Odisha E-Blood Bank Data ଭୁବନେଶ୍ବର: ‘ରକ୍ତଦାନ ମହତ ଦାନ’ । ତୁମର ଟୋପାଏ ରକ୍ତ ବିନ୍ଦୁ ବଞ୍ଚାଇପାରେ ଅନ୍ୟ ଜଣଙ୍କ ଜୀବନ । ଗୋଟିଏ ପରିବାରରେ ହସର କାରଣ ବୁନ୍ଦାଏ ରକ୍ତ ହୋଇଥାଏ । ହେଲେ ଖରା ଦିନ ଆସିଲେ ସାଧାରଣ ଭାବରେ ରକ୍ତର ଅଭାବ ଦେଖିବାକୁ ମିଳିଥାଏ । ରାଜ୍ୟର ଅନେକ ରକ୍ତ ଭଣ୍ଡାରରେ ରକ୍ତର ଅଭାବ ଦେଖିବାକୁ ମିଳେ । ସାଧାରଣ ଲୋକଙ୍କ ରକ୍ତ ତ ଦୂରର କଥା ବିଶେଷ ଭାବରେ ଥାଲାସେମିଆ ଓ ସିକିଲସେଲ ଆନିମିଆରେ ପୀଡ଼ିତ ଥିବା ରୋଗୀଙ୍କର ରକ୍ତ ଅତ୍ୟନ୍ତ ଆବଶ୍ୟକ ପଡ଼ିଥାଏ । ଏପଟେ ଠିକ ସମୟରେ ରକ୍ତ ଭଣ୍ଡାରର ତଥ୍ୟ ଦିଆଯାଉ ନାହିଁ । ଅପଡେଟ ହେଉନାହିଁ ଇ-ବ୍ଲଡ଼ ପୋର୍ଟାଲ । ସମସ୍ୟାରେ ପଡୁଛନ୍ତି ରୋଗୀ ।
ରକ୍ତଦାନ କରିବାକୁ ଆହ୍ଵାନ:
ଠିକ ସମୟରେ ରକ୍ତ ଭଣ୍ଡାରର ତଥ୍ୟ ଦିଆଯାଉ ନାହିଁ । ଯାହା ଫଳରେ ଅନେକ ରୋଗୀ ଅସୁବିଧାର ସମ୍ମୁଖୀନ ହେଉଛନ୍ତି । କଟକ ଭୁବନେଶ୍ବରରେ ଅଧିକ ମାତ୍ରାରେ ରକ୍ତର ଆବଶ୍ୟକତା ରହିଥିବା ବେଳେ ଯଦି ଏଭଳି ରକ୍ତର ଅଭାବ ରୁହେ ତେବେ ସୁପର ସ୍ପେଶାଲିଷ୍ଟ ପାଇଁ ପଡିପାରେ ରକ୍ତର ସାଂଘାତିକ ଅଭାବ । ତେଣୁ କରି ସଚେତନତା ଆବଶ୍ୟକ ରହିଥିବା ବେଳେ ସମସ୍ତେ ସ୍ଵେଚ୍ଛାକୃତ ଭାବରେ ଆସି ରକ୍ତ ଦାନ କରିବାକୁ ଆହ୍ଵାନ ଦେଇଛି ରାଜ୍ୟ ରକ୍ତ ନିରାପତ୍ତା କାର୍ଯ୍ୟାଳୟ ।
ଦୁଇଟି ରହିଛି ପୋର୍ଟାଲ (Blood bank Portal name ):
- ଇ-ବ୍ଲଡ଼ ବ୍ୟାଙ୍କ (ରାଜ୍ୟ ସରକାରଙ୍କ)
