WhatsAppରେ ଆସିଲା ନୂଆ ଫିଚର୍ସ, ଗ୍ରୁପ ଚାର୍ଟ ହେବ ଆହୁରି ମଜାଦାର

ହାଇଦ୍ରାବାଦ: ଲୋକପ୍ରିୟ ମେସେଜିଂ ପ୍ଲାଟଫର୍ମ ହ୍ବାଟସ୍ ଆପ୍(WhatsApp)ଗ୍ରୁପ ଚାଟ୍ସକୁ ନେଇ କିଛି ନୂଆ ଫିଚର୍ସ ଲଞ୍ଚ କରିଛି । ଏହା ମଧ୍ୟରେ ମେମ୍ବର ଟ୍ୟାଗ୍(Member Tag), ଟେକ୍ସଟ ଷ୍ଟିକରସ୍ (Text Stickers) ଏବଂ ଇଭେଣ୍ଟ ରିମାଇଣ୍ଡର (Event Reminder) ଭଳି ଫିଚର ରହିଛି । ଏହି ନୂଆ ଫିଚର୍ସ ୟୁଜର୍ସଙ୍କ ଗ୍ରୁପ୍ ଚାଟର ଅନୁଭବକୁ ବଢାଇବାରେ ସାହାଯ୍ୟ କରିବ ବୋଲି ମେଟା ଦ୍ବାରା ଅଧିକୃତ ଏହି କମ୍ପାନୀ କହିଛି । ଏହା ଦ୍ବାରା ବ୍ୟକ୍ତି ନିଜକୁ ଗ୍ରୁପରେ ଅତି ସହଜରେ ଓ ଭିନ୍ନ ଉପାୟରେ ଉପସ୍ଥାପିତ କରିପାରିବେ ।

ଏହି ଅପ୍‌ଡେଟ ମଧ୍ୟରେ ଆପଣ ଗ୍ରୁପ୍‌ରେ 2 GB ପର୍ଯ୍ୟନ୍ତ HD କ୍ବାଲିଟିର ମିଡିଆ ଆଦାନପ୍ରଦାନ କରିପାରିବେ । ସ୍କ୍ରିନ ସେୟାର, ଭଏସ୍ ଚାଟ ସହିତ ଆହୁରି ଅନେକ ନୂଆ ଫିଚର ଏହି ଗ୍ରୁପ୍ ଚାଟ୍ସରେ ଆପଣ ବ୍ୟବହାର କରିପାରିବେ । ଏହା ୟୁଜର୍ସଙ୍କୁ ଗ୍ରୁପ୍ ଚାଟର ଅନୁଭବକୁ ଆହୁରି ଉନ୍ନତ କରିବ ବୋଲି କୁହାଯାଇଛି । ଚାଲନ୍ତୁ ଦେଖିବା ଏହି ଅପ୍‌ଡେଟ ସହିତ କେଉଁ ନୂଆ ଫିଚର୍ସ ସବୁ ଆସିଛି ।

ମେମ୍ବର ଟ୍ୟାଗ (Member Tag):

ବେଳେ ବେଳେ କୌଣସି ଗ୍ରୁପରେ ଆପଣ କିଛି ସଦସ୍ୟଙ୍କୁ ଜାଣିନଥାନ୍ତି । ଏହା ଫଳରେ କିଛି ମାତ୍ରାରେ ଦ୍ବନ୍ଦ୍ବ ମଧ୍ୟ ସୃଷ୍ଟି ହୋଇଥାଏ । ଏହାର ସମାଧାନ ପାଇଁ ହ୍ବାଟସ୍ ଆପ୍ ମେମ୍ବର ଟ୍ୟାଗ ଭଳି ଫିଚର ଲଞ୍ଚ କରିଛି । ଏହା ଦ୍ବାରା ୟୁଜର୍ସ ନିଜକୁ ଏକ ଟ୍ୟାଗ ଦେଇପାରିବେ, ଯାହା ଗ୍ରୁପ୍ ସଦସ୍ୟଙ୍କୁ ପରସ୍ପରକୁ ଚିହ୍ନିବାରେ ସାହାଯ୍ୟ କରିବ । ଏହି ଟ୍ୟାଗକୁ ଆପଣ ନିଜ ମୁତାବକ ମଜାଦାର ମଧ୍ୟ ବନାଇପାରିବେ । ଉଦାହରଣ ସ୍ବରୁପ: 'ଦ ପ୍ଲାନର' କିମ୍ବା 'ଦାୟିତ୍ବବାନ ସଦସ୍ୟ' ଭଳି ଟ୍ୟାଗ ନିଜ ପାଇଁ ରଖିପାରିବେ ।

