ଇସ୍ରାଏଲରେ ପହଞ୍ଚିିଲେ ପ୍ରଧାନମନ୍ତ୍ରୀ ମୋଦି: ଭବ୍ୟ ସ୍ବାଗତ କଲେ ନେତାନ୍ୟାହୁ, ସଂସଦରେ ରଖିବେ ଅଭିଭାଷଣ

INDIA ISRAEL TIES ନୂଆଦିଲ୍ଲୀ: ଇସ୍ରାଏଲରେ ପହଞ୍ଚିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ତେଲ ଆଭିଭ୍‌ ବିମାନ ବନ୍ଦରରେ ପ୍ରଧାନମନ୍ତ୍ରୀ ପହଞ୍ଚିବା ପରେ ଭବ୍ୟ ସ୍ବାଗତ ଜଣାଇଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍‌ ନେତାନ୍ୟାହୁ ଓ ପତ୍ନୀ ସାରା ନେତାନ୍ୟାହୁ । ଏହି ଦୁଇ ଦିନିଆ ଗସ୍ତ କାର୍ଯ୍ୟକ୍ରମରେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ସହିତ ବହୁ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା କରିବେ ପ୍ରଧାନମନ୍ତ୍ରୀ ମୋଦି ।

ଭାରତ-ଇସ୍ରାଏଲ ଦ୍ବିପାକ୍ଷିକ ସମ୍ପର୍କକୁ ଅଧିକ ସଦୃଢ କରିବା ଉପରେ ଗୁରୁତ୍ବ ଦେବେ ଦୁଇ ଦେଶର ମୁଖ୍ୟ । ବିଶେଷ କରି ଦୁଇ ଦେଶ ମଧ୍ୟରେ କୃଷି, ବାଣିଜ୍ୟ, ପ୍ରତିରକ୍ଷା ଏବଂ ବୈଷୟିକ ଜ୍ଞାନ କୌଶଳ ସମେତ ବିଭିନ୍ନ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ଚୁକ୍ତି ସ୍ବାକ୍ଷରିତ ହେବାର ସମ୍ଭାବନା ରହିଛି । ଏହା ସହିତ ଉଭୟ ଦେଶ ପରସ୍ପରକୁ ସହଯୋଗ କ୍ଷେତ୍ରରେ ନୂଆ ସୁଯୋଗ ସୃଷ୍ଟି ହେବାର ଆଶା କରାଯାଉଛି।

ବିରଳ ସମ୍ମାନରେ ସମ୍ମାନିତ ହେବେ ପ୍ରଧାନମନ୍ତ୍ରୀ:
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଇସ୍ରାଏଲ ପ୍ରଧାନମନ୍ତ୍ରୀ ଓ ତାଙ୍କ ପତ୍ନୀ ସାରା ଜେରୁଜେଲମ୍ ବିମାନବନ୍ଦରରେ ସ୍ବାଗତ କରିବାର କାର୍ଯ୍ୟକ୍ରମ ରହିଛି । ଇସ୍ରାଏଲରେ ଅବସ୍ଥାପିତ ଭାରତୀୟମାନଙ୍କୁ ପ୍ରଧାନମନ୍ତ୍ରୀ ପ୍ରଥମେ ସମ୍ବୋଧନ କରିବେ । ଏହା ପରେ ଇସ୍ରାଏଲ ପାର୍ଲାମେଣ୍ଟ ନେସେଟ୍ (Knesset)ରେ ପହଞ୍ଚି ଆଇନ ପ୍ରଣୟନକାରୀଙ୍କୁ ସମ୍ବୋଧିତ କରିବେ । ଯାହାକି ବିଶ୍ବର କିଛି ମନୋନୀତ ନେତାଙ୍କୁ ପ୍ରଦାନ କରାଯାଇଥିବା ଏକ ବିରଳ ସମ୍ମାନ ଅଟେ ।

ଇସ୍ରାଏଲ ରାଷ୍ଟ୍ରପତିଙ୍କୁ ଭେଟିବେ ପ୍ରଧାନମନ୍ତ୍ରୀ:
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କାର୍ଯ୍ୟାଳୟ ପକ୍ଷରୁ ଜାରି କରାଯାଇଥିବା ସୂଚନା ଅନୁଯାୟୀ, ଉଭୟ ଦେଶ ମଧ୍ୟରେ ବିଜ୍ଞାନ ଓ ପ୍ରଯୁକ୍ତିବିଦ୍ୟା, କୃଷି, ବାଣିଜ୍ୟ, ପ୍ରତିରକ୍ଷା ଏବଂ ବୈଷୟିକ ଜ୍ଞାନ କୌଶଳ ଆଦି ଉପରେ ଆଲୋଚନା ହେବ । ଏହା ସହିତ ଉଭୟ ଦେଶର ପ୍ରଧାନମନ୍ତ୍ରୀ ପାରସ୍ପାରିକ ସ୍ବାର୍ଥ ଥିବା ଆଞ୍ଚଳିକ ତଥା ବିଶ୍ବସ୍ତରୀୟ ଘଟଣାବଳୀ ଉପରେ ନିଜର ଦୃଷ୍ଟିକୋଣ ରଖିବେ । ଏହି ଗସ୍ତରେ ପ୍ରଧାନମନ୍ତ୍ରୀ ଇସ୍ରାଏଲ ରାଷ୍ଟ୍ରପତି ଆଇଜାକ୍ ହେରଜୋଗଙ୍କୁ ମଧ୍ୟ ଭେଟିବେ ।

