ସ୍ପେଶାଲ ରିପୋର୍ଟ: ଭବାନୀ ଶଙ୍କର ଦାସ
Heera Bibi Bhubaneswar Slum Activist ଭୁବନେଶ୍ବର: ‘ବାପାରେ ନିଶା ପାଖକୁ ଯାଅନି...ଯେଉଁ ବଡ଼ ଲୋକ ମଦ ପିଉଛନ୍ତି ତାଙ୍କ ପାଖକୁ ଯାଅନି...ବହୁତ କଷ୍ଟ ଭୋଗୁଛି, ଆଉ କେହି ନଭୋଗନ୍ତୁ ।’ ଏଇ ନିଶା ଉଜାଡି ଦେଇଛି ତାଙ୍କ ସୁନାର ସଂସାର...ଅଳ୍ପ ବୟସରେ ସ୍ବାମୀ ହାତ ଛାଡି ଆରପାରିକୁ ଚାଲିଗଲେ । ବଡ଼ ପୁଅକୁ ବି ଗ୍ରାସ କଲା ନିଶା...ପାଠପଢାରୁ ପଥଚ୍ୟୁତ ହୋଇ ନିଶାରେ ଚୂର ରହିଲେ । ଆଉ ଏବେ ସେ ନିଶା ନିବାରଣ କେନ୍ଦ୍ରରେ । ଏସବୁ କଷ୍ଟ ଭିତରେ ସମାଜରୁ ବାଲ୍ୟ ବିବାହ ଉଚ୍ଛେଦ ଓ ଯୁବପିଢିଙ୍କୁ ନିଶାଠୁ ଦୂରେଇ ରହିବାକୁ ସଚେତନ କରିବାକୁ ପଣ କରିଛନ୍ତି ଭୁବନେଶ୍ୱର ରେଳ ଷ୍ଟେସନ ନିକଟ କଳ୍ପନା ଛକ କଦଳୀ ଗୋଦାମ ବସ୍ତିରେ ରହୁଥିବା ‘ହୀରା ବିବି’ । ନିଜେ ଜରି ଗୋଟାଇ ପେଟ ପୋଷୁଛନ୍ତି ହେଲେ ସମାଜକୁ ବାଣ୍ଟୁଛନ୍ତି ସଚେତନତା ବାର୍ତ୍ତା...ତାଙ୍କ ପ୍ରେରଣାଦାୟୀ କାହାଣୀକୁ ନେଇ ସ୍ପେଶାଲ ରିପୋର୍ଟ...‘ସଲାମ ହୀରା ବିବି’ ।
କଦଳୀ ଗୋଦାମ ବସ୍ତିର ‘ହୀରା’
ଭିନ୍ନ ଜଣେ ମହିଳା । ଭିନ୍ନ ତାଙ୍କର ମହାନତା । ନିଜେ ଦୁଃଖ, କଷ୍ଟ ଓ ଯନ୍ତ୍ରଣା ଭିତରେ ଥାଇ ବି ଅନ୍ୟମାନଙ୍କ ପାଇଁ ସେ ପାଲଟିଛନ୍ତି ସାହା ଭରସା । ଜୀବନ ସହ ସଂଘର୍ଷ ଓ ପେଟ ପାଇଁ ସଂଗ୍ରାମ ଭିତରେ ବି ଅନ୍ୟମାନଙ୍କୁ ଦେଖାଉଛନ୍ତି ବଞ୍ଚିବାର ରାହା । କାଚ, ଜରି ଓ ପ୍ଲାଷ୍ଟିକ ଗୋଟାଇ ପେଟ ପୋଷୁଥିବା ମହିଳା ଧରିଛନ୍ତି ସମାଜ ପରିବର୍ତ୍ତନର ମଙ୍ଗ । ସମାଜରେ ଉପେକ୍ଷିତ ଏହି ଅଭାବୀ ବିଧବା ମହିଳାଙ୍କ ଭିତରେ ରହିଛି ମାନବିକତାର ଜୀବନ୍ତ ଉଦାହରଣ । କେତେବେଳେ ସେ କାହା ପାଇଁ ମା' ସାଜନ୍ତି ତ ଆଉ କେତେବେଳେ ଝିଅ ଓ ଭଉଣୀ ସାଜି ସହାୟତାର ହାତ ବଢ଼େଇ ଦିଅନ୍ତି । ନିଜ ବସ୍ତି ଅଞ୍ଚଳରେ ସାମାଜିକ କୁପ୍ରଥା ହେଉ ଅବା ପଥଚ୍ୟୁତଙ୍କୁ ପଥ ଦେଖାଇବାରେ ସେ ନିଅନ୍ତି ନେତୃତ୍ୱ । ବାଲ୍ୟ ବିବାହ ରୋକିବା ସହ ପଥଚ୍ୟୁତଙ୍କୁ ଦେଖାଉଛନ୍ତି ରାହା ।
କିଏ ଏହି ହୀରା ?
