ଉନ୍ନାଓ ଦୁଷ୍କର୍ମ ମାମଲା: କୁଲଦୀପ ସିଂହ ସେଙ୍ଗାରଙ୍କୁ ସୁପ୍ରିମକୋର୍ଟଙ୍କ ଝଟକା, ଦିଲ୍ଲୀ ହାଇକୋର୍ଟଙ୍କ ଆଦେଶ ଉପରେ ଲଗାଇଲେ ରୋକ

ନୂଆଦିଲ୍ଲୀ: ଉନ୍ନାଓ ଦୁଷ୍କର୍ମ ମାମଲାରେ ବହିଷ୍କୃତ ବିଜେପି ନେତା କୁଲଦୀପ ସିଂହ ସେଙ୍ଗାରଙ୍କୁ ମିଳିଥିବା ଆଜୀବନ କାରାଦଣ୍ଡକୁ ସ୍ଥଗିତ ରଖିବା ପାଇଁ ଦିଲ୍ଲୀ ହାଇକୋର୍ଟ ଦେଇଥିବା ଆଦେଶ ଉପରେ ସୁପ୍ରିମକୋର୍ଟ ସୋମବାର ରହିତାଦେଶ ଜାରି କରିଛନ୍ତି । ଏଥି ସହିତ ଦିଲ୍ଲୀ ହାଇକୋର୍ଟଙ୍କ ଆଦେଶକୁ ଚାଲେଞ୍ଜ କରି ସିବିଆଇ ଆବେଦନ ଉପରେ ସୁପ୍ରିମକୋର୍ଟ ସେଙ୍ଗାରଙ୍କୁ ନୋଟିସ ମଧ୍ୟ କରିଛନ୍ତି ।

2017 ହୋଇଥିବା ଉନ୍ନାଓ ଦୁଷ୍କର୍ମ ମାମଲାରେ ପୂର୍ବରୁ ଅର୍ଥାତ୍ ଡିସେମ୍ବର 23 ତାରିଖରେ ଦିଲ୍ଲୀ ହାଇକୋର୍ଟ ସେଙ୍ଗାରଙ୍କ ଆଜୀବନ କାରାଦଣ୍ଡାଦେଶ ଉପରେ ରୋକ ଲଗାଇଥିଲେ । 2019 ଡିସେମ୍ବରରେ ଟ୍ରାଏଲ କୋର୍ଟ ଉନ୍ନାଓ ଦୁଷ୍କର୍ମ ମାମଲାରେ ସେଙ୍ଗାରଙ୍କୁ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡାଦେଶ ଶୁଣାଇଥିଲେ । ଏଥି ସହିତ 25 ଲକ୍ଷ ଟଙ୍କାର ସରିମାନା କରିଥିଲେ । ସୁପ୍ରିମକୋର୍ଟ ଆରମ୍ଭରୁ ଏହି ଘଟଣା ସହ ଜଡିତ ସମସ୍ତ ମାମଲାକୁ ଉତ୍ତର ପ୍ରଦେଶରୁ ଦିଲ୍ଲୀ ଟ୍ରାନ୍ସଫର କରି ଦେଇଥିଲେ ।

ବିଚାରପତି ସୁବ୍ରମଣ୍ୟମ ପ୍ରସାଦ ଏବଂ ହରୀଶ ବୌଦ୍ୟନାଥ ଶଙ୍କରଙ୍କୁ ନେଇ ଗଠିତ ଖଣ୍ଡପୀଠ ସେଙ୍ଗାରଙ୍କୁ ଜାମିନ ପ୍ରଦାନ କରିଥିଲେ ଏବଂ 15 ଲକ୍ଷ ଟଙ୍କାର ବ୍ୟକ୍ତିଗତ ବଣ଼୍ଡ ଏବଂ ସମାନ ରକମର ତିନିଜଣ ଜାମିନଦାର ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ । ହାଇକୋର୍ଟ ସେଙ୍ଗାରଙ୍କୁ ନିର୍ଦ୍ଦେଶ ଦେଇ କହିଥିଲେ, ପୀଡିତାଙ୍କ ଘରର 5 କିମି ପରିଧି ଭିତରକୁ ସେ ଆସିବେ ନାହିଁ କିମ୍ବା ତାଙ୍କୁ କିମ୍ବା ତାଙ୍କ ମା'ଙ୍କୁ କୌଣସି ଧମକ ଦେବେ ନାହିଁ ।

