ହାଇଦ୍ରାବାଦ: ଟେକ୍ ଜାଏଣ୍ଟ ଆପଲ୍ ନିକଟ ଭବିଷ୍ୟତରେ ନିଜର ପ୍ରମୁଖ ଅପରେଟିଂ ସିଷ୍ଟମ (OS)ର ନାମକୁ ପରିବର୍ତ୍ତନ କରିବାକୁ ଯୋଜନା କରୁଥିବା ଜଣାପଡ଼ିଛି । କମ୍ପାନୀ ପାରମ୍ପରିକ ସଂସ୍କରଣ ନମ୍ବରିଂ ଯୋଜନା ପରିବର୍ତ୍ତେ ରିଲିଜ୍ ବର୍ଷ ଅନୁସାରେ iOS, iPadOS ଏବଂ ଅନ୍ୟାନ୍ୟ ଅପଡେଟ୍ର ନାମକରଣ କରିପାରେ । ବ୍ଲୁମବର୍ଗର ମାର୍କ ଗୁରମ୍ୟାନଙ୍କ ଅନୁଯାୟୀ, ଏହି ବର୍ଷ କମ୍ପାନୀ ନାମ ପରିବର୍ତ୍ତନ ଆରମ୍ଭ କରିପାରେ ।
ଏହାର ଅର୍ଥ ହେଉଛି ଏହି ବର୍ଷ ହେବାକୁ ଥିବା iOSର ପରବର୍ତ୍ତୀ ପ୍ରମୁଖ ପ୍ରକାଶନକୁ iOS 19 ବଦଳରେ iOS 26 କୁହାଯିବ। ଏହା ବ୍ୟତୀତ, ଟେକ୍ ଜାଏଣ୍ଟ ଏହାର ସମସ୍ତ ପ୍ଲାଟଫର୍ମରେ ଏକ ପୁନଃନିର୍ମିତ ଡିଜାଇନ୍ ପ୍ରକାଶ କରିବ ବୋଲି ମଧ୍ୟ ଆଶା କରାଯାଉଛି, ଯାହା ଭିଜନ ପ୍ରୋ ହେଡସେଟକୁ ଶକ୍ତି ଦେଉଥିବା ଭିଜନOS ସହିତ ସମାନ ହେବ।
ଆପଲ୍ର ପାରମ୍ପରିକ ନାମକରଣ ଯୋଜନାରେ ପରିବର୍ତ୍ତନ
ରିପୋର୍ଟ ଅନୁସାରେ, ଆପଲ୍ର ଆଗାମୀ ନାମକରଣ ଯୋଜନା କେବଳ ଆଇଫୋନ ପର୍ଯ୍ୟନ୍ତ ସୀମିତ ରହିବ ନାହିଁ ବରଂ ଏହା ନିଜର ଅପରେଟିଂ ସିଷ୍ଟମ ଉପରେ ମଧ୍ୟ ଲାଗୁ କରିବ । ଏହାର ଅର୍ଥ iPadOS, macOS, watchOS, tvOS ଓ visionOS ସହିତ '26' ଲାଗିପାରେ । ଆଶା କରାଯାଉଛି ଏହି ଅପଡେଟ୍ ଆସନ୍ତା ଜୁନ 9 ତାରିଖରେ ଆୟୋଜନ ହେବାକୁ ଥିବା କମ୍ପାନୀର ୱାର୍ଲ୍ଡୱାଇଡ ଡେଭଲପର୍ସ ସମ୍ମିଳନୀ (WWDC)ରେ ଘୋଷଣା ହୋଇପାରେ ।
ଆପଲ୍ ଆଣିପାରେ ନୂଆ UI
ଏହା ବ୍ୟତୀତ ଆପଲ୍ ଏହାର ସମସ୍ତ ପ୍ଲାଟଫର୍ମରେ ଏକ ନୂତନ ଭିଜୁଆଲ୍ ଡିଜାଇନ ଲଞ୍ଚ କରିବ ବୋଲି ଆଶା କରାଯାଉଛି, ଯାହା ସ୍ଲିକ୍ ହେବ ଏବଂ ଭିଜନ୍ ପ୍ରୋ ହେଡସେଟରେ ଥିବା VisionOSର ବର୍ତ୍ତମାନ ଇଣ୍ଟରଫେସକୁ ଅନୁସରଣ କରିବ। ରିପୋର୍ଟ ଅନୁଯାୟୀ ଏହି ଅପଡେଟ୍ ଇଣ୍ଟରଫେସକୁ 'Solarium' କୋଡେନମ ଦିଆଯାଇଛି । ତେବେ ସୋଲାରିୟମର ଅର୍ଥ ହେଉଛି ସୂର୍ଯ୍ୟକିରଣ ଅତିକ୍ରମ କରୁଥିବା ଏକ କାଚ ଜିନିଷ । ଏହା ସାମ୍ପ୍ରତିକ ବର୍ଷଗୁଡ଼ିକରେ ଆପଲ୍ UIରେ କରାଯାଇଥିବା ସବୁଠାରୁ ଗୁରୁତ୍ବପୂର୍ଣ୍ଣ ପରିବର୍ତ୍ତନ ହୋଇପାରେ, ଯାହା ଆପଲ୍ ଡିଭାଇସଗୁଡ଼ିକରେ ଏକ ସମାନ ଡିଜାଇନ ଭାଷା ଆଣିବ ।
WWDC 2025
ଆପଲ୍ର ଏହି ସମ୍ମିଳନୀ ଜୁନ 9 ତାରିଖଠାରୁ ଆରମ୍ଭ ହୋଇ ଜୁନ 13 ତାରିଖ ପର୍ଯ୍ୟନ୍ତ ଚାଲିବ । ଏହା ଜୁନ 9 ତାରିଖ ଭାରତୀୟ ସମୟ ରାତି 10.30ଟାରେ ଏକ କୀ-ନୋଟ୍ ସହିତ ଆରମ୍ଭ ହେବ । ଏହି ଇଭେଣ୍ଟରେ ଆପଲ୍ ବଡ଼ ବଡ଼ ଘୋଷଣା କରିପାରେ ଯେପରିକି ଆପ୍ସ ଓ ଗେମ୍ସ ଲାଗି ଅତ୍ୟାଧୁନିକ ଫିଚର । ଏହାସହିତ ଆପଲ୍ର ନୂଆ ଟୁଲ୍ ଓ ଟେକ୍ନୋଲୋଜି ସମ୍ପର୍କରେ ଘୋଷଣା ଲାଗି ବ୍ୟକ୍ତିଗତ ଅଧିବେଶନର ମଧ୍ୟ ଆୟୋଜନ କରାଯିବ ।
