ଅବସରପ୍ରାପ୍ତ ଏୟାର ମାର୍ଶାଲ ଜିତେନ୍ଦ୍ର ମିଶ୍ର, ରାମ ଜନ୍ମଭୂମି ତୀର୍ଥକ୍ଷେତ୍ର ଟ୍ରଷ୍ଟର ନୂଆ ସିଇଓ ନିଯୁକ୍ତ

RAM MANDIR TRUST NEW CEO, ଅଯୋଧ୍ୟା(ଉତ୍ତରପ୍ରଦେଶ): ଶ୍ରୀରାମ ଜନ୍ମ ଭୂମି ତୀର୍ଥ କ୍ଷେତ୍ର ଟ୍ରଷ୍ଟ ବୁଧବାର ଏଠାରେ ଅନୁଷ୍ଠିତ ଏକ ବୈଠକରେ ଅବସରପ୍ରାପ୍ତ ଏୟାର ମାର୍ଶାଲ ଜିତେନ୍ଦ୍ର ମିଶ୍ରଙ୍କୁ ଏହାର ପ୍ରଥମ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (CEO) ନିଯୁକ୍ତ କରିଛି । ଏଥିସହ ପୂର୍ବତନ କୋଷାଧ୍ୟକ୍ଷ ଗୋବିନ୍ଦ ଦେବ ଗିରିଙ୍କୁ ଏହାର ନୂତନ ମହାସଚିବ ଏବଂ ମହେଶ ଭାଗଚନ୍ଦକାଙ୍କୁ କୋଷାଧ୍ୟକ୍ଷ ନିଯୁକ୍ତ କରାଯାଇଛି ।

ଟ୍ରଷ୍ଟର ଚୟନ କମିଟି ୫,୫୮୫ ଆବେଦନପତ୍ର ଯାଞ୍ଚ କରିବା ପରେ ଅପରେସନ ସିନ୍ଦୂର ସମୟରେ ୱେଷ୍ଟର୍ଣ୍ଣ ଏୟାର କମାଣ୍ଡର ନେତୃତ୍ୱ ନେଇଥିବା ଏୟାର ମାର୍ଶାଲ ଜିତେନ୍ଦ୍ର ମିଶ୍ରଙ୍କୁ ତିନି ଜଣ ପ୍ରାର୍ଥୀଙ୍କ ସଂକ୍ଷିପ୍ତ ତାଲିକାରୁ ଚୟନ କରାଯାଇଥିଲା । ଅନ୍ୟ ସଂକ୍ଷିପ୍ତ ତାଲିକାଭୁକ୍ତ ପ୍ରାର୍ଥୀମାନେ ଥିଲେ ମେଜର ଜେନେରାଲ ସଞ୍ଜୟ ପ୍ରତାପ ସିଂହ ବିଷ୍ଟ ଏବଂ ଶ୍ରୁତି ହରଦୱାରୀ ।

ଟ୍ରଷ୍ଟ ଅଯୋଧ୍ୟାର ମଦନ ମୋହନ ପାଣ୍ଡେ, ଦିଲ୍ଲୀର ଭାଗଚନ୍ଦକା ଏବଂ ଶିକୋହାବାଦର ଡକ୍ଟର ନିର୍ମଳା ଯାଦବଙ୍କୁ ନୂତନ ଟ୍ରଷ୍ଟି ଭାବେ ସାମିଲ କରିଛି । ବୈଠକ ଦୁଇଟି ଅଧିବେଶନରେ ଅନୁଷ୍ଠିତ ହୋଇଥିଲା । ନୂତନ ଭାବେ ନିଯୁକ୍ତ ଟ୍ରଷ୍ଟିମାନେ ଦ୍ୱିତୀୟ ଅଧିବେଶନରେ ଅନଲାଇନରେ ଯୋଗ ଦେଇଥିଲେ, ବୋଲି ମଧ୍ୟବର୍ତ୍ତୀକାଳୀନ ସଚିବ କୃଷ୍ଣ ମୋହନ ସୂଚନା ଦେଇଛନ୍ତି ।

