ଥିରୁଅନନ୍ତପୁରମ: ହିନ୍ଦୀରେ ଗୋଟିଏ କଥା ଅଛି "ଉପରୱାଲା ଜବ୍ ଭି ଦେତା ହୈ, ଛପଡ଼ ଫାଡ଼୍କେ ଦେତା ହୈ ।" ଏହାର ଏକ ଉଦାହରଣ କେରଳରେ ଦେଖିବାକୁ ମିଳିଛି । ଏଠାରେ ଜଣେ ଅଟୋ ଚାଳକ ୨୫ କୋଟି ଟଙ୍କାର ଓନାମ୍ ବମ୍ପର ଲଟେରୀ ଜିତିଛନ୍ତି (Auto driver cum chef wons 25 crore rupees )। ଯିଏକି ମାଲେସିଆ ଯାଇ ଜଣେ ରୋଷେୟା ଭାବେ କାର୍ଯ୍ୟ କରିବାକୁ ୩ ଲକ୍ଷ ଟଙ୍କାର ଲୋନ୍ ଆବେଦନ କରିଥିଲେ ।
କେରଳର ଶ୍ରୀବରହମ୍ ଅଞ୍ଚଳ ବାସିନ୍ଦା ହେଉଛନ୍ତି ଲଟେରୀ ବିଜେତା ଅନୁପ । ଅନୁପ ଦୀର୍ଘ ୨୨ ବର୍ଷ ହେଲା ଲଟେରୀ ଟିକେଟ୍ କିଣି ଆସୁଛନ୍ତି । ଏଥର ଲେଟେରୀ ଟିକେଟ କିଣିବା ପୂର୍ବରୁ ସେ କିଛି ନିଆରା ନମ୍ବର କିଣି ନେବେ ବୋଲି ଭାବିଥିଲେ । ଅନୁପ୍ଙ୍କ ଲେଟେରୀ ନମ୍ବର ହେଉଛି TJ 750605 । ଗତ ଶନିବାର ଲଟେରୀ ଟିକେଟ୍ ବିଜେତାଙ୍କ ନାମ ଘୋଷଣା ହୋଇଥିଲା । ଅନୁପ ଏହି ଲଟେରୀର ପ୍ରଥମ ବିଜେତା ଭାବରେ ୨୫ କୋଟି ଟଙ୍କା ଜିତିଛନ୍ତି । ତେବେ ଲଟେରୀ ଟିକେଟ କିଣିବା ପାଇଁ ତାଙ୍କ ପାଖରେ ଅର୍ଥର ଅଭାବ ରହିଥିଲା ଏବଂ ସେ ତାଙ୍କ କୁମ୍ପି ଭାଙ୍ଗି ଟଙ୍କା ଯୋଗାଡ କରି ଲଟେରୀ ଟିକେଟ କଣିଥିଲେ । ସେ 50 ଟଙ୍କା ଦେଇ ଗୋଟିଏ ଟିକେଟ କିଣିଥିଲେ ।
ଲଟେରୀ ଜିତିବା ପରେ ଅନୁପଙ୍କୁ ବ୍ୟାଙ୍କ୍ ଆପ୍ରୁଭ୍ ହୋଇଥିବା ନେଇ ବ୍ୟାଙ୍କ୍ରୁ ଫୋନ୍ ଆସିଥିଲା । ତେବେ ସେ ଲୋନ୍ ନେବାକୁ ମନା କରି ଦେଇଛନ୍ତି । ଏହାପରେ ସେ ମାଲେସିଆ ଯିବା ଯୋଜନାକୁ ମଧ୍ୟ ବଦଳାଇ ଦେଇଛନ୍ତି । ଏହାପୂର୍ବରୁ କିଣୁଥିବା ଲଟେରୀ ଟିକେଟ୍ରେ ଅନୁପଙ୍କୁ କେବଳ ୧୦୦, ୫୦୦ ଅଧିକରୁ ଅଧିକ ୫୦୦୦ ଟଙ୍କା ପୁରସ୍କାର ଭାବରେ ମିଳିଥିଲା ।
ଏହାକୁ ନେଇ ଅନୁପ କହିଛନ୍ତି, "ମୁଁ ଲଟେରୀ ଜିତିବି ବୋଲି ମୋର ଆଶା ନଥିଲା । ଏଥିପାଇଁ ମୁଁ ଟିଭିରେ ଲଟେରୀ ରେଜଲ୍ଟ ଦେଖୁନଥିଲି । କିନ୍ତୁ ଲଟେରୀ ଜିତିଥିବା ନେଇ ମୁଁ ମୋ ଫୋନ୍ରେ ଏକ ମେସେଜ୍ ପାଇଥିଲି । ଏହାକୁ ମୁଁ ମୋର ପତ୍ନୀଙ୍କୁ ଦେଖାଇଥିଲି । ସେ ମଧ୍ୟ ଲେଟେରୀ ଟିକେଟ ନମ୍ବର ମିଶାଇ ଆମେ ଟଙ୍କା ଜିତିଥିବା କଥା କହିଥିଲେ ।"
୨୫ କୋଟି ଲଟେରୀ ଟଙ୍କା ମଧ୍ୟରୁ ଅନୁପ୍ଙ୍କୁ ଟ୍ୟାକ୍ସ କାଟି ୧୫ କୋଟି ଟଙ୍କା ମିଳିବ । ଏହି ଟଙ୍କାରେ ସେ କେରଳରେ ଏକ ହୋଟେଲ୍ ବ୍ୟବସାୟ ଆରମ୍ଭ କରିବେ ବୋଲି କହିଛନ୍ତି । ତା ସହିତ କିଛି ଟଙ୍କାରେ ସେ ବାକି ସୁଝିବା ସହ ପରିଜନଙ୍କୁ ସହାୟତା କରିବେ ବୋଲି କହିଛନ୍ତି । ଏହାପରେ କିଛି ଟଙ୍କା ଦାନ କରିବେ ଓ ନିଜ ଘର ତିଆରି କରିବେ ବୋଲି କହିଛନ୍ତି । ଏହାପରେ ସେ ପୁଣି ଆଉ ଏକ ଲଟେରୀ ଟିକେଟ କିଣିବେ ବୋଲି କହିଛନ୍ତି ।
ଅନୁପ ପ୍ରଥମ ବିଜେତା ଭାବରେ ୨୫ କୋଟି ଟଙ୍କା ଜିତିଥିବା ବେଳେ ଦ୍ବିତୀୟ ବିଜେତାଙ୍କୁ ଏହି ଲଟେରୀ ମାଧ୍ୟମରେ ୫ କୋଟି ଟଙ୍କା ମିଳିବ । ଅନ୍ୟ ୧୦ ଜଣଙ୍କୁ ଏହି ଲଟେରୀ ମାଧ୍ୟମରେ କୋଟିଏ ଟଙ୍କା ଲେଖାଏଁ ପୁରସ୍କାର ଦିଆଯିବ । ଗତ ବର୍ଷ ଆଉ ଜଣ ଅଟୋ ଚାଳକ ୧୨ କୋଟି ଟଙ୍କା ଓନାମ୍ ଲଟେରୀ ପୁରସ୍କାର ଜିତିଥିଲେ ।