ନୁଖୁରା ମୁଣ୍ଡକୁ ଫୁରଫୁର ହୋଇ ଉଡୁଥିବା ବାଳ । ରଫୁ ହୋଇଥିବା ଶାଢ଼ୀ ସହ ଚିରା ଚପଲ । ବେଶଭୂଷା ପୂରା ସାଧାରଣ । ନାଁ ତାଙ୍କର ହୀରା ବିବି । ବୟସ ପ୍ରାୟ ୫୦ ହେବ । ଘର ଭୁବନେଶ୍ୱର ରେଳ ଷ୍ଟେସନ ନିକଟ କଳ୍ପନା ଛକ କଦଳୀ ଗୋଦାମ ବସ୍ତି । ସରକାରୀ ସହାୟତାରେ ମିଳିଥିବା ଏହି ଛୋଟିଆ ଘରେ ପିଲା ଛୁଆଙ୍କ ସହ ରୁହନ୍ତି ହୀରା । ୫ ପିଲା ଛୁଆଙ୍କୁ ନେଇ ହୀରାଙ୍କ ତେଲ ଲୁଣର ସଂସାର । 5ଟି ସନ୍ତାନଙ୍କ ମଧ୍ୟରୁ 2 ଝିଅ ଓ 3ଟି ପୁଅ । ବଡ଼ ଝିଅ ବିବାହ କରିସାରିଥିବା ବେଳେ ବଡ଼ ପୁଅ ନିଶାଗ୍ରସ୍ତ ହୋଇ ଏବେ ନିଶା ନିବାରଣ କେନ୍ଦ୍ରରେ । ସ୍ବାମୀ ଗତ 12 ବର୍ଷ ତଳେ ପ୍ରାଣ ହରାଇଥିଲେ । କାଚ ବୋତଲ, ଜରି ଓ ପ୍ଲାଷ୍ଟିକ ଗୋଟାଳି ଭାବେ ଏବେ ତାଙ୍କର ପରିଚୟ । ରାଜଧାନୀ ଓ ଉପକଣ୍ଠରେ ବିଭିନ୍ନ ଗଳିକନ୍ଦି ବୁଲି ଟିଣ, କାଚ, ଜରି, ବୋତଲ ଗୋଟାଇ ଆଣି କବାଡ଼ିଆଙ୍କ ପାଖରେ ବିକ୍ରି କରନ୍ତି । ଆଉ ସେଥିରୁ ଯାହା ରୋଜଗାର ହୁଏ ସେଥିରେ ଚଳେ ହୀରାଙ୍କ ପରିବାର । ପରିବାରର ପେଟ ପୋଷିବା ସହ ଝିଅଙ୍କ ବିବାହ ପାଇଁ ଅର୍ଥ ସଞ୍ଚୁଛନ୍ତି ହୀରା ।
କେତେ ବାଲ୍ୟ ବିବାହ ରୋକିଲେଣି ହୀରା ?
