ସରକାରୀ ନୀତିକୁ ଆଖିଠାର, ଯଶୋଦା ଆଶ୍ରମକୁ ଜିଲ୍ଲାପାଳଙ୍କ କାରଣ ଦର୍ଶାଅ ନୋଟିସ୍ ଜାରି

ରିପୋର୍ଟ: ଅଜିତ କୁମାର ସିଂ

ଭବାନୀପାଟଣା (କଳାହାଣ୍ଡି): କଳାହାଣ୍ଡି ଜିଲ୍ଲା ଧର୍ମଗଡ ସ୍ଥିତ ଯଶୋଦା ଅନାଥ ଆଶ୍ରମରେ ବେଆଇନ ଶିଶୁ ହସ୍ତାନ୍ତର ଭଳି ସଙ୍ଗୀନ ଅଭିଯୋଗ ସାମ୍ନାକୁ ଆସିଛି । ଆଶ୍ରମର ପରିଚାଳକ ବେଆଇନ ଭାବେ ଜଣେ ଅନାଥ ଶିଶୁକୁ ହସ୍ତାନ୍ତର କରିଥିବା ନେଇ ଜଣାପଡିବା ପରେ ଜିଲ୍ଲାରେ ଆଲୋଡନ ସୃଷ୍ଟି ହୋଇଛି । ମାମଲାକୁ ଗୁରୁତ୍ୱର ସହିତ ନେଇ କଳାହାଣ୍ଡି ଜିଲ୍ଲା ଶିଶୁ ମଙ୍ଗଳ ସମିତି ଭବାନୀପାଟଣା ଟାଉନ ଥାନା ପୋଲିସ ନିକଟରେ ଅଭିଯୋଗ କରିଛି । ଏନେଇ ଶିଶୁକୁ ଉଦ୍ଧାର କରି ପ୍ରାଥମିକ ତଦନ୍ତ ଆରମ୍ଭ କରିଛି ଭବାନୀପାଟଣା ପୋଲିସ ।

ଦୋଷୀକୁ ମିଳିବ ଦଣ୍ଡ:
ଏନେଇ କଳାହାଣ୍ଡି ଜିଲ୍ଳା ଶିଶୁମଙ୍ଗଳ ସମିତିର ଅଧ୍ୟକ୍ଷା ସ୍ଵର୍ଣ୍ଣଲତା ମହାନ୍ତି କହିଛନ୍ତି,"କେଉଁ ପରିପ୍ରେକ୍ଷୀରେ ସେ ଛୁଆଟିକୁ ଦେଇଛନ୍ତି, ସେ ପ୍ରଥମ ଦେଖାରେ ଦେଇଛନ୍ତି ନାଁ କିଛି ଦିନ ଧରି ଏହି ପ୍ରକ୍ରିୟା ଚାଲିଥିଲା, ତାହା ଲିଖିତ ଭାବରେ ସେ ଦେବେ । ସେହି ଆଶ୍ରମ ଭିତରେ ବାହାର ଲୋକଙ୍କ ପ୍ରବେଶକୁ ବାରଣ କରାଯାଇଛି । ବର୍ତ୍ତମାନ FIRକୁ ନେଇ ପ୍ରାଥମିକ ତଦନ୍ତ ଆରମ୍ଭ ହୋଇଛି । ଉଭୟ ପକ୍ଷ ଆଶ୍ରମ କର୍ତ୍ତୃପକ୍ଷ ଓ ଗ୍ରହଣ କରିଥିବା ପକ୍ଷ ମଧ୍ୟ ଶିଶୁ ମଙ୍ଗଳ ସମିତିକୁ ଏସଂପର୍କରେ ଜଣେଇ ନାହାଁନ୍ତି । ଜିଲ୍ଲା ପ୍ରଶାସନର ସର୍ବୋଚ୍ଚ କର୍ତ୍ତା ହିସାବରେ ଜିଲ୍ଲାପାଳ ଆଶ୍ରମକୁ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି । ଏହାର ଉତ୍ତର ଦେଲା ପରେ ନିରପେକ୍ଷ ଭାବରେ ଉଭୟ ପକ୍ଷକୁ ନେଇ ତଦନ୍ତ ହେବ । ଜେଜେ ଆକ୍ଟ ବେଆଇନ ପୋଷ୍ୟ ସନ୍ତାନ ଅନୁଯାୟୀ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।"

କାରଣ ଦର୍ଶାଅ ନୋଟିସ୍:
ବେଆଇନ ଶିଶୁ ହସ୍ତାନ୍ତର ମାମଲା ବିଷୟରେ ଜଣାପଡିବା ପରେ ଆଶ୍ରମ ପରିଚାଳକଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି । ୩ ଦିନ ମଧ୍ୟରେ କାରଣ ଦର୍ଶାଇ ଉତ୍ତର ଦେବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି । ଶିଶୁ ମଙ୍ଗଳ ସମିତି ଦ୍ଵାରା ଭବାନୀପାଟଣା ଟାଉନ ଥାନାରେ ଲିଖିତ ଅଭିଯୋଗ ଦାଏର କରାଯାଇଛି । କିପରି ଓ କେଉଁ ପରିସ୍ଥିତିରେ ଶିଶୁକୁ ହସ୍ତାନ୍ତର କରାଗଲା, ସେନେଇ ତନାଘନା ଆରମ୍ଭ କରିଛି ପୋଲିସ ।

କାରଣ ଦର୍ଶାଅ ନୋଟିସ୍ (ETV Bharat Odisha)

ଯଶୋଦା ଅନାଥ ଆଶ୍ରମ କଳାହାଣ୍ଡି (ETV Bharat Odisha)

3 ଦିନ ମଧ୍ୟରେ ଉତ୍ତର:
ଏହି ଘଟଣାକୁ ନେଇ ଗତ ଫେବୃଆରୀ ୨୮ ତାରିଖରେ ଜିଲ୍ଲାପାଳଙ୍କ ତରଫରୁ ଯଶୋଦା ଅନାଥ ଆଶ୍ରମର ପରିଚାଳକ ଶ୍ୟାମ ଜାଲକୁ କାରଣ ଦର୍ଶାଅ ନୋଟିସ ଜାରି କରାଯାଇଥିଲା । କାହିଁକି ଓ କେଉଁ ପରିସ୍ଥିତିରେ ଏଭଳି ଏକ ସମ୍ବେଦନଶୀଳ ଘଟଣା ଘଟିଲା? କାହିଁକି ଆପଣଙ୍କ ସିସିଆଇ ରେଜିଷ୍ଟ୍ରେସନ୍‌କୁ ବାତିଲ କରାଯିବ ନାହିଁ ଆଦି ପ୍ରଶ୍ନର କାରଣ ଦର୍ଶାଇ ଆସନ୍ତା ୩ ଦିନ ମଧ୍ୟରେ ଚିଠିର ଉତ୍ତର ଦେବା ପାଇଁ ଲେଖା ଯାଇଛି ।

ଶିଶୁ ମଙ୍ଗଳ ସମିତି କଳାହାଣ୍ଡି (ETV Bharat Odisha)

ଇଟିଭି ଭାରତ, କଳାହାଣ୍ଡି