍ର ଦଳ ଭାବେ ଆରମ୍ଭରୁ ସେମିଫାଇନାଲ୍‌ ପର୍ଯ୍ୟନ୍ତ ସମସ୍ତ ମ୍ୟାଚ୍‌ ଜିତି ଅପରାଜିତ ଥିଲା ଟିମ୍‌ ଇଣ୍ଡିଆ । ଦଳର ଉଭୟ ବୋଲିଂ ଓ ବ୍ୟାଟିଂ ବିଭାଗ ଦମଦାର ପ୍ରଦର୍ଶନ ଜାରି ରଖିଥିଲେ । ହେଲେ ଫାଇନାଲ୍‌ରେ ଜୟଯାତ୍ରାକୁ ଜାରି ରଖିବାରେ ବିଫଳ ହୋଇଥିଲା ଦଳ । ଅଷ୍ଟ୍ରେଲିଆ ୭ ୱିକେଟ୍‌ରେ ଫାଇନାଲ୍‌ ମ୍ୟାଚ୍‌ ଜିତି ଏହି ସଂସ୍କରଣର ଚମ୍ପିଆନ୍‌ ହୋଇଥିଲା । ତେବେ ଭାରତୀୟ ଷ୍ଟାର ବ୍ୟାଟର ବିରାଟ କୋହଲି ଟୁର୍ଣ୍ଣାମେଣ୍ଟରେ ସର୍ବାଧିକ ରନ୍‌ କରି ଟୁର୍ଣ୍ଣାମେଣ୍ଟର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ । ସେହିଭଳି ମହମ୍ମଦ ଶାମି ସର୍ବାଧିକ ୱିକେଟ୍‌ ସହ ବୋଲରମାନଙ୍କ ତାଲିକାର ଶୀର୍ଷରେ ରହିଥିଲେ ।

ବ୍ୟୁରୋ ରିପୋର୍ଟ, ଇଟିଭି ଭାରତ