ପାକିସ୍ତାନ-ଆଫଗାନିସ୍ତାନ ଯୁଦ୍ଧ; ଉଭୟ ପକ୍ଷରୁ ବହୁ ସୈନିକ ମୃତ

PAKISTAN AFGHANISTAN WAR ନୂଆଦିଲ୍ଲୀ: ପାକିସ୍ତାନ ଓ ଆଫଗାନିସ୍ତାନ ମଧ୍ୟରେ ଗତ 24 ଘଣ୍ଟା ମଧ୍ୟରେ ବିବାଦ ଅଧିକ ଘେନେଇବାରେ ଲାଗିଛି । ଉଭୟ ଦେଶ ମଧ୍ୟରେ ଥିବା ସୀମା- ଡୁରାଣ୍ଡ ଲାଇନକୁ ନେଇ ତିକ୍ତତା ବଢ଼ିଥିବା ବେଳେ, ଦୁଇ ଦେଶ ମଧ୍ୟରେ ଯୁଦ୍ଧ ଆରମ୍ଭ ହୋଇ ଯାଇଛି । ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଏହାକୁ ଓପନ ୱାର୍ (Open War) ଆଖ୍ୟା ଦେଇଛନ୍ତି ।

ଆଫଗାନିସ୍ତାନ ବିରୋଧରେ ପାକିସ୍ତାନର ଯୁଦ୍ଧ ଘୋଷଣା:
ପାକିସ୍ତାନ ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ୍ ଆଫଗାନିସ୍ତାନ ବିରୋଧରେ ଏହି ଯୁଦ୍ଧକୁ ' ଓପନ ୱାର୍' ଭାବେ ଘୋଷଣା କରିଛନ୍ତି । ନିଜର ସୋସିଆଲ ମିଡିଆ ହ୍ୟାଣ୍ଡଲ Xରେ ସେ ଲେଖିଛନ୍ତି ଯେ, "ଆମର ସହିବା କ୍ଷମତା ଚରମ ସୀମାରେ ପହଞ୍ଚିଛି । ଏବେ ତାଲିବାନ ଓ ଆମ ମଧ୍ୟରେ ଯୁଦ୍ଧ ଆରମ୍ଭ ହୋଇଛି ।"

ଅପରେସନ 'ଗଜବ ଇଲ୍ ହକ୍':
ରିପୋର୍ଟ ଅନୁଯାୟୀ ପାକିସ୍ତାନ ପକ୍ଷରୁ ଆଫଗାନିସ୍ତାନ ଉପରେ ଏକ ବଡ଼ ସାମରିକ ଅଭିଯାନ ଆରମ୍ଭ ହୋଇଛି । ଏହାର ନାମ 'ଗଜବ ଇଲ୍ ହକ୍' ରଖାଯାଇଛି । ଆଫଗାନିସ୍ତାନ ପକ୍ଷରୁ ସୀମା ନିକଟରେ ବାରମ୍ବାର କରାଯାଉଥିବା ଆକ୍ରମଣର ପ୍ରତିଉତ୍ତରରେ ପାକିସ୍ତାନ ଏହି ଯୁଦ୍ଧ ଆରମ୍ଭ କରିଛି । ଏହି ଅପରେସନରେ 133 ଆଫଗାନୀ ତାଲିବାନଙ୍କୁ ନିପାତ କରାଯାଇଛି ବୋଲି ପାକିସ୍ତାନ ପକ୍ଷରୁ ଦାବି କରାଯାଇଛି । ଆଫଗାନିସ୍ତାନର ତାଲିବାନ ସରକାର ପକ୍ଷରୁ ପାକିସ୍ତାନ ସୀମାର ବିଭିନ୍ନ ସ୍ଥାନରେ ଆକ୍ରମଣ ପରେ ଗୁରୁବାର ବିଳମ୍ବିତ ରାତିରେ, ପାକିସ୍ତାନ ପକ୍ଷରୁ ପାଲଟା ସାମରିକ କାର୍ଯ୍ୟାନୁଷ୍ଠାନ ଆରମ୍ଭ କରାଯାଇଥିଲା ।

