ମୁମ୍ଵାଇ: ଖୁବ୍ ଶୀଘ୍ର ବାଜିବ ବଲିଉଡ ଅଭିନେତା ଅଲି ଫଜଲଙ୍କ ସାହାନାଇ (Richa Chadha Ali Fazal Wedding) । ହାତକୁ ଦୁଇ ହାତ ହେବେ ଅଲି ଫଜଲ ଏବଂ ରିଚା ଚଢା । ଦୁହେଁ ଖୁବ୍ ଶୀଘ୍ର ବିବାହ ବନ୍ଧନରେ ଆବଦ୍ଧ ହେବାକୁ ଯାଉଛନ୍ତି । ବର୍ତ୍ତମାନ ଉଭୟଙ୍କ ବିବାହ କାର୍ଡର ଫଟୋ ମଧ୍ୟ ସାମ୍ନାକୁ ଆସିଛି।
ଅଲି ଏବଂ ରିଚାଙ୍କ ଜଣେ ବନ୍ଧୁ ସେମାନଙ୍କ ବିବାହ କାର୍ଡ ଡିଜାଇନ୍ କରିଛନ୍ତି । ବିବାହ କାର୍ଡକୁ ଏକ ମ୍ୟାଚ୍ ବକ୍ସ ପରି ଡିଜାଇନ୍ ଦିଆଯାଇଛି । କାର୍ଡର ଶୀର୍ଷରେ ଲେଖା ହୋଇଛି –କପଲ ମ୍ୟାଚେସ୍ । ଏଥିରେ ରିଚା ଏବଂ ଅଲି ସାଇକେଲ ଚଳାଉଥିବା ଥିବାର ଦେଖାଯାଇଛି । ତେବେ ଏହି ବିବାହ କାର୍ଡ ଦେଖିଲେ ଆପଣ ବି ଦ୍ୱନ୍ଦ୍ୱରେ ପଡ଼ିବେ, ଇଏ ବିବାହ କାର୍ଡ ନା ଦିଆସିଲ ଖୋଳ ? ବର୍ତ୍ତମାନ ଅଲି ଫଜଲ ଏବଂ ରିଚା ଚଢାଙ୍କ ବିବାହ କାର୍ଡର ଫଟୋ ସୋସିଆଲ ମିଡିଆରେ ଭାଇରାଲ ହେଉଛି ।
ପୂର୍ବରୁ ଏହି ଲଭ୍ ବାର୍ଡଙ୍କ ବିବାହ ଦୁଇ ଥର ସ୍ଥଗିତ ରଖାଯାଇଛି । ବର୍ତ୍ତମାନ ଉଭୟଙ୍କ ବିବାହ ତାରିଖ ମଧ୍ୟ ସ୍ଥିର କରାଯାଇଛି । ବର୍ତ୍ତମାନ ମେହେନ୍ଦୀ-ହଳଦି ଠାରୁ ଆରମ୍ଭ କରି ବିବାହ ରିସେପ୍ସନ୍ ପର୍ଯ୍ୟନ୍ତ ସମସ୍ତ ବିବରଣୀ ସାମ୍ନାକୁ ଆସିଛି । ମିଡିଆ ରିପୋର୍ଟ ଅନୁଯାୟୀ, ଅଲି-ରିଚାଙ୍କ ବିବାହ କାର୍ଯ୍ୟ ଆସନ୍ତା ମାସ ଅର୍ଥାତ ଅକ୍ଟୋବର 2ରୁ ଆରମ୍ଭ ହେବାକୁ ଯାଉଛି । ଏହି କପୁଲ ରାଜକୀୟ ଶୈଳୀରେ ବିବାହ କରିବେ । ଏହା ପରେ ବଲିଉଡ ସେଲିବ୍ରିଟିଙ୍କ ପାଇଁ ଏକ ରାଜକୀୟ ରିସେପ୍ସନ୍ ମଧ୍ୟ ଆୟୋଜିତ ହେବ ।
ମେହେନ୍ଦୀ-ହଳଦି ସମାରୋହ
ଅକ୍ଟୋବର 2ରୁ ଅଲି-ରିଚାଙ୍କ ହଳଦି ଏବଂ ମେହେନ୍ଦୀ ସମାରୋହ ଆରମ୍ଭ ହେବ । ସେପ୍ଟେମ୍ବରର ଶେଷ ଆଡକୁ ଅତିଥିମାନେ ଆସିବା ଆରମ୍ଭ ହୋଇଯିବ । ଏହି ସମୟରେ ସଂଗୀତ ସମାରୋହ ମଧ୍ୟ ଆୟୋଜିତ ହେବ ।
ଅଲି-ରିଚା ବିବାହ ତାରିଖ
ଅଲି-ରିଚା 6 ଅକ୍ଟୋବରରେ ବିବାହ ବନ୍ଧନରେ ଆବଦ୍ଧ ହେବେ । ଏହି ବିବାହ ଦିଲ୍ଲୀରେ ଅନୁଷ୍ଠିତ ହେବ, ଯେଉଁଥିରେ କେବଳ ନିକଟ ସମ୍ପର୍କୀୟ ଏବଂ ଖାସ୍ ବନ୍ଧୁମାନେ ସାମିଲ ହେବେ । ରାଜଧାନୀରେ ବିବାହ କରିବା ପରେ ଏଠାରେ ଅଲି ଏବଂ ରିଚା ମୁମ୍ବାଇରେ ସେଲିବ୍ରିଟିଙ୍କ ପାଇଁ ଏକ ଷ୍ଟାର ପାର୍ଟି କରିବେ, ଯେଉଁଥିରେ ବଲିଉଡର ସେଲିବ୍ରିଟିମାନେ ସାମିଲ ହେବେ ।
ପ୍ରେମ କାହାଣୀ କେବେ ଆରମ୍ଭ ହେଲା ?
2012 ମସିହାରେ ଅଲି ଏବଂ ରିଚା ପରସ୍ପରର ନିକଟତର ହୋଇଥିଲେ । ଫିଲ୍ମ 'ଫୁକ୍ରେ'ର ସେଟରେ ଏମାନଙ୍କର ସାକ୍ଷାତ ହୋଇଥିଲା । ରିପୋର୍ଟ ଅନୁଯାୟୀ, ରିଚା ଅଲିଙ୍କୁ ପୂର୍ବରୁ ପ୍ରସ୍ତାବ ଦେଇଥିଲେ । କିନତୁ ଅଲି ରିଚାଙ୍କୁ ଉତ୍ତର ଦେବାକୁ ତିନି ମାସ ସମୟ ନେଇଥିଲେ । ଏହାପରେ ଦୁହେଁ ପ୍ରାୟ 5ବର୍ଷ ପର୍ଯ୍ୟନ୍ତ ନିଜ ସମ୍ପର୍କକୁ ଗୁପ୍ତ ରଖିଥିଲେ ।