ରାଜଧାନୀର ବସ୍ତି ଅଞ୍ଚଳରେ ବାପା ମା' ମାନେ ଦଲାଲଙ୍କ ପ୍ରଲୋଭନରେ ପଡ଼ି ଝିଅମାନଙ୍କୁ ପାଠପଢ଼ା ଅଧାରୁ ବାଲ୍ୟ ବିବାହ କରିବା ପାଇଁ ଚେଷ୍ଟା କରୁଛନ୍ତି । ସେଭଳି କ୍ଷେତ୍ରରେ ବସ୍ତିରେ ଥିବା କମ୍ୟୁନିଟି ସେଣ୍ଟର ସହାୟତାରେ ବାଲ୍ୟ ବିବାହ ରୋକିବାର ସେ ନିରନ୍ତର ପ୍ରୟାସ ଜାରି ରଖିଛନ୍ତି । ବର୍ତ୍ତମାନ ସୁଦ୍ଧା ସେ ୮ରୁ ୧୦ଟି ବାଲ୍ୟ ବିବାହ ରୋକି ସାରିଲେଣି । ସ୍କୁଲ ଦୁଆର ମାଡି ନଥିବା ହୀରା ଝିଅ ମାନଙ୍କୁ ସଚେତନ କରିବା ଲାଗି ଆଗେଇ ଆସିଛନ୍ତି । କେବଳ ସେତିକି ନୁହେଁ ସେହି ଝିଅମାନଙ୍କୁ ପାଠ ପଢ଼ାଇ ମଣିଷ କରିବାକୁ ପ୍ରୟାସ କରୁଛନ୍ତି ।
ବସ୍ତିରେ ବାଣ୍ଟୁଛନ୍ତି ନିଶା ନିବାରଣ ବାର୍ତ୍ତା:
ନିଶା ଯୋଗୁଁ ଅଳ୍ପ ବୟସରେ ସ୍ବାମୀଙ୍କୁ ହରାଇଥିବା ହୀରାଙ୍କ ପୁଅ ପାଠପଢ଼ା ଛାଡି ପଥଚ୍ୟୁତ ହୋଇ ଏଣେତେଣେ ବୁଲୁଥିଲେ । ଏହା ତାଙ୍କୁ ବ୍ୟସ୍ତ କରିଥିଲା । ଏହା ପରଠୁ ବସ୍ତିରେ ସେ ନିଶା ନିବାରଣର ବାର୍ତ୍ତା ଦେଉଛନ୍ତି । ପାଠପଢୁ ନ ଥିବା ପିଲାଙ୍କୁ ସ୍ୱେଚ୍ଛାସେବୀ ସଙ୍ଗଠନ ଓ ଅଙ୍ଗନବାଡ଼ି ଦିଦିଙ୍କ ମାଧ୍ୟମରେ ପାଠ ପଢ଼ାଇବାର ବ୍ୟବସ୍ଥା କରୁଛନ୍ତି । ପାଖାପାଖି ୪୦-୪୫ ପିଲାଙ୍କ ଦାୟିତ୍ଵ ସେ ନେଇଛନ୍ତି । ଏପରିକି ବସ୍ତିରେ ରୋଗାକ୍ରାନ୍ତ ଅସହାୟଙ୍କ ସେବା ଶୁଶ୍ରୂଷା ମଧ୍ୟ କରନ୍ତି । ଯାହା ରୋଜଗାର କରନ୍ତି, ସେଥିରୁ କିଛି ଏହି ଅଭାବୀ ଲୋକଙ୍କ ଲାଗି ଖର୍ଚ୍ଚ କରନ୍ତି । ନିରାଶ୍ରୟଙ୍କ ସାହାରା ଓ ଅଭାବୀ ବନ୍ଧୁ ସାଜିଛନ୍ତି ହୀରା ।
ହୀରାଙ୍କ ସମ୍ପର୍କରେ...
ମୂଳତଃ ଆନ୍ଧ୍ରପ୍ରଦେଶର ବାସିନ୍ଦା ହେଉଛନ୍ତି ହୀରାଙ୍କ ପରିବାର । ପରିବାରର ପୂର୍ବ ପିଢ଼ି ପେଟ ପାଟଣା ପାଇଁ ଭୁବନେଶ୍ୱର ଚାଲି ଆସିଥିଲେ । ଭୁବନେଶ୍ୱର ଷ୍ଟେସନ ନିକଟରେ ଥିବା ଏହି କଦଳୀ ଗୋଦାମ ବସ୍ତିରେ ହୀରାଙ୍କର ଜନ୍ମ । ଭାଇଭଉଣୀ ୩ ଜଣଙ୍କ ମଧ୍ୟରେ ହୀରା ବଡ଼ । କିନ୍ତୁ ୧୩ ବର୍ଷ ବୟସରେ ସେ ବିବାହ କରିଥିଲେ । ବୟସରେ ତାଙ୍କ ଠାରୁ ବହୁତ ବଡ଼ ସେକ ତାଜୁଙ୍କୁ ସେ ବାହା ହୋଇଥିଲେ । ଦୁନିଆକୁ ଭଲ ଭାବେ ଜାଣିନଥିବା ହୀରା ବିବାହର ବର୍ଷକ ମଧ୍ୟରେ ମା' ହୋଇଥିଲେ । କିନ୍ତୁ ଦୁର୍ବଳ ସ୍ୱାସ୍ଥ୍ୟ ଓ ଅଜଣା ରୋଗରେ ୩ ମାସର ପ୍ରଥମ ପୁଅର ମୃତ୍ୟୁ ହୋଇଥିଲା । ଏହା ପରେ ସେ 2ଟି ଝିଅ ଓ 3ଟି ପୁଅର ଜନନୀ ହୋଇଥିଲେ । ମାଂସ କଟାଳି ଭାବେ କାମ କରୁଥିବା ସ୍ୱାମୀ ସବୁବେଳେ ନିଶାରେ ଚୁର ରହୁଥିଲେ । ଏଥିପାଇଁ ପରିବାରରେ ବିଶୃଙ୍ଖଳା ସହ ଅବହେଳାର ଶିକାର ହୋଇଥିଲେ ହୀରା ।
ନିଶା ନେଲା ସ୍ବାମୀଙ୍କ ଜୀବନ...
