MLA Ranendra Pratap Swain writes letter to party supremo Naveen Patnaik ଭୁବନେଶ୍ୱର: ୱାକଫ ବିଲରେ ଦଳର ଆଭିମୁଖ୍ୟକୁ ନେଇ ବିଜେଡିରେ ଲାଗି ରହିଛି ବିବାଦ । ଦଳ ବହୁ ଗୋଷ୍ଠୀରେ ବିଭକ୍ତ ହେବା ବିଜେଡି ସଭାପତି ନବୀନ ପଟ୍ଟନାୟକଙ୍କ ଲାଗି ଚ୍ୟାଲେଞ୍ଜ ସୃଷ୍ଟି କରିଛି । ଏହାରି ଭିତରେ ସଭାପତିଙ୍କୁ ଚିଠି ଲେଖିଛନ୍ତି ଦଳର ବରିଷ୍ଠ ନେତା ତଥା ବିଧାୟକ ରଣେନ୍ଦ୍ର ପ୍ରତାପ ସ୍ୱାଇଁ । ଦଳୀୟ ସଂଗଠନରେ ସଂରକ୍ଷଣ ଓ ଦଳ ଧର୍ମନିରପେକ୍ଷତା ନୀତି ବଜାୟ ରଖିବାକୁ ପ୍ରସ୍ତାବ ଦେଇଛନ୍ତି ରଣେନ୍ଦ୍ର ।
ନବୀନ ପଟ୍ଟନାୟକଙ୍କୁ ରାଜାଙ୍କ ଚିଠିକୁ ନେଇ ରାଜନୀତି ସରଗରମ-
ଦେଶରେ ସାମ୍ପ୍ରତିକ ସ୍ଥିତି, ଜାତିଗତ ଭୋଟ ଗଣିତ ଓ ଏହାକୁ ଦୃଷ୍ଟିରେ ରଖି ବିଜେଡି ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ଚିଠି । ଚିଠି ଲେଖିଛନ୍ତି ଦଳର ବରିଷ୍ଠ ନେତା ରଣେନ୍ଦ୍ର ପ୍ରତାପ ସ୍ୱାଇଁ । ଏପ୍ରିଲ 9 ତାରିଖରେ ରଣେନ୍ଦ୍ର ଏହି ଚିଠି ଦଳର ସଭାପତିଙ୍କ ସମେତ ଦଳୀୟ ଦାଇତ୍ୱରେ ଥିବା ବିଭିନ୍ନ ନେତାଙ୍କୁ ଏହି ଚିଠି ଦିଆଯାଇଛି । ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ, ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ, ବିରୋଧୀ ଦଳ ଉପ ମୁଖ୍ୟ ସଚେତକ ପ୍ରତାପ କେଶରୀ ଦେବ ଓ ବିରୋଧୀ ଦଳ ନେତାଙ୍କ ବ୍ୟକ୍ତିଗତ ସଚିବ ଆଦିତ୍ୟ ମହାପତ୍ରଙ୍କୁ ଇମେଲ ଯୋଗେ ରଣେନ୍ଦ୍ର ଚିଠି ପ୍ରେରଣ କରିଛନ୍ତି ।
ନବୀନଙ୍କୁ ରଣେନ୍ଦ୍ରଙ୍କ ଚିଠି-
- ନବୀନଙ୍କୁ ଚିଠି ଲେଖିଲେ ବରିଷ୍ଠ ବିଧାୟକ ରଣେନ୍ଦ୍ର ପ୍ରତାପ ସ୍ବାଇଁ