'27ଟି ଚାଲିବାନୀ ଆଡ୍ଡା ଅକ୍ତିଆର କରିଛୁ'
ପାକିସ୍ତାନ ସୂଚନା ମନ୍ତ୍ରୀ ଅତୁଲ୍ଲା ତରାର କହିଛନ୍ତି ଯେ, ପାଖାପାଖି 133 ଆଫଗାନୀ ତାଲିବାନଙ୍କୁ ନିପାତ କରାଯାଇଛି । ଏହା ସହିତ 200ରୁ ଅଧିକ ତାଲିବାନ ସୈନ୍ୟ ଏହି ଅପରେସନରେ ଗୁରୁତର ଆହତ ହୋଇଛନ୍ତି । ଆଫଗାନିସ୍ତାନ ରାଜଧାନୀ କାବୁଲ, ପାକ୍ତିଆ ଓ କାନ୍ଦାହାର ଭଳି ସ୍ଥାନକୁ ପାକିସ୍ତାନ ସେନା ଟାର୍ଗେଟ କରିଥିଲା । 27ଟି ତାଲିବାନୀ ଆଡ୍ଡା ଅକ୍ତିଆର କରିବା ସହିତ 9 ଜଣ ତାଲିବାନୀଙ୍କୁ ପାକିସ୍ତାନ ବନ୍ଧକ ରଖିଛି ବୋଲି ପାକିସ୍ତାନ ସୂଚନା ମନ୍ତ୍ରୀ ଦାବି କରିଛନ୍ତି ।

ଭାରତର ଉପନିବେଶ ସାଜିଛି ଆଫଗାନିସ୍ତାନ:
ପାକ୍ ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ୍ କହିଛନ୍ତି, ଏହି ସାମରିକ କାର୍ଯ୍ୟାନୁଷ୍ଠାନ(Military Operation) ଏବେ ମଧ୍ୟ ଚାଲିଛି । ପାକିସ୍ତାନ ସଶସ୍ତ୍ର ବାହିନୀ ଏବେ ଆଫଗାନିସ୍ତାନର ଆକ୍ରମଣର ପାଲଟା ଜବାବ ଦେଉଛନ୍ତି । ସେ ନିଜ ସୋସିଆଲ ମିଡିଆରେ ଉଲ୍ଲେଖ କରିିଛନ୍ତି, "ଆଫଗାନିସ୍ତାନରୁ ନାଟୋ (NATO) ସାମରିକ ବାହିନୀ ଯିବା ପରେ ତାଲିବାନ ଶାନ୍ତି ପ୍ରତିଷ୍ଠା ସହିତ ଆଞ୍ଚଳିକ ଅଭିବୃଦ୍ଧି ଉପରେ ଧ୍ୟାନ କେନ୍ଦ୍ରିତ କରିଥିଲା । ମାତ୍ର ଏହା କ୍ରମଶଃ ଭାରତର ଉପନିବେଶ ପାଲଟି ଯାଇଛି । ସାରା ବିଶ୍ବରୁ ଆତଙ୍କବାଦୀଙ୍କୁ ଏକତ୍ରିତ କରି ଆତଙ୍କବାଦ ଖେଳାଉଛି ତାଲିବାନ ।"

ଏନେଇ ପାକିସ୍ତାନ ବିଭିନ୍ନ ସୌହାର୍ଦ୍ଦ୍ୟପୂର୍ଣ୍ଣ ରାଷ୍ଟ୍ରଙ୍କ ଜରିଆରେ ଶାନ୍ତିପୂର୍ଣ୍ଣ ପଦକ୍ଷେପ ନେବାକୁ ଚେଷ୍ଟା କରିଥିଲା ବୋଲି ପ୍ରତିରକ୍ଷା ମନ୍ତ୍ରୀ କହିଛନ୍ତି । ମାତ୍ର ଆଫଗାନିସ୍ତାନ ଭାରତର ଅନୁଗତ ସାଜିଥିବା ଅଭିଯୋଗ ଆଣିଛନ୍ତି ପାକ୍ ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ୍ ।

'ଆଫଗାନିସ୍ତାନ ଅଞ୍ଚଳରେ ପ୍ରବେଶ କରିଥିଲା ପାକିସ୍ତାନ ସେନା'
ଆଫଗାନିସ୍ତାନ ଜାତୀୟ ପ୍ରତିରକ୍ଷା ବିଭାଗ ପକ୍ଷରୁ 55 ପାକିସ୍ତାନ ସୈନିକଙ୍କୁ ହତ୍ୟା କରାଯାଇଥିବା ନେଇ ବୟାନ ଜାରି କରାଯାଇଛି । ଡୁରାଣ୍ଡ ଲାଇନ ସୀମାରେ ଗୁରୁବାର ରାତିରେ ଉଭୟ ପକ୍ଷରୁ ଯୁଦ୍ଧ ହୋଇଥିଲା । ଉଭୟ ଦେଶ ମଧ୍ୟରେ ଥିବା ଏହି 2611 କିମି ପରିମିତ ସୀମାକୁ ଆଫଗାନିସ୍ତାନ ଆଦୌ ସ୍ବୀକାର କରିନାହିଁ । ଆଫଗାନିସ୍ତାନର ଜାତୀୟ ପ୍ରତିରକ୍ଷା ବିଭାଗ କହିଛି ଯେ, ରମଜାନ ମାସର ନବମ ଦିନ ପାକିସ୍ତାନ ସେନା ଆଫଗାନିସ୍ତାନ ଅଞ୍ଚଳରେ ପ୍ରବେଶ କରିବା ପରେ ଆଫଗାନିସ୍ତାନ ପକ୍ଷରୁ ଗୁରୁବାର ରାତି 8 ଟା ସମୟରେ ଅପରେସନ ଆରମ୍ଭ ହୋଇଥିଲା । କିଛି ଦିନ ପୂର୍ବେ ପାକିସ୍ତାନୀ ସେନା ଆଫଗାନିସ୍ତାନ ସୀମାରେ ପ୍ରବେଶ କରି ସାଧାରଣ ନାଗରିକ, ମହିଳା ଓ ଶିଶୁଙ୍କ ଉପରେ ଆକ୍ରମଣ କରିଥିଲେ ।

