NCERTରୁ ପାଇକ ବିଦ୍ରୋହ ବାଦ୍ ପ୍ରସଙ୍ଗ: ନବୀନଙ୍କ ଟୁଇଟ ନେଇ ଝଡ଼, କର୍ତ୍ତୃପକ୍ଷଙ୍କ ସ୍ପଷ୍ଟୀକରଣ

ଭୁବନେଶ୍ବର: ଜାତୀୟ ଶିକ୍ଷା ଗବେଷଣା ଏବଂ ପ୍ରଶିକ୍ଷଣ ପରିଷଦ (NCERT)ର ନୂତନ ଅଷ୍ଟମ ଶ୍ରେଣୀ ସାମାଜିକ ପାଠ୍ୟପୁସ୍ତକରୁ ଓଡ଼ିଶାର ଐତିହାସିକ ପାଇକ ବିଦ୍ରୋହ ଅଧ୍ୟାୟ ଉଚ୍ଛେଦ ନେଇ ହେଉଥିବା ଅଭିଯୋଗକୁ ଆଜି ପରିଷଦ ପକ୍ଷରୁ ପ୍ରେସ୍ ବିଜ୍ଞପ୍ତି ମାଧ୍ୟମରେ ଖଣ୍ଡନ କରାଯାଇଛି । NCERT ପାଠ୍ୟପୁସ୍ତକକୁ ନେଇ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଟ୍ବିଟ ପରେ ରାଜନୀତି ସରଗରମ ହୋଇଛି ।

NCERT ସ୍ପଷ୍ଟୀକରଣ:

NCERT ପକ୍ଷରୁ କୁହାଯାଇଛି ଯେ, ପ୍ରଥମ ପର୍ଯ୍ୟାୟରେ ଏନ୍‌.ସି.ଇ.ଆର୍‌.ଟି ଅଷ୍ଟମ ଶ୍ରେଣୀର ସାମାଜିକ ବିଜ୍ଞାନ ପାଠ୍ୟପୁସ୍ତକ ପ୍ରଥମ ଖଣ୍ଡ ‘ଏକ୍ସପ୍ଲୋରିଂ ସୋସାଇଟି: ଇଣ୍ଡିଆ ଆଣ୍ଡ ବିୟଣ୍ଡ’ରେ ଦି କଲୋନିଆଲ୍ ଏରା ଇନ୍ ଇଣ୍ଡିଆ ଚାପ୍ଟରରେ ଓଡ଼ିଶା ପାଇକ ବିଦ୍ରୋହ ବାଦ୍ ପଡ଼ିଥିବା ନେଇ ଚର୍ଚ୍ଚା ହୋଇଥିଲା । ଦ୍ୱିତୀୟ ଖଣ୍ଡରେ ଆଞ୍ଚଳିକ ଜନ ଆନ୍ଦୋଳନ ଓ ସଶସ୍ତ୍ର ବିଦ୍ରୋହ ସଂପର୍କିତ ବିଷୟ ସ୍ଥାନିତ ହେବ । ଏହି ପାଠ୍ୟପୁସ୍ତକର ଦ୍ୱିତୀୟ ଖଣ୍ଡ ଏବେ ଚୂଡ଼ାନ୍ତ ପର୍ଯ୍ୟାୟରେ ରହିଛି । ଓଡ଼ିଶାର ପାଇକ ବିଦ୍ରୋହ, ପଞ୍ଜାବର କୁକା ବିଦ୍ରୋହ, ଶିଖ୍ ବିଦ୍ରୋହ ଆଦି ଅନେକ ଆଞ୍ଚଳିକ ବିଦ୍ରୋହକୁ ଅନ୍ତର୍ଭୁକ୍ତ କରାଯାଇ ଚଳିତ ବର୍ଷ ଅକ୍ଟୋବର ମାସରେ ଏହା ପ୍ରକାଶ କରାଯିବ ।

