ବିଜେଡି-କଂଗ୍ରେସ ମେଣ୍ଟ ଚର୍ଚ୍ଚା; ଶାସକ ବିଜେପି ଉପରେ ପଡ଼ିବ କି ପ୍ରଭାବ ?

ଭୁବନେଶ୍ବର: ରାଜ୍ୟ ରାଜନୀତିରେ ନୂଆ ସମୀକରଣ ଦେଖିବାକୁ ମିଳିବ କି ? ଜୋର ଧରିଛି ବିଜେଡି ଏବଂ କଂଗ୍ରେସ ମେଣ୍ଟ ଚର୍ଚ୍ଚା । ଆସନ୍ତା ପଞ୍ଚାୟତ ନିର୍ବାଚନରେ ଏହି ଦୁଇ ଦଳ ମଧ୍ୟରେ ମେଣ୍ଟ ହେବ କି ? ଯଦି ଉଭୟ ବିରୋଧୀ ଦଳ ଭିତରେ ମେଣ୍ଟ ହୁଏ, ତେବେ ଶାସକ ବିଜେପି ଉପରେ କେତେ ପ୍ରଭାବ ପଡ଼ିବ ?

୨୦୦୦ ମସିହାରେ କଂଗ୍ରେସ ଏବଂ ଜନତା ଦଳର ବିକଳ୍ପ ଭାବେ ଜନ୍ମ ନେଇଥିଲା 'ବିଜୁ ଜନତା ଦଳ'। ବିଜୁ ପଟ୍ଟନାୟକଙ୍କ ମୃତ୍ୟୁ ପରେ ତତ୍କାଳୀନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ସହଯୋଗରେ ପ୍ରତିଷ୍ଠା ହୋଇଥିଲା ବିଜେଡି । ବିଜୁ ଅନୁଗତଙ୍କୁ ନେଇ ବିଜେଡିର ସୃଷ୍ଟି ହୋଇଥିଲା । ୨୦୦୦ ମସିହାରୁ ୨୦୨୪ ମସିହା ପର୍ଯ୍ୟନ୍ତ ଶାସନ କ୍ଷମତାରେ ରହିଥିଲା ବିଜୁ ଜନତା ଦଳ । ଯଦିଓ 9 ବର୍ଷ ବିଜେପି-ବିଜେଡିର ମିଳିତ ସରକାର ଥିଲା, ତେବେ ୨୦୦୯ ମସିହା ପରଠୁ ଏନଡିଏରୁ ନୀତିଗତ ଭାବେ ଦୂରେଇ ରହିଲେ ବିଜେଡି ସଭାପତି ନବୀନ । ଆନୁଷ୍ଠାନିକ ଭାବରେ ମେଣ୍ଟରେ ରହିଲେ ନଥିଲେ ମଧ୍ୟ ପରୋକ୍ଷରେ କେନ୍ଦ୍ରରେ ନେତୃତ୍ୱାଧୀନ ଭାରତୀୟ ଜନତା ପାର୍ଟି ସରକାରକୁ ସବୁ କ୍ଷେତ୍ରରେ ସମର୍ଥନ ଦେଉଥିଲେ ନବୀନ । ।

ପ୍ରଥମଥର ପାଇଁ ବିଜେଡିର ଆଣ୍ଟି-ବିଜେପି ଷ୍ଟାଣ୍ଡ:

