Kalahandi Heatwave ଭବାନୀପାଟଣା (କଳାହାଣ୍ଡି): "କଷ୍ଟ ଲାଗୁଛି, ହେଲେ ପରିବାର ଅଛି, ଖରାରେ ଖଟିବାକୁ ପଡ଼ିବ । ଯଦି ଖରାରେ ନ ଖଟିବୁ, ଜୀବନରେ ସୁଖ ଶାନ୍ତି ପାଇବା ନାହିଁ । ତେଣୁ ବାଧ୍ୟ ହୋଇ ଖରାରେ ଖଟିବାକୁ ପଡୁଛି । ବଞ୍ଚିବାର ଅଛି ଆଜ୍ଞା । " ମୁଣ୍ଡ ଫଟା ଖରାରେ ରିକ୍ସା ଚଲାଉଥିବା ଜଣେ ୬୦ ବର୍ଷ ବୟସ୍କ ବ୍ୟକ୍ତିଙ୍କର ଏହା ହେଉଛି ପ୍ରତିକ୍ରିୟା । ଗ୍ରୀଷ୍ମ ପ୍ରବାହ ସାଙ୍ଗକୁ ମୁଣ୍ଡ ଫଟା ଖରା, ତା ଉପରେ ୪୦ ଡିଗ୍ରୀ ତାପମାତ୍ରା । ଟାଇଁ ଟାଇଁ ଖରା ବେଳେ ଜୀବନକୁ ବାଜି ଲଗାଇ, ଜୀବିକା ପାଇଁ ସଂଘର୍ଷ କରୁଛନ୍ତି ଗୋବିନ୍ଦ ।
ଗୋବିନ୍ଦ ବାଗ, ଘର କଳାହାଣ୍ଡି ଜିଲ୍ଲା ଭବାନୀପାଟଣା ବାହାଦୁର ବଗିଚା ପଡ଼ା । ତିନି ଝିଅ, ଗୋଟିଏ ପୁଅ ଏବଂ ଏବଂ ପତ୍ନୀ ଶୈଳଙ୍କୁ ନେଇ ତାଙ୍କ ପରିବାର । ହେଲେ ଘରେ ରୋଜଗାରିଆ କହିଲେ କେବଳ ଗୋବିନ୍ଦ । ଦିନ ସାରା ରିକ୍ସା ଚଲାଇ ଯେତିକି ରୋଜଗାର ହୁଏ, ସେଥିରେ କଷ୍ଟେମଷ୍ଟେ ଘର ଚଳେ । ବୋଝ ଉପରେ ନଳିତା ବିଡ଼ା ଭଳି, ଗୋବିନ୍ଦଙ୍କ ଉପରେ ଦାଉ ସାଜିଛି ଗ୍ରୀଷ୍ମ ପ୍ରବାହ । ପ୍ରବଳ ଖରା ଏବଂ ତାପମାତ୍ରା ବୃଦ୍ଧି ଯୋଗୁଁ ଲୋକେ ଘରୁ ବାହାରକୁ ପାଦ କାଢ଼ୁନଥିବା ବେଳେ, ରିକ୍ସା ଧରି ବାହାରିବାକୁ ପଡୁଛି ଗୋବିନ୍ଦଙ୍କୁ । କାହିଁକି ନା ଦିନେ ନଗଲେ ଘରେ ଜଳିବନି ଚୁଲି । ଉପାସ ରହିବେ ୬ ପ୍ରାଣୀ କୁଟୁମ୍ବ । ଦ୍ବି ପ୍ରହର ଝାଞ୍ଜି ଖରାରେ ରିକ୍ସା ଚଲାଉଥିବା ଗୋବିନ୍ଦଙ୍କ ସହ କଥା ହୋଇଥିଲେ ଇଟିଭି ପ୍ରତିନିଧି ଅଜିତ କୁମାର ସିଂ । ଆଉ ଜାଣିବାକୁ ପାଇଥିଲେ ଗୋବିନ୍ଦଙ୍କ ଜୀବନ ଓ ଜଞ୍ଜାଳର କାହାଣୀ । ....
