କଟକ: ଦୁର୍ଗା ପୂଜା ପୂର୍ବରୁ କଟକର ଅସୁରକ୍ଷିତ ବିଲ୍ଡିଂ ଭାଙ୍ଗିଲା କଟକ ମହାନଗର ନିଗମ(CMC) । ପୂଜା ସମୟରେ ଯେପରି କୌଣସି କ୍ଷତି ନ ଘଟେ ସେଥିପାଇଁ ରାସ୍ତା କଡ଼ରେ ଥିବା ପୁରୁଣା ଅସୁରକ୍ଷିତ କୋଠାକୁ ଭାଙ୍ଗିବା ଆରମ୍ଭ କରିଛି ସିଏମସି । ପ୍ରଥମ ପର୍ଯ୍ୟାୟରେ ମାଛୁଆ ବଜାର ନିକଟରେ ଥିବା ଗୀତା ସାହୁ ନାମକ ବ୍ୟକ୍ତିଙ୍କ ଅସୁରକ୍ଷିତ ପୁରୁଣା ଦୁଇ ମହଲା ଘରକୁ ଭଙ୍ଗାଯାଇଛି ।
ଏହି କ୍ରମରେ କଟକର ୫୯ଟି ୱାର୍ଡରେ ଯେତେ ସବୁ ପୁରୁଣା ଓ ଅସୁରକ୍ଷିତ ଘର ଗୁଡିକ ରହିଛି ତାହାକୁ ନୋଟିସ ଆଧାରରେ ସିଏମସି ପକ୍ଷରୁ ଭଙ୍ଗାଯିବ ବୋଲି ସୂଚନା ରହିଛି । ଏନେଇ ସିଏମସି ଡେପୁଟି କମିଶନର କହିଛନ୍ତି, "ବିଲ୍ଡିଂଟି ଅସୁରକ୍ଷିତ ଭାବେ ଠିଆ ହୋଇଥିବାର ମାଲିକଙ୍କୁ ନୋଟିସ ହୋଇଥିଲା । ସାତ ଦିନ ମଧ୍ୟରେ ସେ ନ ଭାଙ୍ଗିବାରୁ ସିଏମସି ପକ୍ଷରୁ ଭଙ୍ଗା ଯାଇଛି । ଦୁର୍ଗା ପୂଜା ସମୟରେ ରାସ୍ତାଘାଟ ଭିଡ଼ ରହିବ । ତେଣୁ ଏପରି ବିପଦ ସଙ୍କୁଳ ଅବସ୍ଥାରେ ଥିବା ଘରକୁ ଭଙ୍ଗା ଯାଉଛି । କେଉଁ କେଉଁ ସ୍ଥାନରେ ଏଭଳି ଅସୁରକ୍ଷିତ ବିଲ୍ଡିଂ ରହିଛି ସେନେଇ ଚିହ୍ନଟ ଚାଲିଛି । ଏନେଇ ସବୁ ୱାର୍ଡ ବୁଲି ଦେଖାଯିବ ।"
ପ୍ରଥମେ ୭ଦିନ ନୋଟିସ ଦିଆଯିବ ଯଦି ଏହି ଦିଗରେ ଘର ମାଲିକ କୌଣସି ପକ୍ଷ ନ ରଖନ୍ତି, ତେବେ ସିଧାସଳଖ ଘରକୁ ନିଯେ ଭାଙ୍ଗିବ ସିଏମସି । ତେବେ କଟକ ହଜାର ବର୍ଷର ସହର ହୋଇଥିବାରୁ ଏଠାରେ ଅନେକ ପୁରୁଣା ବିଲ୍ଡିଂ ରହିଛି । ସେଗୁଡିକୁ ଚିହ୍ନଟ ଓ ପରେ ନୋଟିସ ଆଧାରରେ ସଙ୍ଗେସଙ୍ଗେ ଭଙ୍ଗାଯିବ ବୋଲି କହିଛନ୍ତି ଡେପୁଟି କମିଶନର ସିଏମସି ।
ଏହା ମଧ୍ୟ ପଢ଼ନ୍ତୁ: ନଭେମ୍ବର 8ରୁ ଐତିହାସିକ କଟକ ବାଲିଯାତ୍ରା, ଆଜିଠୁ ପ୍ଲଟ୍ ଆବଣ୍ଟନ
ପୂର୍ବରୁ ଏଭଳି ଅସୁରକ୍ଷିତ ଭାବେ ଠିଆ ହୋଇଥିବା ବିଲ୍ଡିଂ ଏବଂ ପାଚେରୀ ଯୋଗୁଁ ଅନେକ ମୃତ୍ୟୁ ଘଟିଛି । କଟକ ଜିଲ୍ଲା ଦେଉଳ ସାହି ରେଭେନ୍ୟୁ କଲୋନୀରେ ସଫେଇ କାର୍ଯ୍ୟ କରିବା ସମୟରେ ପାଚେରୀଟି ଭୁଶୁଡି ପଡିବାରୁ ତାଙ୍କର ମୃତ୍ୟୁ ହୋଇଥିଲା । ଦୀର୍ଘ ଦିନ ଧରି ପାଚେରୀଟି ଅସୁରକ୍ଷିତ ଅବସ୍ଥାରେ ରହିଥିଲା ।
ପୂର୍ବରୁ ମଧ୍ୟ ଏଭଳି ଏକ ଘଟଣା ଘଟିଥିବାବେଳେ ପାଚେରୀର ମରାମତି ପାଇଁ ନିର୍ଦ୍ଦେଶ ଦିଆଯାଇଥିବା ସତ୍ତ୍ବେ କାର୍ଯ୍ୟକାରୀ ହୋଇନଥିଲା । ତେବେ କର୍ତ୍ତୃପକ୍ଷଙ୍କ ଦାୟିତ୍ୱହୀନତା ପାଇଁ ସଫେଇ କର୍ମଚାରୀଙ୍କ ଜୀବନ ଯାଇଥିବା ସାଧାରଣରେ ବିବାଦ ଦେଖାଦେଇଥିଲା । ତେଣୁ ପୂଜା ଆଗରେ ଏସବୁ ପ୍ରତି ବିଶେଷ ଗୁରୁତ୍ବ ଦେଇଛି ସିଏମସି ।
ଇଟିଭି ଭାରତ, କଟକ
