ଅଯଥା ଆଣ୍ଟିବାୟୋଟିକ୍ ବ୍ୟବହାର ରୋକିବ ଡିଜିଟାଲ ପ୍ରେସକ୍ରିପସନ; ରୋଗୀ କେତେ ଆଣ୍ଟିବାୟୋଟିକ୍ ନେଉଛନ୍ତି, ରହିବ ଡିଜିଟାଲ ରେକର୍ଡ
ଅଯଥା ଆଣ୍ଟିବାୟୋଟିକ୍ ବ୍ୟବହାର ଉପରେ ରୋକ୍ ଲଗାଇବାକୁ ସରକାରଙ୍କ ବଡ଼ ନିଷ୍ପତ୍ତି । ରାଜ୍ୟରେ ଖୁବଶୀଘ୍ର ଆରମ୍ଭ ହେବ ଡିଜିଟାଲ ପ୍ରେସକ୍ରିପସନ୍ ବ୍ୟବସ୍ଥା । ରିପୋର୍ଟ- ବିକାଶ କୁମାର ଦାସ
Published : August 24, 2026 at 6:10 PM IST
ଭୁବନେଶ୍ବର: ଡିଜିଟାଲ ଯୁଗରେ ଆହୁରି ସ୍ମାର୍ଟ ହେବ ସ୍ୱାସ୍ଥ୍ୟସେବା । ରୋଗୀଙ୍କ ଚିକିତ୍ସା ସମ୍ବନ୍ଧୀୟ ତଥ୍ୟକୁ ଡିଜିଟାଲ ଭାବେ ସୁରକ୍ଷିତ ରଖିବା ସହ ଅଯଥା ଆଣ୍ଟିବାୟୋଟିକ୍ ବ୍ୟବହାର ଉପରେ ରୋକ୍ ଲଗାଇବାକୁ ରାଜ୍ୟ ସରକାର ନେବାକୁ ଯାଉଛନ୍ତି ବଡ଼ ପଦକ୍ଷେପ । ଖୁବଶୀଘ୍ର ରାଜ୍ୟରେ ଆରମ୍ଭ ହେବ ଡିଜିଟାଲ ପ୍ରେସକ୍ରିପସନ୍ ବ୍ୟବସ୍ଥା ।
ଆୟୁଷ୍ମାନ ଭାରତ ଡିଜିଟାଲ ମିଶନ୍ ବା ABDM ଅଧୀନରେ ଡିଜିଟାଲ ସ୍ୱାସ୍ଥ୍ୟ ବ୍ୟବସ୍ଥାକୁ ଆହୁରି ସୁଦୃଢ଼ କରାଯିବ । ରୋଗୀଙ୍କ ପ୍ରେସକ୍ରିପସନ୍ ଡିଜିଟାଲ ଭାବେ ସଂରକ୍ଷିତ ରହିବ । ଆବଶ୍ୟକ ସମୟରେ ଏହାକୁ ସ୍କାନ୍ କରି ସେୟାର କରି ହେବ । ଏହା ଦ୍ୱାରା ରୋଗୀଙ୍କ ପୂର୍ବ ଚିକିତ୍ସା ସମ୍ବନ୍ଧୀୟ ତଥ୍ୟ ମଧ୍ୟ ସହଜରେ ଉପଲବ୍ଧ ହୋଇପାରିବ ।
ଡିଜିଟାଲ ପ୍ରେସକ୍ରିପସନ୍ ବ୍ୟବସ୍ଥା:
ବିଶେଷକରି ଆଣ୍ଟିବାୟୋଟିକ୍ର ଅଯଥା ଓ ବାରମ୍ବାର ବ୍ୟବହାରକୁ ନିୟନ୍ତ୍ରଣ କରିବା ଉପରେ ରହିବ ଗୁରୁତ୍ୱ । ଜଣେ ରୋଗୀ କେତେ ଥର ଆଣ୍ଟିବାୟୋଟିକ୍ ନେଉଛନ୍ତି, କେଉଁ ଔଷଧ ନେଇଛନ୍ତି ଏବଂ କେତେଦିନ ପାଇଁ ତାଙ୍କୁ ଔଷଧ ଦିଆଯାଇଛି ? ଏହାର ତଥ୍ୟ ଡିଜିଟାଲ ପ୍ରେସକ୍ରିପସନ୍ ମାଧ୍ୟମରେ ରେକର୍ଡ ରହିପାରିବ । ଏହା ଦ୍ୱାରା ଜଣେ ରୋଗୀଙ୍କୁ ଆବଶ୍ୟକତା ନଥାଇ ବାରମ୍ବାର ଆଣ୍ଟିବାୟୋଟିକ୍ ଦିଆଯାଉଛି କି ନାହିଁ ? ତାହା ଉପରେ ନଜର ରଖିବା ସହଜ ହେବ । ଆଣ୍ଟିବାୟୋଟିକ୍ର ଅନାବଶ୍ୟକ ବ୍ୟବହାର ଯୋଗୁଁ ଔଷଧ ପ୍ରତିରୋଧକତା ବଢ଼ିବାର ଆଶଙ୍କା ଥିବାରୁ ଏଭଳି ଡିଜିଟାଲ ବ୍ୟବସ୍ଥାକୁ ଗୁରୁତ୍ୱ ଦିଆଯାଉଛି ବୋଲି କହିଛନ୍ତି ସ୍ୱାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ ।
