ଆପଲ୍ କଲା ବଡ଼ ଘୋଷଣା: ସେପ୍ଟେମ୍ବର 9ରେ ଲଞ୍ଚ୍ ହେବ iPhone 18 Pro ଏବଂ ପ୍ରଥମ ଫୋଲ୍ଡେବଲ୍ ଆଇଫୋନ୍!

ହାଇଦ୍ରାବାଦ: ଆପଲ୍ ନିଜର ପରବର୍ତ୍ତୀ ବଡ଼ ଆଇଫୋନ ଲଞ୍ଚ ଇଭେଣ୍ଟର ତାରିଖ ଆନୁଷ୍ଠାନିକ ଭାବେ ଘୋଷଣା କରିଦେଇଛି । କମ୍ପାନୀ 9 ସେପ୍ଟମ୍ବର 2026ରେ ଏହି ଇଭେଣ୍ଟ ଆୟୋଜନ କରିବାକୁ ଯାଉଛି, ଯେଉଁଥିରେ ନୂଆ ଆଇଫୋନ ସିରିଜ୍‌ ସହିତ କମ୍ପାନୀ ସବୁଠାରୁ ପ୍ରତୀକ୍ଷିତ ଫୋଲ୍ଡବଲ୍ ଆଇଫୋନ ମଧ୍ୟ ଉନ୍ମୋଚନ ହୋଇପାରେ । ଏହି ଇଭେଣ୍ଟ କାର୍ଲିଫର୍ଣ୍ଣିଆର କ୍ୟୁପର୍ଟିନୋସ୍ଥିତ ଆପଲ୍ ପାର୍କ ଷ୍ଟିଭ୍‌ ଜବ୍ସ ଥିଏଟରରେ ଅନୁଷ୍ଠିତ ହେବ । ଏହାର ଆରମ୍ଭ ପ୍ରଶାନ୍ତ ମହାସାଗର ସମୟ (PT) ସକାଳ 10ଟାରେ, ଅର୍ଥାତ ଭାରତୀୟ ସମୟ (IST) ରାତି 10:30ଟାରେ ହେବ । ଚଳିତ ବର୍ଷ ନିମନ୍ତ୍ରଣ ପତ୍ରରେ "Surprise and shine" ଟ୍ୟାଗଲାଇନ୍ ଦିଆଯାଇଛି, ଯାହା ନୂଆ ଫର୍ମ ଫ୍ୟାକ୍ଟର ବା ଫୋଲ୍ଡବଲ୍ ଆଇଫୋନକୁ ଦର୍ଶାଉଛି । ଏହି ଇଭେଣ୍ଟକୁ ଆପଲ୍‌ର ଅଫିସିଆଲ୍ ୱେବସାଇଟ୍, ଆପଲ୍ ଟିଭି ଏବଂ ୟୁଟ୍ୟୁବ୍‌ ଚ୍ୟାନେଲରେ ଲାଇଭ୍ ଷ୍ଟ୍ରିମ୍ କରାଯିବ ।

ଏହି ଲଞ୍ଚ୍ ଇଭେଣ୍ଟର ସବୁଠାରୁ ବଡ଼ ବିଶେଷତ୍ୱ ହେଉଛି ଯେ ଏହା ଆପଲ୍‌ର ନୂତନ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ଜନ୍ ଟର୍ନସ୍‌ଙ୍କର ପ୍ରଥମ ପ୍ରମୁଖ କାର୍ଯ୍ୟକ୍ରମ ହେବ । ଟିମ୍ କୁକ୍‌ଙ୍କ ସ୍ଥାନରେ ସେ 1 ସେପ୍ଟେମ୍ବର 2026ରୁ ସିଇଓ ଭାବେ ଦାୟିତ୍ୱ ଗ୍ରହଣ କରିଛନ୍ତି । ଟିମ୍ କୁକ୍ ଏବେ ଏଗ୍‌ଜିକ୍ୟୁଟିଭ୍ ଚେୟାରମ୍ୟାନ୍ ପଦକୁ ଯିବେ । ଜନ୍ ଟର୍ନସ୍ ଦୀର୍ଘ ଦିନ ଧରି ଆପଲ୍‌ରେ ହାର୍ଡୱେର୍ ମୁଖ୍ୟ ଭାବରେ କାର୍ଯ୍ୟ କରିଆସୁଥିବାରୁ, ତାଙ୍କ ସିଇଓ ହେବା କମ୍ପାନୀର ଡିଭାଇସ୍ ବ୍ୟବସାୟ ଉପରେ ପୁନର୍ବାର ସର୍ବାଧିକ ଗୁରୁତ୍ୱ ଦେବାର ସଙ୍କେତ ଭାବରେ ଦେଖାଯାଉଛି ।

