ଆମେରିକା-ଇସ୍ରାଏଲର ମିଳିତ ଆକ୍ରମଣରେ ଇରାନର ସର୍ବୋଚ୍ଚ ନେତା ଖାମେନେଇଙ୍କ ମୃତ୍ୟୁ, ସ୍ପଷ୍ଟ କଲା ଇରାନ

Iran Supreme Leader Ayatollah Khomeini Dead, ଦୁବାଇ: ତେହେରାନ ଉପରେ ଆମେରିକା ଓ ଇସ୍ରାଏଲର ପ୍ରଚଣ୍ଡ ଆକ୍ରମଣରେ ଇରାନର ସୁପ୍ରିମ୍ ଲିଡର ଆୟାତୋଲ୍ଲାହ ଖାମେନେଇଙ୍କ ପ୍ରାଣ ହରାଇଛନ୍ତି । ଏନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶନିବାର ଘୋଷଣା କରିଛନ୍ତି । ଏହାର କିଛି ସମୟ ପରେ ଇରାନ ପକ୍ଷରୁ ଏହି ଖବରକୁ ପୁଷ୍ଟି କରାଯାଇଛି । ନିଜର ସୋସିଆଲ ମିଡିଆରେ ଟ୍ରମ୍ପ ଖାମେନେଇଙ୍କୁ ଇତିହାସର ସବୁଠାରୁ ଖଳ ଲୋକ ଭାବେ ଅଭିହିତ କରିଛନ୍ତି । ସେ କହିଛନ୍ତି ଚଳିତ ସପ୍ତାହ ଇରାନର ନ୍ୟୁକ୍ଲିୟର ପ୍ରୋଗ୍ରାମକୁ ଶେଷ କରିବା ପାଇଁ ବିଭିନ୍ନ ସ୍ଥାନରେ ଆହୁରି ପ୍ରବଳ ଓ ଲକ୍ଷ୍ୟ ଭେଦି ବୋମାମାଡ଼ କରାଯିବ ।

ସ୍ପଷ୍ଟ କରିଲା ଇରାନର ଜାତୀୟ ଟିଭି:
ଆମେରିକା ଓ ଇସ୍ରାଏଲର ମିଳିତ ଆକ୍ରମଣରେ ଅଶାନ୍ତ ହୋଇପଡିଛି ମଧ୍ୟପ୍ରାଚ୍ୟ । ଏହି ମିଳିତ ଆକ୍ରମଣରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲାହ ଖାମେନେଇଙ୍କ ମୃତ୍ୟୁ ହୋଇଛି ବୋଲି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶନିବାର ନିଜର ସୋସିଆଲ ମିଡିଆରେ ଦାବି କରିଥିଲେ । ଏହାକୁ ବର୍ତ୍ତମାନ ଇରାନର ଜାତୀୟ ଟେଲିଭିଜନ ପକ୍ଷରୁ ସତ୍ୟ ଭାବେ ଘୋଷଣା କରାଯାଇଛି ।

'ଇତିହାସର ସବୁଠାରୁ ଖଳ ଲୋକ ମୃତ'
"ଇତିହାସର ସବୁଠାରୁ ଖଳ ଲୋକଙ୍କ ମଧ୍ୟରୁ ଜଣେ ଖାମେନେଇ ମୃତ୍ୟୁବରଣ କରିଛନ୍ତି", ବୋଲି ଡୋନାଲ୍ଡ ଟ୍ରମ୍ପ ନିଜର ସୋସିଆଲ ମିଡିଆ ଟ୍ରୁଥରେ ଏହା ଉଲ୍ଲେଖ କରିଛନ୍ତି । ଆମେରିକାର ଇରାନ ଉପରେ ଏହି ଆକ୍ରମଣ ମଧ୍ୟପ୍ରାଚ୍ୟ ଅଞ୍ଚଳରେ ଅସ୍ଥିରତା ଓ ବିଶାଳ ଯୁଦ୍ଧ ପରିସ୍ଥିତି ସୃଷ୍ଟି କରିଛି ।

ଇରାନରେ ଆତଙ୍କ:
ଗତକାଲି ଆମେରିକା ଓ ଇସ୍ରାଏଲର ମିଳିତ ଆକ୍ରମଣ ତେହେରାନରେ ଧ୍ବଂସଲୀଳା ରଚିଛି । ଇରାନର ମିନାବରେ ଥିବା ଏକ ସ୍କୁଲର 108 ଜଣ ଛାତ୍ରଙ୍କ ମୃତ୍ୟୁ ଘଟିଛି । ଇସ୍ରାଏଲ ପ୍ରତିରକ୍ଷା ବାହିନୀ (IDF) ଇରାନ ଉପରେ କରିଥିବା ଏହି ସାମରିକ କାର୍ଯ୍ୟାନୁଷ୍ଠାନକୁ "ପ୍ରତିରୋଧକ ଆକ୍ରମଣ" ଭାବେ ବର୍ଣ୍ଣନା କରିଛି । ଇରାନର ରାଜଧାନୀ ତେହେରାନ ସମେତ ଅନେକ ସହରରେ ବୋମା ବିସ୍ଫୋରଣ ଆତଙ୍କ ଖେଳାଇଥିଲା । ଏହା ସହିତ ସମ୍ଭାବିତ ବିମାନ ଆକ୍ରମଣ ସାଇରନ ବାଜିଥିଲା ।

ବଢୁଛି ମୃତ୍ୟୁ ସଂଖ୍ୟା:
ଇରାନୀ ରେଡ କ୍ରେସେଣ୍ଟ ଶନିବାର ସନ୍ଧ୍ୟାରେ କହିଛି ଯେ, ଇରାନ ଉପରେ ଆମେରିକା-ଇସ୍ରାଏଲ ମିଳିତ ଆକ୍ରମଣରେ ଅତି କମରେ 201 ଜଣଙ୍କର ମୃତ୍ୟୁ ହୋଇଛି ଏବଂ 747 ଜଣ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ଦକ୍ଷିଣ ସହର ମିନାବରେ ଥିବା ଏକ ସ୍କୁଲର 108 ଜଣ ଛାତ୍ର ଅଛନ୍ତି, ଯାହା ଆକ୍ରମଣରେ ପ୍ରଭାବିତ ହୋଇଥିଲା । "ମିନାବ ସ୍କୁଲରେ ମୃତ ଛାତ୍ରଙ୍କ ସଂଖ୍ୟା 108ରେ ପହଞ୍ଚିଛି । ରିଲିଫ୍ ଏବଂ ଭଗ୍ନାବଶେଷ ଅପସାରଣ କାର୍ଯ୍ୟ ଏବେ ବି ଜାରି ରହିଛି," ସଂଗଠନର ଜଣେ ମୁଖପାତ୍ର କହିଛନ୍ତି ।