Traffic police controversy in Bhubaneswar ଭୁବନେଶ୍ବର: ବର୍ଦ୍ଦିରେ ଥାଇ ଟ୍ରାଫିକ କର୍ମଚାରୀଙ୍କ ହଙ୍ଗାମା ଅଭିଯୋଗ । ଗ୍ୟାରେଜ ପଶି ଗାଳିଗୁଲଜ ସହ ମାରପିଟ । ଧମକ ଚମକ ସହ ଓ୍ବାକି ଟକିରେ ଗ୍ୟାରେଜ ବୟଙ୍କ ମୁଣ୍ଡ ଫଟାଇଥିବା ଅଭିଯୋଗ । ଠେଲାପେଲା ସହ ଆକ୍ରମଣ ଯୋଗୁଁ ଜଣେ ଯୁବକ ଆହତ । ଏଭଳି ସାଙ୍ଘାତିକ ଅଭିଯୋଗ ଆସିଛି ମଞ୍ଚେଶ୍ବର ଥାନା ପାଣ୍ଡରା ଛକରୁ । ଟ୍ରାଫିକ ପୋଲିସ କର୍ମଚାରୀଙ୍କ ଗିରଫଦାରୀ ନେଇ ଥାନା ଘେରି ଛନ୍ତି ନବ ନିର୍ମାଣ ଛାତ୍ର ସଂଗଠନ ।
Bhubaneswar news:
ଗ୍ୟାରେଜ ବୟଙ୍କୁ ମାଡ଼: ଟ୍ରାଫିକ ପୋଲିସ ମାଡରେ ଆହତ ଗ୍ୟାରେଜରେ କାମ କରୁଥିବା ଯୁବକ ମହମ୍ମଦ ଅଖତର କହିଛନ୍ତି, "ପୁରୀ-କଟକ ବାଇପାସ୍ ରୋଡରେ ଥିବା ଗ୍ୟାରେଜରେ ମୁଁ କାମ କରୁଥିଲି । ଟ୍ରାଫିକ ପୋଲିସ ଜଣଙ୍କ ମଦ ପିଇକି ଆସି ମୋ ନାମ ପଚାରିଥିଲେ । ପରେ ବିନା କୌଣସି କାରଣରେ ଓଲଟା ପାଲଟା କଥା ବାର୍ତ୍ତା କରି କିଛି ଅଶ୍ଳୀଳ ଭାଷାରେ ମୋତେ ଗାଳିଗୁଲଜ କରିଥିଲେ । ଏକ ଘଣ୍ଟା ଧରି ଆସି ପାଟିତୁଣ୍ଡ କରିବା ଆରମ୍ଭ କରିଥିଲେ । ମୁଁ ତାଙ୍କୁ ତାଙ୍କ ଡ୍ୟୁଟିକୁ ଯିବା ପାଇଁ କହିଥିଲେ । ନିଶାରେ ଚୁର ଥିବା ଟ୍ରାଫିକ ପୋଲିସ ଜଣଙ୍କ ମୋତେ ଧକ୍କା ମାରିବା ସହ ଠେଲାପେଲା କରି ୱାକି ଟକିରେ ମୋ ମୁଁଣ୍ଡକୁ ଆକ୍ରମଣ କରିଥିଲେ ।"
ଘଟଣା ପରେ ଉତ୍ତେଜନା:
ଘଟଣା ଘଟିବା ପରେ ସେଠାରେ ଉତ୍ତେଜନା ସୃଷ୍ଟି ହୋଇଥିଲା । କିଛି ଲୋକ ଜମା ହୋଇ ପୋଲିସ କର୍ମଚାରୀଙ୍କ ଏଭଳି କାରନାମା ନେଇ ହୋହଲ୍ଲା କରିଥିଲେ । ପରେ ପିସିଆର ଓ ପୋଲିସ ଟିମ୍ ପହଞ୍ଚି ମାଡ଼ ଖାଇଥିବା ଯୁବକ ଓ ମାଡ଼ ମାରିଥିବା ପୋଲିସ କର୍ମାଚରୀଙ୍କୁ ଥାନାକୁ ନେଇଥିଲା । ମୁଣ୍ଡ ଫାଟି ଥିବା ଗ୍ୟାରେଜ ଯୁବକକୁ ହସ୍ପିଟାଲ ନେଇଥିଲା ପୋଲିସ ।ସେଠାରେ ତାଙ୍କର ମୁଣ୍ଡରେ ଷ୍ଟିଚ ପକାଇବା ସହ ଥାନାକୁ ଆଣି ପୋଲିସ ଘଟଣା ସମ୍ପର୍କରେ ତଦନ୍ତ ଜାରି ରଖିଛି ।