ଶେଷରେ ନିଶା ନେଇଥିଲା ହୀରାଙ୍କ ସ୍ୱାମୀଙ୍କ ଜୀବନ । ୧୨ ବର୍ଷ ତଳେ ସେ ସ୍ୱାମୀଙ୍କୁ ହରାଇଥିଲେ । ଦୁଃଖ କଷ୍ଟରେ ୫ ଛୁଆଙ୍କୁ ନେଇ ଚାଲିଥିଲା ହୀରାଙ୍କ ସଂସାର । ନିଜେ ଭୋଗିଥିବା ଯନ୍ତ୍ରଣାରେ ଆଉ ଯେମିତି କେହି ନଜୁଝୁ ସେ ଦିଗରେ ଆରମ୍ଭ କରିଥିଲେ ପ୍ରୟାସ । ନିଜ ଅଞ୍ଚଳରେ ବାଲ୍ୟ ବିବାହ ରୋକିବା ଲାଗି ସେ ନେଇଥିଲେ ପଣ । ଏହାରି ଭିତରେ ବସ୍ତିର ପିଲାଙ୍କ ସହ ମିଶି ତାଙ୍କ ବଡ଼ ପୁଅ ନିଶାଗ୍ରସ୍ତ ହେବା ହୀରାଙ୍କୁ ବେଶ ପ୍ରଭାବିତ କରିଥିଲା । ପୁଅ ଓ ଅନ୍ୟ ଯୁବ ବର୍ଗଙ୍କୁ ନିଶା ନିବାରଣ କେନ୍ଦ୍ରରେ ଛାଡିବା ବ୍ୟବସ୍ଥା କରିବା ସହ ବସ୍ତିକୁ ନିଶା ମୁକ୍ତ କରିବାକୁ ଶପଥ ନେଇଛନ୍ତି ହୀରା ।
ହୀରାଙ୍କ ମହତ ଉଦ୍ଦେଶ୍ୟ ପଛରେ ରହସ୍ୟ କଣ ?
