ସୌମ୍ୟ ହତ୍ୟା ମାମଲା; କ୍ରାଇମବ୍ରାଞ୍ଚ ଡିଜି କହିଲେ, ଓମ୍ ଙ୍କର କାହିଁକି କରାଗଲା ମିଛ ଧରା ପରୀକ୍ଷା

CRIME BRANCH DG ON SOMYA DEATH ISSUE, କଟକ : ଜିଆରପି କନଷ୍ଟେବଳ ସୌମ୍ୟରଞ୍ଜନ ସ୍ୱାଇଁ ହତ୍ୟା ମାମଲାରେ ବଡ଼ କଥା କହିଛନ୍ତି, କ୍ରାଇମବ୍ରାଞ୍ଚ ଡିଜି ବିନୟତୋଷ ମିଶ୍ର । ବିଶେଷକରି ଓମ୍ ପ୍ରକାଶଙ୍କର କାହିଁକି ମିଛ ଧରା ପରୀକ୍ଷା କରାଗଲା । ତେଵେ ତଦନ୍ତ ପ୍ରକ୍ରିୟା ଏବେ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚି ଥିବା ବେଳେ ଏକ ମାସ ମଧ୍ୟରେ ଏହାର ଚାର୍ଜସିଟ ଦାଖଲ କରାଯିବ ବୋଲି ଡିଜି ଆଜି (ଶନିବାର) ସ୍ପଷ୍ଟ କରିଛନ୍ତି । ହତ୍ୟା ମାମଲାରେ ସାଧାରଣତଃ ୯୦ ଦିନ ଭିତରେ ଚାର୍ଜସିଟ୍ ଦାଖଲ କରିବାର ନିୟମ ଥିବା ବେଳେ ହାତରେ ଏବେ ଆଉ ମାସେ ସମୟ ଅଛି । ଏହି ସମୟ ସୀମା ଭିତରେ ସମସ୍ତ ଅଭିଯୁକ୍ତଙ୍କୁ ଗିରଫ କରି ପୂର୍ଣ୍ଣାଙ୍ଗ ଚାର୍ଜସିଟ୍ କିମ୍ବା ଗିରଫ ହୋଇଥିବା ଅଭିଯୁକ୍ତଙ୍କୁ ନେଇ ପ୍ରାଥମିକ ଚାର୍ଜସିଟ୍ ଦାଖଲ କରାଯିବ ବୋଲି ଡିଜି ସୂଚନା ଦେଇଛନ୍ତି ।

ଡିଜିଙ୍କ କହିବା ଅନୁସାରେ, ଏହି ହତ୍ୟାକାଣ୍ଡ ଏକ ରାସ୍ତା ଉପରେ ଘଟିଥିଲା । ଏଥିରେ କିଛି ସ୍ଥାନୀୟ ଲୋକ ସାମିଲ ଥିବା ବେଳେ ସେହି ବାଟ ଦେଇ ଯାଉଥିବା ଆଉ କିଛି ବାହାର ଲୋକ କୌତୂହଳବଶତଃ ଓହ୍ଲାଇ ନିଜର ଆକ୍ରୋଶ ବାହାର କରିବା ପାଇଁ ସୌମ୍ୟଙ୍କୁ ପିଟିବା ଆରମ୍ଭ କରିଦେଇଥିଲେ । ଭିଡିଓ ଆଧାରରେ ସେହି ବାହାର ଲୋକମାନଙ୍କୁ ଚିହ୍ନଟ କରିବା ପାଇଁ ସ୍ଥାନୀୟ ଲୋକେ ସହଯୋଗ କରିପାରୁ ନଥିବାରୁ ପୋଲିସକୁ ସେମାନଙ୍କ ପାଖରେ ପହଞ୍ଚିବାକୁ ସମୟ ଲାଗୁଛି । ମାମଲାରେ ଏପର୍ଯ୍ୟନ୍ତ ୨୦ ଜଣଙ୍କୁ ଗିରଫ କରାଯାଇଥିବା ବେଳେ ପୋଲିସ ଆକଳନ ଅନୁସାରେ ଆଉ ୫ରୁ ୬ ଜଣ ଗିରଫ ହେବା ବାକି ଅଛି । ନିକଟରେ ଗିରଫ୍ ହୋଇଥିବା ଶେଷ ଅଭିଯୁକ୍ତ ଜଣକ ଘଟଣାସ୍ଥଳରୁ ପ୍ରାୟ ୨୦-୨୫ କିଲୋମିଟର ଦୂରରେ ରହେ, ଯିଏ ମୋଟର ସାଇକେଲରେ ଯାଉଥିବା ବେଳେ ଭିଡ଼ ଦେଖି ଓହ୍ଲାଇ ମାଡ଼ ମାରିବାରେ ସାମିଲ ହୋଇଥିଲା ।