24 ବର୍ଷ ପରେ କ୍ଷମତାରୁ ଯିବା ପରେ ନବୀନ ଏବେ ପ୍ରଥମଥର ପାଇଁ ବିଜେପି ବିରୋଧୀ ଆଭିମୁଖ୍ୟ ପୋଷଣ କରିଛନ୍ତି । ଗତ ରାଜ୍ୟସଭା ନିର୍ବାଚନରେ ବିଜେପି ସମର୍ଥିତ ପ୍ରାର୍ଥୀ ଦିଲ୍ଲୀପ ରାୟଙ୍କ ବିରୋଧରେ ଯାଇ ନବୀନ, ଡାକ୍ତର ଦତ୍ତେଶ୍ୱର ହୋତାଙ୍କୁ ପ୍ରାର୍ଥୀ କରିଥିଲେ । ନବୀନଙ୍କ ପ୍ରସ୍ତାବକୁ ଗ୍ରହଣ କରିଥିଲେ ପିସିସି ସଭାପତି ଭକ୍ତ ଚରଣ ଦାଶ । ବିଜେଡିର ମିଳିତ ପ୍ରାର୍ଥୀ ଡାକ୍ତର ହୋତାଙ୍କୁ ସମର୍ଥନ କରିଥିଲା କଂଗ୍ରେସ । କିନ୍ତୁ ରାଜ୍ୟସଭା ନିର୍ବାଚନରେ କ୍ରସ୍‌ ଭୋଟିଂ କରି ଉଭୟ ବିଜେଡି ଏବଂ କଂଗ୍ରେସର ବିଧାୟକମାନେ ଦିଲ୍ଲୀପକୁ ଜିତାଇ ଥିଲେ । ଫଳରେ ଏବେ ନବୀନ ଏବଂ ଭକ୍ତଙ୍କ ଆକ୍ରୋଶ ଆହୁରି ବଢିଯାଇଛି । ଉଭୟଙ୍କ ଲକ୍ଷ୍ୟ କଳେ ବଳେ, କୌଶଳେ ଭାରତୀୟ ଜନତା ପାର୍ଟି ସରକାରକୁ ଚେକ୍ ଦେବା । କ୍ଷମତା ହାତରୁ ଯିବା ପରେ ନବୀନ, ବିଜେପିକୁ କାଉଣ୍ଟର କରିବାକୁ ଚଳଚଞ୍ଚଳ ମନୋଭାବ ଦେଖିବାକୁ ମିଳୁଛି । ସେହିପରି ଜାତୀୟ ସ୍ତରରେ କଂଗ୍ରେସର ଏକମାତ୍ର ମୁଖ୍ୟ ପ୍ରତିଦ୍ବନ୍ଦ୍ବୀ ବିଜେପିକୁ ମାତ୍ ଦେବାକୁ ଭକ୍ତ ମଧ୍ୟ ବିଜେଡି ସହ ହାତ ମିଶାଇବା ପାଇଁ ଆଗ୍ରହି ଥିବା ଚର୍ଚ୍ଚା ହେଉଛି ।

ରାଜ୍ୟ ରାଜନୀତିରେ ନୂଆ ସମୀକରଣ ଦେଖିବାକୁ ମିଳିବ କି ? (ETV Bharat Odisha)

ମେଣ୍ଟ ଚର୍ଚ୍ଚା କାହିଁକି ଜୋର ଧରିଲା ?

ଆଗକୁ ଆସୁଛି ତ୍ରିସ୍ତରୀୟ ପଞ୍ଚାୟତ ନିର୍ବାଚନ । ରାଜ୍ୟ ରାଜନୀତିରେ ଉଭୟ ବିଜେଡି ଏବଂ କଂଗ୍ରେସ ମେଣ୍ଟ କରି ଲଢ଼ିବେ ନା ଏକାକୀ ଲଢ଼ିବେ ? ଏଭଳି ପ୍ରଶ୍ନରେ ପିସିସି ସଭାପତି ଭକ୍ତ ଚରଣ ଦାଶଙ୍କ ଉତ୍ତର ମେଣ୍ଟ ରାଜନିତୀକୁ ଅଧିକ ରୋଚକ କରିଛି । ସେପଟେ ରାଜନୈତିକ ସମୀକ୍ଷକଙ୍କ ମତରେ ଉଭୟ ବିଜେଡି ଏବଂ କଂଗ୍ରେସ ଧର୍ମନିରପେକ୍ଷ । ରାଜ୍ୟସଭା ନିର୍ବାଚନରେ ମିଳିତ ପ୍ରାର୍ଥୀ ଦେଇ ମିଶ୍ର ଅନୁଭୂତି ସାଉଁଟିବା ପରେ ଏବେ ଉଭୟେ ବିଜେଡି-କଂଗ୍ରେସ, ବିଜେପି ସରକାରକୁ ଚେକ୍ ଦେବା ପାଇଁ ମେଣ୍ଟ ସମ୍ଭାବନାକୁ ଏଡାଇ ଦିଆ ଯାଇନପାରେ ।