ଦିନ ୧୦ରୁ ୧୧ଟା ଟପିଲେ ଅସମ୍ଭାଳ ସ୍ଥିତି । ପାରଦ ଉପର ମୁହାଁ, ବଢୁଛି ତାତି । ଘରୁ ବାହାରିବା ମୁସ୍କିଲ । ରାସ୍ତାଘାଟ ଶୂନଶାନ ହୋଇଯାଉଛି । ତଥାପି ଜୀବନ ବଞ୍ଚିବା ପାଇଁ ବାହାରକୁ ବାହାରିବାକୁ ବାଧ୍ୟ ହେଉଛନ୍ତି ଛୋଟ ବ୍ୟବସାୟୀ । ଠେଲାରେ କିଛି ଫଳ ଧରି ଗ୍ରାହକଙ୍କ ଅପେକ୍ଷାରେ ଗିରିଧାରୀ ନାଗ । ତାଙ୍କ କହିବା ହେଲା "କଣ କରିବୁ ଆଜ୍ଞା, ପରିସ୍ଥିତି ବହୁତ ଖରାପ । ଯଦି ଠେଲା ନ ଲଗାଇବୁ, ଘର ସଂସାର କେମିତି ଚଲାଇବୁ? ତାପମାତ୍ରା ବୃଦ୍ଧି ଯୋଗୁଁ ଦିନ ୧୧ଟା ପରେ ଲୋକ ଆସୁ ନାହାନ୍ତି । ପେଟ ପାଟଣା କଥା, ନ ବାହାରିଲେ ନହେବ ଆଜ୍ଞା । "
"ଖରା ତ ହେଉଛି, ଆଉ ଏଥିରେ କାମ କରିବାକୁ ପଡୁଛି । କାମ ନ କଲେ ଚଳିବୁ କେମିତି ? ମୋ ପରିବାରରେ ପାଞ୍ଚ ପ୍ରାଣୀ । ମୁଁ ଯଦି ରୋଜଗାର ନ କରିବି, ତେବେ ସେମାନେ ଖାଇବେ କଣ ? ତେଣୁ ଖରାରେ କାମ କରିବାକୁ ପଡୁଛି ।" ଖରାବେଳେ ଟ୍ରଲି ଚଲାଉଥିବା ସିଂରାଜ ସତ୍ନାମୀଙ୍କ ପ୍ରତିକ୍ରିୟା ଥିଲା ଏମିତି । ...
ମହିଳା ପରିବା ଦୋକାନୀ ଅମ୍ବିକା ନାଏକ କୁହନ୍ତି "ଯେତେ ଖରା ହେଲେ ମଧ୍ୟ ପରିବା ବିକ୍ରି କରିବାକୁ ପଡୁଛି । କାରଣ ପରିବା ବିକିଲେ ହିଁ ପରିବାର ଚଳାଇବୁ । ନ ହେଲେ ଭୋକରେ ରହିବାକୁ ପଡ଼ିବ । ଯେତେ ଖରା ହେଲେ ମଧ୍ୟ ବ୍ୟବସାୟ କରିବାକୁ ପଡୁଛି ।"
ଗୋବିନ୍ଦ ବାଗ, ଗିରିଧାରୀ ନାଗ, ସିଂରାଜ ସତ୍ନାମୀ ଏବଂ ଅମ୍ବିକା ନାଏକ । ଏହି ୪ ଜଣଙ୍କ ଜୀବନ-ଜଞ୍ଜାଳ କାହାଣୀ ଉଦାହରଣ ମାତ୍ର । ଏମାନଙ୍କ ଭଳି ଅନେକ ଅଛନ୍ତି, ଯେଉଁମାନଙ୍କ ପ୍ରତିଦିନର ରୋଜଗାର ଉପରେ ନିର୍ଭର କରେ ପୂରା ପରିବାର ।
Kalahandi Temperature Today:
କଳାହାଣ୍ଡି ଜିଲ୍ଲାର ସଦର ମହକୁମା ଭବାନୀପାଟଣାରେ ପ୍ରଚଣ୍ଡ ଗ୍ରୀଷ୍ମ ପ୍ରବାହ । ଆକାଶରୁ ଯେମିତି ଝରୁଛି ନିଆଁ ଝୁଲ । ଦିନ ତ ଦିନ ସକାଳୁ ଦ୍ୱିପ୍ରହର ଯାଏଁ ବାହାରକୁ ବାହାରିଲେ ମୁଣ୍ଡ ଝାଇଁ ଝାଇଁ କରି ଦେଉଛି । ଦିନରେ ଘରୁ ନବାହାରିବାକୁ ଚେତାଇ ଦେଇଛି