- ସାଂଗଠନିକ ନିର୍ବାଚନ ଭିତରେ ଚିଠି ଲେଖି ଦଳ ସଭାପତିଙ୍କୁ ଦେଲେ ପରାମର୍ଶ
- କିଛି ଲୋକଙ୍କୁ ଦଳର ସଂଗଠନକୁ ହାଇଜ୍ୟାକ୍ କରିବାକୁ ଦିଆନଯାଉ
- କିଏ ବିଜେଡିକୁ ହାଇଜାକ କରୁଛି ତାକୁ ନେଇ ହଟଚମଟ ସୃଷ୍ଟି
- ସାଂଗଠନିକ ନିର୍ବାଚନ ପ୍ରକ୍ରିୟାବେଳେ ରାଜାଙ୍କ ଚିଠି ଚର୍ଚ୍ଚାର ବିଷୟ ପାଲଟିଛି
- ସଂଗଠନରେ ସଂରକ୍ଷଣ ନେଇ ନବୀନଙ୍କୁ ମଧ୍ୟ ପ୍ରସ୍ତାବ ଦେଇଛନ୍ତି ରାଜା
ସାଂଗଠନିକ ନିର୍ବାଚନ ଭିତରେ ଚିଠି ଲେଖି ଦଳ ସଭାପତିଙ୍କୁ ଦେଲେ ପରାମର୍ଶ -
ସାଂଗଠନିକ ନିର୍ବାଚନ ଚାଲିଥିବା ବେଳେ ରଣେନ୍ଦ୍ରଙ୍କ ଏହି ଚିଠି ଦଳୀୟ ମହଲରେ ବେଶ ଆଲୋଚନାର ବିଷୟ ହୋଇଛି । 3 ପୃଷ୍ଠା ବିଶିଷ୍ଟ ଏହି ଚିଠିରେ ଦେଶରେ ସାମ୍ପ୍ରତିକ ସ୍ଥିତି ଏବଂ ସମିକରଣ, ସଂରକ୍ଷଣ ଚିତ୍ର, ଏହାକୁ ନେଇ ରାଜନୈତିକ ଚକାପଞ୍ଝା ନେଇ ବିସ୍ତୃତ ସୂଚନା ଦେଇଛନ୍ତି ରଣେନ୍ଦ୍ର । ଚିଠିରେ ରଣେନ୍ଦ୍ର ଦଳର ସଭାପତିଙ୍କୁ 5ଟି ପ୍ରସ୍ତାବ ମଧ୍ୟ ଦେଇଛନ୍ତି । ସଂଗଠନରେ ସଂରକ୍ଷଣ କରିବାକୁ ରଣେନ୍ଦ୍ର ପ୍ରସ୍ତାବ ଦେଇଛନ୍ତି । ରଣେନ୍ଦ୍ର ଚିଠିରେ ଦର୍ଶାଇଛନ୍ତି, ବିଜେଡି ସାମାଜିକ ନ୍ୟାୟ, ଧର୍ମନିରପେକ୍ଷତା ଓ ଆଞ୍ଚଳିକ ସନ୍ତୁଳନକୁ ନେଇ ଆଗକୁ ବଢ଼ିବା ଉଚିତ । ଏସସି, ଏସଟି, ଓବିସି, ସଂଖ୍ୟାଲଘୁ ଓ ମହିଳାଙ୍କୁ ସେମାନଙ୍କ ସଂଖ୍ୟା ଅନୁପାତରେ ବିଜେଡିର ରାଜ୍ୟ, ଜିଲ୍ଲା ଓ ବ୍ଳକ କମିଟିରେ ସ୍ଥାନ ଦିଆଯାଉ ।
ସଂଗଠନକୁ ହାଇଜ୍ୟାକ କରିବାକୁ ଦିଆନଯାଉ-