ଗଣମାଧ୍ୟମର ପ୍ରଶ୍ନର ଉତ୍ତରରେ ପିସିସି ସଭାପତି ଭକ୍ତ ଦାଶ କହିଛନ୍ତି, "ଆବଶ୍ୟକ ପଡ଼ିଲେ ବିଜେଡି ସହ କଂଗ୍ରେସ ମତ ବିନିମୟ କରିପାରେ ।"

ବିଜେଡି-କଂଗ୍ରେସ ମେଣ୍ଟ ହେବ !

ଓଡ଼ିଶା ପ୍ରଦେଶ କଂଗ୍ରେସ କମିଟି, ସଭାପତି ଭକ୍ତ ଚରଣ ଦାସ ଭବିଷ୍ୟତରେ ପଞ୍ଚାୟତ ନିର୍ବାଚନରେ ​​କଂଗ୍ରେସ-ବିଜେଡି ମେଣ୍ଟ ହେବାର ସମ୍ଭାବନା ଉପରେ ଇଙ୍ଗିତ କରି ବିତର୍କ ଆରମ୍ଭ କରିଛନ୍ତି । ପିସିସି ସଭାପତି ଭକ୍ତ ଚରଣ ଦାଶ କହିଛନ୍ତି,"ଯଦି ପାରସ୍ପରିକ ବୁଝାମଣା ହୁଏ, ତେବେ ଦୁଇ ଦଳ ଏକାଠି ଲଢ଼ିପାରିବେ, ଯଦିଓ ଭବିଷ୍ୟତ ଅନିଶ୍ଚିତତା ରହିଛି ।"

ଆଗାମୀ ପଞ୍ଚାୟତ ନିର୍ବାଚନରେ ​​କଂଗ୍ରେସ ଏବଂ ବିଜୁ ଜନତା ଦଳ ମଧ୍ୟରେ ମେଣ୍ଟ ସମ୍ଭାବନାକୁ ଏଡାଇ ଦିଆଯାଇ ନପାରେ । ଯଦି ରାଜ୍ୟରେ ବିଜେଡି କଂଗ୍ରେସ ମେଣ୍ଟ ହୁଏ ତାହେଲେ ପ୍ରଭାବ କଣ ପଡିବ ? ବିଜେଡି କଂଗ୍ରେସ ହାତ ମିଳାଇ ସେମାନେ ଶାସକ ଭାରତୀୟ ଜନତା ପାର୍ଟି ସରକାରକୁ ଏକ ଦୃଢ଼ ବିରୋଧ ଉପସ୍ଥାପନ କରିପାରିବେ । ଯାହା ଓଡ଼ିଶାର ନିର୍ବାଚନୀ ଦୃଶ୍ୟପଟକୁ ପରିବର୍ତ୍ତନ କରିପାରେ । କଂଗ୍ରେସ ଏବଂ ବିଜେଡିର ମିଳିତ ଭୋଟ ଅଂଶ ସେମାନଙ୍କୁ ଏକ ଗୁରୁତ୍ୱପୂର୍ଣ୍ଣ ଲାଭ ଦେଇପାରେ, ବିଶେଷକରି ଯେଉଁ ନିର୍ବାଚନ ମଣ୍ଡଳୀରେ ସେମାନେ ପାରମ୍ପରିକ ଭାବରେ ଭଲ ପ୍ରଦର୍ଶନ କରିଛନ୍ତି ।