ପ୍ରଧାନମନ୍ତ୍ରୀଙ୍କ ଗୁରୁତ୍ବପୂର୍ଣ୍ଣ ଗସ୍ତ:
ଏହି ଗସ୍ତ ଦୁଇ ଦେଶ ମଧ୍ୟରେ ଦୀର୍ଘ ସମୟ ଧରି ଚାଲିଆସିଥିବା ଏହି ରଣନୈତିକ ସମ୍ପର୍କକୁ ଅଧିକ ସୁଦୃଢ କରିବ । ଏହି ଅବସରରେ ଉଭୟ ଦେଶରେ ବିଭିନ୍ନ କ୍ଷେତ୍ରରେ ଦେଖାଯାଉଥିବା ଅସୁବିଧା ଉପରେ ମଧ୍ୟ ଆଲୋଚନା କରାଯିବ । ଯାହା ଦ୍ବାରା ଆଗାମୀ ଦିନରେ ଉଭୟ ଦେଶ ମଧ୍ୟରେ ସହଯୋଗିତା ଆହୁରି ବଢିବ ।

ଇସ୍ରାଏଲ ବିପକ୍ଷ ନେତାଙ୍କ ବଡ଼ ବୟାନ:
ପ୍ରଧାନମନ୍ତ୍ରୀଙ୍କ ଐତିହାସିକ ଗସ୍ତ ପୂର୍ବରୁ ଇସ୍ରାଏଲର ବିପକ୍ଷ ନେତାଙ୍କ ୟାଏର ଲାପିଡ, ନରେନ୍ଦ୍ର ମୋଦିଙ୍କୁ ଇସ୍ରାଏଲର 'ପ୍ରକୃତ ବନ୍ଧୁ' ଭାବେ ସମ୍ବୋଧନ କରିଛନ୍ତି । ସେ ନିଜର X ହ୍ୟାଣ୍ଡେଲରେ ହିନ୍ଦୀ ଭାଷାରେ ଏହା ଉଲ୍ଲେଖ କରିଛନ୍ତି । ସେ ଲେଖିଛନ୍ତି , "ସମଗ୍ର ଇସ୍ରାଏଲ ପ୍ରଧାନମନ୍ତ୍ରୀ ମୋଦିଙ୍କୁ ସ୍ୱାଗତ କରିବାକୁ ଉତ୍ସାହିତ ... ସେ ଇସ୍ରାଏଲର ଜଣେ ପ୍ରକୃତ ବନ୍ଧୁ । ଇସ୍ରାଏଲ ଏବଂ ଭାରତ ମଧ୍ୟରେ ସମ୍ପର୍କ କେବଳ ଏକ ରଣନୈତିକ ସମ୍ପର୍କ ନୁହେଁ, ବରଂ ଦୁଇ ରାଷ୍ଟ୍ର ମଧ୍ୟରେ ଏକ ଗଭୀର ବନ୍ଧୁତାର ବନ୍ଧନ ।"

ଭାରତ ଓ ଇସ୍ରାଏଲର 'ସ୍ୱତନ୍ତ୍ର ରଣନୈତିକ ସହଭାଗିତା'
ପ୍ରଧାନମନ୍ତ୍ରୀଙ୍କ ଏହି ଗସ୍ତ ସମୟରେ ଭାରତ ଓ ଇସ୍ରାଏଲ ମଧ୍ୟର ଦୀର୍ଘ ସମ୍ପର୍କ ଏକ 'ସ୍ୱତନ୍ତ୍ର ରଣନୈତିକ ସହଭାଗିତା'କୁ ପରିବର୍ତ୍ତିତ ହେବ । ଇସ୍ରାଏଲର ଜର୍ମାନୀ ଓ ଆମେରିକା ସହିତ ଜେରୁଜେଲମ୍‌ର ସୁଦୃଢ ସମ୍ପର୍କ ଭଳି ଭାରତ ମଧ୍ୟ ଏଥିରେ ସ୍ଥାନିତ ହେବ । ଗତ 9 ବର୍ଷ ମଧ୍ୟରେ ଏହା ପ୍ରଧାନମନ୍ତ୍ରୀଙ୍କ ଇସ୍ରାଏଲକୁ ଦ୍ବିତୀୟ ଗସ୍ତ । ପ୍ରଧାନମନ୍ତ୍ରୀଙ୍କ 2017 ମସିହାରେ ପ୍ରଥମ ଗସ୍ତ ସମୟରେ ଉଭୟ ଦେଶର ସମ୍ପର୍କ 'ରଣନୈତିକ ସହଭାଗିତା'କୁ ଉନ୍ନୀତ ହୋଇଥିଲା ।

