ଢ଼ିଙ୍କିଆରେ ସପକ୍ଷବାଦୀ ଓ ବିପକ୍ଷବାଦୀ ମୁହାଁମୁହିଁ, ବୋଇତ ବନ୍ଦାଣ ଓ ବାଲିଯାତ୍ରା ବନ୍ଦ

ଜଗତସିଂହପୁର: ବୋଇତ ବନ୍ଦାଣ ଓ ବାଲିଯାତ୍ରାକୁ ନେଇ ଜଗତସିଂହପୁର ଜିଲ୍ଲା ଏରସମା ବ୍ଲକ ଅନ୍ତର୍ଗତ ଢ଼ିଙ୍କିଆ ଚାରିଦେଶରେ ଉତ୍ତେଜନା । ଜଟାଧାରୀ ମୁହାଁଣରେ ଅନୁଷ୍ଠିତ ହେଉଥିବା ବୋଇତ ବନ୍ଦାଣ ଓ ବାଲିଯାତ୍ରାକୁ ନେଇ ଶିଳ୍ପ ସପକ୍ଷବାଦୀ ଓ ବିପକ୍ଷବାଦୀଙ୍କ ମଧ୍ୟରେ ବିବାଦ ଯୋଗୁଁ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଛି । କୌଣସି ଅଘଟଣକୁ ଏଡ଼ାଇବା ପାଇଁ ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନ ପକ୍ଷରୁ ସେଠାରେ ଅନୁଷ୍ଠିତ ହେଉଥିବା ବୋଇତ ବନ୍ଦାଣ ଉତ୍ସବ ଓ ବାଲିଯାତ୍ରା ହେଉଥିବା ସ୍ଥଳରେ ଭାରତୀୟ ନ୍ୟାୟ ସଂହିତାର ୧୬୩ ଧାରା ଲାଗୁ କରାଯାଇଛି । ଏହି ବାଲିଯାତ୍ରା ସ୍ଥଳରେ ୨ ଜଣରୁ ଅଧିକ ଲୋକ ଏକାଠି ହେବା ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି । 

ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ, ଏରସମା ବ୍ଲକ ଅନ୍ତର୍ଗତ ଢ଼ିଙ୍କିଆ ଚାରିଦେଶର ଜଟାଧାରୀ ମୁହାଁଣ ବେଳାଭୂମିରେ ବୋଇତ ବନ୍ଦାଣ ଉତ୍ସବ ଓ ବାଲିଯାତ୍ରା ଦୀର୍ଘଦିନ ଧରି ଚାଲି ଆସୁଥିଲା । ପୂର୍ବରୁ JSW ସପକ୍ଷବାଦୀମାନେ ଏହି କାର୍ଯ୍ୟକ୍ରମ କରି ଆସୁଥିଲେ । ଗତମାସରେ ଢ଼ିଙ୍କିଆର ପଞ୍ଚାୟତ ନିର୍ବାଚନ ହୋଇଥିଲା । ଏହି ନିର୍ବାଚନରେ ଶିଳ୍ପ ବିପକ୍ଷବାଦୀ ନେତା ଦେବେନ୍ଦ୍ର ସ୍ୱାଇଁଙ୍କ ସମର୍ଥକ ପିଙ୍କି ଦାସ ସରପଞ୍ଚ ଭାବେ ନିର୍ବାଚିତ ହୋଇଥିଲେ । ସରପଞ୍ଚ ବାଲିଯାତ୍ରା ପାଇଁ ପ୍ରସ୍ତୁତି ଆରମ୍ଭ କରିବା ସହିତ ପ୍ରଶାସନର ଅନୁମତି ଆଣିଥିଲେ । ଏହାକୁ ସପକ୍ଷବାଦୀମାନେ ବିରୋଧ କରିବା ସହ ଉଭୟଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା । ଏହି ଘଟଣାରେ ଜିଲ୍ଲା ପ୍ରଶାସନ ଓ ପୋଲିସ ହସ୍ତକ୍ଷେପ କରି ଉଭୟ ମିଶି ବୋଇତ ବନ୍ଦାଣ ଓ ବାଲିଯାତ୍ରା କରିବା ପାଇଁ କହିଥିଲେ । କିନ୍ତୁ ଏହାକୁ ନେଇ ଶିଳ୍ପ ସପକ୍ଷବାଦୀ ଓ ବିପକ୍ଷବାଦୀଙ୍କ ମଧ୍ୟରେ ଉତ୍ତେଜନା ବଢିବାରୁ ଆଜି ଜିଲ୍ଲା ପ୍ରଶାସନ ପକ୍ଷରୁ ବୋଇତ ବନ୍ଦାଣ ଉତ୍ସଵ ଉପରେ ରୋକ ଲଗାଇଦିଆଯିବା ସହିତ ବାଲିଯାତ୍ରା ପଡ଼ିଆରେ BNSSର ୧୬୩ ଧାରା ଲାଗୁ କରାଯାଇଛି ।

ଏହା ମଧ୍ୟ ପଢ଼ନ୍ତୁ...୧୪ରେ ପାରାଦ୍ୱୀପ କଳିଙ୍ଗ ବାଲିଯାତ୍ରା ମହୋତ୍ସବ, ଉଦଘାଟନ କରିବେ ମୁଖ୍ୟମନ୍ତ୍ରୀ ଏହା ମଧ୍ୟ ପଢ଼ନ୍ତୁ...ବାଲିଯାତ୍ରା ବୁଲିବେ ବିଦେଶୀ ପ୍ରତିନିଧି, ଜଳପଥରେ ସ୍ୱାଗତ କରିବ ପ୍ରଶାସନ

ଇଟିଭି ଭାରତ, ଜଗତସିଂହପୁର