4 ଘଣ୍ଟାର ଅପରେସନ:
ଆଫଗାନିସ୍ତାନ ପକ୍ଷରୁ ପାକିସ୍ତାନ ସେନାର ପୂର୍ବ ଓ ଦକ୍ଷିଣ-ପୂର୍ବରେ ବିଭିନ୍ନ ସୈନ୍ୟ ପୋଷ୍ଟଗୁଡିକ ଉପରେ ଆକ୍ରମଣ କରାଯାଇଥିଲା । ସୀମା ନିକଟରେ ଥିବା ପାକ୍ତିକା, ଖୋସ୍ତ, ନଙ୍ଗରହାର, କୁନାର ଓ ନୁରିସ୍ତାନ ପ୍ରଭୃତି ସ୍ଥାନରେ 4 ଘଣ୍ଟା ଧରି ଅପରେସନ ଚଳାଇଥିଲା । ଆଫଗାନିସ୍ତାନ ପ୍ରତିରକ୍ଷା ବିଭାଗର ସୂଚନା ଅନୁଯାୟୀ, 55 ପାକିସ୍ତାନୀ ସୈନ୍ୟଙ୍କୁ ନିପାତ କରାଯାଇଛି । ଏହା ସହିତ ଏକ ସାମରିକ ପରିବହନ ଗାଡି, 2ଟି ମିଲିଟାରୀ ଠିକଣା ଓ 19ଟି ପୋଷ୍ଟକୁ ଅକ୍ତିଆର କରି ଧ୍ବଂସ କରି ଦିଆଯାଇଛି ବୋଲି ଆଫଗାନିସ୍ତାନ ଦାବି କରିଛି ।

ଶରଣାର୍ଥୀ କ୍ୟାମ୍ପ ଉପରେ ପାକିସ୍ତାନର ଆକ୍ରମଣ:
ପାକିସ୍ତାନ ସାମରିକ ପୋଷ୍ଟ ଗୁଡିକରୁ ସୈନିକମାନେ ପଳାୟନ କରିଥିଲେ । ଏକ ଟ୍ୟାଙ୍କକୁ ଧ୍ବଂସ କରାଯାଇଛି । ଏକ ବଡ଼ ମିଲିଟାରୀ ପରିବହନ ପାଇଁ ଉଦ୍ଦିଷ୍ଟ ଗାଡ଼ି ଜବତ କରାଯାଇଛି ଓ ବହୁ ଅସ୍ତ୍ରଶସ୍ତ୍ର ଜବତ କରାଯାଇଥିବା ନେଇ ଆଫଗାନିସ୍ତାନ ପ୍ରତିରକ୍ଷା ବିଭାଗ ସୂଚନା ଦେଇଛି । ଏହା ସହିତ ଯୁଦ୍ଧରେ 8 ଜଣ ଆଫଗାନି ସୈନିକଙ୍କ ମୃତ୍ୟୁ ହୋଇଥିବା ବେଳେ 11 ଜଣଙ୍କ ଆହତ ହୋଇଛନ୍ତି । ଏହା ବ୍ୟତୀତ ନଙ୍ଗରହାରଠାରେ ଏକ ଶରଣାର୍ଥୀ କ୍ୟାମ୍ପ ଉପରେ ପାକିସ୍ତାନର ଆକ୍ରମଣ ଯୋଗୁଁ 13 ଜଣ ସାଧାରଣ ନାଗରିକଙ୍କ ମୃତ୍ୟୁ ଘଟିଥିବା ଆଫଗାନିସ୍ତାନ ପ୍ରତିରକ୍ଷା ବିଭାଗ ପକ୍ଷରୁ କୁହାଯାଇଛି ।