ବାଲିଗୁଡା ଖଡଗ ନଦୀରେ ବୁଡିଲା ଡଙ୍ଗା: ଭାସିଗଲେ ଶ୍ୱଶୁର-ବୋହୂ, ମିଳୁନି ପତ୍ତା

କନ୍ଧମାଳ: ଶୁଦ୍ଧିକ୍ରିୟାରେ ଯୋଗ ଦେଇ ଫେରୁଥିବା ବେଳେ ଖଡଗ ନଦୀରେ ବୁଡିଗଲା ଡଙ୍ଗା । 8 ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଥିବା ବେଳେ ଶ୍ବଶୁର-ବୋହୂ ନିଖୋଜ । ଗତକାଲି(ମଙ୍ଗଳବାର) ଅପରାହ୍ନ ସମୟରେ ବାଲିଗୁଡ଼ା ଥାନା ଅନ୍ତର୍ଗତ ସଲାଗୁଡ଼ା ପଞ୍ଚାୟତର ଦୁର୍ଗମ ଡାକା ଗାଁ ନିକଟ ଖଡ଼ଗ ନଦୀରେ ଏହି ଅଭାବନୀୟ ଘଟଣା ଘଟିଛି । ବର୍ତ୍ତମାନ ସୁଦ୍ଧା ଉଭୟଙ୍କ ପତ୍ତା ମିଳିନାହିଁ । ଉଦ୍ଧାର କାର୍ଯ୍ୟରେ ଲାଗିଛି ଅଗ୍ନିଶମ ।

ଶୁଦ୍ଧିକ୍ରିୟାରେ ଯୋଗ ଦେବାକୁ ଯାଇଥିଲେ:

ନିଖୋଜ ଶ୍ବଶୁର ଓ ବୋହୂ ହେଲେ ଗୁନନା ମଲ୍ଲିକ, ଡାକଲି ମଲ୍ଲିକ । ଗତକାଲି(ମଙ୍ଗଳବାର) ଏକ ଗୁନନା ବୋହୁଙ୍କ ସହିତ ଏକ ଶୁଦ୍ଧିକ୍ରିୟାରେ ଯୋଗ ଦେବାକୁ ଡାକା ଗାଁ ଆରପଟକୁ ଦେଶୀ ଡଙ୍ଗାରେ ଯାଇଥିଲେ । ତେବେ ଅପରାହ୍ନ ସମୟରେ ଏକ ଦେଶୀ ଡଙ୍ଗାରେ 10 ଜଣ ଫେରିବା ବେଳେ ହଠାତ୍‌ ଭାରସାମ୍ୟ ହରାଇ ଡଙ୍ଗାଟି ବୁଡି ଯାଇଥିଲା । 8 ଜଣଙ୍କୁ ସ୍ଥାନୀୟଲୋକେ ଉଦ୍ଧାର କରିଥିଲେ ହେଲେ ଶ୍ବଶୁର ବୋହୂଙ୍କ କୌଣସି ପତ୍ତା ମିଳିନଥିଲା । ଉଭୟେ ପ୍ରଖର ସୁଅରେ ଭାସି ନିଖୋଜ ହୋଇଯାଇଛନ୍ତି ।

ଆଜିବି ଚାଲିଛି ଖୋଜାଖୋଜି:

ଖବର ପାଇ ବାଲିଗୁଡ଼ା ଅଗ୍ନିଶମ ବାହିନୀ ଗତକାଲି ସନ୍ଧ୍ୟାରେ ଘଟଣାସ୍ଥଳରେ ପହଞ୍ଚି ନଦୀରେ ଖୋଜାଖୋଜି କରିଥିଲା ମଧ୍ୟ ନିଖୋଜ ଦୁଇଜଣଙ୍କର କୌଣସି ସନ୍ଧାନ ମିଳିନାହିଁ । ଲଗାଣ ବର୍ଷା ଯୋଗୁଁ ନଦୀରେ ଜଳସ୍ତର ବଢ଼ିବା ସହ ସ୍ରୋତ ପ୍ରଖର ଥିବାରୁ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହେଉଛି । ନିଖୋଜଙ୍କ ପରିବାର ଓ ସମ୍ପର୍କୀୟମାନେ ମଧ୍ୟ ନଦୀକୂଳରେ ରହି ଖୋଜାଖୋଜି ଜାରି ରଖିଛନ୍ତି । ଅନ୍ୟପଟେ ଆଜି ମଧ୍ୟ ନଦୀରେ ଉଭୟଙ୍କୁ ଖୋଜୁଛି ଅଗ୍ନିଶମ ବାହିନୀ ।

ଏନେଇ ବାଲିଗୁଡା ଅଞ୍ଚଳର ବରିଷ୍ଠ ସମାଜସେବୀ ଉମଚରଣ ଦିଗାଲ କହିଛନ୍ତି ଯେ, ଗୁନନା ମଲିକ, ଡାକଲି ମଲିକ ନଦୀରେ ଯାଉଥିବା ବେଳେ ଭାସିଯାଇଥିବ ଜଣାପଡିଛି । ଏହା ଅତ୍ୟନ୍ତ ଦୁଃଖଦ ଘଟଣା, ଏଥିପାଇଁ ସମଗ୍ର ବାଲିଗୁଡା ଅଞ୍ଚଳବାସୀ ଦୁଃଖ ପ୍ରକାଶ କରୁଛନ୍ତି । ଗ୍ରାମବାସୀ ବହୁ ଖୋଜା ଖୋଜି ପରେ ମଧ୍ୟ କୌଣସି ସୂଚନା ଏବେ ପର୍ଯ୍ୟନ୍ତ ପାଇ ନଥିବା ଜଣାପଡିଛି ।

ପୂର୍ବରୁ ବି ଘଟିଛି ଡଙ୍ଗା ବୁଡି ଘଟଣା:

ଏହି ଡଙ୍ଗା ବୁଡି ଘଟଣା ସମ୍ପର୍କରେ ସ୍ଥାନୀୟ ନେତା ଶିବରାମ ମାଝୀ କହିଛନ୍ତି ଯେ, ଏଭଳି ଘଟଣା ଖଡ଼ଗ ନଦୀରେ ବାରମ୍ବାର ହେଉଛି । ପୂର୍ବରୁ ମଧ୍ୟ ଦୁଇ ଦୁଇ ଥର ଏଭଳି ଘଟଣା ଘଟିଛି । ସରକାରଙ୍କୁ ଏକ ବ୍ରିଜ ପାଇଁ ବାରମ୍ବାର ପ୍ରସ୍ତାବ ଦେଲେ ମଧ୍ୟ କୌଣସି ସୁଫଳ ମିଳୁନାହିଁ ।

ଇଟିଭି ଭାରତ, କନ୍ଧମାଳ