ମୋଦିଙ୍କ ଇସ୍ରାଏଲ ଗସ୍ତ ସୂଚୀ:

ଆଜି (ବୁଧବାର) ସନ୍ଧ୍ୟାରେ ଇସ୍ରାଏଲର ପ୍ରଯୁକ୍ତିବିଦ୍ୟା କ୍ଷେତ୍ରରେ ଅଗ୍ରଗତିକୁ ନେଇ ଆୟୋଜିତ ପ୍ରଦର୍ଶନୀରେ ପ୍ରଧାନମନ୍ତ୍ରୀ ଯୋଗ ଦେବେ । ରାତ୍ରିରେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ପ୍ରଧାନମନ୍ତ୍ରୀ ମୋଦିଙ୍କ ପାଇଁ ଏକ ରାତ୍ର ଭୋଜନ ଆୟୋଜନ କରିବାର କାର୍ଯ୍ୟକ୍ରମ ରହିଛି । ଗୁରୁବାର ସକାଳରେ ୟାଦ ଭସେମ (Yad Vashem) ଠାରେ ହୋଲୋକଷ୍ଟରେ ମୃତ୍ୟୁବରଣ କରିଥିବା ଇସ୍ରାଏଲ ନାଗରିକଙ୍କ ପ୍ରତି ପ୍ରଧାନମନ୍ତ୍ରୀ ମୋଦି ଶ୍ରଦ୍ଧାଞ୍ଜଳି ସମର୍ପଣ କରିବେ । ଏହା ପରେ ଇସ୍ରାଏଲ ରାଷ୍ଟ୍ରପତି ଆଇଜାକ୍ ହେରଜୋଗଙ୍କ ସହିତ ସାକ୍ଷାତ କରିବାର କାର୍ଯ୍ୟକ୍ରମ ରହିଛି ।

ଏହି ସବୁ କ୍ଷେତ୍ରରେ ଗୁରୁତ୍ବପୂର୍ଣ୍ଣ ଚୁକ୍ତି ସ୍ବାକ୍ଷର ହେବ:
ପ୍ରଧାନମନ୍ତ୍ରୀ ମୋଦିଙ୍କ ଗସ୍ତ ସମୟରେ ଉଭୟ ଦେଶ ମଧ୍ୟରେ ବହୁ ଗୁରୁତ୍ବପୂର୍ଣ୍ଣ ଚୁକ୍ତିନାମା ସ୍ବାକ୍ଷରିତ ହେବାର କାର୍ଯ୍ୟକ୍ରମ ରହିଛି । ଏହା ମଧ୍ୟରେ ସାମରିକ ଚୁକ୍ତି ମଧ୍ୟ ସାମିଲ ରହିଛି । ଚୁକ୍ତିନାମାର ଏକ ଅଂଶ ଭାବରେ, ଏକ ଗୋପନୀୟତା ବ୍ୟବସ୍ଥା ପ୍ରତିଷ୍ଠିତ ହେବ । ଯାହା ଏପର୍ଯ୍ୟନ୍ତ ଉପଲବ୍ଧ ନ ଥିବା ଅନେକ ନୂତନ କ୍ଷେତ୍ର ପାଇଁ ରାସ୍ତା ଖୋଲିବ । ଏହା ସହିତ AI, କ୍ବାଣ୍ଟମ୍ ସେକ୍ଟର ଓ ସାମରିକ କ୍ଷେତ୍ରରେ ଗୁରୁତ୍ବପୂର୍ଣ୍ଣ ଚୁକ୍ତି ସ୍ବାକ୍ଷର ହେବାର ସମ୍ଭାବନା ରହିଛି ।

ନୂଆଦିଲ୍ଲୀରେ ବୈଦେଶିକ ମନ୍ତ୍ରଣାଳୟ (MEA) ପକ୍ଷରୁ କୁହାଯାଇଛି ଯେ , "ଏହି ଗସ୍ତ ଦୁଇ ଦେଶ ମଧ୍ୟରେ ଗଭୀର ଏବଂ ଦୀର୍ଘସ୍ଥାୟୀ ରଣନୈତିକ ସହଭାଗିତାକୁ ପୁନଃନିର୍ଦ୍ଦିଷ୍ଟ କରିବ । ସାଧାରଣ ଅସୁବିଧା ଗୁଡ଼ିକର ସମୀକ୍ଷା କରିବା ସହିତ ଦୁଇଟି ସ୍ଥିର ଗଣତନ୍ତ୍ର ମଧ୍ୟରେ ଏକ ଦୃଢ଼ ସହଭାଗିତା ପାଇଁ ସେମାନଙ୍କର ସହଭାଗୀ ଦୃଷ୍ଟିକୋଣ ହାସଲ କରିବା ଦିଗରେ ପ୍ରୟାସକୁ ପୁନଃ ଉଜ୍ଜିବିତ କରିବାର ସୁଯୋଗ ପ୍ରଦାନ କରିବ ।"