ସେହିପରି ଡିଜିଟାଲ ଲକର୍ରେ ସ୍ୱାସ୍ଥ୍ୟ ସମ୍ବନ୍ଧୀୟ ଦଲିଲ ସୁରକ୍ଷିତ ଭାବେ ରଖିବା ଏବଂ ଆବଶ୍ୟକ ସମୟରେ ସେଗୁଡ଼ିକୁ ସ୍କାନ୍ ଓ ସେୟାର କରିବାର ସୁବିଧା ମିଳିବ । ଫଳରେ କାଗଜ ପ୍ରେସକ୍ରିପସନ୍ ଉପରେ ନିର୍ଭରଶୀଳତା କମିବା ସହ ରୋଗୀଙ୍କ ଚିକିତ୍ସା ଇତିହାସକୁ ଡିଜିଟାଲ ଭାବେ ପରିଚାଳନା କରିବା ସହଜ ହେବ । ଡିଜିଟାଲ ସ୍ୱାସ୍ଥ୍ୟସେବାର ବ୍ୟବହାରକୁ ନେଇ ପ୍ରଧାନମନ୍ତ୍ରୀ ଗୁରୁତ୍ୱ ଦେଉଥିବାରୁ ରାଜ୍ୟରେ ମଧ୍ୟ ଏହାକୁ ଆହୁରି ବ୍ୟାପକ କରାଯିବ । ରୋଗୀଙ୍କ ତଥ୍ୟକୁ ସୁରକ୍ଷିତ ରଖିବା, ଚିକିତ୍ସା ବ୍ୟବସ୍ଥାକୁ ସୁବ୍ୟବସ୍ଥିତ କରିବା ଏବଂ ଅନାବଶ୍ୟକ ଔଷଧ ବ୍ୟବହାରକୁ ରୋକିବ । ଏହି ତିନୋଟି ଦିଗରେ ଡିଜିଟାଲ ପ୍ରେସକ୍ରିପସନ୍ ବ୍ୟବସ୍ଥା ଗୁରୁତ୍ୱପୂର୍ଣ୍ଣ ହେବ ବୋଲି କହିଛନ୍ତି ସ୍ୱାସ୍ଥ୍ୟମନ୍ତ୍ରୀ ।
ମେଡ଼ିସିନ ଦୋକାନୀ ବିରେନ୍ ପଟ୍ଟନାୟକ କହିଛନ୍ତି," ଆମେ ବିନା ପ୍ରେସକ୍ରିପସନରେ ଆଣ୍ଟି ବାୟୋଟିକ ଦେଉନାହୁଁ । ଅନେକ ସମୟରେ ମଧ୍ୟ ରୋଗୀଙ୍କୁ ମନା କରୁଛୁ । ଯଦି କେହି ମାଗୁଛନ୍ତି ତେବେ ପ୍ରେସକ୍ରିପସନ ଦେଖିକରି ଦେଉଛୁ । "
ଅଯଥା ଆଣ୍ଟିବାୟୋଟିକ୍ ବ୍ୟବହାର ସାଜି ପାରେ ଘାତକ:
ଡାକ୍ତର ଜ୍ୟୋତି ରଞ୍ଜନ ପଣ୍ଡା କହିଛନ୍ତି," ଅନେକ ସମୟରେ ଯଦି କୌଣସି ବ୍ୟକ୍ତିର ସମାନ୍ୟ ଜ୍ୱର କାଶ ହୁଏ, ତେବେ ତୁରନ୍ତ ମେଡ଼ିସିନ ଷ୍ଟୋରରୁ ଆଣ୍ଟି ବାୟୋଟିକ ଆଣି ସେବନ କରିଥାନ୍ତି । ଯାହାଫଳରେ କି ସାଙ୍ଗେ ସାଙ୍ଗେ ମେଡ଼ିସିନ କାମ କରିବ କିନ୍ତୁ ଭବିଷ୍ୟତ ପାଇଁ ଏହା ଅତ୍ୟନ୍ତ ଖରାପ ଅଟେ । ଆବଶ୍ୟକ ନଥିଲେ ଏହାକୁ ବ୍ୟବହାର କରିବା ଅନୁଚିତ୍ ।"
ସେହିପରି ଡାକ୍ତର ସ୍ୱାତୀ ଦାଶ କହିଛନ୍ତି," ଡାକ୍ତରଙ୍କ ବିନା ପରାମର୍ଶରେ ଆଣ୍ଟିବାୟୋଟିକ୍ ସେବନ କରିବା ଅନୁଚିତ୍ । କେଉଁ କ୍ଷେତ୍ରରେ ଏହାକୁ ସେବନ କରାଯିବ ସେନେଇ ଡାକ୍ତରଙ୍କ ସହିତ ପରାମର୍ଶ କରିବା ନିହାତି ଆବଶ୍ୟକ । "
ତେବେ ସ୍ୱାସ୍ଥ୍ୟ ବ୍ୟବସ୍ଥାରେ ପ୍ରଯୁକ୍ତିର ଏହି ବ୍ୟବହାର ଆଗାମୀ ଦିନରେ ରୋଗୀଙ୍କ ଚିକିତ୍ସାକୁ ଅଧିକ ସହଜ, ସୁସଂଗଠିତ ଓ ତଥ୍ୟଭିତ୍ତିକ କରିବାରେ ସହାୟକ ହେବ ବୋଲି ଆଶା କରାଯାଉଛି ।
ଇଟିଭି ଭାରତ, ଭୁବନେଶ୍ବର