Law and order issues in Bhubaneswar:
ସିସିଟିଭି ଫୁଟେଜ ଯାଞ୍ଚ: ପୋଲିସ ଘଟଣାସ୍ଥଳରେ ପହଞ୍ଚି ଦୋକାନରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରିଛି । ଯେଉଁଥିରେ ଟ୍ରାଫିକ ପୋଲିସ କର୍ମଚାରୀ ଜଣଙ୍କ ତାଙ୍କୁ ଆକ୍ରମଣ କରୁଥାବାର ଭିଡିଓ ରହିଛି । ଏହା ସହିତ ଆକ୍ରମଣ କରୁଥିବାର ଓ ଗୋଡେଇ ଗୋଡେଇ ଗାଳିଗୁଲଜ କରୁଥିବା ମଧ୍ୟ ନଜରକୁ ଆସିଛି । ସିସିଟିଭି ଫୁଟେଜ, ଅଭିଯୋଗକାରୀଙ୍କ ପକ୍ଷ ଓ ପୋଲିସର ପକ୍ଷ ନେଇ ଆଲୋଚନା କରୁଛନ୍ତି ।
ଥାନା ଘେରିଲା ନବ ନିର୍ମାଣ ଛାତ୍ର ସଂଗଠନ:
ପୋଲିସର ବ୍ୟବହାର ନେଇ ଥାନା ଘେରିଛନ୍ତି ନବ ନିର୍ମାଣ ଛାତ୍ର ସଂଗଠନ । କିଛି ଯୁବକ ଥାନା ଘେରାଉ ସହ ପୋଲିସର ଏପରି ବ୍ୟବହାରକୁ ଜୋରଦାର ବିରୋଧ କରିଛନ୍ତି । ତୁରନ୍ତ ସେହି ପୋଲିସ କର୍ମଚାରୀକୁ ଗିରଫ ଦାବି ନେଇ ଥାନାରେ ଏକ ଲିଖିତ ଅଭିଯୋଗ ଦେଇଥିବା ବେଳେ ବିହାରରୁ ଆସିଥିବା ସେହି ଯୁବକକୁ ପୋଲିସର ଏପରି ବ୍ୟବହାର ନେଇ କଡ଼ା ପ୍ରଶ୍ନ କରିଛନ୍ତି ।
ଏହା ମଧ୍ୟ ପଢ଼ନ୍ତୁ.. BJD ପୂର୍ବତନ ବିଧାୟକ ପ୍ରଣବ ବଳବନ୍ତରାୟଙ୍କୁ ଆକ୍ରମଣ ଉଦ୍ୟମ ଶ୍ରୀମନ୍ଦିର ସମ୍ମୁଖରେ ସାମ୍ବାଦିକାଙ୍କୁ ସେବାୟତଙ୍କ ଆକ୍ରମଣ, ଅସଦାଚାରଣ ସହ ମାଡ଼ ମାରିଥିବା ଅଭିଯୋଗ |
ଏନେଇ ପୋଲିସ ବିଭାଗର ପ୍ରତିକ୍ରିୟା ମିଳିପାରିନାହିଁ । କିନ୍ତୁ ପୋଲିସ ପକ୍ଷରୁ ସୂଚନା ଦିଆଯାଇ କୁହାଯାଇଛି ଯେ, ଟ୍ରାଫିକ ପୋଲିସ ଜଣଙ୍କ ଖରାରେ ଦୀର୍ଘ ସମୟ ଧରି ଠିଆ ହୋଇ ଡ୍ୟୁଟି କରିଥିଲେ । ଛାଇ ପାଇଁ ସେ ଗ୍ୟାରେଜ ପାଖରେ ଠିଆ ହୋଇଥିଲେ । ଦୋକାନ ପାଖରେ ବସନ୍ତୁ ନାହିଁ ତାଙ୍କୁ ଗ୍ୟାରେଜ ପିଲା ମନା କରିଥିଲେ । ଯେଉଥି ପାଇଁ ପାଟିତୁଣ୍ଡ ହେବା ସହ ଏଭଳି ଘଟଣା ଘଟିଛି । ଏନେଇ ପୋଲିସ କର୍ମଚରୀ ସହ ଆକ୍ରମଣ ଅଭିଯୋଗ ଆଣିଥିବା ପିଲା ମଧ୍ୟ ଥାନାରେ ରହିଛି । ପୋଲିସ ଉଭୟଙ୍କୁ ପଚରାଉଚୁରା କରୁଛି ।
ଇଟିଭି ଭାରତ, ଭୁବନେଶ୍ବର