ଦେଓରିଆ ଜିଲ୍ଲାର ବାସିନ୍ଦା ଅବସରପ୍ରାପ୍ତ ଏୟାର ମାର୍ଶାଲ ଜିତେନ୍ଦ୍ର ମିଶ୍ର ଭାରତୀୟ ବାୟୁସେନାରେ କାର୍ଯ୍ୟ ସମ୍ପାଦନ କରିସାରିଛନ୍ତି । ଯୁଦ୍ଧ ସେବା ପଦକ ସମେତ ସେ ଅନେକ ସାମରିକ ସମ୍ମାନ ପାଇଥିଲେ । ସେହିପରି ମଦନ ମୋହନ ପାଣ୍ଡେ ଜଣେ ଓକିଲ ଯିଏ ରାମ ଜନ୍ମଭୂମି ମାମଲାରେ ରାମ ଲଲ୍ଲା ବିରାଜମାନଙ୍କ ପ୍ରତିନିଧିତ୍ୱ କରିଥିଲେ ଓ ଶିକୋହାବାଦର ଡକ୍ଟର ନିର୍ମଳା ଯାଦବ ଜଣେ ଅବସରପ୍ରାପ୍ତ କଲେଜ ଅଧ୍ୟକ୍ଷ ଏବଂ ଶିକ୍ଷାବିତ୍ ।

ପୂର୍ବତନ କୋଷାଧ୍ୟକ୍ଷ ତଥା ନବ ନିଯୁକ୍ତ ମହାସଚିବ ଗୋବିନ୍ଦ ଦେବ ଗିରି କହିଛନ୍ତି ଯେ କୃଷ୍ଣ ମୋହନ "ସଙ୍କଟପୂର୍ଣ୍ଣ ସମୟ" ମଧ୍ୟରେ ଟ୍ରଷ୍ଟକୁ ପରିଚାଳନା କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି । ସେ କହିଛନ୍ତି ଯେ, ଆବଶ୍ୟକ ହେଲେ ଟ୍ରଷ୍ଟ ଜଣେ ଯୁଗ୍ମ ସିଇଓ କିମ୍ବା ଡେପୁଟି ସିଇଓଙ୍କୁ ନିଯୁକ୍ତ କରିପାରିବ ଏବଂ ସିଇଓଙ୍କ କର୍ତ୍ତବ୍ୟ ଏବଂ ଦାୟିତ୍ୱ ନିର୍ଦ୍ଦିଷ୍ଟ କରି ଏକ SOP ପ୍ରସ୍ତୁତ କରିବ ।

"ଆମକୁ ଅଯୋଧ୍ୟାକୁ ବିଶ୍ୱର ସାଂସ୍କୃତିକ ରାଜଧାନୀ କରିବାକୁ ପଡ଼ିବ । ଏଥିପାଇଁ ଆମେ କୌଣସି କସରତ ଛାଡ଼ିବୁ ନାହିଁ," ବୋଲି ମହାସଚିବ ଗୋବିନ୍ଦ ଦେବ ଗିରି କହିଛନ୍ତି ।

ଏହା ମଧ୍ୟ ପଢ଼ନ୍ତୁ- ରାମ ମନ୍ଦିର ଟ୍ରଷ୍ଟକୁ ମିଳିବ ନୂଆ CEO: 5585 ଆଶାୟୀରୁ 3 ଜଣଙ୍କ ନାଁ ଚୟନ କଲା କମିଟି

ଏହା ମଧ୍ୟ ପଢ଼ନ୍ତୁ- ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ବସିଲା ଗୁରୁତ୍ୱପୂର୍ଣ୍ଣ ବୈଠକ, ତିନି ନୂତନ ସଦସ୍ୟଙ୍କ ନାମ ଚୂଡ଼ାନ୍ତ ହୋଇପାରେ

ବ୍ୟୁରୋ ରିପୋର୍ଟ, ଇଟିଭି ଭାରତ