ଏନ୍‌.ସି.ଇ.ଆର୍‌.ଟିର ନିଜ ‘ଏକ୍ସ’ ପୋଷ୍ଟରେ ଆଜି ମଧ୍ୟ ଏଥିନେଇ ସ୍ପଷ୍ଟୀକରଣ ଦିଆଯାଇଛି । ଦ୍ୱିତୀୟ ଖଣ୍ଡରେ ଭାରତବର୍ଷର ପ୍ରମୁଖ ଆଞ୍ଚଳିକ ବିଦ୍ରୋହ ବିଶେଷତଃ ଓଡ଼ିଶାର ପାଇକ ବିଦ୍ରୋହ ବିସ୍ତୃତ ଭାବେ ସ୍ଥାନ ପାଇବ । ଏହା ଫଳରେ ଅଷ୍ଟମ ଶ୍ରେଣୀର ଛାତ୍ରଛାତ୍ରୀ ଆମ ଦେଶର ଗୌରବମୟ ଇତିହାସ ସହ ଆଞ୍ଚଳିକ ବିବିଧତାର ବୈଶିଷ୍ଟ୍ୟ ବିଷୟରେ ଅବଗତ ହୋଇପାରିବେ । ତେଣୁ ପାଇକ ବିଦ୍ରୋହ ବାଦ୍ ପଡ଼ିଛି ବୋଲି ଉଠୁଥିବା ଚର୍ଚ୍ଚାକୁ ଆଦୌ ସତ୍ୟ କି ତଥ୍ୟ ଆଧାରିତ ଭାବେ ଗ୍ରହଣ ନ କରିବାକୁ ପରିଷଦ ପକ୍ଷରୁ ସ୍ପଷ୍ଟୀକରଣ କରାଯାଇଛି ।

NCERT ପାଠ୍ୟପୁସ୍ତକକୁ ନେଇ ନବୀନଙ୍କ ଟ୍ବିଟ:

ପୂର୍ବତନ ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ 'X'ରେ କହିଛନ୍ତି, "ଜାତୀୟ ଶିକ୍ଷା ଗବେଷଣା ଏବଂ ତାଲିମ ପରିଷଦ (ncert) ଏହାର ପାଠ୍ୟପୁସ୍ତକରୁ ଓଡ଼ିଶାର ପାଇକା ବିଦ୍ରୋହବିଦ୍ରୋହକୁ ବାଦ ଦେଇଛି ଜାଣି ମୁଁ ଗଭୀର ଚିନ୍ତିତ । ପାଇକ ବିଦ୍ରୋହ ଓଡ଼ିଶାର ଇତିହାସରେ ଏକ ଐତିହାସିକ ମୁହୂର୍ତ୍ତ ଥିଲା, କାରଣ ଆମର ସାହସୀ ପାଇକମାନେ ୧୮୧୭ ମସିହାରେ ଅତ୍ୟାଚାରୀ ବ୍ରିଟିଶ ବିରୁଦ୍ଧରେ ଅସାଧାରଣ ସାହସର ସହିତ ଲଢ଼ିଥିଲେ । ମୁଁ ଭାରତ ସରକାରଙ୍କୁ ଏହାକୁ ପ୍ରଥମ ସ୍ୱାଧୀନତା ଯୁଦ୍ଧ ଭାବରେ ଘୋଷଣା କରିବାକୁ ଅନେକ ଥର ଅନୁରୋଧ କରିଥିଲି । ପାଇକମାନେ ଅତୁଳନୀୟ ସାହସର ସହିତ ବିଦେଶୀ, ଉପନିବେଶବାଦୀ ଶାସନର ଅତ୍ୟାଚାର ବିରୁଦ୍ଧରେ ଲଢ଼ିବା ପାଇଁ ଏକାଠି ହୋଇଥିଲେ ।