- ଇ-ରକ୍ତ କୋଷ (କେନ୍ଦ୍ର ସରକାରଙ୍କ)
ସୁପର ସ୍ପେଶାଲିଷ୍ଟ ପାଇଁ ପଡିପାରେ ରକ୍ତର ଅଭାବ:
ବିଶେଷ ଭାବରେ ରାଜ୍ୟରେ ସ୍ୱାସ୍ଥ୍ୟ କ୍ଷେତ୍ରରେ ଅଗ୍ରଗତି କରିବାରେ ଲାଗିଛି । ଅତ୍ୟାଧୁନିକ ସେବା ଯୋଗାଇ ଦେଉଛି ସ୍ୱାସ୍ଥ୍ୟ ବିଭାଗ । ହେଲେ କଟକ ଭୁବନେଶ୍ବରରେ ସମସ୍ତ ବଡ ହସ୍ପିଟାଲ ରହିଥିବାରୁ ଅଧାରୁ ଅଧିକ ମାତ୍ରାରେ ରକ୍ତ ଏହି ଦୁଇଟି ସହରକୁ ଆବଶ୍ୟକ ପଡୁଛି । ତେବେ ଆଗାମୀ ଦିନରେ ଅନେକ ସରକାରୀ ହସ୍ପିଟାଲରେ ସୁପର ସ୍ପେଶାଲିଷ୍ଟ ଚିକିତ୍ସା ଆରମ୍ଭ ହେବାକୁ ଯାଉଛି ଓ ଅନେକ ହସ୍ପିଟାଲରେ ମଧ୍ୟ ଆରମ୍ଭ ହୋଇଗଲନି । ତେବେ ଏନେଇ ମଧ୍ୟ ରକ୍ତର ଅଧିକ ମାତ୍ରାରେ ଆବଶ୍ୟକତା ରହିଛି । ବିଶେଷ ଭାବରେ ଖରା ଦିନରେ ବିଶେଷ ଭାବରେ ରକ୍ତର ଅଭାବ ଦେଖାଯାଇପାରେ’ ବୋଲି କହିଛନ୍ତି ରାଜ୍ୟ ରକ୍ତ ନିରାପତ୍ତା ସୁରକ୍ଷା ନିର୍ଦ୍ଦେଶକ ପ୍ରଦୀପ କୁମାର ପାତ୍ର ।
କାହିଁକି ଖରା ଦିନରେ କମୁଛି ରକ୍ତ ସଂଗ୍ରହ ?
"ବିଶେଷ ଭାବରେ ଖରା ଦିନରେ ଅନେକ ଲୋକମାନେ କାମ କରିଥାନ୍ତି । ଆଉ ଥକି ପଡିଥାନ୍ତି । ଏହା ସହିତ ଅନେକ ସମସ୍ୟା ରହିଛି ଯାହା ଫଳରେ ରକ୍ତ ସଂଗ୍ରହ କମିଯାଉଛି । ଲୋକମାନେ ଖରା ଦିନରେ ଇଚ୍ଛା ପ୍ରକାଶ କରିନଥାନ୍ତି । ଯାହା ଫଳରେ ରାଜ୍ୟରେ ଅନେକ ରକ୍ତ ଭଣ୍ଡାରରେ ରକ୍ତ କମିବା ଦେଖାଯାଇଥାଏ" ବୋଲି କହିଛନ୍ତି ରକ୍ତ ନିରାପତ୍ତା ସୁରକ୍ଷା ନିର୍ଦ୍ଦେଶକ ପ୍ରଦୀପ କୁମାର ପାତ୍ର ।
କେଉଁ ଜିଲ୍ଲାରେ ଅଧିକ ରକ୍ତ ଅଭାବ ?
