କର୍ଣ୍ଣାଟକ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଲେ ସିଦ୍ଧରମୈୟା

ବେଙ୍ଗାଲୁରୁ: କର୍ଣ୍ଣାଟକ ରାଜନୀତିରେ ବଡ଼ ପରିବର୍ତ୍ତନ । କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା ମୁଖ୍ୟମନ୍ତ୍ରୀ ପଦବୀରୁ ଇସ୍ତଫା ଦେଇଛନ୍ତି । ମନ୍ତ୍ରୀମାନଙ୍କ ସହ ଏକ ବ୍ରେକଫାଷ୍ଟ୍‌ ବୈଠକରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବେ ବୋଲି ପୂର୍ବରୁ ଘୋଷଣା କରିଥିଲେ ସିଦ୍ଧରମୈୟା । ତେବେ ଆଗାମୀ ମୁଖ୍ୟମନ୍ତ୍ରୀ ହୋଇପାରନ୍ତି ଉପମୁଖ୍ୟମନ୍ତ୍ରୀ ଡି.କେ ଶିବ କୁମାର ।

ସିଦ୍ଧରମୈୟା ଆଜି ଅପରାହ୍ନ ପ୍ରାୟ 3ଟାରେ ରାଜଭବନ ଯାଇ ଏବଂ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି । ତେବେ ସିଦ୍ଧରମୈୟାଙ୍କ ଇସ୍ତଫା ପରେ, ଉପମୁଖ୍ୟମନ୍ତ୍ରୀ ଡି.କେ. ଶିବକୁମାର ମୁଖ୍ୟମନ୍ତ୍ରୀ ପଦ ସମ୍ଭାଳି ପାରନ୍ତି । ସେହିପରି ଗୃହମନ୍ତ୍ରୀ ପରମେଶ୍ୱରଙ୍କ ନାମ ମଧ୍ୟ ଆଲୋଚନା ହେଉଛି ।

ମୁଖ୍ୟମନ୍ତ୍ରୀ ସିଦ୍ଧରମୈୟା ତାଙ୍କ କାବେରୀ ବାସଭବନରେ ମନ୍ତ୍ରୀମାନଙ୍କ ପାଇଁ ଏକ ବ୍ରେକଫାଷ୍ଟ ଆୟୋଜନ କରିଥିଲେ । ସିଦ୍ଧରମୈୟାଙ୍କ ସହ ଗୃହମନ୍ତ୍ରୀ ଜି. ପରମେଶ୍ୱର ଏବଂ ଉପମୁଖ୍ୟମନ୍ତ୍ରୀ ଡି.କେ. ଶିବକୁମାରଙ୍କ ଅନେକ ମନ୍ତ୍ରୀ ଉପସ୍ଥିତ ଥିଲେ ।

ସିଦ୍ଧରମୈୟା ଇସ୍ତଫା ଘୋଷଣା କଲେ

ପୂର୍ବରୁ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା ମୁଖ୍ୟମନ୍ତ୍ରୀ ପଦରୁ ଇସ୍ତଫା ଘୋଷଣା କରିଥିଲେ । ସେ ତାଙ୍କ ମନ୍ତ୍ରୀମାନଙ୍କ ସହିତ ଏକ ବ୍ରେକଫାଷ୍ଟ ବୈଠକ ସମୟରେ ଭାବପ୍ରବଣ ସ୍ୱରରେ ଏହି ଘୋଷଣା କରିଥିଲେ । ପୂର୍ବରୁ, ମୁଖ୍ୟମନ୍ତ୍ରୀ ସିଦ୍ଧରମୈୟା ତାଙ୍କ କ୍ୟାବିନେଟ ମନ୍ତ୍ରୀମାନଙ୍କୁ ବ୍ରେକଫାଷ୍ଟ ବୈଠକ ପାଇଁ ଡାକିଥିଲେ । ସକାଳ 9ଟାରେ ଆରମ୍ଭ ହେବାକୁ ଥିବା ବୈଠକ ଗୋଟିଏ ଘଣ୍ଟା ବିଳମ୍ବ ହୋଇଥିଲା । ମୁଖ୍ୟମନ୍ତ୍ରୀ ସିଦ୍ଧରମୈୟା ନିଜେ ତାଙ୍କ ବାସଭବନରେ ଗୋଟିଏ ଘଣ୍ଟା ବିଳମ୍ବରେ ପହଞ୍ଚିଥିଲେ, ଯେଉଁଠାରେ ମନ୍ତ୍ରୀମାନଙ୍କ ପାଇଁ ବ୍ରେକଫାଷ୍ଟ ଟେବୁଲ ରଖାଯାଇଥିଲା ।

ମଙ୍ଗଳବାର ଦିନ ଦିଲ୍ଲୀରେ ଅନୁଷ୍ଠିତ ହାଇକମାଣ୍ଡଙ୍କ ନେତୃତ୍ୱରେ ହୋଇଥିବା ବୈଠକରେ ସିଦ୍ଧରମୈୟା କ୍ଷମତା ହସ୍ତାନ୍ତର କରିବାକୁ ରାଜି ହୋଇଥିଲେ । ସୂତ୍ର ଅନୁସାରେ ରାହୁଲ ଗାନ୍ଧୀଙ୍କ ଠାରୁ ବାର୍ତ୍ତା ପାଇବା ପରେ ସେ ଇସ୍ତଫା ଦେବାକୁ ନିଷ୍ପତ୍ତି ନେଇଥିଲେ ।

ସୂତ୍ର ଅନୁସାରେ, କର୍ଣ୍ଣାଟକ ରାଜ୍ୟପାଳ ଥାୱରଚାନ୍ଦ ଗେହଲଟ୍ ବୁଧବାର ରାତିରେ ତାଙ୍କ ରାଜ୍ୟ ମଧ୍ୟପ୍ରଦେଶକୁ ଯାଇଛନ୍ତି, ଯାହା ଫଳରେ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ଇସ୍ତଫା ବିଳମ୍ବିତ ହୋଇପାରେ ।