ବଜାରରେ ନକଲି ପନିର ବିକ୍ରିକୁ ନେଇ ଆକ୍ସନ ମୋଡରେ ସ୍ୱାସ୍ଥ୍ୟ ବିଭାଗ, ଖାଉଟିଙ୍କୁ ସଚେତନ କଲେ ମନ୍ତ୍ରୀ

ଭୁବନେଶ୍ବର: ବଜାରରେ ନକଲି ପନିର ବିକ୍ରିକୁ ନେଇ ବିଭିନ୍ନ ଘଟଣା ସାମ୍ନାକୁ ଆସିବା ପରେ ଏବେ ଆକ୍ସନ୍‌ ମୋଡ୍‌ରେ ସ୍ୱାସ୍ଥ୍ୟ ବିଭାଗ । ନକଲି ପନିର ସହ ଅନ୍ୟ ଅପମିଶ୍ରିତ ଖାଦ୍ୟ ସାମଗ୍ରୀର ଉତ୍ପାଦନ ଓ ବିକ୍ରି ଉପରେ ବିଭାଗ ପକ୍ଷରୁ କଡ଼ା ନଜର ରଖାଯାଇଛି । ଏନେଇ ସ୍ୱାସ୍ଥ୍ୟମନ୍ତ୍ରୀ ମଧ୍ୟ ସତର୍କ କରିଛନ୍ତି । ସ୍ୱାସ୍ଥ୍ୟ ମନ୍ତ୍ରୀଙ୍କ କହିବା ଅନୁସାରେ ନକଲି ପନିର ସମ୍ପର୍କରେ ବିଭାଗ ପାଖରେ ପୂର୍ବରୁ ସୂଚନା ରହିଥିଲା । ଏହାକୁ ଆଧାର କରି ଗତ ୭ ଦିନ ଧରି ରାଜ୍ୟର ବିଭିନ୍ନ ସ୍ଥାନରେ ଖାଦ୍ୟ ସୁରକ୍ଷା ବିଭାଗ ପକ୍ଷରୁ ଚଢ଼ାଉ ଜାରି ରହିଛି । ବିଶେଷକରି କେଉଁଠି ନକଲି ପନିର ପ୍ରସ୍ତୁତ ହେଉଛି, କେଉଁଠାରୁ ଏହା ବଜାରକୁ ଆସୁଛି ଏବଂ କେଉଁ ବ୍ୟବସାୟୀ ଏହାକୁ ବିକ୍ରି କରୁଛନ୍ତି, ତାହା ଉପରେ ନଜର ରଖାଯାଉଛି ।

ଗ୍ରାହକଙ୍କୁ ସଚେତନ କଲେ ସ୍ବାସ୍ଥ୍ୟମନ୍ତ୍ରୀ

ଏହା ସହିତ ସେ ଆହୁରି ମଧ୍ୟ କହିଛନ୍ତି ଯେ ରାଜଧାନୀ ଭୁବନେଶ୍ୱରର ବିଭିନ୍ନ ସ୍ଥାନରେ ମଧ୍ୟ ଖାଦ୍ୟ ସୁରକ୍ଷା ଅଧିକାରୀମାନେ ଯାଞ୍ଚ ଓ ଚଢ଼ାଉ କରୁଛନ୍ତି । ସନ୍ଦେହ ଥିବା ଖାଦ୍ୟ ସାମଗ୍ରୀର ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଉଛି । କେବଳ ପନିର ନୁହେଁ, ଅନ୍ୟ ଅପମିଶ୍ରିତ ଖାଦ୍ୟ ସାମଗ୍ରୀ ବିକ୍ରି ଉପରେ ମଧ୍ୟ ବିଭାଗର ନଜର ରହିଛି । ସାଧାରଣତଃ ଖାଦ୍ୟର ଗୁଣବତ୍ତା ଓ ନିରାପତ୍ତାକୁ ନେଇ ଏପରି ଅପମିଶ୍ରଣ ଚିନ୍ତାର କାରଣ ହୋଇଥାଏ । ତେଣୁ ବଜାରରୁ ଖାଦ୍ୟ ସାମଗ୍ରୀ କିଣିବା ସମୟରେ ଗ୍ରାହକମାନେ ମଧ୍ୟ ସଚେତନ ରହିବା ଆବଶ୍ୟକ । ନକଲି କିମ୍ବା ସନ୍ଦେହଜନକ ଖାଦ୍ୟ ସାମଗ୍ରୀ ସମ୍ପର୍କରେ ଅଭିଯୋଗ ମିଳିଲେ ଆଗାମୀ ଦିନରେ ମଧ୍ୟ ଯାଞ୍ଚ ଓ ଚଢ଼ାଉ ଜୋରଦାର କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି ।

ସୂଚନା ଅନୁଯାୟୀ, କଟକ ଭୁବନେଶ୍ୱର ସମେତ ରାଜ୍ୟରେ ଥିବା ଛୋଟ ବଡ ସହରରେ ନକଲି ପନିର କିଣାବିକା ଚାଲିଥିବା ନଜରକୁ ଆସିଥିଲା । ଆଗକୁ ପାର୍ବଣ ଋତୁ ଥିବାରୁ ବଜାରକୁ ବିଭିନ୍ନ ପ୍ରକାର ନକଲି ଓ ଅପମିଶ୍ରିତ ଖାଦ୍ୟ ସାମଗ୍ରୀ ଆସିବାର ଆଶଙ୍କା ରହିଛି । ତେଣୁ ଖାଦ୍ୟ କିଣିବା ସମୟରେ ଗ୍ରାହକମାନେ ସତର୍କ ରହିବାକୁ ସ୍ୱାସ୍ଥ୍ୟମନ୍ତ୍ରୀ ପରାମର୍ଶ ଦେଇଛନ୍ତି । ଖାଦ୍ୟ ସାମଗ୍ରୀର ମାନ, ଉତ୍ପାଦନ ତାରିଖ, ମିଆଦ ତାରିଖ ଏବଂ ପ୍ୟାକେଟ୍‌ରେ ଥିବା ଲେବଲ୍‌ ଯାଞ୍ଚ କରିବା ପରେ ହିଁ ଖାଦ୍ୟ କିଣିବାକୁ କୁହାଯାଇଛି ।

ଏହା ମଧ୍ୟ ପଢନ୍ତୁ ରାକ୍ଷୀ ପୂର୍ଣ୍ଣିମା ପୂର୍ବରୁ ବଜାରରୁ ଛେନା ପନିର ଗାୟବ, ଚିନି ଦର ପାଇଁ ବଢିବ ମିଠା ଦର

ଏହା ମଧ୍ୟ ପଢନ୍ତୁ କଟକରେ ମିଳୁଛି ସିନ୍ଥେଟିକ ପନିର, ଜବତ କଲା ସିଏମସି ସ୍ୱାସ୍ଥ୍ୟ ବିଭାଗ

ଇଟିଭି ଭାରତ, ଭୁବନେଶ୍ବର