ହାଇଦ୍ରାବାଦ: WWDC 2025 ଇଭେଣ୍ଟ ଆଜି (ଜୁନ 9)ଠୁ ଆରମ୍ଭ ହେବାକୁ ଯାଉଛି । ଏହି ପାଞ୍ଚ ଦିନିଆ ବାର୍ଷିକ ୱାର୍ଲ୍ଡୱାଇଡ୍ ଡେଭଲପର୍ସ ସମ୍ମିଳନୀ, ଆପଲ୍ ସିଇଓ ଟିମ୍ କୁକ୍ଙ୍କ ମୁଖ୍ୟ ଭାଷଣରୁ ଆରମ୍ଭ ହେବ । ବିଗତ ବର୍ଷର ଧାରା ଜାରି ରଖି କୁପର୍ଟିନୋ-ଭିତ୍ତିକ ଟେକ୍ ଜାଏଣ୍ଟ ଇଭେଣ୍ଟର ସମୟ ଏବଂ ସମ୍ପୂର୍ଣ୍ଣ କାର୍ଯ୍ୟସୂଚୀ ପୂର୍ବରୁ ସେୟାର କରିସାରିଛି । ଏହି କାର୍ଯ୍ୟକ୍ରମରେ, ଆପଲ୍ ତାର ସମସ୍ତ ପ୍ଲାଟଫର୍ମ ପାଇଁ ନୂତନ ସଫ୍ଟୱେର୍ ଅପଡେଟ୍ ଘୋଷଣା କରିବ।
ଏହା iPhone, iPad, Apple Watch, Apple Vision Pro ଏବଂ Mac କମ୍ପ୍ୟୁଟର ଭଳି Apple ଡିଭାଇସଗୁଡ଼ିକୁ ଶକ୍ତି ଦେଉଥିବା ନୂତନ ଅପରେଟିଂ ସିଷ୍ଟମ୍ (OS) ସମ୍ପର୍କରେ ମଧ୍ୟ ଆଲୋକପାତ କରିପାରେ । ଆପଲ୍ 2024ରୁ ଏହାର ଆପଲ୍ ଇଣ୍ଟେଲିଜେନ୍ସ ପ୍ରତିଶ୍ରୁତି ପୂରଣ କରିବା ସହ ଏହାର ପ୍ରତିଦ୍ବନ୍ଦ୍ବୀମାନଙ୍କୁ ଟକ୍କର ଦେବା ପାଇଁ ଏହାର ଡିଭାଇସଗୁଡ଼ିକରେ କୃତ୍ରିମ ବୁଦ୍ଧିମତ୍ତା (AI) ଅଭିଜ୍ଞତାକୁ ଉନ୍ନତ କରିବା ଉପରେ ଧ୍ୟାନ ଦେବ ବୋଲି ଆଶା କରାଯାଉଛି ।
Apple WWDC 2025: କେମିତି ଦେଖିବେ ଲାଇଭ୍ ?
ଆପଲ୍ର ଏହି ବାର୍ଷିକ ଇଭେଣ୍ଟ ଜୁନ 9ରୁ 13 ତାରିଖ ଯାଏଁ କାଲିଫର୍ଣ୍ଣିଆର କୁପର୍ଟିନୋ ସ୍ଥିତ ଆପଲ୍ ପାର୍କରେ ଅନୁଷ୍ଠିତ ହେବ । ଆଜି (ସୋମବାର) ଭାରତୀୟ ସମୟ ରାତି 10.30ଟାରେ ଆପଲ୍ ସିଇଓ ଟିମ୍ କୁକ୍ଙ୍କ ମୁଖ୍ୟ ଭାଷଣରୁ ଆରମ୍ଭ ହେବ । ଏହି ଇଭେଣ୍ଟର ସିଧାପ୍ରସାରଣ ବିଶ୍ବବ୍ୟାପୀ କରାଯିବ ବୋଲି କମ୍ପାନୀ ପ୍ରତିଶ୍ରୁତି ଦେଇଛି । ଆଗ୍ରହୀ ଦର୍ଶକ ଆପଲ୍ର ଅଫିସିଆଲ ୟୁଟ୍ୟୁବ ଚ୍ୟାନେଲ, ଆପଲ୍ ୱେବସାଇଟ୍, ଆପଲ୍ ଡେଭଲପର ଆପ୍ ଓ ଆପଲ୍ ଟିଭି ଆପ୍ରେ ଦେଖିପାରିବେ ।
ନିମ୍ନରେ ଦିଆଯାଇଥିବା ଭିଡିଓ ଉପରେ କ୍ଲିକ୍ କରି ଆପଣ ଯଥା ସମୟରେ ଟିମ୍ କୁକ୍ଙ୍କ ମୁଖ୍ୟ ଭାଷଣ ବା କୀ-ନୋଟ୍ ଦେଖିପାରିବେ ।