ପ୍ରଥମ ଫୋଲ୍ଡେବଲ୍ ଆଇଫୋନ୍ ଏବଂ iPhone 18 Pro:

ଚଳିତ ବର୍ଷ ଆପଲ୍ ନିଜର ଆଇଫୋନ୍ ଲଞ୍ଚ୍‌କୁ ଦୁଇଟି ଭାଗରେ ବିଭକ୍ତ କରିପାରେ । ଏହି ଇଭେଣ୍ଟରେ ପ୍ରିମିୟମ୍ ଡିଭାଇସ୍ ଯଥା iPhone 18 Pro, iPhone 18 Pro Max ଏବଂ ଏକ ସମ୍ପୂର୍ଣ୍ଣ ନୂଆ ଫୋଲ୍ଡେବଲ୍ ଫୋନ୍ ଆସିବାର ସମ୍ଭାବନା ରହିଛି । ଏହି ଫୋଲ୍ଡେବଲ୍ ଫୋନ୍‌କୁ iPhone Fold କିମ୍ବା iPhone Ultra ନାମ ଦିଆଯାଇପାରେ । ରିପୋର୍ଟ ଅନୁସାରେ, ଆପଲ୍ ଲିକ୍ୱିଡ୍ ମେଟାଲ୍ ହିଞ୍ଜ୍, ଇନ୍-ସେଲ୍ ଟଚ୍ ପ୍ୟାନେଲ୍ ଏବଂ ପ୍ରେସର୍-ଡିସପର୍ସିଂ ମେଟାଲ୍ ପ୍ଲେଟ୍ ବ୍ୟବହାର କରି ଫୋଲ୍ଡିଂ କ୍ରିଜ୍‌କୁ ପ୍ରାୟତଃ ସମ୍ପୂର୍ଣ୍ଣ ଶେଷ କରିଦେଇଛି । ଏହି ଫୋନ୍ 2nm ପ୍ରୋସେସ୍ ଯୁକ୍ତ A20 Pro ଚିପ୍ ଏବଂ ଆପଲ୍‌ର ନିଜସ୍ୱ C2 ମୋଡେମ୍ ଦ୍ୱାରା ପରିଚାଳିତ ହେବ, ଯାହା ପ୍ରୋ ମଡେଲ୍‌ରେ ମଧ୍ୟ ବ୍ୟବହୃତ ହେବ । ବର୍ତ୍ତମାନର iPhone 17 Pro ତୁଳନାରେ iPhone 18 Pro ମଡେଲ୍‌ଗୁଡ଼ିକରେ କିଛି ଛୋଟ ଅପଗ୍ରେଡ୍ ଦେଖିବାକୁ ମିଳିବ ।

ଫୋଲ୍ଡେବଲ୍ ଆଇଫୋନ୍‌ର ଚାହିଦାକୁ ନେଇ କମ୍ପାନୀ ବେଶ୍ ଆଶାବାଦୀ ରହିଛି । ପ୍ରାରମ୍ଭିକ ପର୍ଯ୍ୟାୟରେ 7 ରୁ 8 ମିଲିୟନ୍ ୟୁନିଟ୍ ଉତ୍ପାଦନ କରିବାକୁ ଯୋଜନା କରାଯାଇଥିବା ବେଳେ, ବର୍ତ୍ତମାନ କମ୍ପାନୀ ସପ୍ଲାୟର୍ସମାନଙ୍କୁ 2026ରେ ପ୍ରାୟ 10 ମିଲିୟନ୍ ୟୁନିଟ୍ ପ୍ରସ୍ତୁତ କରିବାକୁ କହିଛି । ତଥାପି, ସପ୍ଲାୟି ଚେନ୍‌ରେ ଥିବା ସମସ୍ୟା କାରଣରୁ ଆମେରିକା ବାହାରେ ଏହି ଫୋନ୍ ପହଞ୍ଚିବା ପାଇଁ କିଛି ମାସ ସମୟ ଲାଗିପାରେ ।

ଅନ୍ୟପକ୍ଷରେ, ସାଧାରଣ iPhone 18ର ଲଞ୍ଚ୍ ଆସନ୍ତା ବର୍ଷର ସ୍ପ୍ରିଙ୍ଗ୍ (ବସନ୍ତକାଳୀନ) ଇଭେଣ୍ଟକୁ ସ୍ଥାନାନ୍ତରିତ ହୋଇପାରେ, ଯେଉଁଥିରେ iPhone 18 ବେସ୍ ମଡେଲ୍ ସହିତ iPhone Air ଏବଂ ଏଣ୍ଟ୍ରି-ଲେଭଲ୍ iPhone 18e ଉନ୍ମୋଚିତ ହୋଇପାରେ ।