ନିର୍ଦ୍ଦିଷ୍ଟ କିଛି ଲୋକଙ୍କୁ ଦଳର ସଂଗଠନକୁ ହାଇଜ୍ୟାକ କରିବାକୁ ଦିଆନଯାଉ । ସବୁ ବର୍ଗ ଓ ସମ୍ପ୍ରଦାୟଙ୍କୁ ଗୁରୁତ୍ୱ ଦେଇ ସଂଗଠନରେ ସାମିଲ କରାଯାଉ । ଭାଗ ବାଣ୍ଟି ସଂଗଠନରେ ସାମିଲ କରାଯାଉ । ଫଳରେ ଦଳର ତୃଣମୂଳ ସ୍ତରକୁ ସକରାତ୍ମକ ବାର୍ତ୍ତା ଯିବ । ଗୁରୁତ୍ୱପୂର୍ଣ୍ଣ ୱାକଫ ବିଲରେ ଦଳର ଆଭିମୁଖ୍ୟକୁ ନେଇ ସୃଷ୍ଟି ହୋଇଥିବା ବିବାଦକୁ ନେଇ ଚୁପ ଥିବା ରଣେନ୍ଦ୍ର ଚିଠିରେ ଏ ନେଇ ଉଲ୍ଲେଖ କରିଛନ୍ତି । ବିଜେଡ଼ି ସଭାପତିଙ୍କୁ ଏନେଇ ସେ ସତର୍କ କରାଇ ଦେଇଛନ୍ତି । ୱାକଫ ବିଲରେ ଆଭିମୁଖ୍ୟ ଦଳର ଧର୍ମନିରପେକ୍ଷତାରେ ପ୍ରଶ୍ନ ଚିହ୍ନ ଲଗାଇ ଦେଇଛି । ତେଣୁ ଧର୍ମନିରପେକ୍ଷ ଓ ସାମାଜିକ ନ୍ୟାୟ ଆଦର୍ଶକୁ ଉଜ୍ଜୀବିତ ରଖିବାକୁ ଉଚିତ ପଦକ୍ଷେପ ନିଆଯାଉ ବୋଲି ସେ ପ୍ରସ୍ତାବ ଦେଇଛନ୍ତି ।
ସଂଗଠନରେ ସଂରକ୍ଷଣ ନେଇ ନବୀନଙ୍କୁ ମଧ୍ୟ ପ୍ରସ୍ତାବ ଦେଇଛନ୍ତି ରାଜା-
ରାଜ୍ୟ ଜନସଂଖ୍ୟାର 94 ପ୍ରତିଶତ ଏସିସି, ଏସଟି ଓ ଓବିସି ବର୍ଗ ଅଛନ୍ତି । ଏମାନେ ଅବହେଳିତ ଅବସ୍ଥାରେ ଅଛନ୍ତି । ଜନସଂଖ୍ୟାର 54 ପ୍ରତିଶତ ଓବିସି ବର୍ଗ ଶିକ୍ଷା ବ୍ୟବସ୍ଥାରେ ଶୂନ୍ୟ ସଂରକ୍ଷଣ ପାଉଛନ୍ତି । ଏହା ଆମ ସାମାଜିକ ନ୍ୟାୟ ବ୍ୟବସ୍ଥାକୁ କ୍ଷୁର୍ଣ୍ଣ କରୁଛି । ବିଜୁ ପଟ୍ଟନାୟକ ସାମାଜିକ ନ୍ୟାୟର ପୁରୋଧା ଥିଲେ । ଆମେ ଯେମିତି ଏହାକୁ ଭୁଲି ନଯାନ୍ତି । ଦେଶର ଶିଳ୍ପ ପାଇଁ 50 ପ୍ରତିଶତରୁ ଅଧିକ ଖଣିଜ ଓଡ଼ିଶାରୁ ସଂଗ୍ରହ ହେଉଛି । ଓଡିଶାର ଲୋକେ ପ୍ରଦୂଷଣ, ବିସ୍ଥାପନ ଭୋଗୁଛନ୍ତି । ସେହିପରି କେନ୍ଦ୍ର ଅବହେଳା ରାଜ୍ୟର ସହଚର ହୋଇଛି । ଏସବୁ ଦିଗରେ ପଦକ୍ଷେପ ନେଇ ଯୋଜନା ପ୍ରସ୍ତୁତ କରିବାକୁ ରଣେନ୍ଦ୍ର ପ୍ରସ୍ତାବ ଦେଇଛନ୍ତି ।
ଇଟିଭି ଭାରତ, ଭୁବନେଶ୍ୱର
