ନୂଆଦିଲ୍ଲୀ: ଆସନ୍ତା ୨୭ ତାରିଖରେ ଜାପାନ ଗସ୍ତରେ ଯିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଜାପାନର ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କ ରାଷ୍ଟ୍ରୀୟ ଅନ୍ତିମ ସଂସ୍କାର କାର୍ଯ୍ୟକ୍ରରେ ସାମିଲ ହେବେ ପ୍ରଧାନମନ୍ତ୍ରୀ । ଏହି ଗସ୍ତରେ ଜାପାନ ପ୍ରଧାନମନ୍ତ୍ରୀ ଫୁମିଓ କିଶିଦାଙ୍କୁ ପୃଥକ ଭାବରେ ଭେଟିବାର କାର୍ଯ୍ୟକ୍ରମ ରହିଛି । ଜୁଲାଇ ୮ ତାରିଖରେ ଏକ ନିର୍ବାଚନୀ ରାଲିରେ ଭାଷଣ ଦେବା ସମୟରେ ସିଞ୍ଜୋ ଆବେଙ୍କୁ ଗୁଳି କରି ହତ୍ୟା କରାଯାଇଥିଲା ।
ଜାପାନର ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କ ଦେହନ୍ତକୁ ୨ ମାସ ବିତିଥିଲେ ମଧ୍ୟ ଏଯାଏଁ ତାଙ୍କ ରାଷ୍ଟ୍ରୀୟ ଅନ୍ତ୍ୟେଷ୍ଟି କାର୍ଯ୍ୟକ୍ରମ ଆୟୋଜିତ ହୋଇନାହିଁ । ସେପଟେ ଆବେଙ୍କ ଏହି ରାଷ୍ଟ୍ରୀୟ ଅନ୍ତ୍ୟେଷ୍ଟି କ୍ରିୟାକୁ ବିରୋଧ କରି ବିବାଦ ଲାଗି ରହିଛି । ଦୁଇଦିନ ତଳେ ଆବେଙ୍କ ଅନ୍ତ୍ୟେଷ୍ଟି କ୍ରିୟାକୁ ବିରୋଧ କରି ଜଣେ ବରିଷ୍ଠ ନାଗରିକ ନିଜକୁ ନିଆଁ ଲଗାଇ ଦେଇଥିଲେ । ଅନ୍ତିମ ସଂସ୍କାର କାର୍ଯ୍ୟକ୍ରମରେ ସରକାର ପାଖାପାଖି ୯୧୦ କୋଟି ଟଙ୍କା ଖର୍ଚ୍ଚ କରିବାକୁ ଥିବାରୁ ଲୋକ ଏହାକୁ ବିରୋଧ କରୁଛନ୍ତି ।
ଏହା ବି ପଢନ୍ତୁ...NIAର ଆକ୍ସନ ପରେ କେରଳରେ PFIର ହରତାଳ: ଗାଡି ଭଙ୍ଗାରୁଜା, 2 ପୋଲିସ ଆହତ
ଦେଶର ପ୍ରାୟ ୫୬ ପ୍ରତିଶତ ଲୋକ ଆବେଙ୍କ ଅନ୍ତ୍ୟେଷ୍ଟି କ୍ରିୟାରେ ଏତେ ଟଙ୍କା ଖର୍ଚ୍ଚକୁ ବିରୋଧ କରୁଛନ୍ତି । ଏପରିକି ଟୋକିଓରେ ଏକ କୋର୍ଟରେ ପିଟିସନ ଦାୟର ହୋଇଛି । ଜନତାଙ୍କ ଟଙ୍କାକୁ ନଷ୍ଟ ନ କରିବାକୁ ପିଟିସନରେ ଉଲ୍ଲେଖ ରହିଛି । ସିଞ୍ଜୋ ଆବେଙ୍କ ସହ ଭାରତର ଭଲ ସମ୍ପର୍କ ରହିଥିଲା । ସେ ଜାପାନର ସବୁଠୁ ଅଧିକ ସମୟ ଥିବା ଜଣେ ପ୍ରଧାନମନ୍ତ୍ରୀ ।
ଜୁଲାଇ ୮ ତାରିଖରେ ଜାପାନର ନାରା ସହରରେ ଭାଷଣ ଦେଉଥିବାବେଳେ, ସିଞ୍ଜୋଙ୍କୁ ଗୁଳିମାଡ଼ ହୋଇଥିଲା । ହଠାତ୍ ପଛପଟୁ ତାଙ୍କ ଉପରକୁ ଜଣେ ବ୍ୟକ୍ତି ଅତର୍କିତ ଭାବେ ୨ ରାଉଣ୍ଡ ଗୁଳି ଚଳାଇଥିଲା । ୬୭ ବର୍ଷ ବୟସରେ ସିଞ୍ଜୋ ଆବେଙ୍କ ଦେହାନ୍ତ ହୋଇଥିଲା । ଘଟଣା ସମସ୍ତଙ୍କୁ ସ୍ତବ୍ଧ କରିଥିଲା । ଭାରତ ଓ ଜାପାନ ବନ୍ଧୁତାର ଚମ୍ପିଅନ ଥିଲେ ସିଞ୍ଜୋ ଆବେ । ଜଣେ ପ୍ରିୟ ବନ୍ଧୁଙ୍କୁ ହରାଇଥିବା କହି ପ୍ରଧାନମନ୍ତ୍ରୀ ମୋଦି ଦୁଃଖ ପ୍ରକାଶ କରିଥିଲେ ।
