ଲୁଣା ନଦୀକୁ ଡେଇଁ ଯୁବକ ନିଖୋଜ, ଅଗ୍ନିଶମ ବାହିନୀର ଉଦ୍ଧାର କାର୍ଯ୍ୟ ଜାରି

କେନ୍ଦ୍ରାପଡ଼ା: ଲୁଣା ନଦୀକୁ ଡ଼େଇଁ ଯୁବକ ନିଖୋଜ । କେନ୍ଦ୍ରାପଡ଼ା ସଦର ଥାନା ଅନ୍ତର୍ଗତ କଳପଡ଼ା ଲୁଣା ନଦୀ ସେତୁ ଉପରୁ ଗତକାଲି (ମଙ୍ଗଳବାର) ବିଳମ୍ବିତ ରାତିରେ ଜଣେ ଯୁବକ ହଠାତ୍‌ ନଦୀକୁ ଡେଇଁପଡ଼ି ନିଖୋଜ ହେବା ଘଟଣା ସମଗ୍ର ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ନିଖୋଜ ଯୁବକ ଜଣକ ବାହାକଣ୍ଡିଆ ଗ୍ରାମର ରାଜକୁମାର ଜେନା ବୋଲି ଚିହ୍ନଟ କରାଯାଇଛି । ରାତିର ଅନ୍ଧକାର ମଧ୍ୟରେ ରାଜକୁମାର ସେତୁ ଉପରୁ ନଦୀର ଗଭୀର ପାଣିକୁ ଡେଇଁ ପଡ଼ିଥିଲେ,ଏହାପରେ ତାଙ୍କର ଆଉ କୌଣସି ପତ୍ତା ମିଳିନଥିଲା ।

​ସ୍ପିଡ୍‌ ବୋଟ୍‌ ସହାୟତାରେ ଉଦ୍ଧାର କାର୍ଯ୍ୟ:

ଘଟଣା ସମ୍ପର୍କରେ ଖବର ପାଇବା ପରେ ସ୍ଥାନୀୟ ଅଗ୍ନିଶମ ବାହିନୀ ଆଜି (ବୁଧବାର) ସକାଳୁ ଘଟଣାସ୍ଥଳରେ ପହଞ୍ଚି ଉଦ୍ଧାର ଅଭିଯାନ ଆରମ୍ଭ କରିଛନ୍ତି । ଅଗ୍ନିଶମ ବାହିନୀର ପ୍ରଶିକ୍ଷିତ ଟିମ୍‌ ସ୍ପିଡ୍‌ ବୋଟ୍‌ ସହାୟତାରେ ଲୁଣା ନଦୀର ସ୍ରୋତ ମଧ୍ୟରେ ବ୍ୟାପକ ଖୋଜାଖୋଜି ଜାରି ରଖିଛନ୍ତି । ଦୀର୍ଘ ସମୟ ଧରି ନଦୀର ବିଭିନ୍ନ ସ୍ଥାନ ଓ ନିକଟବର୍ତ୍ତୀ କୂଳ ଅଞ୍ଚଳରେ ସର୍ଚ୍ଚ ଅପରେସନ୍‌ ଜାରି ରହିଥିଲେ ମଧ୍ୟ ବର୍ତ୍ତମାନ ପର୍ଯ୍ୟନ୍ତ ଉକ୍ତ ଯୁବକଙ୍କର କୌଣସି ପତ୍ତା ମିଳିପାରିନାହିଁ । ଲୁଣା ନଦୀରେ ପ୍ରବଳ ଜଳସ୍ରୋତ ଥିବାରୁ ଉଦ୍ଧାର କାର୍ଯ୍ୟରେ ଅନେକ ପ୍ରତିବନ୍ଧକ ସୃଷ୍ଟି ହେଉଥିବା ବେଳେ ସ୍ଥାନୀୟ ମାଛ ଧରାଳି ଓ ଗ୍ରାମବାସୀ ମଧ୍ୟ ଖୋଜାଖୋଜିରେ ଅଗ୍ନିଶମ ବାହିନୀକୁ ସହଯୋଗ କରୁଛନ୍ତି ।

ଆତ୍ମହତ୍ୟା ଉଦ୍ୟମ ନା ଅନ୍ୟ କିଛି !