ସିପାହୀ ବିଦ୍ରୋହର ୪୦ ବର୍ଷ ପୂର୍ବରୁ NCERT ପାଠ୍ୟପୁସ୍ତକରୁ ଏହି ପାଇକ ବିଦ୍ରୋହ ବିଦ୍ରୋହକୁ ବାଦ ଦିଆଯିବା, ବିଦ୍ରୋହର ୨୦୦ ବର୍ଷ ପରେ ଆମର ସାହସୀ ପାଇକାମାନଙ୍କ ପ୍ରତି ଏକ ବଡ଼ ଅପମାନ । ଯାହା ବ୍ରିଟିଶ ଶାସନ ବିରୁଦ୍ଧରେ ଜନ ଆନ୍ଦୋଳନର ମଶାଲବାହକ ହୋଇଥିଲା । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ପାଇକ ବିଦ୍ରୋହ ଏବଂ ଓଡ଼ିଶାକୁ ନ୍ୟାୟ ପ୍ରଦାନ କରିବା ନିଶ୍ଚିତ କରିବାକୁ ଅନୁରୋଧ କରୁଛି ।"

'ମିଥ୍ୟା ତଥ୍ୟ ଦେଇ ଶସ୍ତା ରାଜନୀତି କରିବା ଦୁର୍ଭାଗ୍ୟଜନକ':

ସେପେଟେ ନବୀନଙ୍କ ଟ୍ବିଟକୁ ନେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ପ୍ରତିକ୍ରିୟା ରଖି କହିଛନ୍ତି, "ବିରୋଧୀ ଦଳ ନେତା ଆପଣ ଜାଣିରଖିବା ଉଚିତ ଯେ, ଏନ୍‌ସିଇଆରଟି ପାଠ୍ୟପୁସ୍ତକରୁ 'ପାଇକ ବିଦ୍ରୋହ' ପ୍ରସଙ୍ଗ ବାଦ୍‌ ଦିଆଯାଇନାହିଁ । ସାମାଜିକ ବିଜ୍ଞାନର ଦ୍ୱିତୀୟ ଭଲ୍ୟୁମ୍‌ରେ ଏହି ବିଷୟ ସ୍ଥାନ ପାଇଥିବା ନେଇ ଏନ୍‌ସିଇଆରଟି ପକ୍ଷରୁ ସ୍ପଷ୍ଟୀକରଣ ଦିଆସରିଛି, ଯାହାକି ଚଳିତ ବର୍ଷ ସେପ୍ଟେମ୍ବର-ଅକ୍ଟୋବରରେ ରିଲିଜ୍‌ ହେବାର ଅଛି । ପାଇକ ବିଦ୍ରୋହ ବାବଦରେ ତଥ୍ୟ ଏଥିରେ ସ୍ଥାନ ପାଇବା ନେଇ ସୂଚନା ଦିଆଯିବା ପରେ ମଧ୍ୟ ସାମାଜିକ ଗଣମାଧ୍ୟମରେ ମିଥ୍ୟା ତଥ୍ୟ ରଖିବା ହାସ୍ୟାସ୍ପଦ ମନେହେଉଛି । ପାଇକ ବିଦ୍ରୋହକୁ ଜାତୀୟ ପ୍ରସଙ୍ଗ କରିବା ସହ, କେନ୍ଦ୍ର ସରକାର ଓଡ଼ିଶା ଇତିହାସର ଏହି ସ୍ମରଣୀୟ ଅଧ୍ୟାୟ ବାବଦରେ ସମସ୍ତ ସ୍ତରରେ ପ୍ରଚାର କରିଆସିଛନ୍ତି । କିନ୍ତୁ ଶାସନରେ ଥିବା ସମୟରେ ଏ ଦିଗରେ କିଛି ପ୍ରୟାସ କରିନଥିବାବେଳେ, ଏବେ ଏଭଳି ପ୍ରସଙ୍ଗରେ ମିଥ୍ୟା ତଥ୍ୟ ଦେଇ ଶସ୍ତା ରାଜନୀତି କରିବା ଦୁର୍ଭାଗ୍ୟଜନକ ମନେହେଉଛି ।"

'ଓଡ଼ିଶାବାସୀଙ୍କୁ ଭ୍ରମିତ କରିବା ପାଇଁ ପ୍ରଚେଷ୍ଟା ଅତ୍ୟନ୍ତ ହାସ୍ୟାସ୍ପଦ':

ନବୀନଙ୍କ ଟ୍ବିଟକୁ ନେଇ ରାଜ୍ୟ ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ପ୍ରତିକ୍ରିୟା ରଖି କହିଥିଲେ, "ପାଠ୍ୟପୁସ୍ତକରୁ 'ପାଇକ ବିଦ୍ରୋହ'କୁ ବାଦ ଦିଆଯାଇନାହିଁ । ଏହା ସାମାଜିକ ବିଜ୍ଞାନ ପୁସ୍ତକର ଦ୍ୱିତୀୟ ଭାଗରେ ଶୀଘ୍ର ପ୍ରକାଶ ପାଇବ ବୋଲି ଗତକାଲି NCERT ସ୍ପଷ୍ଟୀକରଣ ଦିଆଯାଇଛି । ମାତ୍ର ନିଜର ରାଜନୈତିକ ଆଶା ପୂରଣ ପାଇଁ ଏଭଳି ମିଥ୍ୟା ଟ୍ବିଟ ଜରିଆରେ ଓଡ଼ିଶାବାସୀଙ୍କୁ ଭ୍ରମିତ କରିବା ପାଇଁ ଆପଣଙ୍କ ଏ ପ୍ରଚେଷ୍ଟା ଅତ୍ୟନ୍ତ ହାସ୍ୟାସ୍ପଦ ।"

'ଏହା କି ପ୍ରକାର ବାହାନା':

ସେପଟେ ଏନେଇ ପୁଣି ଶାସକ ଦଳକୁ ଟାର୍ଗେଟ କରିଛନ୍ତି ବିଜେଡି ରାଜ୍ୟସଭା ସାଂସଦ ସସ୍ମିତ ପାତ୍ର । ସେ କହିଛନ୍ତି, "ଏହା କି ପ୍ରକାର ବାହାନା । ପ୍ରଥମେ, ସେମାନେ ଏହାକୁ ବାଦ ଦେଇଛନ୍ତି । ଏବେ, ସେମାନେ ଦାବି କରୁଛନ୍ତି ଯେ, ଏହାକୁ ଭାଗ 2ରେ "ଆଞ୍ଚଳିକ ବିଦ୍ରୋହ" ଅଧୀନରେ ରଖାଯିବ । ଏହା ଏକ ସ୍ପଷ୍ଟୀକରଣ ନୁହେଁ; ଏହା ଏକ ଆତ୍ମପ୍ରକଟିତ ବିରୋଧାଭାସ । 1817ର ପାଇକା ବିଦ୍ରୋହ ଏକ ଆଞ୍ଚଳିକ ଫୁଟନୋଟ ନୁହେଁ; ଏହା ବ୍ରିଟିଶ ଶାସନ ବିରୁଦ୍ଧରେ ଭାରତର ପ୍ରଥମ ସଂଗଠିତ ବିଦ୍ରୋହ । ଏହାକୁ "ଆଞ୍ଚଳିକ" ଭାବରେ ଲେବଲ୍ କରିବା ଆମ ଦେଶର ସ୍ୱାଧୀନତା ସଂଗ୍ରାମ ପ୍ରତି ଏକ ଘୋର ଅନ୍ୟାୟ ।

'ପାଇକା ବିଦ୍ରୋହ ଉପେକ୍ଷିତ ହେବା ଉଟିତ ନୁହେଁ':

