100 ଘଣ୍ଟାର ସର୍ଚ୍ଚ ଅପରେସନ ପରେ ମିଳିଲା MV Ocean Winner ଜାହାଜର ଏକ ଲାଇଫବୋଟ୍, ଏବେ ବି ନିଖୋଜ 22 କ୍ରୁ ମେମ୍ବର

MV OCEAN WINNER , ଜଗତସିଂହପୁର: ବଙ୍ଗୋପସାଗରରେ ପାନାମା-ପତାକାବାହୀ କାର୍ଗୋ ଜାହାଜ MV Ocean Winner ବୁଡ଼ିଯିବା ପରେ ନିଖୋଜ କ୍ରୁ ସଦସ୍ୟଙ୍କୁ ଖୋଜିବା ପାଇଁ ସନ୍ଧାନ ଏବଂ ଉଦ୍ଧାର କାର୍ଯ୍ୟକୁ ଅଧିକ ତ୍ବରାନ୍ବିତ କରାଯାଇଛି । ଜାହାଜ ବୁଡ଼ିବାର ପ୍ରାୟ ୧୦୦ ଘଣ୍ଟା ପରେ ମଙ୍ଗଳବାର ଭାରତୀୟ ତଟରକ୍ଷୀ ବାହିନୀର ଉଦ୍ଧାରକାରୀ ଦଳ ମଝି ସମୁଦ୍ରରେ ଏକ ଲାଇଫ ବୋଟ୍ ଠାବ କରିଛନ୍ତି । ଏହା MV Ocean Winnerର ଲାଇଫ ବୋଟ୍ ବୋଲି ଜଣାପଡ଼ିଛି ।

ମଝି ସମୁଦ୍ରରେ ଭାସୁଥିବା ଅବସ୍ଥାରେ ତଟରକ୍ଷୀ ବାହିନୀର ଉଦ୍ଧାରକାରୀ ଦଳ ଏହି ଲାଇଫବୋଟ୍‌କୁ ଠାବ କରିଛନ୍ତି । ଲାଇଫବୋଟ୍ ଭିତରେ କୌଣସି କ୍ରୁ ସଦସ୍ୟ ନଥିବା ଜଣାପଡ଼ିଛି । ଲାଇଫ ବୋଟ୍ ଠାବ ହେବା ପରେ ଏହାର ଆଖପାଖ ଅଞ୍ଚଳରେ ଉଦ୍ଧାରକାରୀ ଦଳ ପକ୍ଷରୁ ସର୍ଚ୍ଚ ଅପରେସନ ଜୋରଦାର କରାଯାଇଛି ।

ଭାରତୀୟ ତଟରକ୍ଷୀ ବାହିନୀ (ICG) ପକ୍ଷରୁ ଜାରି ପ୍ରେସ ବାର୍ତ୍ତା ଅନୁସାରେ, MV Ocean Winnerର ନିଖୋଜ ୨୨ ଜଣ କ୍ରୁ ସଦସ୍ୟଙ୍କ ସନ୍ଧାନରେ ସର୍ଚ୍ଚ ଆଣ୍ଡ ରେସ୍କ୍ୟୁ ଅପରେସନ୍ ବର୍ତ୍ତମାନ ସୁଦ୍ଧା ବଳବତ୍ତର ରହିଛି । ଅପରେସନ୍‌ରେ ଭାରତୀୟ ତଟରକ୍ଷୀ ବାହିନୀର ଜାହାଜ ଓ ଅନ୍ୟ ଉଦ୍ଧାରକାରୀ ଟିମ୍ ନିୟୋଜିତ ହୋଇଛନ୍ତି ।

ଭାରତୀୟ ତଟରକ୍ଷୀ ବାହିନୀ (ICG) ସୂଚନା ଅନୁସାରେ, ପଣ୍ୟ ଜାହାଜ MV Ocean Winner ଅଗଷ୍ଟ 20 ତାରିଖରେ ଓଡ଼ିଶାର ପାରାଦ୍ବୀର ବନ୍ଦରରୁ ଜଳପଥରେ ଚୀନ ଅଭିମୁଖେ ଯାତ୍ରା ଆରମ୍ଭ କରିଥିଲା । ଅଗଷ୍ଟ 22 ତାରିଖରେ MV Ocean Winner ସହ ଯୋଗାଯୋଗ ବିଚ୍ଛିନ୍ନ ହୋଇଥିଲା । ପରେ ଜାହାଜଟି ବଙ୍ଗୋପସାଗରରେ ବୁଡ଼ିଯାଇଥିବା ସୂଚନା ମିଳିଥିଲା । ଜାହାଜରେ ଥିବା ୨୪ ଜଣ କ୍ରୁ ସଦସ୍ୟଙ୍କ ମଧ୍ୟରୁ ପୂର୍ବରୁ ୨ ଜଣଙ୍କୁ ଉଦ୍ଧାର କରାଯାଇଥିବାବେଳେ ଅନ୍ୟ ୨୨ ଜଣଙ୍କର ଏଯାଏଁ କୌଣସି ପତ୍ତା ମିଳିନାହିଁ ।

ଜାହାଜ ବୁଡ଼ିବା ଘଟଣାକୁ ୧୦୦ ଘଣ୍ଟାରୁ ଅଧିକ ସମୟ ବିତିଯାଇଥିଲେ ମଧ୍ୟ ନିଖୋଜ 22 କ୍ରୁ ସଦସ୍ୟଙ୍କ ସନ୍ଧାନ କାର୍ଯ୍ୟ ଜାରି ରହିଛି । ଲାଇଫବୋଟ୍ ଠାବ ହେବା ପରେ ଉଦ୍ଧାରକାରୀ ଦଳ ଆଶାବାଦୀ ହୋଇଛନ୍ତି । ଲାଇଫବୋଟ୍ ଯେଉଁ ସ୍ଥାନରେ ମିଳିଛି, ସେହି ଅଞ୍ଚଳକୁ କେନ୍ଦ୍ର କରି ନିଖୋଜ କ୍ରୁ ସଦସ୍ୟମାନଙ୍କ ସନ୍ଧାନ ଅଭିଯାନକୁ ଅଧିକ ତ୍ବରାନ୍ବିତ କରାଯାଇଛି । ଉଦ୍ଧାର ଅପରେସନ୍‌ର ପରବର୍ତ୍ତୀ ଅପଡେଟ୍‌କୁ ଅପେକ୍ଷା କରାଯାଇଥିବା ଭାରତୀୟ ତଟରକ୍ଷୀ ବାହିନୀ ପକ୍ଷରୁ କୁହାଯାଇଛି ।

ଇଟିଭି ଭାରତ, ଜଗତସିଂହପୁର