ଦୀପା ଶିଖା ଭଳି ନିଜେ ଜଳି ସମାଜକୁ ଆଲୋକର ରାସ୍ତା ଦେଖାଉଛନ୍ତି ହୀରା ବିବି । ବାସ୍ ତାଙ୍କ ଜୀବନଙ୍କ ସେହି ସଂଘର୍ଷର କାହାଣୀ ଜାଣିବାକୁ କଳ୍ପନା ଛକ କଦଳୀ ଗୋଦାମ ବସ୍ତିରେ ପହଞ୍ଚିଥିଲା ଆମ 'ETV Bharat' ଟିମ୍ । ନିଜେ ଦୁଃଖ କଷ୍ଟରେ ଚଳୁଥିବା ହୀରା... ସମାଜର ପଥଭ୍ରଷ୍ଟ ଯୁବପିଢିଙ୍କୁ ଶିକ୍ଷିତ କରିବା ପାଇଁ ଅହରହ ବସ୍ତିରେ କାର୍ଯ୍ୟ କରି ଚାଲିଛନ୍ତି । ଏନେଇ ‘ଇଟିଭି ଭାରତ’ ଆଗରେ ଦୁଃଖ-କଷ୍ଟ-ଖୁସିକୁ ବାଣ୍ଟିଥିଲେ ହୀରା ।
13 ବର୍ଷରେ ବିବାହ କରିଥିଲେ, ଏବେ ବାଲ୍ୟ ବିବାହ ରୋକିବାକୁ ଚଳାଇଛନ୍ତି ପ୍ରୟାସ:
ETV Bharatକୁ ହୀରା ବିବି କହିଛନ୍ତି, ‘ମୁଁ ମାତ୍ର 13 ବର୍ଷ ବୟସରେ ବାହା ହୋଇଥିଲି । କମ ବୟସରେ ବାହା ହୋଇ ମୋର ପରିସ୍ଥିତି ଯାହା ହୋଇଛି, ଅନ୍ୟମାନେ କେହି ଏହି ଅବସ୍ଥାରେ ନପଡ଼ନ୍ତୁ । ସ୍ୱାମୀ ନିଶା ଖାଇ ପରିବାରକୁ ଅଣଦେଖା କରୁଥିବାରୁ ଘରୁ ପାଦ କାଢିଥିଲି । ଗୋଟିଏ ଓଳି ଖାଇ ଅନ୍ୟ ଓଳି ଉପବାସ ରହୁଥିଲି । ଟିଣ ଓ କାଚ ଗୋଟେଇ ପରିବାର ଚଳେଇବା ଆରମ୍ଭ କରିଥିଲି, ଯାହା ଏବେ ମଧ୍ୟ ଜାରି ରହିଛି । ବହୁତ କଷ୍ଟ ଭୋଗୁଛି, ଆଉ କେହି ନଭୋଗନ୍ତୁ । ଜୀବନରୁ ମିଳିଥିବା ଶିକ୍ଷାରୁ ବାଲ୍ୟ ବିବାହ ରୋକ ଦିଗରେ କାର୍ଯ୍ୟ ଆରମ୍ଭ କଲି । ପରିବାର ଲୋକଙ୍କୁ ବୁଝାସୁଝା କରିବା ସହ ଝିଅଙ୍କୁ ପାଠ ପଢେଇବା ଲାଗି ବ୍ୟବସ୍ଥା କରେ । ଜରି ଗୋଟାଳି ବୋଲି ସମସ୍ତଙ୍କ ନଜରରେ ଛୋଟ ହୋଇଥିଲେ ବି କାହାରି ଦୁଃଖ ଦେଖିଲେ ସହିପାରେନାହିଁ । ନିଶା ଯୋଗୁଁ କାହାରି ଜୀବନ ଚାଲି ନଯାଉ ଏଥିପାଇଁ ସବୁବେଳେ ଚେଷ୍ଟା କରେ ।’
ଓଡ଼ିଶାରେ ବାଲ୍ୟ ବିବାହ ହିସାବ ?
ସଭ୍ୟତା ସହ ତାଳ ଦେଇ ଆଗକୁ ବଢୁଛି ଦେଶ । ହେଲେ ଦାରିଦ୍ର୍ୟର ତାଡନା ହେଉ ଅବା ଦଲାଲଙ୍କ ଶିକାର ହୋଇ ବାଲ୍ୟ ବିବାହ କରାଉଛନ୍ତି ବାପା ମା’ । ଯେଉଁଥିରୁ ମୁକୁଳି ପାରିନି ଓଡ଼ିଶା । ଏବେବି ରାଜ୍ୟର ଅଧିକାଂଶ ଜିଲ୍ଲାରେ ବାଲ୍ୟ ବିବାହ ହେଉଥିବା ରିପୋର୍ଟ ହେଉଛି । ଗତ 5 ବର୍ଷର ବାଲ୍ୟ ବିବାହ ରିପୋର୍ଟ ଯଦି ଦେଖାଯାଏ ଏଥିରେ ସବୁଠୁ ଆଗରେ ରହିଛି ଆଦିବାସୀ ଅଧ୍ୟୁଷିତ ନବରଙ୍ଗପୁର