ଭୁବନେଶ୍ୱର ଇସ୍କନ ମନ୍ଦିରରେ ଚତୁର୍ଦ୍ଧାମୂର୍ତ୍ତିଙ୍କ ସ୍ନାନଯାତ୍ରା, କାଳିଆ ପ୍ରେମରେ ବିଭୋର ଭକ୍ତ
ପବିତ୍ର ସ୍ନାନପୂର୍ଣ୍ଣିମାରେ ଭୁବନେଶ୍ୱରର ଇସ୍କନ ସମେତ ବିଭିନ୍ନ ମନ୍ଦିରରେ ଚତୁର୍ଦ୍ଧାମୂରତିଙ୍କ ସ୍ନାନଯାତ୍ରା । କାଳିଆ ପ୍ରେମରେ ବିଭୋର ହେଲେ ଭକ୍ତ ।
Published : June 11, 2025 at 10:46 PM IST
Sri Jagannath's Snana yatra mahotsava ଭୁବନେଶ୍ୱର: ଆଜି ହେଉଛି ପବିତ୍ର ସ୍ନାନପୂର୍ଣ୍ଣିମା । ଏହି ପବିତ୍ର ପୁର୍ଣିମାରେ ଜଗନ୍ନାଥଙ୍କ ଗାଧୁଆ ଦେଖେ ସାରା ଦୁନିଆ । ଭାବବିନୋଦିଆର ଗାଧୁଆ ପର୍ବ ବା ସ୍ନାନ ଯାତ୍ରାକୁ ନେଇ ସବୁଠି ଭକ୍ତିର ପରିବେଶ । ଶ୍ରୀକ୍ଷେତ୍ରରୁ ଏକାମ୍ର କ୍ଷେତ୍ର ସବୁଠି ଲୀଳାମୟ ଠାକୁରଙ୍କ ହେଇଛି ସ୍ନାନ ଯାତ୍ରା । ଭୁବନେଶ୍ୱରର ଇସ୍କନ ସମେତ ବିଭିନ୍ନ ମନ୍ଦିରରେ ପୁରୀ ନିତି ଅନୁଯାୟୀ ଠାକୁରଙ୍କ ସ୍ନାନ ଯାତ୍ରା ହୋଇଯାଇଛି । ଶଙ୍ଖ, ଘଣ୍ଟ, ଘଣ୍ଟା, ହୁଳହୁଳି ଓ ହରେକୃଷ୍ଣ ଧ୍ୱନିରେ ଗଗନ ପବନ ପ୍ରକମ୍ପିତ ହେଉଥିବା ବେଳେ ଭକ୍ତଂକ ଗହଳିରେ ଚତୁର୍ଦ୍ଧାମୂରତି ପହଣ୍ଡିରେ ଆସି ସ୍ନାନ ଯାତ୍ରା ହୋଇଛି ।
ଭକତ ଆଉ ଭଗବାନଙ୍କର ଏହି ଅପୂର୍ବ ମିଳନକୁ ନେଇ ପୁରା ପରିବେଶ ଭକ୍ତିମୟ ହୋଇଥିବା ବେଳେ ପବିତ୍ର ସ୍ନାନ ଯାତ୍ରା ଦେଖିଛନ୍ତି ଶହ ଶହ ଶ୍ରଦ୍ଧାଳୁ । ଚର୍ମ ଚଚକ୍ଷୁରେ ସ୍ନାନ ଯାତ୍ରା ସହ ଦିବ୍ୟ ଗଜାନନ ବେଶ ଦେଖି ପରମାନନ୍ଦ ଲାଭ କରିଛନ୍ତି ଭାବ ବିହୋଳିତ ଶ୍ରଦ୍ଧାଳୁ । ତେବେ ପ୍ରଥମେ ମନ୍ଦିରରୁ ପହଣ୍ଡି ହୋଇ ତିନି ଠାକୁର ସ୍ନାନ ବେଦୀକୁ ଆସିବା ପରେ ୧୦୮ ସୁଗନ୍ଧିତ ଗରା ପାଣିରେ ୪ ତୁର୍ଦ୍ଧାମୂର୍ତିଙ୍କୁ ସେବକ ମାନେ ସ୍ନାନ କରାଇଛନ୍ତି ।
"ପ୍ରଭୁଙ୍କ ଏହି ସୁନ୍ଦର ଲୀଳା ଭକ୍ତଙ୍କୁ ଭାବ ବିଭୋଳ କରିଛି । ପୁରୀ ନ ଯାଇପାରୁ ଥିଲେ ମଧ୍ୟ ଭୁବନେଶ୍ୱ ର ଇସ୍କନର ମନ୍ଦିରେ ହେଉଥିବା ସ୍ନାନ ଯାତ୍ରାକୁ ଅନୁଭବ କରିଛି," କହିଛନ୍ତି ଜଣେ ଶ୍ରଦ୍ଧାଳୁ ।
"ଭାବକୁ ନିକଟ ସେତ ଅଭାବେ ଦୂର । ତେଣୁ ସେ ସବୁଠି ଅଛନ୍ତି ତାଙ୍କୁ ଦର୍ଶନ ପାଇଁ କୋଉଠିଁ ଯିବାର ଆବଶ୍ୟକ ନଥାଏ ଭକ୍ତି ଥିଲେ ସବୁଠି ତାଙ୍କୁ ଅନୁଭବ କରିହେବ," ବୋଲି କହିଛନ୍ତି ଜଣେ ଶ୍ରଦ୍ଧାଳୁ ।
ପୁରୀରେ ସ୍ନାନବେଦୀରେ ଚତୁର୍ଦ୍ଧାମୂର୍ତ୍ତି । ଲୋକାରଣ୍ୟ ବଡଦାଣ୍ଡ । ଦିବ୍ୟ ସ୍ନାନର ମୂକସାକ୍ଷୀ ହୋଇଛି ବିଶ୍ବ ବ୍ରହ୍ମାଣ୍ଡ । ବଡ ଠାକୁରଙ୍କୁ ଅତି ପାଖରୁ ଦେଖି ଭାବବିହ୍ବଳ ଭକ୍ତ । ଭକ୍ତଙ୍କ ପାଇଁ ରତ୍ନସିଂହାସନରୁ ଓହ୍ଲାଇ ଆସି ସ୍ନାନବେଦୀରେ ବିଜେ କରିଛନ୍ତି ମହାପ୍ରଭୁ । ପ୍ରଭୁଙ୍କ ଦିବ୍ୟଭବ୍ୟ ରୂପ ଦର୍ଶନ କରିଛନ୍ତି ଲକ୍ଷ ଲକ୍ଷ ଶ୍ରଦ୍ଧାଳୁ ।
