କେମୋଥେରାପିର ବିକଳ୍ପ ହେବ ସ୍ମାର୍ଟ କର୍କଟ ଔଷଧ RK-251, ଚାଲିଛି ଅଧିକ ଗବେଷଣା

ହାଇଦ୍ରାବାଦ: ଭାରତୀୟ ବୈଜ୍ଞାନିକମାନେ ଏକ ନୂତନ 'ସ୍ମାର୍ଟ' କର୍କଟ ଔଷଧ ବିକଶିତ କରିଛନ୍ତି ଯାହା କେମୋଥେରାପିର ବିକଳ୍ପ ଭାବରେ କାର୍ଯ୍ୟ କରିପାରିବ । RK-251 ନାମକ ଏହି ଔଷଧ କେବଳ କର୍କଟ କୋଷକୁ ପ୍ରଭାବିତ କରିବ । ଯଦି ଏହି ଔଷଧ ମାର୍କେଟରେ ଉପଲବ୍ଧ ହୁଏ, ତେବେ ଏହା କିଛି କ୍ଷେତ୍ରରେ କେମୋଥେରାପିର ଆବଶ୍ୟକତାକୁ ହ୍ରାସ କରିପାରିବ । ସାଧାରଣତଃ, କେମୋଥେରାପି କର୍କଟ କୋଷକୁ ନଷ୍ଟ କରିବା ସହିତ ସୁସ୍ଥ କୋଷଗୁଡ଼ିକୁ ମଧ୍ୟ ପ୍ରଭାବିତ କରିପାରେ, ଯାହା ଚିକିତ୍ସା ସମୟରେ ବିଭିନ୍ନ ପାର୍ଶ୍ୱ ପ୍ରତିକ୍ରିୟା ସୃଷ୍ଟି କରେ । ସେପଟେ କେନ୍ଦ୍ର ସରକାର ସ୍ପଷ୍ଟ କରିଛନ୍ତି ଯେ RK-251 ରେ ବ୍ୟବହୃତ ନୂତନ ପଦ୍ଧତି କେବଳ କର୍କଟ କୋଷକୁ ଚିହ୍ନଟ ଏବଂ ଟାର୍ଗେଟ କରିବା ପାଇଁ ଡିଜାଇନ୍ କରାଯାଇଛି ।

ଏହାର ଅର୍ଥ ହେଉଛି ଏହାକୁ ମୁଖ୍ୟତଃ କର୍କଟ କୋଷ ମଧ୍ୟରେ ସକ୍ରିୟ ରହିବା ପାଇଁ ଡିଜାଇନ୍ କରାଯାଇଛି, ଯାହା ଭବିଷ୍ୟତରେ କର୍କଟ ଚିକିତ୍ସା ପାଇଁ ଅଧିକ ସଠିକ୍ ପଦ୍ଧତି ପାଇଁ ଆଶା ସୃଷ୍ଟି କରୁଛି । RK-251 ନାମକ ଏହି ନୂତନ ଔଷଧକୁ ଭାରତ ସରକାରଙ୍କ ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା ବିଭାଗ ଅଧୀନରେ ଏକ ସ୍ୱୟଂଶାସିତ ପ୍ରତିଷ୍ଠାନ ଇନଷ୍ଟିଚ୍ୟୁଟ୍ ଅଫ୍ ଆଡଭାନ୍ସଡ୍ ଷ୍ଟଡି ଇନ୍ ସାଇନ୍ସ ଆଣ୍ଡ୍ ଟେକ୍ନୋଲୋଜି (IASST) ଏବଂ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି-ଗୌହାଟି (IIT-ଗୌହାଟି) ର ବୈଜ୍ଞାନିକମାନେ ମିଳିତ ଭାବରେ ବିକଶିତ କରିଛନ୍ତି । ଏହି ଗବେଷଣା IASST ର ଡାକ୍ତର ଆସିସ୍ ବାଲା ଏବଂ IIT-ଗୌହାଟିର ଡାକ୍ତର କେ.ପି. ଭାବକଙ୍କ ନେତୃତ୍ୱରେ ପ୍ରସ୍ତୁତ କରାଯାଇଛି । ଏହାର ଫଳାଫଳଗୁଡ଼ିକ ଜୁଲାଇ 2, 2026 ରେ ଆମେରିକୀୟ କେମିକାଲ୍ ସୋସାଇଟିର ଜର୍ଣ୍ଣାଲ୍ ଅଫ୍ ମେଡିସିନାଲ୍ କେମେଷ୍ଟ୍ରିରେ ପ୍ରକାଶ ପାଇଥିଲା ।

ଏହି "ସ୍ମାର୍ଟ" ଔଷଧ, RK-251, କିପରି କାମ କରେ?

