ଶ୍ରେଷ୍ଠ ଫିଚର ଫିଲ୍ମ ଭାବେ ଜାତୀୟ ପୁରସ୍କାର ହାତେଇଲା ଓଡ଼ିଆ ଫିଲ୍ମ 'ପ୍ରତୀକ୍ଷା', ଧନ୍ୟବାଦ ଦେଲେ ଅନୁପମ ପଟ୍ଟନାୟକ

ନୂଆଦିଲ୍ଲୀ: ଶ୍ରେଷ୍ଠ ଓଡ଼ିଆ ଫିଲ୍ମ ଭାବେ ଜାତୀୟ ସ୍ତରରେ ପୁରସ୍କୃତ ହେଲା ଓଡ଼ିଆ ଫିଲ୍ମ 'ପ୍ରତୀକ୍ଷା' । ନୂଆଦିଲ୍ଲୀର ବିଜ୍ଞାନ ଭବନରେ ଆୟୋଜିତ ୬୯ତମ ଜାତୀୟ ଚଳଚ୍ଚିତ୍ର ପୁରସ୍କାର କାର୍ଯ୍ୟକ୍ରମରେ ଶ୍ରେଷ୍ଠ ଫିଚର ଫିଲ୍ମ ଭାବେ ପୁରସ୍କାର ହାତେଇଲା ଫିଲ୍ମ । ଏହି ଅବସରରେ ଫିଲ୍ମ ପାଇଁ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଠାରୁ ଫିଲ୍ମର ପ୍ରଯୋଜକ ତଥା ନିର୍ଦ୍ଦେଶକ ଅନୁପମ ପଟ୍ଟନାୟକ ପୁରସ୍କାର ଗ୍ରହଣ କରିଛନ୍ତି । ଏହି ପୁରସ୍କାର ଜିତି ଫିଲ୍ମ ସାରା ଓଡ଼ିଶା ଏବଂ ଓଡ଼ିଆ ଫିଲ୍ମ ଇଣ୍ଡଷ୍ଟ୍ରି ପାଇଁ ଗୌରବ ଆଣିଛି ।

ତେବେ ପ୍ରଯୋଜକ ତଥା ନିର୍ଦ୍ଦେଶକ ଅନୁପମ ପଟ୍ଟନାୟକ ଜାତୀୟ ପୁରସ୍କାର ସହ ଏକ ଫଟୋ ସେୟାର କରି ମଧ୍ୟ ଏହି ଖୁସି ଖବର ସମସ୍ତଙ୍କ ସହ ସେୟାର କରିଛନ୍ତି । ସେ ଫଟୋ ସେୟାର କରି ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି । ଏବେ ସେ କ୍ୟାପସନରେ ଲେଖିଛନ୍ତି, ଗର୍ବର ମୁହୂର୍ତ୍ତ । ମୋର ଏବଂ ଏହା ପୁରା ଟିମ୍ ପାଇଁ ପ୍ରଥମ ଜାତୀୟ ପୁରସ୍କାର । ଆଶା କରେ ଏହା କେବଳ ଆରମ୍ଭ । ଆପଣମାନଙ୍କ ଭଲପାଇବା ଏବଂ ଆଶୀର୍ବାଦ ପାଇଁ ଧନ୍ୟବାଦ । କ୍ୱାଲିଟି ଓଡିଆ ସିନେମାକୁ ସମର୍ଥନ କରନ୍ତୁ । ଟିମ୍ ପ୍ରତୀକ୍ଷାକୁ କୃତଜ୍ଞତା ।

ଏହି ଫିଲ୍ମର ସଫଳତାକୁ ନେଇ ପୂର୍ବରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଫିଲ୍ମ ନିର୍ମାତାଙ୍କ ସହ ପୁରା ଟିମକୁ ଶୁଭେଚ୍ଛା ଜଣାଇଥିଲେ । ବର୍ତ୍ତମାନ ଅନୁପମଙ୍କ ଏହି ସଫଳତା ପାଇଁ ଓଲିଉଡରୁ ଛୁଟିଛି ଶୁଭେଚ୍ଛାର ସୁଅ । ଅନେକ ସେଲିବ୍ରିଟି ଅନୁପମଙ୍କୁ ଶୁଭେଚ୍ଛା ଜଣାଇଛନ୍ତି । ଅଭିନେତା ସବ୍ୟସାଚୀ ମିଶ୍ର ଲେଖିଛନ୍ତି, ଆମେ ବହୁତ ଗର୍ବିତ । ଏହା ଆମକୁ ଅଧିକ ଆତ୍ମବିଶ୍ବାସୀ ଯୋଗାଇଛି । ଜାତୀୟ ପୁରସ୍କାର ପାଇଁ ଶୁଭେଚ୍ଛା । ସେହିପରି ଅଭିନେତ୍ରୀ ପ୍ରକୃତି ମିଶ୍ର ଲେଖିଛନ୍ତି, ବହୁତ ବହୁତ ଶୁଭେଚ୍ଛା । ଅଭିନେତ୍ରୀ ଝିଲ୍ଲିକ ଭଟ୍ଟାଚାର୍ଯ୍ୟ ଲେଖିଛନ୍ତି, ଟିମ୍ ପ୍ରତୀକ୍ଷାଙ୍କୁ ଶୁଭେଚ୍ଛା । ଶୀତଲ ପାତ୍ର ଲେଖିଛନ୍ତି, ଶୁଭେଚ୍ଛା ପିଲୁ ଭାଇ ଏବଂ ପୁରା ପ୍ରତୀକ୍ଷା ଟିମ୍ । ସେହିପରି ଏଲି ପାଢୀଙ୍କ ସମେତ ଅନ୍ୟ ସେଲିବ୍ରିଟି ଏବଂ ଫ୍ୟାନ୍ସ ପୁରା ଟିମ୍କୁ ଶୁଭେଚ୍ଛା ଜଣାଇବା ସହ ପ୍ରଶଂସା କରିଛନ୍ତି ।

