ବିଧାନସଭାରେ ରାତି ତମାମ ଆଲୋଚନା, ବିଶ୍ୱବିଦ୍ୟାଳୟ ସଂଶୋଧନ ବିଲ୍‌ ପାସ୍

ରାତି ସାରା ବିଧାନସଭା ଚାଲିବା ପରେ ଅନିର୍ଦ୍ଦିଷ୍ଟକାଳ ପାଇଁ ମୁଲତବୀ ଘୋଷଣା । ସାଢେ ୧୨ ଘଣ୍ଟାର ଆଲୋଚନା ପରେ ପାସ୍ ହେଲା ବିଶ୍ୱବିଦ୍ୟାଳୟ ସଂଶୋଧନ ବିଲ୍‌ ।

Odisha University Amendment Bill 2024 passed ଭୁବନେଶ୍ବର: ଶେଷ ହେଲା ବିଧାନସଭା ବଜେଟ ଅଧିବେଶନ । ନିର୍ଦ୍ଧାରିତ ଦିବସର 3 ଦିନ ପୂର୍ବରୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଗୃହକୁ ମୁଲତବୀ ଘୋଷଣା କଲେ ବାଚସ୍ପତି ସୁରମା ପାଢ଼ୀ । ଗୃହରେ ପାରିତ ହେଲା ଓଡି଼ଶା ବିଶ୍ୱବିଦ୍ୟାଳୟ ସଂଶୋଧନ ବିଲ୍‌ 2024 । ବୁଧବାର ରାତି ତମାମ ଆଲୋଚନା ପରେ ଆଜି ଭୋର ସମୟରେ ପାରିତ ହୋଇଥିଲା । ମୁଖ୍ଯମନ୍ତ୍ରୀ ମୋହନ ଚରଣ ମାଝୀ,ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ଶେଷ ଯାଏଁ ଉପସ୍ଥିତ ରହିଥିଲେ । ରାଜ୍ୟ ରାଜପଥ ପ୍ରାଧିକାରଣ ବିଲ 2025 ମଧ୍ୟ ପାରିତ ହୋଇଛି ।

Odisha Assembly All Night Session :
୨ ଦଶନ୍ଦୀ ପରେ ରାତିସାରା ଚାଲିଲା ବିଧାନସଭା: ବଜେଟ ଅଧିବେଶନର 25 ତମ ଦିବସରେ ଗୃହ ରାତିସାରା ଚାଲିଥିଲା । ବୁଧବାର ଅପରାହ୍ନରେ ବିଶ୍ବବିଦ୍ୟାଳୟ ସଂଶୋଧନ ବିଲ ଉପରେ ଚର୍ଚ୍ଚା ଆରମ୍ଭ ହୋଇଥିଲା । 12 ଘଣ୍ଟା ଧରି ଏହା ଉପରେ ଆଲୋଚନା ହେବା ପରେ ଆଜି ଭୋର 4ଟା 30 ସମୟରେ ପାରିତ ହୋଇଥିଲା । ବିରୋଧୀ ଦଳ ଆଣିଥିବା ସମସ୍ତ ସଂଶୋଧନ କାଟ ଖାଇଥିଲା । ଦୀର୍ଘ 2 ଦଶନ୍ଦୀ ପରେ ବିଧାନସଭାରେ ରାତିସାରା ଚାଲିଥିଲା ଓ ବିଧାୟକ ମାନେ ଉପସ୍ଥିତ ରହିଥିଲେ । ଗୃହ କାର୍ଯ୍ୟ ରାତି 9ଟା ପର୍ଯ୍ୟ ଚାଲିବା ନିୟମ ରହିଛି । କିନ୍ତୁ ଏହି ସମୟ ପରେ ମଧ୍ୟ ଗୃହ କାର୍ଯ୍ୟ ଜାରି ରହିବାକୁ ସରକାରୀ ଦଳ ମୁଖ୍ୟ ସଚେତକ ପ୍ରସ୍ତାବ ଆଣିଥିଲେ । ଏହାରୁ ବିରୋଧୀ ବିଜେଡି ବିରୋଧ କରିଥିଲେ ମଧ୍ୟ ବିଶ୍ବବିଦ୍ୟାଳୟର ସ୍ବାୟତ୍ତତା ବଜାୟ ରଖିବାକୁ ସଂଶୋଧନ ଜରୁରୀ ବୋଲି ଶାସକ ଦଳ ବିଧାୟକ କହିଥିଲେ ।