ଜିଲ୍ଲା । ଆସନ୍ତୁ ନଜର ପକାଇବା ବିଗତ 5 ବର୍ଷରେ ଓଡ଼ିଶାରେ କେତେ ବାଲ୍ୟ ବିବାହ ରେକର୍ଡ କରାଯାଇଛି । ବିଧାନସଭାରେ ଉପ-ମୁଖ୍ୟମନ୍ତ୍ରୀ ତଥା ମହିଳା ଓ ଶିଶୁ ବିକାଶ ମନ୍ତ୍ରୀ ପ୍ରଭାତୀ ପରିଡା ଦେଇଥିବା ଉତ୍ତର ଅନୁସାରେ ୨୦୧୯ ମସିହାରୁ ଚଳିତ ବର୍ଷ ଫେବୃଆରୀ ମଧ୍ୟରେ ୮୧୫୯ଟି ବାଲ୍ୟ ବିବାହ ଘଟଣା ସରକାରଙ୍କ ଦୃଷ୍ଟିକୁ ଆସିଛି । ନବରଙ୍ଗପୁର ଜିଲ୍ଲାରେ ସର୍ବାଧିକ ଓ ଝାରସୁଗୁଡା ଜିଲ୍ଲାରେରେ ସର୍ବନିମ୍ନ ବାଲ୍ୟ ବିବାହ ଘଟଣା ହୋଇଛି ।
| 2019-2025(ଫେବୃଆରୀ ସୁଦ୍ଧା) ରିପୋର୍ଟ |
|---|
| ଜିଲ୍ଲା | ବାଲ୍ୟ ବିବାହ ସଂଖ୍ୟା |
| ଅନୁଗୋଳ | 271 |
| ବାଲେଶ୍ଵର | 361 |
| ବରଗଡ଼ | 208 |
| ଭଦ୍ରକ | 76 |
| ବଲାଙ୍ଗୀର | 180 |
| ବୌଦ୍ଧ | 142 |
| କଟକ | 154 |
| ଦେବଗଡ଼ | 154 |
| ଢେଙ୍କାନାଳ | 97 |
| ଜିଲ୍ଲା | ବାଲ୍ୟ ବିବାହ ସଂଖ୍ୟା |
| ଗଜପତି | 137 |
| ଜଗତସିଂହପୁର | 60 |
| ଯାଜପୁର | 112 |
| ଝାରସୁଗୁଡା | 57 |
| କଳାହାଣ୍ଡି | 65 |
| କନ୍ଧମାଳ | 308 |
| କେନ୍ଦ୍ରାପଡା | 92 |
| କେନ୍ଦୁଝର | 328 |
| ଖୋର୍ଦ୍ଧା | 110 |
| କୋରାପୁଟ | 636 |
| ମାଲକାନଗିରି | 157 |
| ମୟୂରଭଞ୍ଜ | 594 |
| ନବରଙ୍ଗପୁର | 1347 |
| ନୟାଗଡ | 308 |
| ନୂଆପଡା | 110 |
| ପୁରୀ | 163 |
| ରାୟଗଡ଼ା | 408 |
| ସମ୍ବଲପୁର | 62 |
| ସୋନପୁର | 243 |
| ସୁନ୍ଦରଗଡ | 253 |
ବାଲ୍ୟ ବିବାହ ରୋକିବାକୁ କଣ ରହିଛି ଆଇନ:
ବାଲ୍ୟ ବିବାହ ଏକ ସାମାଜିକ ସମସ୍ୟା ରୂପେ ଉଭା ହୋଇଛି । ବାଲ୍ୟ ବିବାହ ଦ୍ବାରା ଶିଶୁଙ୍କ ସବୁ ଅଧିକାର ଗୁଡିକରୁ ବଞ୍ଚିତ କରିଥାଏ । ବାଲ୍ୟ ବିବାହ ରୋକିବାକୁ 2006 ମସିହାରେ ଏକ ଆଇନ ପ୍ରଣିତ ହୋଇଥିଲା ଯାହା ବାଲ୍ୟବିବାହ ନିଷେଧ ଆଇନ 2006 ନାମରେ ପରିଚିତ।
ଏବେ ନଜର ପକାଇବା ଓଡ଼ିଶାରେ ନିଶାଜନିତ ମୃତ୍ୟୁ ଉପରେ...
ନିଶା ଯୋଗୁଁ ଅନେକ ଅକାଳରେ ପ୍ରାଣ ହରାଇଥାନ୍ତି । ଯାହା ଦେଶ ଓ ରାଜ୍ୟ ପାଇଁ ଉଭୟ ଚିନ୍ତାଜନକ । ଓଡ଼ିଶାରେ ମଦ ମୃତ୍ୟୁକୁ ନେଇ ଦେଖନ୍ତୁ ଏହି ରିପୋର୍ଟ...