ପାଣିପାଗ ବିଭାଗ । କିନ୍ତୁ ଘରୁ ବାହାରକୁ ପାଦ ନକାଢ଼ିଲେ ପରିବାର ରହିବେ ଭୋକ ଉପାସରେ । ପେଟର ଜ୍ବାଳା ଆଗରେ ଏ ଖରା ତାତି ଯେମିତି ପଛରେ ପଡ଼ିଯାଇଛି । ତାପମାତ୍ରା ୪୦ ଡିଗ୍ରୀ ହେଉ କିମ୍ବା ତାଠାରୁ ଅଧିକ । ଖରାକୁ ଖାତିର ନକରି କିଏ ରିକ୍ସା ଟାଣୁଛନ୍ତି ତ ଆଉ କିଏ ରାସ୍ତା କଡ଼ରେ ପରିବା ଦୋକନ କିମ୍ବା ଠେଲା ଲଗାଇଛନ୍ତି । ଯେମିତି ଭୋକ ଆଉ ପାଉଣା ପାଇଁ ଖରା ସହ କରିବାକୁ ପଡ଼ୁଛି ଅହ ରହ ସଂଘର୍ଷ ।
Kalahandi Heatwave:
କଳାହାଣ୍ଡି ଜିଲ୍ଲାରେ ଗ୍ରୀଷ୍ମଋତୁରେ ତାପମାତ୍ରା ଅଧିକ ରୁହେ । ବର୍ତ୍ତମାନ ଏପ୍ରିଲ ମାସ ଚାଲିଥିବା ବେଳେ, ଦିନକୁ ଦିନ ବଢ଼ିବାରେ ଲାଗିଛି ପାରଦ । ଆମେ ଯଦି ଗତ ତିନି ବର୍ଷରେ ତାପମାତ୍ରା ଗ୍ରାଫ ଦେଖିବା, ତେବେ ୨୦୨୨ ମସିହାରେ ସର୍ବୋଚ୍ଚ ତାପମାତ୍ରା ୪୨ ଡିଗ୍ରୀ ରେକର୍ଡ କରାଯାଇଥିଲା । ସେହିପରି ୨୦୨୩ ମସିହାରେ ୪୪ ଡିଗ୍ରୀ ସର୍ବୋଚ୍ଚ ତାପମାତ୍ରା ରହିଥିବା ବେଳେ, ୨୦୨୪ ମସିହାରେ ସର୍ବାଧିକ ୪୬ ଡିଗ୍ରୀ ଥିଲା । ୨୦୨୫ ମସିହା ମାର୍ଚ୍ଚ ମାସ ସୁଦ୍ଧା କଳାହାଣ୍ଡି ଜିଲ୍ଲାରେ ତାପମାତ୍ରା ୩୭.୮ ଡିଗ୍ରୀ ରହିଥିବା ଜିଲ୍ଲା ପାଣିପାଗ ବିଭାଗ ସୂଚନା ଦେଇଛି।
କଳାହାଣ୍ଡି: କେଉଁ ବର୍ଷ କେତେ ତାପମାତ୍ରା ?
୨୦୨୨- ସର୍ବୋଚ୍ଚ ତାପମାତ୍ରା ୪୨ ଡିଗ୍ରୀ
୨୦୨୩-ସର୍ବୋଚ୍ଚ ତାପମାତ୍ରା ୪୪ ଡିଗ୍ରୀ
୨୦୨୪- ସର୍ବୋଚ୍ଚ ତାପମାତ୍ରା ୪୬ ଡିଗ୍ରୀ
୨୦୨୫- ମାର୍ଚ୍ଚ ମାସ ସୁଦ୍ଧା ୩୭.୮ ଡିଗ୍ରୀ
ଦୈନିକ ରୋଜଗାର ଉପରେ ନିର୍ଭର କରୁଥିବା ଲୋକଙ୍କୁ ବାଦ ଦେଲେ ସାଧାରଣ ଲୋକଙ୍କୁ ମଧ୍ୟ ତାତିରୁ ମିଳୁନି ତ୍ରାହି । ଗୁରୁତ୍ବପୂର୍ଣ୍ଣ କାମରେ ବାହାରକୁ ଯିବାକୁ ପଡୁଥିବା ବେଳେ, ବହୁତ କଷ୍ଟ ହେଉଛି । ଭବାନୀପାଟଣା ବାସିନ୍ଦା ବାପି ସାହୁଙ୍କ କହିବା କଥା , "ବର୍ତ୍ତମାନ ବହୁତ ଖରା ହେଉଛି, ଆଉ ଏହି ଖରା ଗରିବ ଖଟିଖିଆଙ୍କୁ ବହୁତ କଷ୍ଟ ଦେଉଛି । ରିକ୍ସାବାଲା ହୁଅନ୍ତୁ କି ପରିବା ବ୍ୟବସାୟୀ ଅବା ଶ୍ରମିକ, କାହା ଘରେ ଫ୍ୟାନ ଅଛି ତ ଆଉ କାହା ଘରେ ନାହିଁ, ଯାହା ଭାରି କଷ୍ଟ ଦାୟକ, ପ୍ରବଳ ଖରାରେ ସାଧାରଣ ଲୋକ କଷ୍ଟ ପାଉଛନ୍ତି "।