"କଟକ, ଭୁବନେଶ୍ଵର, ବାରିପଦା, ସମ୍ବଲପୁରରେ ଅଧିକ ମାତ୍ରାରେ ରକ୍ତର ଚାହିଦା ଅଧିକ ରହିଥାଏ । ଏପରିକି ସିକିଲ ସେଲ ପାଇଁ ମଧ୍ୟ ସମ୍ବଲପୁର, ଝାରସୁଗୁଡା, ଗଜପତି ଅନୁଗୋଳ ଆଦି ଜିଲ୍ଲା ଗୁଡିକରେ ମଧ୍ୟ ରକ୍ତର ଅଧିକ ଆବଶ୍ୟକତା ରହିଛି । ଏପରିକି ଏସସିବିରେ ବିଭିନ୍ନ ଅପରେସନ କରାଗଲାଣି । ଯାହା ଫଳରେ ରକ୍ତର ମଧ୍ୟ ବ୍ୟବହାର ବଢିଯାଉଛି । ଅନ୍ୟପଟେ ଦୁର୍ଘଟଣା ହେଉ କୌଣସି ଜରୁରୀକାଳିନ ସେବା ମାଧ୍ୟମରେ ମଧ୍ୟ ରକ୍ତର ବ୍ୟବହାର ବୃଦ୍ଧି ପାଉଛି । ଏହାସହ ବିଶେଷ ଭାବରେ ଆଦିବାସୀ ବହୁଳ ଅଞ୍ଚଳରେ ବିଶେଷ କରି ରକ୍ତ ଅଭାବ ଦେଖାଯାଇଥାଏ" ବୋଲି କହିଛନ୍ତି ରକ୍ତ ନିରାପତ୍ତା ସୁରକ୍ଷା ନିର୍ଦ୍ଦେଶକ ପ୍ରଦୀପ କୁମାର ପାତ୍ର ।
ରକ୍ତଦାନ ପାଇଁ ସ୍ବେଚ୍ଛାକୃତ ଭାବରେ ଆଗେଇ ଆସନ୍ତୁ:
"ରକ୍ତଦାନ ପାଇଁ ଆଗେଇ ଆସନ୍ତୁ। ଯେତେବେଳେ ରକ୍ତ ଆବଶ୍ୟକ ପଡେ ସେତେବେଳେ ଦେବାକୁ ପଡିଥାଏ । ତେଣୁ ପ୍ରତି ଜିଲ୍ଲାପାଳଙ୍କୁ ଏନେଇ ସଚେତନତା କରାଯାଇଛି । ରକ୍ତ ବ୍ୟାଙ୍କ ସହିତ ପ୍ରତି ମାସରେ ଏକ ବୈଠକ କରାଯାଉଛି । ଜିଲ୍ଲା ପରିଷଦ ସହିତ ବୈଠକ କରାଯାଉଛି । ଲୋକଙ୍କୁ ସଚେତନତା କରିବାକୁ ପଡିବ । କୌଣସି ସମୟରେ ରକ୍ତ ଦାନ କଲେ ରକ୍ତଦାତାଙ୍କର ଦେହ ଖରାପ ହେବ ନାହିଁ କି କୌଣସି ସମସ୍ୟା ହେବ ନାହିଁ" ବୋଲି କହିଛନ୍ତି ରାଜ୍ୟ ରକ୍ତ ସୁରକ୍ଷା ନିର୍ଦ୍ଦେଶକ ପ୍ରଦୀପ କୁମାର ପାତ୍ର।
ଖରା ଦିନରେ କ'ଣ ଚ୍ୟାଲେଞ୍ଜ:
ବିଶେଷ କରି ପ୍ରତିବର୍ଷ ଖରାଦିନ ଆସିଲେ ଅନେକ ସ୍ଥାନରେ ରକ୍ତର ଅଭାବ ଦେଖାଯାଇଥାଏ । ଖରା ଦିନରେ ଲୋକମାନେ ରକ୍ତ ଦାନ କରିବାକୁ ଆସନ୍ତି ନାହିଁ । ରକ୍ତଦାନ କରୁଥିବା ବଡ ବର୍ଗ ସ୍କୁଲ ଓ କଲେଜ ପିଲାଙ୍କ ଶିକ୍ଷାନୁଷ୍ଠାନ ବିଶେଷ ଭାବରେ ବନ୍ଦ ରହିଥାଏ । ସେଥିପାଇଁ ଜାନୁଆରୀ ଓ ଫେବୃଆରୀ ମାସରେ ଅଧିକ ରକ୍ତ ସଂଗ୍ରହ କରିବାକୁ ଚେଷ୍ଟା କରାଯାଏ । ହେଲେ ସେହି ସମୟ ମଧ୍ୟରେ ରକ୍ତ ସଂଗ୍ରହରେ ବାଧା ଉପୁଜିଥାଏ । ଏପଟେ ବିନା ଏକ୍ସଚେଞ୍ଜରେ ରକ୍ତ ଦେବାକୁ ଚେଷ୍ଟା କରାଯାଉଛି । ଖରାଦିନରେ ଲୋକମାନଙ୍କୁ ଅନୁରୋଧ କି ସ୍ବ ଇଚ୍ଛାରେ ହସ୍ପିଟାଲ ଆସି ରକ୍ତଦାନ କରନ୍ତୁ । ଯାହା ଫଳରେ ଖରା ଦିନରେ ରକ୍ତ ଅଭାବ ରହିବ ନାହିଁ । ରାଜ୍ୟରେ ବର୍ଷକୁ ୪ ଲକ୍ଷରୁ ଅଧିକ ୟୁନିଟ ରକ୍ତ ଆବଶ୍ୟକ।
ଗତ ୫ ବର୍ଷର ତଥ୍ୟ:
- ୨୦୧୯ ମସିହାରେ ମୋଟ ରକ୍ତ ସଂଗ୍ରହ କରାଯାଇଥିଲା ୪ ଲକ୍ଷ ୨୯ ହଜାର ୮୨୩ ୟୁନିଟ । ମୋଟ କ୍ୟାମ୍ପ ୩୮୦୪ ହୋଇଥିବାବେଳେ କ୍ୟାମ୍ପରୁ ସଂଗ୍ରହ ହୋଇଥିଲା ୨ ଲକ୍ଷ ୧୪ ହଜାର ୧୮୮ ୟୁନିଟ ରକ୍ତ।
- ୨୦୨୦ ମସିହାରେ ମୋଟ ରକ୍ତ ସଂଗ୍ରହ କରାଯାଇଥିଲା ୩ ଲକ୍ଷ ୮୨ ହଜାର ୧୨୨ ୟୁନିଟ । ତେବେ ମୋଟ କ୍ୟାମ୍ପ ୪୭୭୧ ହୋଇଥିବାବେଳେ କ୍ୟାମ୍ପରୁ ସଂଗ୍ରହ ହୋଇଥିଲା ୨ ଲକ୍ଷ ୧୯ ହଜାର ୪୮ ୟୁନିଟ ରକ୍ତ।
- ୨୦୨୧ ମସିହାରେ ମୋଟ ରକ୍ତ ସଂଗ୍ରହ କରାଯାଇଥିଲା ୪ ଲକ୍ଷ ୩୦ ହଜାର ୧୫୩ ୟୁନିଟ । ତେବେ ମୋଟ କ୍ୟାମ୍ପ ୪୯୪୨ ହୋଇଥିବାବେଳେ କ୍ୟାମ୍ପରୁ ସଂଗ୍ରହ ହୋଇଥିଲା ୨ ଲକ୍ଷ ୬୦ ହଜାର ୫୮୧ ୟୁନିଟ ରକ୍ତ।
- ୨୦୨୨ ମସିହାରେ ମୋଟ ରକ୍ତ ସଂଗ୍ରହ ହୋଇଥିଲା ୪ ଲକ୍ଷ ୯୮ ହଜାର ୪୮୨ ୟୁନିଟ । ଏବେ ରକ୍ତ ଦାନ କ୍ୟାମ୍ପ ହୋଇଥିଲା ୪୫୯୬ ହୋଇଥିବା ବେଳେ ସେଥିମଧ୍ୟରୁ ସଂଗ୍ରହ ହୋଇଥିଲା ୨ ଲକ୍ଷ ୭୬ ହଜାର ୧୪୭ ୟୁନିଟ ରକ୍ତ ।
- ୨୦୨୩ ମସିହାରେ ରକ୍ତ ସଂଗ୍ରହ ହୋଇଥିଲା ୫ ଲକ୍ଷ ୩୯ ହଜାର ୩୮୮ ୟୁନିଟ । ତେବେ ଏହି ରକ୍ତଦାନ କ୍ୟାମ୍ପ ହୋଇଥିଲା ୪୮୨୧ ହୋଇଥିବା ବେଳେ ସେଥିମଧ୍ୟରୁ ସଂଗ୍ରହ ହୋଇଥିଲା ୩ ଲକ୍ଷ ୧୨ ହଜାର ୨୮୯ ୟୁନିଟ ରକ୍ତ।