NCERT ପାଠ୍ୟପୁସ୍ତକର ପ୍ରଥମ ଖଣ୍ଡରେ ଏହାକୁ କାହିଁକି ଅନ୍ତର୍ଭୁକ୍ତ କରାଯାଇ ନାହିଁ ? ଏବଂ ଦ୍ୱିତୀୟ ଖଣ୍ଡରେ ଏହାକୁ ସଠିକ୍ ଭାବରେ ପ୍ରଦର୍ଶିତ କରାଯିବ ବୋଲି କ’ଣ ନିଶ୍ଚିତତା ଅଛି ? ପାଇକା ବିଦ୍ରୋହକୁ କାହିଁକି କ୍ରମାଗତ ଭାବରେ ଅବମାନନା କରାଯାଉଛି ଏବଂ ଭାରତୀୟ ଇତିହାସରେ ଏହାର ଯଥାର୍ଥ ସ୍ଥାନକୁ ପ୍ରତ୍ୟାଖ୍ୟାନ କରାଯାଉଛି ? ନବୀନ ପଟ୍ଟନାୟକଙ୍କ ପାଇକା ବିଦ୍ରୋହକୁ ଭାରତର ପ୍ରଥମ ସ୍ୱାଧୀନତା ଯୁଦ୍ଧ ଭାବରେ ମାନ୍ୟତା ଦେବା ପାଇଁ ବାରମ୍ବାର ଦାବି ସମ୍ପୂର୍ଣ୍ଣ ବୈଧ । ଏହି ଐତିହାସିକ ବିଦ୍ରୋହ 1857 ବିଦ୍ରୋହର ପୂର୍ବବର୍ତ୍ତୀ ଏବଂ ଉପନିବେଶବାଦୀ ଆଧିପତ୍ୟ ବିରୁଦ୍ଧରେ ପ୍ରତିରୋଧର ଏକ ସାହସିକ ଦାବି ଭାବରେ ଠିଆ ହୋଇଛି । ଏହା କେବଳ ଉପେକ୍ଷିତ ହେବା ଉଟିତ ନୁହେଁ, ବରଂ ଜାତୀୟ ସ୍ୱୀକୃତି ପାଇବା ଉଚିତ ।

ଜନସାଧାରଣଙ୍କ ବ୍ୟାପକ ଆକ୍ରୋଶ ପରେ, NCERT ବର୍ତ୍ତମାନ ପରବର୍ତ୍ତୀ ସଂସ୍କରଣରେ ଏହାକୁ ସାମିଲ କରିବାକୁ ଘୋଷଣା କରିବାକୁ ବାଧ୍ୟ ହୋଇଛି । କିନ୍ତୁ ଏଠାରେ ପ୍ରକୃତ ଚିନ୍ତାଧାରା ରହିଛି; ଯେତେବେଳେ ଏପରି ଜାତୀୟ ଗୁରୁତ୍ୱର ଏକ ଆନ୍ଦୋଳନକୁ କେବଳ ଏକ ଆଞ୍ଚଳିକ ଘଟଣାରେ ପରିଣତ କରାଯାଏ, ସେତେବେଳେ ଓଡ଼ିଶାର ବିଜେପି ମନ୍ତ୍ରୀ, ସାଂସଦ, ବିଧାୟକ ଏବଂ ନେତାମାନଙ୍କର ବିବେକ କ’ଣ ଆନ୍ଦୋଳିତ ହୁଏ ନାହିଁ ? ଇତିହାସର ସତ୍ୟକୁ ବିକୃତ କରାଯାଇ ନୀରବତା କାହିଁକି ? ଇତିହାସ ବାସ୍ତବତାକୁ ପ୍ରତିଫଳିତ କରିବା ଉଚିତ; ରାଜନୈତିକ ସୁବିଧା ଦ୍ୱାରା ହ୍ରାସ କରାଯିବା ଉଚିତ୍ ନୁହେଁ ।

ଇଟିଭି ଭାରତ, ଭୁବନେଶ୍ବର