ଗ୍ରୀଷ୍ଣ ଋତୁରେ କଳାହାଣ୍ଡିରେ ହୁଏ ପ୍ରବଳ ଖରା । ଏହାକୁ ନେଇ ଶିବ ସାହୁଙ୍କ ପ୍ରତିକ୍ରିୟା "କଳାହାଣ୍ଡିରେ ଖରା କିଭଳି ହୁଏ ତାହା ଓଡ଼ିଶାର ଲୋକେ ଜାଣିଛନ୍ତି । ଆଉ ଏହି ଖରାରେ କିଏ ଯଦି ଅଧିକ କଷ୍ଟ ପାଉଛି ତାହା ହେଲେ ଆମେ କହିବୁ ଖଟିଖିଆ ମଣିଷ, କାରଣ ପିଲାଙ୍କ ପାଇଁ ସକାଳୁଆ ସ୍କୁଲ ହୁଏ କିମ୍ବା ଖରା ଛୁଟି ହୁଏ । ଅଫିସ ମଧ୍ୟ ସକାଳୁଆ ହୁଏ । ହେଲେ ଯେଉଁମାନେ ରୋଜଗାର କଲେ ପରିବାର ଚଳେ ସେମାନେ ସରକାରଙ୍କ ଗ୍ରୀଷ୍ମ କାଳୀନ ନିୟମକୁ ମାନି ଚଳିବା ମୁସ୍କିଲ ହୋଇପଡ଼େ । ତେଣୁ ସରକାର ଏବଂ ପ୍ରଶାସନ ଏଥିପ୍ରତି ଦୃଷ୍ଟି ଦେବା ଜରୁରୀ । "
Heat Related Illnesses:
ଏପଟେ ଗ୍ରୀଷ୍ମ ପ୍ରବାହର ମୁକାବିଲା ପାଇଁ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ସ୍ବତନ୍ତ୍ର ରିଲିଫ କମିଶନର (SRC)ଙ୍କ ଗାଇଡଲାଇନ ଅନୁସାରେ ପ୍ରଶାସନ ଏବଂ ପୌର ପରିଷଦ ପକ୍ଷରୁ ପଦକ୍ଷେପ ଗ୍ରହଣ କରାଯାଇଛି । ଭବାନୀପାଟଣା ପୌର ପରିଷଦ ଅଧିକାରୀ ଚିନ୍ମୟ ନାୟକ କହିଛନ୍ତି ଯେ, "ଏସଆରସିଙ୍କ ନିର୍ଦ୍ଦେଶନାମା ଅନୁଯାୟ ୨୪ ଘଣ୍ଟିଆ ହେଲ୍ପ ଡେକ୍ସ ଖୋଲା ଯାଇଛି । ଏହା ସହିତ ସହରରେ ଥିବା ୧୨ ଅମୃତ ଧାରାର ମରାମତି ମଧ୍ୟ କରାଯାଇଛି । ୧୫ଟି ସ୍ଥାନରେ ଜଳ ଛତ୍ର ଖୋଲାଯିବ । ଯଦି ଦରକାର ପଡେ ତେବେ ଆହୁରି ଅଧିକ ମଧ୍ୟ ଖୋଲିବା ବ୍ୟବସ୍ଥା କରାଯିବ । ଏହାସହିତ ପଶୁପକ୍ଷୀମାନଙ୍କ ସୁବିଧା ପାଇଁ ମଧ୍ୟ ୩୦ଟି ସ୍ଥାନରେ ଜଳକୁଣ୍ଡ ବ୍ୟବସ୍ଥା କରାଯାଉଛି । "
ଦେଶରେ ରେକର୍ଡ ଭାଙ୍ଗୁଛି ବୌଦ୍ଧ ତାତି, ଜାଣନ୍ତୁ ଏହା ପଛର କାରଣ - HOTTEST PLACE BOUDHଟ୍ରାଫିକ ପୋଷ୍ଟରେ BMC ଗ୍ରୀନ୍ ସେଡ୍, ମୁଣ୍ଡ ଫଟା ଖରାରୁ ମିଳିବ ତ୍ରାହି - BMC TRAFFIC SHEDS |
କଳାହାଣ୍ଡି ଭବାନୀପାଟଣାରୁ ଅଜିତ କୁମାର ସିଂ ଇଟିଭି ଭାରତ