ତେବେ ଯୁବକ ଜଣକ କେଉଁ ପରିସ୍ଥିତିରେ ଏବଂ କେଉଁ କାରଣରୁ ନଦୀକୁ ଡେଇଁପଡ଼ିଲେ ସେନେଇ କୌଣସି ସ୍ପଷ୍ଟ ସୂଚନା ମିଳିପାରିନାହିଁ । ଏନେଇ ବାହାକଣ୍ଡିଆ ଗାଁର ବିପ୍ଳବ ପରିଡ଼ା କହିଛନ୍ତି,"ଏହା ଏକ ଆତ୍ମହତ୍ୟା ଉଦ୍ୟମ ନା ଏହା ପଛରେ ଅନ୍ୟ କୌଣସି କାରଣ ରହିଛି ? ସେନେଇ ସ୍ଥାନୀୟ ଲୋକଙ୍କ ମଧ୍ୟରେ ବିଭିନ୍ନ ପ୍ରକାରର ଚର୍ଚ୍ଚା ହେଉଛି । ଘଟଣା ପରଠାରୁ ଆମ ଗାଁ ବାହାକଣ୍ଡିଆରେ ଶୋକାକୁଳ ପରିବେଶ ସୃଷ୍ଟି ହୋଇଛି ।"

କେନ୍ଦ୍ରାପଡ଼ା ଲୁଣା ନଦୀକୁ ଡ଼େଇଁ ଯୁବକ ନିଖୋଜ (ETV Bharat Odisha)

​ଥାନାରେ ଏପର୍ଯ୍ୟନ୍ତ ନାହିଁ ଲିଖିତ ଅଭିଯୋଗ:

ଅପରପକ୍ଷେ ଏହି ନିଖୋଜ ଘଟଣାକୁ ନେଇ କେନ୍ଦ୍ରାପଡ଼ା ସଦର ଥାନାରେ ଏପର୍ଯ୍ୟନ୍ତ କୌଣସି ଲିଖିତ ଅଭିଯୋଗ ହୋଇନଥିବା ଜଣାପଡ଼ିଛି । ସଦର ଥାନା ଆଇଆଇସି ପଦ୍ମାଳୟା ପ୍ରଧାନ ସୂଚନା ଦେଇଛନ୍ତି ଯେ, ଘଟଣା ସମ୍ପର୍କରେ ପୋଲିସ ନିକଟରେ କୌଣସି ଲିଖିତ ଅଭିଯୋଗ ଦାଖଲ କରାଯାଇ ନାହିଁ । ଅଗ୍ନିଶମ ବାହିନୀ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛି ଏବଂ ପରିବାର ଲୋକଙ୍କ ପକ୍ଷରୁ ଅଭିଯୋଗ ମିଳିବା ପରେ ପୋଲିସ ଏହାର ତଦନ୍ତ ପ୍ରକ୍ରିୟା ଆରମ୍ଭ କରିବ ।"

ସେପଟେ ସ୍ଥାନୀୟ ପ୍ରଶାସନ ଓ ଅଗ୍ନିଶମ ବାହିନୀ ପକ୍ଷରୁ ନଦୀର ତଳ ମୁଣ୍ଡରେ ମଧ୍ୟ ସତର୍କତା ଅବଲମ୍ବନ କରାଯାଇ ଖୋଜାଖୋଜି ପ୍ରକ୍ରିୟାକୁ ଜୋରଦାର କରାଯାଇଛି ।

ଇଟିଭି ଭାରତ, କେନ୍ଦ୍ରାପଡ଼ା