ଓଡ଼ିଶାରେ ମଦ ମୃତ୍ୟୁ ମାମଲା:
2024ରେ ତତ୍କାଳୀନ ଅବକାରୀ ମନ୍ତ୍ରୀ ଅଶ୍ୱିନୀ ପାତ୍ର ବିଧାନସଭାରେ ଦେଇଥିବା ଉତ୍ତର ଅନୁସାରେ,
- 2010-2022 ମଧ୍ୟରେ ବିଷାକ୍ତ ମଦ ପିଇ 50 ଜଣଙ୍କ ମୃତ୍ୟୁ
- ନିର୍ବାଚନ ବେଳେ ମଦ ପିଇ ଭଦ୍ରକ 9 ଜଣଙ୍କ ମୃତ୍ୟୁ
- 2011-2019ରେ କଟକ ମଦ ମୃତ୍ୟୁରେ 41 ଜଣ ପ୍ରାଣ ହରାଇଛନ୍ତି
- ଚଳିତ ବର୍ଷ ଗଞ୍ଜାମ ଚିକିଟିରେ ବିଷାକ୍ତ ମଦ ପିଇ 5 ଜଣଙ୍କ ମୃତ୍ୟୁ
ଶିକ୍ଷାଠୁ ଦୂରେଇ ରହିଥିବା ପିଲାଙ୍କ ପାଇଁ କାମ କରୁଛନ୍ତି ହୀରା:
ସମାଜସେବୀ ରତ୍ନାକର ସାହୁ କହିଛନ୍ତି, ‘ହୀରା ବିବି ବସ୍ତିରେ ରହି ମଧ୍ୟ ହୀରା ପରି ଜାଜୁଲ୍ୟା ମାନ ବ୍ୟକ୍ତିତ୍ୱ । ଜରି ଗୋଟାଇ ନିଜର ଓ ପରିବାରର ପ୍ରତି ପୋଷଣ କରୁଛନ୍ତି । ୧୨ରୁ ୧୩ ବର୍ଷ ହେବ ମୁଁ ତାଙ୍କୁ ଜାଣିଛି । ଶିକ୍ଷାଠୁ ଦୂରେଇ ରହୁଥିବା ବସ୍ତି ଅଞ୍ଚଳର ପିଲା ଶିକ୍ଷାର ଅଲୋକ ସ୍ପର୍ଶ କରିବେ । ନିଶାରୁ ଦୂରେଇ ରହିବେ । ସେହିପରି ଅଞ୍ଚଳରେ ବାଲ୍ୟ ବିବାହ ମୁକ୍ତ ହେବ । ଏଭଳି ଘଟଣା ନଜରକୁ ଆସିଲେ, ସେ ଦୃଢତାର ସହ ହସ୍ତକ୍ଷେପ କରନ୍ତି । ସରକାରୀ ଅଧିକାରୀ ଓ ସାମାଜିକ ଅନୁଷ୍ଠାନର ଦୃଷ୍ଟି ଆକର୍ଷଣ କରନ୍ତି । ଏହି ପ୍ରୟାସ ସେ ନିରନ୍ତର ଭାବେ କରୁଛନ୍ତି । ତାଙ୍କ ପ୍ରୟାସକୁ ଯେତେ ପ୍ରଶଂସା କଲେ ମଧ୍ୟ କମ ହେବ ।’
ପେଟ ପୋଷିବା ପାଇଁ ସମାଜରେ ଲୋକେ କିଛି ନା କିଛି କାମ କରୁଛନ୍ତି । ହେଲେ ସେ ଜରି ଗୋଟାଇ ସମାଜକୁ ଦେଉଛନ୍ତି ସଚେତନାର ବାର୍ତ୍ତା । ବାଲ୍ୟ ବିବାହ ରୋକିବାରେ ତାଙ୍କ ସଚେତନା ଓ ନିଶାରୁ ଯୁବପିଢିଙ୍କୁ ରକ୍ଷା କରିବାକୁ କରୁଥିବା ସଚେତନ ନିହାତି ପ୍ରଶଂସନୀୟ ।
ଭୁବନେଶ୍ବରରୁ ଭବାନୀ ଶଙ୍କର ଦାସଙ୍କ ରିପୋର୍ଟ, ଇଟିଭି ଭାରତ