ପ୍ରାୟତଃ କର୍କଟ କୋଷଗୁଡ଼ିକ ଅତ୍ୟଧିକ ପରିମାଣର ପ୍ରତିକ୍ରିୟାଶୀଳ ଅମ୍ଳଜାନ ପ୍ରଜାତି (ROS) ଉତ୍ପାଦନ କରନ୍ତି, ଯାହା ଏକ କ୍ଷତିକାରକ ଅଣୁ । ଯେତେବେଳେ RK-251 କର୍କଟ କୋଷରେ ପହଞ୍ଚିଥାଏ,ସେତେବେଳେ ROSର ବର୍ଦ୍ଧିତ ସ୍ତର ଔଷଧକୁ ସକ୍ରିୟ କରିଥାଏ । ଯାହା NBDHEX ନାମକ ଏକ ଶକ୍ତିଶାଳୀ କର୍କଟ-ବିରୋଧୀ ଉପାଦନକୁ ଛାଡ଼ିଥାଏ । ଏହି ଉପାଦନର ଲକ୍ଷ୍ୟ ପ୍ରୋଟିନକୁ ଅବରୋଧ କରେ, ଯାହାକୁ ଅନେକ କର୍କଟ କୋଷ ବଞ୍ଚିବା ଏବଂ ଚିକିତ୍ସା ପ୍ରତିରୋଧ କରିବା ପାଇଁ ବ୍ୟବହାର କରନ୍ତି । ଏହି ଔଷଧ କେବଳ କର୍କଟ କୋଷଗୁଡ଼ିକୁ ଟାର୍ଗେଟ କରେ ଏବଂ ସୁସ୍ଥ କୋଷଗୁଡ଼ିକରେ ନିଷ୍କ୍ରିୟ ରହିଥାଏ । ଏହି ପ୍ରଯୁକ୍ତିବିଦ୍ୟା ସୁସ୍ଥ କୋଷଗୁଡ଼ିକୁ କ୍ଷତି ନକରି ସିଧାସଳଖ କର୍କଟ କୋଷଗୁଡ଼ିକୁ ପ୍ରଭାବିତ କରେ ।

ଏହା କାହିଁକି ଗୁରୁତ୍ୱପୂର୍ଣ୍ଣ ?

ପାରମ୍ପରିକ କେମୋଥେରାପିର ଏକ ପ୍ରମୁଖ ସମସ୍ୟା ହେଉଛି ଯେ ଅନେକ କେମୋଥେରାପି ଔଷଧ କର୍କଟ କୋଷ ଏବଂ ସୁସ୍ଥ କୋଷ ମଧ୍ୟରେ ସମ୍ପୂର୍ଣ୍ଣ ଅଲଗା କରିପାରେ ନାହିଁ । ଫଳସ୍ୱରୂପ, ସୁସ୍ଥ କୋଷଗୁଡ଼ିକ ମଧ୍ୟ ପ୍ରଭାବିତ ହୋଇଥାଏ ଏବଂ କିଛି ପାର୍ଶ୍ୱ ପ୍ରତିକ୍ରିୟା ମଧ୍ୟ ସୃଷ୍ଟି ହୁଏ । RK-251 ହେଉଛି ଏକ ଔଷଧ ଯାହା ମୁଖ୍ୟତଃ କର୍କଟ କୋଷ ମଧ୍ୟରେ ସକ୍ରିୟ ଏବଂ ଏହି ଅନାବଶ୍ୟକ କ୍ଷତିକୁ ହ୍ରାସ କରିପାରେ । ତଥାପି, RK-251 ଔଷଧ ଏପର୍ଯ୍ୟନ୍ତ କର୍କଟ ରୋଗୀଙ୍କ ପାଇଁ ଏକ ନିଶ୍ଚିତ ଚିକିତ୍ସା ନୁହେଁ । ଏହି ଔଷଧ ଏପର୍ଯ୍ୟନ୍ତ ପରୀକ୍ଷଣ ପ୍ରାରମ୍ଭିକ ପର୍ଯ୍ୟାୟରେ ଅଛି । ମଣିଷଙ୍କ ଉପରେ ଏହାର ପ୍ରଭାବ ନିର୍ଣ୍ଣୟ କରିବା ପାଇଁ ଅଧିକ ଅଧ୍ୟୟନ ଆବଶ୍ୟକ ।