ଏହି ମେଣ୍ଟ ସେମାନଙ୍କୁ ପ୍ରମୁଖ ପଞ୍ଚାୟତ ଆସନ ଦଖଲ କରିବାରେ ଏବଂ ସ୍ଥାନୀୟ ଶାସନ ଉପରେ ଅଧିକ ପ୍ରଭାବ ପକାଇବାରେ ସହାୟକ ହୋଇପାରେ । ମିଳିତ ଭାବେ କାର୍ଯ୍ୟ କଲେ କଂଗ୍ରେସ ଏବଂ ବିଜେଡି ଓଡ଼ିଶାରେ ବିଜେପିକୁ ପ୍ରଭାବଶାଳୀ ଭାବରେ ମୁକାବିଲା କରିପାରିବେ । ଏହି ମେଣ୍ଟ ଓଡ଼ିଶାରେ ଆଞ୍ଚଳିକ ରାଜନୀତିକୁ ମଧ୍ୟ ସୁଦୃଢ଼ ​​କରିପାରିବ, ସ୍ଥାନୀୟ ସମସ୍ୟାକୁ ଅଧିକ ଗୁରୁତ୍ୱ ପ୍ରଦାନ କରିପାରିବ ।

ରାଜନିତୀରେ କିଛି ଅସମ୍ଭବ ନୁହେଁ: ବିଜେଡି

ସେପଟେ ବିଜେଡି ବିଧାୟକ ସାରଦା ଜେନା କହିଛନ୍ତି, "ରାଜନିତୀରେ କିଛି ଅସମ୍ଭବ ନୁହେଁ । ରାଜନୈତିକ ବିଚାର ଧାରା, ରାଜନୈତିକ ଆଦର୍ଶ, ଚିନ୍ତାଧାରା ଯେଉଁଠି ସମାନ ରୁହେ, ସେଠି ହୁଏତ ବନ୍ଧୁତା ସ୍ଥାପନ କରାଯାଇପାରେ । କଂଗ୍ରେସ ସହ ମେଣ୍ଟ ହେବ କି ନହେବ ସେ ନିଷ୍ପତ୍ତି ଦଳର ସୁପ୍ରିମୋ ନବୀନ ପଟ୍ଟନାୟକ ନେବେ । ବିଜୁ ଜନତା ଦଳର ରାଜନୈତିକ ବ୍ୟାପାର କମିଟି ନିଷ୍ପତ୍ତି ନେବ । ରାଜନିତୀରେ କେହି କାହାର ଚିର ଶତ୍ରୁ କିମ୍ବା ଚିର ମିତ୍ର ନୁହଁନ୍ତି । ତେଣୁ ଆଗାମୀ ଦିନରେ ସବୁ ସ୍ପଷ୍ଟ ହେବ । "

ରାଜ୍ୟ ରାଜନୀତିରେ ନୂଆ ସମୀକରଣ ଦେଖିବାକୁ ମିଳିବ କି ? (ETV Bharat Odisha)

