ସୁପ୍ରିମକୋର୍ଟଙ୍କ ରାୟ ସତ୍ତ୍ବେ ଟାରିଫ୍ ନିଷ୍ପତ୍ତିରେ ଅଟଳ ଟ୍ରମ୍ପ; କହିଲେ 'ଭାରତ ସହ ବାଣିଜ୍ୟ ଚୁକ୍ତିରେ ହେବନି ପରିବର୍ତ୍ତନ'

TRUMP TARIFFS ନୂଆଦିଲ୍ଲୀ: ଟାରିଫ୍ ନିଷ୍ପତ୍ତିରେ ଅଟଳ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଆମେରିକାର ସୁପ୍ରିମକୋର୍ଟ ଗତକାଲି (ଶୁକ୍ରବାର) ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଲାଗୁ ହୋଇଥିବା ଗ୍ଲୋବାଲ ଟାରିଫକୁ ଅବୈଧ ଘୋଷଣା କରିବା ପରେ ମଧ୍ୟ ସେ ନିଜ ନିଷ୍ପତ୍ତିରେ ଅଟଳ ରହିଛନ୍ତି । ଆମେରିକା ସୁପ୍ରିମକୋର୍ଟଙ୍କ ଦ୍ବାରା ଅବୈଧ ଘୋଷଣା ହେବା ପରେ ହ୍ୱାଇଟ୍ ହାଉସରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଟ୍ରମ୍ପ କହିଛନ୍ତି,'ଭାରତ ସହ ବାଣିଜ୍ୟ ଚୁକ୍ତିନାମାରେ କୌଣସି ପରିବର୍ତ୍ତନ ହେବ ନାହିଁ ।'

ଆମେରିକାର ସୁପ୍ରିମକୋର୍ଟଙ୍କ ଝଟକା ପରେ ମଧ୍ୟ ନିଜ ଜିଦରେ ଅଟଳ ଡୋନାଲ୍ଡ ଟ୍ରମ୍ପ । ସୁପ୍ରିମକୋର୍ଟ ଟାରିଫକୁ ଅବୈଧ ଘୋଷଣା କରିବାର କିଛି ସମୟ ପରେ ପ୍ରତିକ୍ରିୟା ରଖିଛନ୍ତି ସେ । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି,"ମୁଁ ଭାବୁଛି ଭାରତ ସହିତ ମୋର ସମ୍ପର୍କ ଚମତ୍କାର ଏବଂ ଆମେ ଭାରତ ସହିତ ବ୍ୟବସାୟ କରୁଛୁ । ଭାରତ ଋଷଠାରୁ ଅଲଗା ହୋଇଗଲା । ଭାରତ ଋଷଠାରୁ ତେଲ ଆଣୁଥିଲା । ମୋର ଅନୁରୋଧରେ ସେମାନେ ପଛକୁ ହଟିଗଲେ, କାରଣ ଆମେ ଏହି ଭୟଙ୍କର ଯୁଦ୍ଧକୁ ସମାପ୍ତ କରିବାକୁ ଚାହୁଁଛୁ । ଯାହା ପ୍ରତି ମାସରେ 25,000 ଲୋକଙ୍କୁ ହତ୍ୟା କରୁଛି ।"

ସେ ଆହୁରି ମଧ୍ୟ କହିଛନ୍ତି,"ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହିତ ମୋର ସମ୍ପର୍କ ବହୁତ ଭଲ । ଗତ ଗ୍ରୀଷ୍ମ ଋତୁରେ ଶୁଳ୍କ ବ୍ୟବହାର କରି ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧକୁ ବନ୍ଦ କରାଯାଇଥିଲା । ମୁଁ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧ ବନ୍ଦ କରିଥିଲି । ଆପଣ ଜାଣନ୍ତି ଯେ, ଏହି ଯୁଦ୍ଧରେ 10ଟି ବିମାନ ଖସାଇ ଦିଆଯାଇଥିଲା । ଏହି ଯୁଦ୍ଧ ଏକ ପରମାଣୁ ଯୁଦ୍ଧରେ ପରିଣତ ହୋଇଥାନ୍ତା । ତେଣୁ ଗତକାଲି ପାକିସ୍ତାନର ପ୍ରଧାନମନ୍ତ୍ରୀ କହିଥିଲେ ଯେ ରାଷ୍ଟ୍ରପତି ଟ୍ରମ୍ପ ଯୁଦ୍ଧ ବନ୍ଦ କରି 30 ନିୟୁତ ଜୀବନ ବଞ୍ଚାଇଛନ୍ତି । ମୁଁ କହିଥିଲି ଯେ, ଯଦି ତୁମେ ଯୁଦ୍ଧ କରିବାକୁ ଚାହୁଁଛ, ତେବେ ଠିକ୍ ଅଛି କିନ୍ତୁ ତୁମେ ଆମେରିକା ସହିତ ବାଣିଜ୍ୟ କରିବ ନାହିଁ । ଉଭୟଙ୍କୁ 200 ପ୍ରତିଶତ ଶୁଳ୍କ ଦେବାକୁ ପଡିବ ।"

ବାଣିଜ୍ୟ ଚୁକ୍ତିନାମା ଅନୁଯାୟୀ, ୱାଶିଂଟନ୍ ନୂଆଦିଲ୍ଲୀ ଉପରେ କମ୍ ପାରସ୍ପରିକ ଶୁଳ୍କ ଲାଗୁ କରିବ, ଏହାକୁ 25 ପ୍ରତିଶତରୁ ହ୍ରାସ କରି 18 ପ୍ରତିଶତ କରିବ । ଟ୍ରମ୍ପଙ୍କୁ ପଚରାଗଲା ଯେ ସୁପ୍ରିମକୋର୍ଟଙ୍କ ନିଷ୍ପତ୍ତି ଭାରତ ସହିତ ବାଣିଜ୍ୟ ଚୁକ୍ତିନାମାକୁ ପ୍ରଭାବିତ କରିବ କି ?

ଏହି ଅବସରରେ ଟ୍ରମ୍ପ କହିଥିଲେ," କିଛି ପରିବର୍ତ୍ତନ ହେବ ନାହିଁ । ସେମାନେ ଶୁଳ୍କ ଦେବେ ଏବଂ ଆମେ ଶୁଳ୍କ ଦେବୁ ନାହିଁ । ଭାରତ ସହିତ ଚୁକ୍ତିନାମା ହେଉଛି ଯେ, ସେମାନେ ଶୁଳ୍କ ଦେବେ । ଯେପରି ଆପଣ ଜାଣନ୍ତି, ଏହା ପୂର୍ବ ପରିସ୍ଥିତିର ଏକ ଓଲଟପାଲଟ । ମୁଁ ଭାବୁଛି ପ୍ରଧାନମନ୍ତ୍ରୀ ମୋଦି ଜଣେ ପ୍ରକୃତରେ ମହାନ ବ୍ୟକ୍ତି, କିନ୍ତୁ ସେ ଆମେରିକାର ବିରୋଧୀ ଲୋକମାନଙ୍କ ଅପେକ୍ଷା ବହୁତ ବୁଦ୍ଧିମାନ । ତେଣୁ ଆମେ ଭାରତ ସହିତ ଏକ ଚୁକ୍ତି କରିଛୁ । ଏବେ ଏହା ଏକ ନ୍ୟାୟପୂର୍ଣ୍ଣ ଚୁକ୍ତି । ଆମେ ସେମାନଙ୍କୁ ଶୁଳ୍କ ଦେଉନାହୁଁ, ସେମାନେ ଶୁଳ୍କ ଦେଉଛନ୍ତି । "