ସ୍ତନ କର୍କଟ ବିରୁଦ୍ଧରେ ପ୍ରତିଶ୍ରୁତିପୂର୍ଣ୍ଣ ଫଳାଫଳ:

ଗବେଷକମାନେ ପରୀକ୍ଷାଗାରରେ ସ୍ତନ କର୍କଟ ବିରୁଦ୍ଧରେ RK-251 ପରୀକ୍ଷା କରିଥିଲେ ।ଏହି ପରୀକ୍ଷଣ ସମୟରେ କର୍କଟ କୋଷ ଗୁଡ଼ିକ ଉପରେ RK-251 ଔଷଧ ଅଧିକ ପ୍ରଭାବି ହୋଇଥିବା ବେଳେ ସୁସ୍ଥ କୋଷଗୁଡ଼ିକ ଉପରେ କମ୍ ପ୍ରଭାବି ହୋଇଥିଲା । ଗବେଷକମାନେ ଜେବ୍ରାଫିଶ୍ ଭ୍ରୁଣ ଉପରେ ମଧ୍ୟ ଏହି ଔଷଧ ପରୀକ୍ଷା କରିଥିଲେ ।ତଥାପି ରୋଗୀମାନଙ୍କଠାରେ ଏହି ଔଷଧ ପରୀକ୍ଷଣ କରିବା ପୂର୍ବରୁ ଅଧିକ ଅଧ୍ୟୟନ ଆବଶ୍ୟକ ।

ପାରମ୍ପରିକ କେମୋଥେରାପି କର୍କଟ କୋଷ ଏବଂ ସୁସ୍ଥ କୋଷକୁ କ୍ଷତି ପହଞ୍ଚାଇଥାଏ । RK-251 ର ଫଳାଫଳ ଉତ୍ସାହଜନକ ହେଲେ ମଧ୍ୟ, ମଣିଷଠାରେ ଏହାର ବ୍ୟବହାର ବିଚାର କରିବା ପୂର୍ବରୁ ଅଧିକ ଗବେଷଣା ଆବଶ୍ୟକ । ବୈଜ୍ଞାନିକମାନଙ୍କୁ ଅତିରିକ୍ତ ପରୀକ୍ଷାଗାର ଅଧ୍ୟୟନ ଏବଂ ଶେଷରେ ମଣିଷଙ୍କ ଠାରେ କ୍ଲିନିକାଲ୍ ପରୀକ୍ଷଣ ମାଧ୍ୟମରେ ଏହାର ସୁରକ୍ଷା ଏବଂ ପ୍ରଭାବ ନିଶ୍ଚିତ କରିବାକୁ ପଡିବ । ଏହାର ମୁଖ୍ୟ ଲକ୍ଷ୍ୟ ହେଉଛି ସୁସ୍ଥ ଟିସୁରେ RK-251 ଔଷଧ ନିଷ୍କ୍ରିୟ ରହିବ ଏବଂ କେବଳ କର୍କଟ କୋଷର ସଂସ୍ପର୍ଶରେ ଆସିଲେ ସକ୍ରିୟ ହେବ ।

(ଏଠାରେ ଦିଆଯାଇଥିବା ସମସ୍ତ ସୂଚନା ଏବଂ ପରାମର୍ଶ କେବଳ ଆପଣଙ୍କ ସାଧାରଣ ସୂଚନା ପାଇଁ। ଏହି ସୂଚନା ବୈଜ୍ଞାନିକ ଗବେଷଣା, ଅଧ୍ୟୟନ ଏବଂ ଡାକ୍ତରୀ ଏବଂ ସ୍ୱାସ୍ଥ୍ୟ ବିଶେଷଜ୍ଞଙ୍କ ପରାମର୍ଶ ଉପରେ ଆଧାରିତ। ଏହି ପରାମର୍ଶଗୁଡ଼ିକୁ ଚେଷ୍ଟା କରିବା ପୂର୍ବରୁ ଆପଣଙ୍କ ଡାକ୍ତରଙ୍କ ସହିତ ପରାମର୍ଶ କରିବା ଭଲ।)