'ଚଞ୍ଚକତା ପୂର୍ଣ୍ଣ ବିଲ ଆଣିଛନ୍ତି ବିଜେପି ସରକାର'

ବିଶ୍ୱ ବିଦ୍ୟାଳୟ ସଂଶୋଧନ ବିଲ 2024 ପାରିତ ହେବା ପରେ ବିଜେଡି ବିଧାୟକ ଅରୁଣ ସାହୁ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି ଯେ, ଚଞ୍ଚକତା ପୂର୍ଣ୍ଣ ବିଲ ଆଣିଛନ୍ତି ବିଜେପି ସରକାର। 2024 ରେ ଯେଉଁ ବିଲ ଅଣା ଯାଇଛି 1989ର ବିଲକୁ ସଂଶୋଧନ କରାଯାଇଛି ବୋଲି କୁହାଯାଇଛି । ବିଲର ବୈଧତା କଣ ଅଛି, ପରବର୍ତ୍ତୀ ସମୟରେ ସୁପ୍ରିମକୋର୍ଟ ରେ ଆଲୋଚନା ହେବ । ବିଲରେ ଗଭର୍ଣ୍ଣର ଙ୍କ ପାୱାରକୁ କାଟି ଦିଆ ଯାଇଛି । ୟୁଜିସିର ଡ୍ରାଫ୍ଟ ଗାଇଡ଼ ଲାଇନ, NEPର ଗାଇଡ଼ ଲାଇନ ଓ ନୂଆ ବିଲ ମଧ୍ୟରେ ତାଳ ମେଳ ନାହିଁ । ଯେହେତୁ 4 ବର୍ଷ ତଳେ ବିଜେପି ବିରୋଧରେ ଥିଲେ, ୟୁଜିସି କୁ ଲଗେଇ ମାମଲା କରିଥିଲେ, ତେଣୁ ନିଜ ଜିଦ ରକ୍ଷା ପାଇଁ ବିଲ ଆଣି ତରବରିଆ ଭାବେ ସଂଖ୍ୟା ବଳ ରେ ପାସ କରିଛନ୍ତି । ବିଲ ଉପରେ ସାଢେ 12 ଘଣ୍ଟା ଆଲୋଚନା ହେଲା । ଆହୁରି ହୋଇ ପାରିଥାନ୍ତା ହେଲେ ସେତିକି ସୁଯୋଗ ଦିଆଯାଉନି । ମୁଁ କେବଳ 3 ଘଣ୍ଟା 10 ମିନିଟ ଆଲୋଚନାରେ ଭାଗ ନେଇଛି ।

13 ଫେବୃଆରୀରୁ ଆରମ୍ଭ ହୋଇଥିଲା ବଜେଟ ଅଧିବେଶନ । 17 ତାରିଖରେ ଚଳିତ ଆର୍ଥିକ ବର୍ଷ ଲାଗି ବଜେଟ ଆଗତ କରିଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଚଳିତ ଅଧିବେଶନରେ ବିଶ୍ୱବିଦ୍ୟାଳୟ ସଂଶୋଧନ ବିଲ 2024 ଓ ଓଡିଶା ରାଜ୍ୟ ରାଜପଥ ପ୍ରାଧିକାରଣ ବିଲ 2025 ପାରିତ ହୋଇଛି ।

ଇଟିଭି ଭାରତ, ଭୁବନେଶ୍ବର