- ୨୦୨୪ ମସିହାରେ ରକ୍ତ ସଂଗ୍ରହ ହୋଇଥିଲା ୫ ଲକ୍ଷ ୬୦ ହଜାର ୪୨୦ ୟୁନିଟ । ତେବେ ଏହି ରକ୍ତଦାନ କ୍ୟାମ୍ପ ହୋଇଥିଲା ୪୮୨୧ ହୋଇଥିବା ବେଳେ ସେଥିମଧ୍ୟରୁ ସଂଗ୍ରହ ହୋଇଥିଲା ୨ ଲକ୍ଷ ୪୧ ହଜାର ୯୬୧ ୟୁନିଟ ରକ୍ତ ।
ରାଜ୍ୟର ମୁଖ୍ୟ ହସ୍ପିଟାଲରେ ରକ୍ତର ସ୍ଥିତି:
- ଭୁବନେଶ୍ୱର ସ୍ଥିତ କ୍ୟାପିଟାଲ ହସ୍ପିଟାଲର ୨୦୨୪ ମସିହାରେ ମୋଟ ଆକାରରେ ରକ୍ତ ସଂଗ୍ରହ କରାଯାଇଛି ୧୭୧୬୭
- କଟକ ଏସସିବି ମେଡିକଲରେ ୨୦୨୪ ମସିହାରେ ମୋଟ ଆକାରରେ ରକ୍ତ ସଂଗ୍ରହ କରାଯାଇଛି ୪୦୦୩୨
- ବୁର୍ଲା ମେଡିକାଲ କଲେଜରେ ୨୦୨୪ ମସିହାରେ ମୋଟ ଆକାରରେ ରକ୍ତ ସଂଗ୍ରହ କରାଯାଇଛି ୨୭୩୭୭
- ବ୍ରହ୍ମପୁର ଏମକେସିଜି ମେଡିକାଲ କଲେଜରେ ୨୦୨୪ ମସିହାରେ ମୋଟ ଆକାରରେ ରକ୍ତ ସଂଗ୍ରହ କରାଯାଇଛି ୩୭୭୪୦
- ରେଡକ୍ରସ ଦ୍ଵାରା ୨୦୨୪ ମସିହାରେ ମୋଟ ଆକାରରେ ରକ୍ତ ସଂଗ୍ରହ କରାଯାଇଛି ୧୮୭୧୦ ୟୁନିଟ ରକ୍ତ
ରାଜ୍ୟରେ କେତେ ରକ୍ତ ଭଣ୍ଡାର ରହିଛି:
ରାଜ୍ୟରେ ବର୍ତ୍ତମାନ ସୁଧା ୮୪ଟି ରକ୍ତ ଭଣ୍ଡାର ରହିଥିବାବେଳେ ସରକାରୀ ରକ୍ତ ଭଣ୍ଡାର ୫୫, ବେସରକାରୀ ରକ୍ତ ଭଣ୍ଡାର ୧୦ଟି ରହିଛି । ସେହିପରି ଭାବରେ ରେଡ କ୍ରସର ୪ଟି ରକ୍ତ ଭଣ୍ଡାର ରହିଥିବାବେଳେ ପିଏସୟୁରେ ୧୫ଟି ରକ୍ତ ଭଣ୍ଡାର ରହିଛି ।
କ୍ୟାପିଟାଲ ହସ୍ପିଟାଲର ରକ୍ତ ଭଣ୍ଡାରର ନିର୍ଦ୍ଦେଶକ ଦେବାଶିଷ ମିଶ୍ର କହିଛନ୍ତି, ‘ରକ୍ତ ଭଣ୍ଡାରରେ ରକ୍ତର ଅଭାବ ଦେଖାଯାଇଛି । ବିଶେଷ ଭାବରେ ଡୋନର ଆଦି ରକ୍ତ ପାଇଁ ଆଗ୍ରାହ୍ୟ ପ୍ରକାଶ କରିନଥାନ୍ତି । ଯେଉଁଥି ପାଇଁ ରକ୍ତର ଅଭାବ ରହିଥାଏ । ପ୍ରତି ବର୍ଷ ଏହି ସମୟରେ ଡ଼ାକ୍ତର ଅଭାବ ଦେଖାଯାଏ । ମାସକୁ ୧୫ ରୁ ୨୦ ଟି କ୍ୟାମ୍ପ କରାଯାଉଛି । ପୂର୍ବରୁ ଏହା ୨୫ ରୁ ୩୦ଟି ରକ୍ତ କ୍ୟାମ୍ପ କରାଯାଉଥିଲା ।’
ଇଟିଭି ଭାରତ, ଭୁବନେଶ୍ବର