ସମଗ୍ର ଘଟଣାର ଆରମ୍ଭ ଦୁଇ ଯୁବତୀଙ୍କ ସହ ଘଟିଥିବା ଏକ ଭିନ୍ନ ଘଟଣାରୁ ହୋଇଥିଲା । ଘଟଣା ସମୟରେ ଓମ୍ ସେଠାରେ ଉପସ୍ଥିତ ଥିଲେ । ଯଦିଓ ସେହି ଦୁଇ ଯୁବତୀ ଓମ୍‌ଙ୍କ ବିରୋଧରେ କିଛି କହିନାହାନ୍ତି, କିନ୍ତୁ ଓମ୍ ଯେଉଁ ବୟାନ ଦେଉଛନ୍ତି ସେଥିରେ କେତେ ସତ୍ୟତା ଅଛି ତାହା ଜାଣିବା ଜରୁରୀ । ଓମ୍‌ଙ୍କ କହିବା କଥା ଯେ, ଲୋକେ ତାଙ୍କୁ ଧରି ଗୋଟିଏ ଜାଗାରେ ବସାଇ ଦେଇଥିଲେ । ଓମ୍ ଘଟଣାର ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରତ୍ୟକ୍ଷଦର୍ଶୀ ହୋଇଥିବାରୁ, ସେ ସେହି ସମୟରେ କେତେ ଜଣ ଲୋକଙ୍କୁ ଚିହ୍ନଟ କରିପାରୁଛନ୍ତି ଏବଂ ତାଙ୍କ କଥାରେ କେତେ ସତ୍ୟତା ଅଛି ତାହା ପରଖିବା ପାଇଁ ହିଁ ତାଙ୍କର ମିଛଧରା ପରୀକ୍ଷା କରାଯାଇଛି ।

ଏକ ବଡ଼ ସ୍ପଷ୍ଟୀକରଣ ଦେଇ କ୍ରାଇମବ୍ରାଞ୍ଚ ଡିଜି କହିଛନ୍ତି ଯେ, "ସାଧାରଣତଃ କୌଣସି ମାମଲାରେ ଅଭିଯୋଗକାରୀ ବା କମ୍ପ୍ଲେନେଣ୍ଟଙ୍କର ଲାଇ-ଡିଟେକ୍ସନ ଟେଷ୍ଟ କରାଯାଏ ନାହିଁ । ଯଦି ଅଭିଯୋଗ ସମ୍ପୂର୍ଣ୍ଣ ମିଛ ବୋଲି ପ୍ରମାଣ ମିଳେ, ସେତେବେଳେ ଯାଇ ଏଭଳି ପଦକ୍ଷେପ ନିଆଯାଏ । କିନ୍ତୁ ଏହି ମାମଲାରେ ଦୁଇ ଯୁବତୀ ମିଛ ଅଭିଯୋଗ କରିଛନ୍ତି ବୋଲି ପୋଲିସକୁ କୌଣସି ପ୍ରମାଣ ମିଳିନାହିଁ, ସେମାନଙ୍କ ବୟାନ ସମ୍ପୂର୍ଣ୍ଣ ସତ୍ୟ । ତେଣୁ ସେମାନଙ୍କର କୌଣସି ମିଛଧରା ପରୀକ୍ଷା କରାଯିବାର ଆବଶ୍ୟକତା ନାହିଁ । ଏବେ ଓମ୍ ସେହି ଯୁବତୀମାନଙ୍କୁ ପୂର୍ବରୁ ଚିହ୍ନିଥିଲେ କି ନାହିଁ ଏବଂ ଅନ୍ୟ କେଉଁମାନେ ଏଥିରେ ଜଡ଼ିତ, ସେ ଦିଗରେ ତଦନ୍ତ ଜାରି ରହିଛି ।"

ଇଟିଭି ଭାରତ, କଟକ