Apple WWDC 2025: ସମ୍ପୂର୍ଣ୍ଣ କାର୍ଯ୍ୟସୂଚୀ
ଆପଲ୍ର କୀ-ନୋଟ୍ iOS, iPadOS, visionOS, watchOS, ଏବଂ tvOS ଭଳି ଆପଲ୍ର OS ଅପଡେଟ୍ର ପରବର୍ତ୍ତୀ ପୁନରାବୃତ୍ତି ସହିତ ଆସୁଥିବା ସମସ୍ତ ଅପଡେଟ୍ ଏବଂ ପରିବର୍ତ୍ତନଗୁଡ଼ିକ ସମ୍ପର୍କରେ ସୂଚନା ଦେଇପାରେ । ଏହାପରେ ରାତି 1.30ଟାରେ, ଏହା ସଫ୍ଟୱେର୍ ଏବଂ ପ୍ଲାଟଫର୍ମ କ୍ଷେତ୍ରରେ ହୋଇଥିବା ଉନ୍ନତି ବିଷୟରେ ଆଲୋଚନା କରିବା ଲାଗି 'ପ୍ଲାଟଫର୍ମ୍ ଷ୍ଟେଟ୍ ଅଫ୍ ଦି ୟୁନିଅନ' ନାଁରେ ଏକ କାର୍ଯ୍ୟକ୍ରମର ଆୟୋଜନ କରିବ ।
କମ୍ପାନୀ ଅନୁଯାୟୀ WWDC 2025 ଇଭେଣ୍ଟରେ ଆପଲ୍ ବିଶେଷଜ୍ଞଙ୍କ ସହିତ 100ରୁ ଅଧିକ ବୈଷୟିକ ଅଧିବେଶନ ଆୟୋଜନ କରିବ, ଯାହା ଡେଭଲପରମାନଙ୍କୁ ନୂତନମ ଫ୍ରେମୱାର୍କ ଏବଂ ପ୍ରଯୁକ୍ତିବିଦ୍ୟା ବିଷୟରେ ଅଧିକ ଜାଣିବାକୁ ସକ୍ଷମ କରିବ । ଡେଭଲପରମାନଙ୍କୁ ଗାଇଡ୍ ଏବଂ ଡକ୍ୟୁମେଣ୍ଟେସନ୍ ମଧ୍ୟ ପ୍ରଦାନ କରାଯିବ, ଯାହା ଡେଭଲପର ସମ୍ମିଳନୀର ହାଇଲାଇଟ୍ସ ଏବଂ ସବୁଠାରୁ ବଡ଼ ଘୋଷଣା ବିଷୟରେ ସୂଚନା ପ୍ରଦାନ କରେ ।
ଆପଲ୍ ଡେଭଲପର୍ ପ୍ରୋଗ୍ରାମ୍ ଏବଂ ଆପଲ୍ ଡେଭଲପର୍ ଏଣ୍ଟରପ୍ରାଇଜ୍ ପ୍ରୋଗ୍ରାମର ସଦସ୍ୟମାନେ ଅନଲାଇନ୍ ଗ୍ରୁପ୍ ଲ୍ୟାବ୍ ମାଧ୍ୟମରେ ଆପଲ୍ ବିଶେଷଜ୍ଞଙ୍କ ସହ ଯୋଗାଯୋଗ କରିପାରିବେ । ଏହାସହିତ ଆପଲ୍ ଇଣ୍ଟେଲିଜେନ୍ସ, ଡିଜାଇନ୍ ଏବଂ ଡେଭଲପର୍ ଟୁଲ୍ସ ଉପରେ ପରାମର୍ଶ ଏବଂ ମାର୍ଗଦର୍ଶନ ପାଇଁ ୱାନ-ଅନ-ୱାନ ସାକ୍ଷାତକାର ନେଇପାରିବେ । ଏହା ବ୍ୟତୀତ ଆପଲ୍ ପାର୍କରେ ଚଳିତ ବର୍ଷର ସ୍ବିଫ୍ଟ ଷ୍ଟୁଡେଣ୍ଟ ଚ୍ୟାଲେଞ୍ଜ ପ୍ରୋଗ୍ରାମ ( Swift Student Challenge programme)ର ବିଜେତାମାନଙ୍କ ପାଇଁ ସ୍ତତନ୍ତ୍ର ବ୍ୟବସ୍ଥା କରାଯାଇଛି । ଉତ୍କୃଷ୍ଟ ଉପସ୍ଥାପନ ପାଇଁ 50 ଜଣ ବିଜେତାଙ୍କୁ କମ୍ପାନୀର ମୁଖ୍ୟାଳୟରେ ତିନି ଦିନିଆ ଅଭିଜ୍ଞତା ମଧ୍ୟ ପ୍ରଦାନ କରାଯିବ ।
