ଲକ୍ଷ୍ନୌ: ଉତ୍ତର ପ୍ରଦେଶରେ ଏକ ଶୀତଳ ଭଣ୍ଡାରର ଭୁଶୁଡିଲା ଛାତ । ବର୍ତ୍ତମାନ ସୁଦ୍ଧା ୮ଜଣଙ୍କ ମୃତ୍ୟୁ ହୋଇଥିବା ସୂଚନା । କୋଠା ତଳେ ଅନେକ ଶ୍ରମିକ ଚାପି ହୋଇ ରହିଥିବା ବେଳେ ମୃତ୍ୟୁ ସଂଖ୍ୟା ବୃଦ୍ଧି ହେବା ନେଇ ଆଶଙ୍କା କରାଯାଇଛି । ଗୁରୁବାର ଦିନ ଜିଲ୍ଲାର ଚନ୍ଦୌସୀ ଅଞ୍ଚଳରେ ଏହି ଅଘଟଣ ହୋଇଛି ।

ସୂଚନାଅନୁସାରେ, ଗତକାଲି(ଗୁରୁବାର) ଚନ୍ଦୌସୀ ଅଞ୍ଚଳରେ ରହିଥିବା ଏକ ଶୀତଳ ଭଣ୍ଡାରରେ ଶ୍ରମିକମାନେ କାମ କରୁଥିବା ସମୟରେ ହଠାତ ଛାତ ଭୁଶୁଡି ପଡିଥିଲା । ଫଳରେ ୫୦ରୁ ଅଧିକ ଶ୍ରମିକ ଚାପି ହୋଇଯାଇଥିଲେ । ତେବେ ଏହା ଏକ ଆଳୁ ଶୀତଳ ଭଣ୍ଡାର ହୋଇଥିବା ସୂଚନା ମିଳିଛି । ଘଟଣା ସମ୍ପର୍କରେ ଖବରପାଇ ପୋଲିସ ଏବଂ ଏନଡିଆରଏଫ ଟିମ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିବା ବେଳେ ବର୍ତ୍ତମାନ ସୁଦ୍ଧା ୮ଜଣଙ୍କ ମୃତଦେହ ଉଦ୍ଧାର କରାଯାଇଛି । ତେବେ ବର୍ତ୍ତମାନ ସୁଦ୍ଧା ମଧ୍ୟ ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ମୃତ୍ୟୁ ସଂଖ୍ୟା ବୃଦ୍ଧି ହୋଇପାରେ ବୋଲି ଅନୁମାନ କରାଯାଉଛି ।

ଏନେଇ ମୁରାଦାବାଦର ଡିଆଉଇଜି ସଲଭ ମାଥୁର କହିଛନ୍ତି, "ସମ୍ବଲ ଶୀତଳ ଭଣ୍ଡାରରର ଛାତ ଭୁଶୁଡିବାରେ ଘଟଣାରେ ମୃତ୍ୟୁ ସଂଖ୍ୟା ୮କୁ ବୃଦ୍ଧି ପାଇଛି । କିଛି ଲୋକ ବର୍ତ୍ତମାନ ସୁଦ୍ଧା ଛାତ ତଳେ ଚାପି ହୋଇ ରହିଛନ୍ତି । NDRF ଏବଂ SDRF ଟିମ ଉଦ୍ଧାର କାର୍ଯ୍ୟ ଜାରି ରଖିଥିବା ବେଳେ ଏଯାଏଁ ୧୧ଜଣକୁ ସୁରକ୍ଷିତ ଭାବେ ଉଦ୍ଧାର କରାଯାଇଛି ।"

ଦୁଃଖପ୍ରକାଶ କଲେ ମୁଖ୍ୟମନ୍ତ୍ରୀ: ଚନ୍ଦୌସୀରେ ହୋଇଥିବା ଦୁର୍ଘଟଣାକୁ ନେଇ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଟ୍ବିଟ କରି ଦୁଃଖ ପ୍ରକାଶ କରିଛନ୍ତି । ସେ କହିଛନ୍ତି, "ଶୀତଳ ଭଣ୍ଡାରରେ ପ୍ରାଣ ହରାଇଥିବା ଖବର ଅତ୍ୟନ୍ତ ଦୁଃଖଦାୟକ । ଶୋକସନ୍ତପ୍ତ ପରିବାରକୁ ମୋର ସମବେଦନା । ପ୍ରଭୁ ଶ୍ରୀରାମ ମୃତକଙ୍କ ଆତ୍ମାଙ୍କୁ ନିଜ ଚରଣରେ ସ୍ଥାନ ଦିଅନ୍ତୁ । ଏଭଳି ସ୍ଥିତିରେ ମୃତକଙ୍କ ପରିବାରକୁ ଧୌର୍ଯ୍ୟ ରଖିବା ପାଇଁ ପ୍ରଭୁ ସାହାସ ଦିଅନ୍ତୁ । ଓଁ ଶାନ୍ତି!"

ପ୍ରକାଶଥାଉକି, ଶୀତଳଭଣ୍ଡାର କୋଠା ଭୁଶୁଡିବାକୁ ୨୧ ଘଣ୍ଟା ପୁରୁଥିଲେ ସୁଦ୍ଧା ବର୍ତ୍ତମାନ ସୁଦ୍ଧା ଉଦ୍ଧାର କାର୍ଯ୍ୟ ଶେଷ ହୋଇପାରି ନାହିଁ । ଚନ୍ଦୌସୀ ପୋଲିସ ଶୀତଳ ଭଣ୍ଡାରର ମାଲିକଙ୍କ ନାଁରେ ମାମଲା ରୁଜୁ କରିବା ସହ ତଦନ୍ତ ଆରମ୍ଭ କରିଛି । ଆହତମାନଙ୍କୁ ମୋରଦାବାଦ ହସ୍ପିଟାଲରେ ଚିକିତ୍ସା କରାଯାଇଥିବା ନେଇ ଜିଲ୍ଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି । ଉଦ୍ଧାର କାର୍ଯ୍ୟରେ ଅନେକ ଜେସିବି ମେସିନ ମଧ୍ୟ ଲାଗିଛି । ଚାରି ହୋଇ ରହିଥିବା ଶ୍ରମିକଙ୍କୁ ଖୋଜିବା ପାଇଁ ସନ୍ଧାନୀ କୁକୁର ମଧ୍ୟ ଲାଗିଥିବା ଜିଲ୍ଲାପ୍ରଶାସନ ପକ୍ଷରୁ କୁହାଯାଇଛି ।

ବ୍ୟୁରୋ ରିପୋର୍ଟ, ଇଟିଭି ଭାରତ