ରାୟଗଡାରେ ଭୁଲ ଇଞ୍ଜେକସନ୍ ନେଇ ଦୁଇ ଶିଶୁଙ୍କ ମୃତ୍ୟୁ ଅଭିଯୋଗ, ଦୁର୍ଗମ ଅଞ୍ଚଳର କଷ୍ଟ ବଖାଣିଲା ଯୁବାପଦର
କାଶୀପୁର ବ୍ଲକ ଯୁବାପଦର ଗାଁର ଘଟଣା । ଚିକିତ୍ସା କରିଥିବା ଫାର୍ମାସିଷ୍ଟ ଅଭିଯୋଗକୁ କଲେ ଖଣ୍ଡନ । ଗାଁରେ ମୌଳିକ ସୁବିଧା ମିଳୁନି । ରିପୋର୍ଟ- ରଞ୍ଜନ ରଥ
Published : August 24, 2026 at 3:03 PM IST
ରାୟଗଡା: ଭୁଲ ଇଞ୍ଜେକସନରୁ ଗୋଟିଏ ଦିନରେ ଦୁଇ ଶିଶୁଙ୍କ ମୃତ୍ୟୁ ଅଭିଯୋଗ । ଏପରି ଅଭିଯୋଗ ଆସିଛି ରାୟଗଡା ଜିଲ୍ଲା କାଶୀପୁର ବ୍ଲକ କୁଚେଇପଦର ପଞ୍ଚାୟତ ଅନ୍ତର୍ଗତ ଯୁବାପଦର ଗାଁରୁ । ଗାଁ ନିକଟରେ କୌଣସି ଚିକିତ୍ସା ସୁବିଧା ମିଳୁନଥିବାରୁ ଘରୋଇ କ୍ଲିନିକରେ ଚିକିତ୍ସା କରି ଶିଶୁଙ୍କ ମୃତ୍ୟୁ ହୋଇଥିବା ପରିବାର ଲୋକଙ୍କ ସହ ଗାଁଲୋକେ ଅଭିଯୋଗ କରିଛନ୍ତି । ଗାଁଲୋକଙ୍କ ଅଭିଯୋଗକୁ ଖଣ୍ଡନ କରିଛନ୍ତି ଚିକିତ୍ସା କରିଥିବା ଫାର୍ମାସିଷ୍ଟ ବିପିନ ବିହାରୀ ଶର୍ମା । ତେବେ ଥାନରେ ଅଭିଯୋଗ ହୋଇନଥିବା ସୂଚନା ରହିଛି । ସେପଟେ ଦୁର୍ଗମ ଅଞ୍ଚଳରେ ଥିବା ଏହି ଗାଁରେ କୌଣସି ସୁବିଧା ମିଳୁନଥିବା ଗାଁଲୋକେ ଅଭିଯୋଗ କରିଛନ୍ତି ।
ଗୋଟିଏ ଦିନରେ ଦୁଇ ଶିଶୁଙ୍କ ଜୀବନ ଗଲା:
ଗତକାଲି(ରବିବାର) ଭୁଲ୍ ଇଞ୍ଜେକସନ ପାଇଁ ଯୁବାପଦର ଗ୍ରାମରେ ୨ ଜଣ ଶିଶୁଙ୍କ ଜୀବନ ଚାଲିଯାଇଥିବା ନେଇ ପରିବାରଲୋକେ ଅଭିଯୋଗ କରିଛନ୍ତି । ମୃତ ଶିଶୁଙ୍କ ପରିବାର ଲୋକଙ୍କ ଅଭିଯୋଗ ଅନୁଯାୟୀ, ଗତ ଶୁକ୍ରବାର ଖଗେଶ୍ଵର ମାଝୀଙ୍କ 6 ବର୍ଷର ପୁଅ ଓ ଦୁର୍ଯ୍ୟୋ ପୂଜାରୀଙ୍କ 4 ବର୍ଷ ପୁଅର ଶରୀର ଅସୁସ୍ଥ ହୋଇପଡିଥିଲା । ଉଭୟଙ୍କ ପରିବାର ଲୋକେ କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ ଡୁମ୍ବାଗୁଡା ଗ୍ରାମରେ ଚାଲିଥିବା ଏକ ଘରୋଇ କ୍ଲିନିକକୁ ଦୁଇ ଶିଶୁଙ୍କୁ ଚିକିତ୍ସା ପାଇଁ ଆଣିଥିଲେ । ହେଲେ ଇଞ୍ଜେକସନ ଦେଇ ଶିଶୁଙ୍କୁ ଘରକୁ ଆଣିବା ପରେ ଖଗେଶ୍ଵର ମାଝୀଙ୍କ 6 ବର୍ଷର ପୁଅଙ୍କ ମୃତ୍ୟୁ ହୋଇଥିବା ତାଙ୍କ ପତ୍ନୀ ଅଭିଯୋଗ କରିଛନ୍ତି । ସମାନ ଅଭିଯୋଗ ଦୁର୍ଯ୍ୟୋ ପୂଜାରୀଙ୍କ ପତ୍ନୀ ମଧ୍ୟ କରିଛନ୍ତି ।
