IND vs ZIM LIVE: ଜିମ୍ବାୱେକୁ ୭୨ ରନ୍ ରେ ପରାସ୍ତ କଲା ଭାରତ, ସେମି ଆଶା ଉଜ୍ବଳ, ୧ରେ ୱେଷ୍ଟଇଣ୍ଡିଜ୍ ସହ ମୁକାବିଲା

IND vs ZIM LIVE: ଜିମ୍ବାୱେକୁ ୭୨ ରନରେ ପରାସ୍ତ କରି ଭାରତ ସେମିଫାଇନାଲ ଆଡକୁ ଏକ ଦୃଢ଼ ପଦକ୍ଷେପ ନେଇଛି । ଏବେ ଟିମ୍ ଇଣ୍ଡିଆ ମାର୍ଚ୍ଚ ୧ରେ ୱେଷ୍ଟଇଣ୍ଡିଜ୍ ସହିତ ମୁକାବିଲା କରିବ । ଗୁରୁବାର ଟି୨୦ ବିଶ୍ୱକପର ସୁପର-୮ ମ୍ୟାଚ୍ ରେ ଜିମ୍ବାୱେ ଟସ୍ ଜିତି ଭାରତକୁ ପ୍ରଥମେ ବ୍ୟାଟିଂ କରିବାକୁ ଆମନ୍ତ୍ରଣ କରିଥିଲା । ଅଭିଷେକ ଶର୍ମା (୫୫) ଏବଂ ହାର୍ଦ୍ଦିକ ପାଣ୍ଡ୍ୟା (୫୦*)ଙ୍କ ଅର୍ଦ୍ଧଶତକୀୟ ଇନିଂସ ସହାୟତାରେ ଟିମ୍ ଇଣ୍ଡିଆ ୨୦ ଓଭରରେ ଚାରି ୱିକେଟ୍ ହରାଇ ୨୫୬ ରନ କରିଥିଲା । ଜବାବରେ, ଜିମ୍ବାୱେର ଦଳ ନିର୍ଦ୍ଧାରିତ ଓଭରରେ ଛଅ ୱିକେଟ୍ ହରାଇ କେବଳ ୧୮୪ ରନ କରିପାରିଥିଲା । ସେମାନଙ୍କ ପାଇଁ ବ୍ରାଏନ୍ ବେନେଟ୍ ୯୭ ରନର ଅପରାଜିତ ଇନିଂସ ଖେଳିଥିଲେ ।

ଭାରତ ତରଫରୁ ଓପନିଂ କରିବାକୁ ଆସିଥିବା ସଞ୍ଜୁ ସାମସନ ୧୫ ବଲରୁ ୨୬ ରନ୍ କରି ଆଉଟ୍ ହୋଇଥିଲେ । ଇଶାନ କିଶାନ (୨୪ ବଲରୁ ୩୮ ରନ୍) ନିଜର ଅର୍ଦ୍ଧଶତକ ମିସ୍ କରିଥିଲେ । ଅଭିଷେକ ଶର୍ମା ୩୦ ବଲରୁ ୫୫ ରନ୍ କରିଥିବା ବେଳେ ଅଧିନାୟକ ସୂର୍ଯ୍ୟକୁମାର ଯାଦବ ୧୩ ବଲରୁ ୩୩ ରନ୍ କରିଥିଲେ । ହାର୍ଦ୍ଦିକ୍ ପାଣ୍ଡ୍ୟା (୫୦*) ଓ ତିଲକ ବର୍ମା (୪୪*) ରନ୍ କରି ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ ।

ଭାରତ ଆଜି ନିଜ ପ୍ଲେଇଂ ଇଲେଭେନରେ ଦୁଇଟି ପରିବର୍ତ୍ତନ କରିଥିଲା । ଉପ-ଅଧିନାୟକ ଅକ୍ଷର ପଟେଲ ଏବଂ ସଞ୍ଜୁ ସାମସନ ୱାଶିଂଟନ ସୁନ୍ଦର ଏବଂ ରିଙ୍କୁଙ୍କ ସ୍ଥାନ ନେଇଥିଲେ । ଜିମ୍ବାୱେ ମଧ୍ୟ ନିଜ ଦଳରେ ଗୋଟିଏ ପରିବର୍ତ୍ତନ କରିଥିଲା ।

ଗ୍ରୁପ-୧ ର ଅଂଶ ଥିବା ଭାରତ ପ୍ରଥମ ସୁପର ୮ ମ୍ୟାଚ୍ ରେ ଦକ୍ଷିଣ ଆଫ୍ରିକା ହାତରୁ ୭୬ ରନରେ ପରାଜୟ ବରଣ କରିଛି । ସେମିଫାଇନାଲ ଆଶାକୁ ବଞ୍ଚାଇ ରଖିବା ପାଇଁ ଆଜି ଚେନ୍ନାଇରେ ଭାରତର ବିଜୟ ଜରୁରୀ ଥିଲା । ଗ୍ରୁପ-୧ ରୁ ଦକ୍ଷିଣ ଆଫ୍ରିକା ପ୍ରଥମ ଦଳ ଭାବେ ସେମିଫାଇନାଲକୁ ଉନ୍ନୀତ ହୋଇସାରିଛି । ଆସନ୍ତା ମାର୍ଚ୍ଚ ୧ରେ ୱେଷ୍ଟଇଣ୍ଡିଜ୍ ବିପକ୍ଷ ମୁକାବିଲା ହିଁ ସ୍ଥିର କରିବ ଏହି ଗ୍ରୁପ୍ ରୁ ଦ୍ବିତୀୟ ଦଳ କିଏ ହେବ ।