ସୂଚନା ଥାଉ କି, ପିତା-ପୁତ୍ର ସମ୍ପର୍କର ଗତିଶୀଳ ଥିବା ଓଡ଼ିଆ ଫିଲ୍ମ 'ପ୍ରତୀକ୍ଷା' ୨୦୨୨ ମସିହା ଡିସେମ୍ବର ୨ରେ ମୁକ୍ତିଲାଭ କରିଥିଲା । ଯେଉଁଥିରେ ଭୁବନେଶ୍ବରରେ ରହୁଥିବା ଏକ ମଧ୍ୟବିତ୍ତ ପରିବାରର ଏକ ସ୍ବପ୍ନ, ଆକାଂକ୍ଷାକୁ ନେଇ ଫିଲ୍ମର କାହାଣୀ ସୁନ୍ଦର ଭାବେ ଦର୍ଶାଯାଇଥିଲା । ଏହି ଫିଲ୍ମ ବେଶ ପ୍ରଶଂସା ସାଉଁଟିଥିଲା । ଏପରିକି ବଲିଉଡ୍‌ ଅଭିନେତା ଅନୁପମ ଖେର ଏହି ଫିଲ୍ମର ହିନ୍ଦୀ ସଂସ୍କରଣ ପ୍ରସ୍ତୁତ କରିବାକୁ ଆଗେଇ ଆସିଥିଲେ । ଏହାର ପ୍ରଯୋଜନା ସହ ବାପା ଭୂମିକାରେ ଅଭିନୟ କରିବେ ବୋଲି ବି ଘୋଷଣା କରିଥିଲେ ।

ଏହା ମଧ୍ୟ ପଢନ୍ତୁ: ଓଡ଼ିଆ ଫିଲ୍ମ 'ପ୍ରତୀକ୍ଷା'କୁ ମିଳିଲା ଜାତୀୟ ପୁରସ୍କାର, ମୁଖ୍ୟମନ୍ତ୍ରୀଙ୍କ ଶୁଭେଚ୍ଛା

ନିର୍ଦ୍ଦେଶକ ଅନୁପମ ପଟ୍ଟନାୟକ ଏହାର ପ୍ରଯୋଜନା କରିଥିଲେ ଏବଂ ନିର୍ଦ୍ଦେଶନା ଦେଇଥିଲେ । ଏହି ଫିଲ୍ମର କାହାଣୀ ରଚନା କରିଥିଲେ ଗୌରହରି ଦାସ । ରୋଶନ ବିଷୋୟୀ ଏହାର ଚିତ୍ରନାଟ୍ୟ ଓ ସଂଳାପ ରଚନା କରିଥିଲେ । ଏଥିରେ ମୁଖ୍ୟ ଭୂମିକାରେ ଅଭିନୟ କରିଥିଲେ ଦୀପନ୍ୱିତ ଦାଶମହାପାତ୍ର ଓ ବର୍ଷା ପଟ୍ଟନାୟକ । ଚୌଧୁରୀ ଜୟପ୍ରକାଶ ଦାସ, ସିଦ୍ଧାନ୍ତ ମହାପାତ୍ର ଶ୍ରୀଲା ତ୍ରିପାଠୀ, ରୂପାମ୍ବିକା ନାୟକ, ଅବକାଶ ମିଶ୍ର, ସୁଶୀଲ ମିଶ୍ର, ରୋଶନ ବିଷୋୟୀ ଆଦି କଳାକାର ପ୍ରମୁଖ ଭୂମିକାରେ ଅଭିନୟ କରିଥିଲେ ।