'ବିଜେଡି-କଂଗ୍ରେସ ମିଶିଲେ ବି ବିଜେପିକୁ ରୋକି ପାରିବେନି': ବିଜେପି

କଂଗ୍ରେସ ଏବଂ ବିଜୁ ଜନତା ଦଳ ଓଡ଼ିଶାରେ ହାତ ମିଳାଇଛନ୍ତି । ରାଜ୍ୟସଭା ନିର୍ବାଚନ ପାଇଁ ଜଣେ ସାଧାରଣ ପ୍ରାର୍ଥୀ, ଡାକ୍ତର ଦତ୍ତେଶ୍ୱର ହୋତାଙ୍କୁ ପ୍ରାର୍ଥୀ କରିଥିଲେ । ଭାରତୀୟ ଜନତା ପାର୍ଟିକୁ ଚେକ ଦେବାକୁ ଏହି ମେଣ୍ଟ ଏକ ରଣନୀତିକ ପଦକ୍ଷେପ ବୋଲି କୁହାଯାଇପାରେ । ତେବେ ବିଜେଡି-କଂଗ୍ରେସ ମେଣ୍ଟ ହେଲେ ଗେରୁଆ ଦଳକୁ କିଛି ଫରକ ପଡ଼ିବ ନାହିଁ ବୋଲି ଶାସକ ଦଳ ଯୁକ୍ତି ବାଢ଼ିଛି ।

ବିଜେଡି-କଂଗ୍ରେସର ମେଣ୍ଟ ନେଇ ବରିଷ୍ଠ ବିଜେପି ବିଧାୟକ ପଦ୍ମଲୋଚନ ପଣ୍ଡା କହିଛନ୍ତି," ବିଜେଡି-କଂଗ୍ରେସ ମିଶିଲେ ବି ବିଜେପିକୁ ରୋକି ପାରିବେନି । ଲୋକମତ ଆମ ସହ ଅଛି, ଆଗକୁ ଅଧିକ ସମର୍ଥନ ମିଳିବ।ତାଙ୍କର ସ୍ଥିତି ଦିନକୁ ଦିନ ଖରାପ ହେବାକୁ ବସିଲାଣି । ସେମାନେ ନିଜ ଦଳ, ନିଜ ବିଧାୟକମାନଙ୍କୁ ଏକାଠି ରଖନ୍ତୁ । ତାପରେ ବିଜେପି କଥା କହିବେ ।"

ରାଜ୍ୟ ରାଜନୀତିରେ ନୂଆ ସମୀକରଣ ଦେଖିବାକୁ ମିଳିବ କି ? (ETV Bharat Odisha)

ଏପରି କହିଲେ ରାଜନୈତିକ ସମୀକ୍ଷକ:

ରାଜନୈତିକ ସମୀକ୍ଷକ ରବି ଦାଶ କହିଛନ୍ତି,"ଉଭୟ ବିଜେଡି-କଂଗ୍ରେସ ମଧ୍ୟରେ ସେମିତି ଗ୍ରାଉଣ୍ଡ ସ୍ତରର ଆଲୋଚନା ଏପର୍ଯ୍ୟନ୍ତ ହେବାର କୌଣସି ସୂଚନା ସାମ୍ନାକୁ ଆସିନାହିଁ । ଉଭୟ ବିଜେଡି କଂଗ୍ରେସ ଧର୍ମ ନିରପେକ୍ଷ । ରାଜ୍ୟ ତଥା ସାରା ଦେଶରେ କଂଗ୍ରେସର ମୁଖ୍ୟ ଶତ୍ରୁ ହେଉଛି ବିଜେପି । ଓଡ଼ିଶାରେ ବିଜେଡି ମଧ୍ୟ ବିରୋଧୀ ଦଳ । ତେବେ ଭକ୍ତ ଦାଶ ହିଁ ନିଷ୍ପତ୍ତି ନେଇପାରିବେ । କିନ୍ତୁ କଂଗ୍ରେସ ଭିତରେ ସେନେଇ ଅସନ୍ତୋଷ ବ୍ୟାପୁଛି । ସେମିତି କିଛି ଆଲୋଚନା ଉଭୟ ବିଜେଡି ଏବଂ କଂଗ୍ରେସର କାହିଁକି ଦେଖିବାକୁ ମିଳୁନାହିଁ । ଯଦି ଉଭୟ ଦଳ ଚାହିଁବେ, ତେବେ ସେମାନେ ମେଣ୍ଟ କରିପାରିବେ ।"

ଇଟିଭି ଭାରତ, ଭୁବନେଶ୍ବର