ଆପଣ ବିଭିନ୍ନ ଗ୍ରୁପ୍‌ରେ ନିଜର ଭିନ୍ନ ଭିନ୍ନ ଟ୍ୟାଗ୍ ଚୟନ କରିପାରିବେ । ଉଦାହରଣ ସ୍ବରୁପ ଆପଣ ନିଜ ସାଙ୍ଗ ଗ୍ରୁପ୍‌ରେ ନିଜର ଟ୍ୟାଗ୍ 'ଦ ପ୍ଲାନର' ରଖିବା ସହିତ ଆପଣଙ୍କ ଖେଳୁଥିବା ଖେଳସାଥୀଙ୍କ ଗ୍ରୁପ୍‌ରେ ନିଜର ଟ୍ୟାଗ୍ 'ଗୋଲକିପର' ରଖିପାରିବେ ।

ହ୍ବାଟସ୍ ଆପ୍ ଗ୍ରୁପ୍‌ରେ ଟେକ୍ସଟ ଷ୍ଟିକର(Text Stickers):

ଆମର ଦୈନନ୍ଦିନ ଜୀବନରେ ମେସେଜ କରିବା ସମୟରେ ଷ୍ଟିକର ଏକ ବହୁ ଗୁରୁତ୍ବପୂର୍ଣ୍ଣ ଅଂଶ ହୋଇପଡିଛି । ଯେଉଁଥିପାଇଁ ହ୍ବାଟସ୍ ଆପ୍ ଟେକ୍ସଟ ମେସେଜକୁ ଷ୍ଟିକରରେ ପରିବର୍ତ୍ତନ କରିବାର ଫିଚର ଆଣିଛି । ଯାହା ଦ୍ବାରା ଆପଣଙ୍କ ମେସେଜ ଗ୍ରୁପ୍‌ରେ ସମସ୍ତଙ୍କ ଠାରୁ ଟିକେ ନିଆରା ଲାଗିବ । ୟୁଜର୍ସମାନେ ସହଜରେ ନିଜର ଟେକ୍ସଟ ଲେଖି ନିଜ ପସନ୍ଦ ହିସାବରେ ଷ୍ଟିକର ବିକଳ୍ପ ବାଛି ଗ୍ରୁପ୍ ଚାଟ୍‌ରେ ପଠାଇପାରିବେ ।

ଇଭେଣ୍ଟ ରିମାଇଣ୍ଡର:

ହ୍ବାଟସ୍ ଆପ୍ ପ୍ରଥମ ଥର ପାଇଁ ଗ୍ରୁପ୍ ଚାଟ୍‌ରେ ଇଭେଣ୍ଟ ରିମାଇଣ୍ଡର ଭଳି ଫିଚର ଆଣିବାକୁ ଯାଉଛି । ଯାହା ଆପଣଙ୍କ କୌଣସି ଇଭେଣ୍ଟ ପ୍ଲାନିଂର ଅନୁଭବକୁ ଆହୁରି ମଧୁର କରିବ । ୟୁଜର୍ସ ନିଜ ମୁତାବକ ଆଗୁଆ ରିମାଇଣ୍ଡର ସେଟ୍ କରିପାରିବେ । ଆପଣଙ୍କ ପାର୍ଟିରେ ଯେଉଁ ସଦସ୍ୟଙ୍କୁ ଆମନ୍ତ୍ରଣ କରିବାକୁ ଚାହୁଁଛନ୍ତି ତାଙ୍କୁ ମଧ୍ୟ ଇଭେଣ୍ଟ ରିମାଇଣ୍ଡର ମାଧ୍ୟମରେ ନିମନ୍ତ୍ରଣ କରିପାରିବେ । ଏହା ସହିତ ସଦସ୍ୟଙ୍କୁ ଇଭେଣ୍ଟର ସମୟ, ତାରିଖ ଓ ସ୍ଥାନ ବିଷୟରେ ମଧ୍ୟ ସୂଚନା ଦେଇପାରିବେ ।