ସୁପ୍ରିମକୋର୍ଟଙ୍କ ତିନି ଜଣିଆ ଖଣ୍ଡପୀଠ ସୋମବାର ଦିଲ୍ଲୀ ହାଇକୋର୍ଟଙ୍କ ନିର୍ଦ୍ଦଶକୁ ଚାଲେଞ୍ଜ କରି ସିବିଆଇ ପକ୍ଷରୁ ଆଗତ ମାମଲାର ଶୁଣାଣି କରିଥିଲେ । ସୁପ୍ରିମକୋର୍ଟ ୱେବ ସାଇଟରେ ପୋଷ୍ଟ ହୋଉଥିବା ଖବର ଅନୁସାରେ, ପ୍ରଧାନ ବିଚାରପତି (CJI) ସୂର୍ଯ୍ୟକାନ୍ତ, ଜଷ୍ଟିସ ଜେକେ ମାହେଶ୍ୱରୀ ଏବଂ ଅଗଷ୍ଟିନ ଜର୍ଜ ମସୀହଙ୍କ ଭେକେସନ ବେଞ୍ଚ ଏହି ମାମଲାର ଶୁଣାଣି କରୁଥିଲେ । ଦିଲ୍ଲୀ ହାଇକୋର୍ଟ ଦେଇଥିବା ଆଦେଶ ଉପରେ ସୁପ୍ରିମକୋର୍ଟ ଆଜି ରୋକ ଲଗାଇଛନ୍ତି । ମାମଲାର ପରବର୍ତ୍ତୀ ଶୁଣାଣି ଚାରି ସପ୍ତାହ ପରେ ହେବ । ସୁପ୍ରିମ କୋର୍ଟ ସେଙ୍ଗୀରଙ୍କୁ ଦୁଇ ସପ୍ତାହ ମଧ୍ୟରେ ଜବାବ ରଖିବା ପାଇଁ କହିଛନ୍ତି ।

ପୀଡିତାଙ୍କ ପରିବାର ମହିଳା ଅଧିକାର କର୍ମକର୍ତ୍ତାଙ୍କ ସହ ମିଶି ସେଙ୍ଗାରଙ୍କ ଦଣ୍ଡାଦେଶ ସ୍ଥଗିତ ରଖିବା ନିର୍ଦ୍ଦେଶକୁ ବିରୋଧ କରିଥିଲେ । ପରିବାର ସହସ୍ୟ ତଥା ମହିଳା ଅଧିକାର କର୍ମକର୍ତ୍ତା କହିଥିଲେ, କୋର୍ଟଙ୍କ ଜାମିନ ଲୋକଙ୍କ ଭରସାକୁ ଭାଙ୍ଗି ଦେଇଛି । ଏହି ନିର୍ଦ୍ଦେଶ ମହାଳାଙ୍କ ବିରୋଧୀ ଅପରାଧ ବିରୋଧରେ ଭୁଲ ବାର୍ତ୍ତା ଦେଉଛି । ସେଙ୍ଗାରଙ୍କ ଜାମିନକୁ ନେଇ ଦିଲ୍ଲୀ ହାଇକୋର୍ଟରେ ସିିବିଆଇ କଡା ବିରୋଧ କରିଥିଲା ।

ଏହା ମଧ୍ୟ ପଢନ୍ତୁ ଉନ୍ନାଓ ଦୁଷ୍କର୍ମ ମାମଲା: 'ସେଙ୍ଗରଙ୍କ ଦଣ୍ଡାଦେଶ ସ୍ଥଗିତ ରଖିବା ଆଦେଶ ବେଆଇନ ଏବଂ ଭୁଲ'- CBI

ଏହା ମଧ୍ୟ ପଢନ୍ତୁ UNNAO RAPE CASE, ପୀଡିତାଙ୍କ ସୁରକ୍ଷା ଅଧିକାରୀଙ୍କୁ କୋର୍ଟଙ୍କ ରିପୋର୍ଟ ତଲବ