ତେବେ ଘରୋଇ କ୍ଲିନିକର ମାଲିକ ବିପିନ ବିହାରୀ ଶର୍ମାଙ୍କ ନାଁରେ ଏପରି ଅଭିଯୋଗ ଆଣିଛନ୍ତି ମୃତ ଦୁଇ ଶିଶୁଙ୍କ ପରିବାର ଲୋକଙ୍କ ସମେତ ଗ୍ରାମବାସୀ । ଅନ୍ୟପଟେ ବିପିନ ବିହାରୀ ଶର୍ମା ଦଶମନ୍ତପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଫାର୍ମାସିଷ୍ଟ ଭାବେ କାର୍ଯ୍ୟରତ । ଗାଁଲୋକଙ୍କ ଅଭିଯୋଗକୁ ଖଣ୍ଡନ କରିଛନ୍ତି ବିପିନ ବିହାରୀ ଶର୍ମା ।
ଅଭିଯୋଗକୁ ଖଣ୍ଡନ:
ସେ କହିଛନ୍ତି ଯେ, ‘କୌଣସି ଘରୋଇ କ୍ଲିନିକ କରିନି । ସମାଜସେବା କରୁଛି । ବର୍ତ୍ତମାନ ଫାର୍ମାସିଷ୍ଟ ଭାବେ କାର୍ଯ୍ୟ କରୁଛି ।’ କେହି ରୋଗୀ ଆସିଲେ ଇଞ୍ଜେକସନ ଓ ସାଲାଇନ ଦେଉଥିବା କଥା କହିଛନ୍ତି । ଏପରିକି ଲୋକଙ୍କ ଠାରୁ ଟଙ୍କା ନେବା ଅଭିଯୋଗକୁ ମଧ୍ୟ ଅସ୍ବୀକାର କରିଛନ୍ତି ।
ଦୁର୍ଗମ ଘାଟିକୁ ବାଟ ଭୁଲିଛି ବିକାଶ:
ଏହି ଦୁର୍ଗମ ଘାଟି ଅଞ୍ଚଳରେ କାଶୀପୁର ବ୍ଲକର ଡଙ୍ଗାସିଲ ଓ କୁଚେଇପଦର ପଞ୍ଚାୟତର ପ୍ରାୟ ୨୦ରୁ ଊର୍ଦ୍ଧ୍ବ ଗାଁ ରହିଛି । ଯୁବାପଦର ଗାଁରେ ଲୋକଙ୍କୁ ମୌଳିକ ସୁବିଧା ମିଳୁନଥିବା ଅନେକ ଗ୍ରାମବାସୀ ଅଭିଯୋଗ କରିଛନ୍ତି । ଏପରିକି ରୋଗ ହେଲେ ପାଖରେ ମେଡିକାଲଟିଏ ନଥିବାରୁ ବାଧ୍ୟ ହୋଇ ସେମାନେ ଘରୋଇ କ୍ଲିନିକ ଉପରେ ନିର୍ଭର କରୁଥିବା କହିଛନ୍ତି । ଏହି ଅଞ୍ଚଳକୁ ସୁବିଧା ସୁଯୋଗ ଯୋଗାଇ ଦେବାକୁ ଦାବି କରିଛନ୍ତି । ଅନ୍ୟପଟେ କେବଳ ଶିଶୁ ନୁହେଁ ଗାଁର ଅଧିକାଂଶ ଲୋକେ ବର୍ତ୍ତମାନ ଜ୍ବରରେ ପୀଡିତ । ଚିକିତ୍ସା ପାଇପାରୁନଥିବା ଅଭିଯୋଗ କରିଛନ୍ତି ।
ଯୁବାପଦର ଗାଁର ଶଙ୍କର ନାୟକ କହିଛନ୍ତି,‘ଏହି ଗାଁରେ କୌଣସି ସୁବିଧା ମିଳୁନାହିଁ । ବାଧ୍ୟ ହୋଇ ଘରୋଇ କ୍ଲିନିକ ଉପରେ ନିର୍ଭର କରୁଛୁ । ଏଠାକୁ ସ୍ବାସ୍ଥ୍ୟକର୍ମୀ ମଧ୍ୟ 3ରୁ 4 ମାସରେ ଥରେ ଆସନ୍ତି । ଯେଉଁ ଦୁଇଟି ପିଲାଙ୍କ ମୃତ୍ୟୁ ହେଲା, ସେମାନେ ଘରୋଇ କ୍ଲିନିକରେ ଚିକିତ୍ସା କରିଥିଲେ ।
ଥାନରେ ହୋଇନି ଅଭିଯୋଗ-
ଏନେଇ ଆମେ ଦୋରାଗୁଡା ଥାନ ଅଧିକାରୀଙ୍କ ସହ ଯୋଗାଯୋଗ କରିଥିଲୁ । ଏପରି କୌଣସି ଅଭିଯୋଗ ତାଙ୍କ ଥାନାକୁ ଆସିନଥିବା ପୋଲିସ ଅଧିକାରୀ କହିଛନ୍ତି ।
ଇଟିଭି ଭାରତ, ରାୟଗଡା
