ବେଙ୍ଗାଲୁରୁ ବର୍ଷା ପାଣିରେ ଭାସିଗଲା ସୁନା ଗହଣା । ହଜାର କି ଲକ୍ଷେ ନୁହେଁ ଏକାଥରେ ୨ କୋଟି ଟଙ୍କାର ସୁନା ଅଳଙ୍କାର ଭସାଇ ନେଲା ବର୍ଷା । ଏଭଳି ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି ବେଙ୍ଗାଲୁରୁରୁ । ଦୁଇ ଦିନ ଧରି ପ୍ରବଳ ବର୍ଷା ପବନରେ ବେହାଲ ହୋଇପଡିଥିବା ବେଙ୍ଗାଲୁରୁ ସହରର ଗୋଟିଏ ସୁନା ଦୋକାନରୁ ପାଖାପାଖି ୨ କୋଟି ଟଙ୍କାର ସୁନାଗହଣା ଭାସି ଯାଇଥିବା ଖବର ମିଳିଛି । ମାଲେଶ୍ବର ଅଞ୍ଚଳରେ ଥିବା ନିହାନ ନାମକ ସୁନା ଦୋକାନରେ ଏଭଳି ଘଟିଛି ।ଯାହା ସୂଚନା ମିଳିଛି ପ୍ରବଳ ବର୍ଷା ଯୋଗୁଁ ଦୋକାନ ଭିତରେ ପାଣି ମାଡି ଯାଇଥିଲା । ପାଣି ସହିତ ଅଳିଆ ଆବର୍ଜନା ସବୁ ଦୋକାନରେ ଭର୍ତ୍ତି ହୋଇଯାଇଥିଲା । ଯେଉଁ କାରଣରୁ କର୍ମଚାରୀମାନେ ଆଉ ସଟର ବନ୍ଦ କରିପାରି ନଥିଲେ । ଫଳରେ ବର୍ଷାଜଳରେ କୋଟିକୋଟି ଟଙ୍କାର ସୁନାଗହଣା ଭାସି ଯାଇଥିଲା । ଦୋକାନ ମାଲିକଙ୍କ କହିବା ଅନୁସାରେ କିଛି ଦିନ ହେଲା ତାଙ୍କ ଦୋକାନ ନିକଟରେ ଖନନ କାର୍ଯ୍ୟ ଚାଲିଛି । ଯେଉଁ କାରଣରୁ ଏଭଳି କ୍ଷତି ହୋଇଛି । ବର୍ଷାପାଣି ଦୋକାନରେ ପଶିବା ପରେ ଅଳଙ୍କାର ଗୁଡିକ ଓଦା ହୋଇଯାଇଥିଲା । ସହୟତା ପାଇଁ ସେ ମ୍ୟୁନିସିପାଲିଟିକୁ ଯୋଗାଯୋଗ କରିଥିଲେ । କିନ୍ତୁ ସାହାଯ୍ୟ କରିବାକୁ କୌଣସି କର୍ମଚାରୀ ଆସିନଥିଲେ । ଫଳରେ ବର୍ଷାଜଳରେ ଦୋକାନରେ ଥିବା ୮୦ ଭାଗ ଅଳଙ୍କାର ଭାସି ଯାଇଛି । ଯାହାର ମୂଲ୍ୟ ପ୍ରାୟ ୨ କୋଟି ଟଙ୍କା ହେବ ବୋଲି ମାଲିକ କହିଛନ୍ତି । ଏହାମଧ୍ୟ ପଢନ୍ତୁ Karnataka Rain କର୍ଣ୍ଣାଟକରେ ବର୍ଷା ବିତ୍ପାତ ବିଭିନ୍ନ ସ୍ଥାନରେ 7 ମୃତ ଲଗାଣ ବର୍ଷା ଓ ଝଡ ତୋଫାନରେ ବେହାଲ ହୋଇପଡିଛି ବେଙ୍ଗାଲୁରୁ । ଦୁଇ ଦିନ ଧରି ବର୍ଷା ବିଭୀଷିକା ଯୋଗୁଁ ସହରରେ ବ୍ୟାପକ କ୍ଷୟକ୍ଷତି ହୋଇଛି । ରାସ୍ତାଘାଟ ଜଳମଗ୍ନ ଥିବାରୁ ଟ୍ରାଫିକ ସମସ୍ୟା ସୃଷ୍ଟି ହୋଇଛି । ସେହିପରି ଝଡ ତୋଫାନରେ ସହରର ବିଭିନ୍ନ ଅଞ୍ଚଳରେ ୬୦୦ରୁ ଅଧିକ ଗଛ ଭାଙ୍ଗି ଯାଇଥିବା ବେଳେ ୨୦ଟି ଘର ପାଣି ଘେରରେ ରହିଛି । ଘରେ ପାଣି ମାଡି ଯାଇଥିବାରୁ ଶତାଧିକ ଲୋକେ ଦୁର୍ଦ୍ଦଶାରେ ଦିନ କାଟୁଛନ୍ତି । ଘରର ସମସ୍ତ ଆସବାବପତ୍ର ଓ ଖାଦ୍ୟ ସାମଗ୍ରୀ ପାଣିରେ ଉବୁଟୁବୁ ହେଉଛି । ବର୍ଷା ବିତ୍ପାତରେ ଏବେସୁଦ୍ଧା ରାଜ୍ୟର ବିଭିନ୍ନ ସ୍ଥାନରେ ୭ ଜଣଙ୍କର ମୃତ୍ୟୁ ହୋଇଥିବା ଖବର ଆସିଛି । ଅଧିକାଂଶ ମୃତ୍ୟୁ ବଜ୍ରାଘାତ ଯୋଗୁଁ ହୋଇଛି । ଆହୁରି 45 ଦିନ କର୍ଣ୍ଣାଟକରେ ଏଭଳି ପାଗ ଜାରି ରହିବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ । ବ୍ୟୁରୋ ରିପୋର୍ଟ ଇଟିଭି ଭାରତ