ନୂଆଦିଲ୍ଲୀ: ଫିକା ପଡୁଛି ପାର୍ବଣ । ଦେଶରେ ବଢି ଚାଲିଛି ତୈଳ ତାତି । ପେଟ୍ରୋଲ-ଡିଜେଲ ଦରରେ ଲଗାଣ ବୃଦ୍ଧିରେ ହନ୍ତସନ୍ତ ସାଧାରଣ ଖାଉଟି । ଦୁଇ ଦିନର ସ୍ଥିରତା ପରେ ପୁଣି ମହଙ୍ଗା ହୋଇଛି ତୈଳ ଦର । ଆଜି(ଗୁରୁବାର) ଦେଶରେ ପେଟ୍ରୋଲ-ଡିଜେଲ ଦର ବଢାଇଛନ୍ତି ରାଷ୍ଟ୍ରାୟତ୍ତ ତୈଳ କମ୍ପାନୀ ।
ସୂଚନା ମୁତାବକ, ପେଟ୍ରୋଲ-ଡିଜେଲ ଦରରେ ୩୦-୩୫ ପଇସା ବୃଦ୍ଧି ହୋଇଛି । ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ଆଜି ପେଟ୍ରୋଲ ଦାମ୍ ପ୍ରତି ଲିଟର ପିଛା ୧୦୪.୭୯ ଟଙ୍କା ଏବଂ ଡିଜେଲ ଦର ୯୩.୫୪ ଟଙ୍କା ରହିଛି । ସେହିପରି ମୁମ୍ବାଇରେ ପେଟ୍ରୋଲ ୧୧୦.୭୪ ଟଙ୍କା ଏବଂ ଡିଜେଲ ୧୦୧.୪୦ ଟଙ୍କାରେ ବିକ୍ରି ହେଉଛି । ଯଦି ପାଟନା କଥା କହିବା ତାହାହେଲେ, ଏଠାରେ ଦର ଯଥାକ୍ରମେ ୧୦୮.୦୪ ଏବଂ ୧୦୦.୦୭ ଟଙ୍କା ରହିଛି ।
କୋଲକାତାରେ ପେଟ୍ରୋଲ ରେଟ୍ ଲିଟର ପିଛା ୧୦୫ ଟଙ୍କା ଏବଂ ଡିଜେଲ ୯୬.୬୩ ଟଙ୍କାରେ ବିକ୍ରି ହେଉଛି । ଚେନ୍ନାଇରେ ପେଟ୍ରୋଲ ୧୦୨.୧୦ ଟଙ୍କାରେ ମିଳୁଥିବାବେଳେ ଡିଜେଲ ମଧ୍ୟ ୯୭.୯୩ ଟଙ୍କା ସହ ଶତକ ମୁହାଁ ହୋଇଛି ।
ଦେଶର ପ୍ରମୁଖ ସହରଗୁଡିକୁ ବିଚାରକୁ ନେଲେ, ବାଣିଜ୍ୟ ନଗରୀ କୁହାଯାଉଥିବା ମୁମ୍ବାଇରେ ପେଟ୍ରୋଲ ସବୁଠୁ ଅଧିକ ୧୦୭ ଟଙ୍କା ଲିଟର ପିଛା ବିକ୍ରି ହେଉଛି । ଏହାବ୍ୟତୀତ ଅନେକ ରାଜ୍ୟରେ ମଧ୍ୟ ପେଟ୍ରୋଲ ଶତକ ପାର୍ କରିଥିବାବେଳେ ଡିଜେଲ ମଧ୍ୟ ଲିଷ୍ଟରେ ସାମିଲ ହେବାକୁ ପ୍ରସ୍ତୁତ ହେଉଛି ।
| ସହର | ପେଟ୍ରୋଲ ଦର | ଡିଜେଲ ଦର |
| ଦିଲ୍ଲୀ | ₹104.79 | ₹93.54 |
| ମୁମ୍ବାଇ | ₹110.75 | ₹101.40 |
| କୋଲକାତା | ₹105.43 | ₹96.63 |
| ଚେନ୍ନାଇ | ₹102.10 | ₹97.93 |
| ବେଙ୍ଗାଲୁରୁ | ₹108.44 | ₹99.26 |
| ଭୋପାଳ | ₹117.52 | ₹113.37 |
| ଲକ୍ଷ୍ନୌ | ₹101.81 | ₹93.96 |
| ପାଟନା | ₹108.04 | ₹100.07 |
| ଚଣ୍ଡୀଗଡ | ₹100.86 | ₹93.34 |
ତେବେ ଆପଣ ନିଜ ସହରର ପେଟ୍ରୋଲ-ଡିଜେଲ ଦର ଜାଣିବାକୁ ଚାହୁଁଥିଲେ, ଘରେ ବସି ମଧ୍ୟ ଏ ସମ୍ପର୍କରେ ଜାଣିପାରିବେ । ଏଥିପାଇଁ ଆପଣକୁ ଇଣ୍ଡିଆନ ଅଏଲ ୱେବସାଇଟକୁ ଯିବାକୁ ପଡିବ । ଏହାପରେ ଆପଣଙ୍କୁ RSP ଏବଂ ନିଜ ସହରର କୋଡ୍ ଲେଖି 9224992249 ନମ୍ବରରେ ପଠାଇବାକୁ ହେବ । ସବୁ ସହରର କୋଡ୍ ଭିନ୍ନ ଭିନ୍ନ ହୋଇଥାଏ, ଯାହା IOCL ୱେବସାଇଟରେ ଆପଣ ପାଇପାରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
