ମାଲକାନଗିରି: ଘାଟି ରାସ୍ତାରୁ ୫ ଫୁଟର ମଗର କୁମ୍ଭୀର ଉଦ୍ଧାର । ମାଲକାନଗିରି ଜିଲ୍ଲା ବାଲିମେଳା-ଚିତ୍ରକୋଣ୍ଡା ଘାଟି ରାସ୍ତାରେ ଦେଖିବାକୁ ମିଳିଛି ଏକ ୫ ଫୁଟର ମଗର କୁମ୍ଭୀର । ଗତକାଲି (ସୋମବାର) ରାତିରେ କୁମ୍ଭୀରଟିକୁ ଦେଖିବା ପରେ ସ୍ଥାନୀୟ ଲୋକେ ତୁରନ୍ତ ବନ ବିଭାଗକୁ ଖବର ଦେଇଥିଲେ । ବନ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ସୁରକ୍ଷିତ ଭାବେ ତାକୁ ଉଦ୍ଧାର କରିଥିଲେ । 

ମାଲକାନଗିରି ଡିଏଫଓ ଡି.ସାଇ କିରନଙ୍କ ସୂଚନା ମୁତାବକ," ଗତକାଲି ବାଲିମେଳା-ଚିତ୍ରକୋଣ୍ଡା ଘାଟି ରାସ୍ତାରେ ଏକ ୫ ଫୁଟ୍ ଲମ୍ବର ମଗର କୁମ୍ଭୀର ବୁଲୁଥିବାର ସ୍ଥାନୀୟ ଲୋକେ ଦେଖିବାକୁ ପାଇଥିଲେ ।ଏହାପରେ ସେମାନେ ତୁରନ୍ତ ବନ ବିଭାଗକୁ ଖବର ଦେଇଥିଲେ । ଖବର ପାଇ ବନ ବିଭାଗର ସ୍ପେଶାଲ ଫିଲ୍ଡ ଷ୍ଟାଫ୍ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ଅନେକ ପରିଶ୍ରମ ପରେ କୁମ୍ଭୀରଟିକୁ କୌଣସି କ୍ଷତି ନ ପହଞ୍ଚାଇ ସୁରକ୍ଷିତ ଭାବେ କାବୁ କରାଯାଇଛି । ତାକୁ ବର୍ତ୍ତମାନ ଡାକ୍ତରୀ ନିରୀକ୍ଷଣରେ ରଖାଯାଇଛି । ସରକାରୀ ନିୟମ ଅନୁଯାୟୀ, ସ୍ୱାସ୍ଥ୍ୟ ପରୀକ୍ଷା ପରେ କୁମ୍ଭୀରଟି ସମ୍ପୂର୍ଣ୍ଣ ସୁସ୍ଥ ଥିବା ସ୍ପଷ୍ଟ ହେଲେ ତାକୁ ପୁଣି ଥରେ ତାର ପ୍ରାକୃତିକ ପରିବେଶକୁ ଛାଡ଼ି ଦିଆଯିବ ।"

ଇଟିଭି ଭାରତ, ମାଲକାନଗିରି